Author: ممتاز حیدر

سکیورٹی خدشات اور طالبان کی شدت پسندانہ پالیسیوں کے باعث جرمنی نے افغان پناہ گزین پروگرام فوری طور پر ختم کرنے کا اعلان کردیا۔

افغان طالبان کی شدت پسندانہ پالیسیوں اور دہشتگرد نیٹورکس کی سرپرستی کے باعث عالمی برادری نے افغانستان کے ساتھ سفارتی تعلقات محدود کرنا شروع کر دیے ہیں، جس کے تحت جرمنی نے افغان مہاجرین کے خلاف سخت فیصلہ کرتے ہوئے افغان پناہ گزین پروگرام فوری طور پر ختم کرنے کا اعلان کر دیا ہے۔جرمن نشریاتی ادارے ڈی ڈبلیو نیوز کے مطابق جرمنی نے افغان پناہ گزینوں کے حوالے سے کیے گئے تمام وعدے اور عہدنامے واپس لے لیے ہیں اور 640 افغان شہریوں کو ملک میں داخلے کی اجازت دینے سے انکار کر دیا گیا ہے۔

جرمن چانسلر فریڈرک مرز کے مطابق افغان مہاجرین کے جرائم میں ملوث ہونے اور سنگین سکیورٹی خدشات کے پیشِ نظر ہجرت کے پروگراموں کے خاتمے کے لیے سخت اقدامات کیے جا رہے ہیں، جبکہ وزارتِ داخلہ نے واضح کر دیا ہے کہ جرمنی آنے کے منتظر افغان مہاجرین کے داخلے کے امکانات ختم ہو چکے ہیں اور اس معاملے میں کوئی سیاسی دلچسپی باقی نہیں رہی۔ڈی ڈبلیو نیوز کے مطابق متاثرہ افغان پناہ گزینوں میں جرمن فوج اور وزارتوں کے سابق مقامی عملہ، صحافی اور انسانی حقوق کے کارکن شامل ہیں، جنہیں ای میل کے ذریعے مطلع کر دیا گیا ہے کہ ان کے جرمنی میں داخلے کی کوئی بنیاد موجود نہیں۔

بھارت کو جدید ٹیکنالوجی اور سلیکون سپلائی چین سے متعلق عالمی ڈیجیٹل اتحاد ’پیکس سیلیکا‘ سے نکالے جانے کے دعویٰ پر بھارتی سیاست میں ہلچل مچ گئی ہے۔

بھارتی اپوزیشن جماعتوں نے اس مبینہ پیش رفت کو مودی حکومت کی خارجہ اور ٹیکنالوجی پالیسیوں کی سنگین ناکامی قرار دیتے ہوئے پارلیمنٹ اور عوامی سطح پر سوالات اٹھا دیے ہیں،بھارتی اپوزیشن رہنما اور کانگریس کے سینئر لیڈر جے رام رمیش نے اس معاملے پر سخت ردعمل دیتے ہوئے کہا کہ عالمی سطح پر بھارت کی ساکھ کو شدید دھچکا پہنچا ہے۔ ان کے مطابق مودی حکومت کی پالیسیوں کے باعث بھارت کو ایک اہم اور اسٹریٹجک ٹیکنالوجی اتحاد سے باہر ہونا پڑا، جو ملک کے لیے باعثِ تشویش ہے،جے رام رمیش نے دعویٰ کیا کہ مئی میں پاکستان کے ہاتھوں بھارت کی عبرتناک شکست کے بعد عالمی برادری میں بھارت کی پوزیشن کمزور ہوئی، جس کے اثرات اب سامنے آ رہے ہیں۔ ان کا کہنا تھا کہ 10 مئی کے بعد امریکا کی جانب سے بھارت کو پیکس سیلیکا اتحاد سے نکالے جانے کا فیصلہ حیران کن نہیں، کیونکہ عالمی طاقتیں اب بھارت کو ایک قابلِ اعتماد شراکت دار کے طور پر نہیں دیکھ رہیں۔

اپوزیشن رہنما کے مطابق یہ صورتحال مودی حکومت کی خارجہ پالیسی، دفاعی حکمتِ عملی اور ٹیکنالوجی سفارت کاری پر ایک بڑا سوالیہ نشان ہے۔ انہوں نے مطالبہ کیا کہ حکومت قوم کو اعتماد میں لے اور واضح کرے کہ بھارت کو اس مبینہ اتحاد سے کیوں نکالا گیا اور اس کے معاشی و تکنیکی اثرات کیا ہوں گے۔

واضح رہے کہ پیکس سیلیکا اتحاد کا مقصد قابلِ اعتماد اتحادی ممالک کے ساتھ مل کر محفوظ، مستحکم اور جدید سلیکون سپلائی چین قائم کرنا بتایا جاتا ہے، تاکہ سیمی کنڈکٹرز اور جدید ٹیکنالوجی کے شعبے میں اسٹریٹجک خودمختاری کو فروغ دیا جا سکے۔ ماہرین کے مطابق اگر کسی ملک کو ایسے اتحاد سے باہر کیا جاتا ہے تو اس کے اثرات ٹیکنالوجی، معیشت اور قومی سلامتی تک پھیل سکتے ہیں۔

انگلینڈ کے سابق کپتان مائیکل وان نے آسٹریلیا کے شہر سڈنی کے ساحل پر فائرنگ کے وقت ایک ریسٹورنٹ میں بند ہوجانے کا انکشاف کیا ہے۔

مائیکل وان فائرنگ کے وقت ساحل کے قریبی ریسٹورنٹ میں فیملی کے ساتھ موجود تھے۔اس حوالے سے مائیکل وان کا کہنا ہے کہ ریسٹورنٹ میں بند ہونا بہت خوفناک تھا، ہم محفوظ گھر پہنچے، ایمرجنسی فورسز اور دہشت گردوں کے ساتھ لڑنے والے کا شکریہ ادا کرتا ہوں،یسٹورنٹ کا باؤنسر ہاتھ میں گن پکڑے میرے پاس آیا اور مجھے اندر جانے کو کہا، ہم حملے سے چند سو قدموں کے فاصلے پر تھے، سائرنز کی اونچی آواز سنیں، سائرن کی آواز اکثر شارک کے حملے یا 2 نوجوانوں کی لڑائی کی وجہ سے سننے میں آتی ہے، ہمیں جلد پتہ چل گیا کہ یہ فائرنگ کا واقعہ ہے، بہت خوفناک منظر تھا، ہم 6 لوگ تھے، میں میری اہلیہ، اس کی بہن، میری دو بیٹیاں اور ان کی سہیلی تھی، میں خود کو جتنا پُرسکون رکھ سکتا تھا اتنی میں نے کوشش کی۔

واضح رہے کہ گزشتہ روز سڈنی میں بونڈی بیچ پر یہودیوں کی ایک تقریب میں فائرنگ سے ہلاکتوں کی تعداد 15 ہوگئی ہے جبکہ 2 پولیس اہلکاروں اور حملہ آور سمیت 40 زخمی اسپتال میں زیر علاج ہیں۔

پاکستان انٹرنیشنل ایئرلائنز (پی آئی اے) نے سوشل میڈیا پر گردش کرنے والی اس خبر کو سختی سے مسترد کر دیا ہے جس میں دعویٰ کیا گیا تھا کہ پی آئی اے کی ایک پرواز کا پورا فلائٹ کریو بیرونِ ملک لاپتہ ہو گیا ہے۔ قومی ایئرلائن نے اس دعوے کو “فیک نیوز” قرار دیتے ہوئے کہا ہے کہ یہ من گھڑت خبر پی آئی اے اور پاکستان کی ساکھ کو نقصان پہنچانے کے لیے پھیلائی گئی۔

پی آئی اے کی جانب سے جاری بیان کے مطابق سوشل میڈیا پر یہ دعویٰ سامنے آیا کہ کینیڈا کے شہر ٹورنٹو میں قیام کے دوران ایک پرواز کا مکمل کریو غائب ہو گیا۔ تاہم ایئرلائن نے واضح کیا کہ ایسا کوئی واقعہ پیش نہیں آیا۔پی آئی اے نے سوشل میڈیا پلیٹ فارم ایکس (سابق ٹوئٹر) پر اپنے بیان میں کہا “ایک ٹوئٹ، جو بعض پاکستان مخالف حلقوں کی جانب سے پھیلائی گئی ہے، اس میں یہ دعویٰ کیا گیا کہ پی آئی اے کی ایک مخصوص پرواز کا پورا کریو لاپتہ ہو گیا ہے۔ یہ دعویٰ سراسر بے بنیاد ہے اور اس کا مقصد پی آئی اے اور پاکستان کو بدنام کرنا ہے۔”ایسا کوئی واقعہ پیش نہیں آیا اور یہ خبر مکمل طور پر جعلی ہے۔ مقامی میڈیا رپورٹس کے مطابق یہ گمراہ کن معلومات ایک ایسے سوشل میڈیا اکاؤنٹ سے پھیلائی گئیں جسے “افغان اور پاکستان مخالف” قرار دیا جا رہا ہے۔ انگریزی روزنامہ ڈان نے پی آئی اے کے ترجمان کے حوالے سے بتایا کہ یہ ٹوئٹ ایک منظم اور سوچے سمجھے منصوبے کا حصہ ہے، جس کا مقصد پاکستان اور قومی ایئرلائن کی ساکھ کو نقصان پہنچانا ہے۔

یہ بات قابلِ ذکر ہے کہ ماضی میں ایسے واقعات رپورٹ ہوتے رہے ہیں جن میں بعض انفرادی کریو ممبران نے بیرونِ ملک قیام کے دوران وطن واپس نہ آنے کا فیصلہ کیا۔ تجزیہ کاروں کے مطابق انفرادی سطح پر ایسے فیصلوں کی وجوہات میں ملکی معاشی حالات اور کینیڈا کی امیگریشن پالیسیوں کے تحت پناہ کے مواقع شامل رہے ہیں۔تاہم پی آئی اے نے اس رجحان کی روک تھام کے لیے متعدد اقدامات کیے ہیں، جن میں بیرونِ ملک اسٹیشن مینیجرز کے پاس کریو کے پاسپورٹس رکھوانا اور کینیڈا روٹس پر نسبتاً سینئر اور عمر رسیدہ کریو کی تعیناتی شامل ہے۔

سڈنی: بونڈی بیچ میں ہونے والے ہولناک دہشت گرد حملے کے بعد مغربی سڈنی کے ایک قبرستان میں نفرت انگیز اور اشتعال دلانے والا واقعہ پیش آیا ہے، جہاں نامعلوم افراد نے مسلم قبروں پر سور کے سر پھینک دیے۔

یہ واقعہ کیمڈن کے علاقے ناریلن قبرستان میں پیش آیا، جسے مقامی مسلم رہنماؤں نے شدید الفاظ میں مذمت کی ہے۔معروف مسلم انڈرٹیکر احمد ہریچی نے اس واقعے کو “بے مقصد، نفرت سے بھرپور اور انسانیت سوز” قرار دیتے ہوئے کہا کہ ایسے اقدامات کسی مسئلے کا حل نہیں بلکہ مسائل کو مزید گہرا کرتے ہیں۔ان کا کہنا تھا جس نے بھی یہ حرکت کی ہے، اس نے نفرت کے سوا کچھ ثابت نہیں کیا۔ یہ محض حماقت ہے۔ اس سے غصہ، درد اور تقسیم ہی بڑھے گی۔ ہمیں بزدلانہ حرکتوں سے مزید اشتعال نہیں چاہیے۔ جن لوگوں کی قبریں ہیں، وہ حالیہ واقعات سے بہت پہلے وفات پا چکے تھے اور ان کا موجودہ حالات سے کوئی تعلق نہیں۔قبریں سکون، وقار اور احترام کی جگہ ہوتی ہیں تمام مذاہب اور پوری انسانیت کے لیے۔ اگر آپ امن چاہتے ہیں تو یہ طریقہ نہیں، اگر انصاف چاہتے ہیں تو بھی یہ راستہ نہیں۔ یہ عمل محض انسانیت کی کمی کو ظاہر کرتا ہے۔

یہ واقعہ ایسے وقت میں پیش آیا ہے جب سڈنی کے مسلم رہنماؤں نے واضح اعلان کیا ہے کہ وہ بونڈی بیچ حملے میں ملوث مبینہ ملزمان، نوید اکرم (24) اور ان کے والد ساجد اکرم (50)، کی میتیں وصول کرنے یا ان کی آخری رسومات ادا کرنے سے انکار کریں گے۔پولیس کے مطابق دونوں افراد نے ایک پیدل پل پر کھڑے ہو کر فوجی نوعیت کے ہتھیاروں سے مقامی افراد، سیاحوں اور خاندانوں پر فائرنگ کی۔ اس حملے میں اب تک 16 افراد جاں بحق ہو چکے ہیں، جن میں حملہ آور ساجد اکرم بھی شامل ہیں، جبکہ چار بچوں سمیت 42 افراد زخمی ہو کر اسپتال منتقل کیے گئے۔پولیس نے تصدیق کی ہے کہ 14 افراد موقع پر ہی جاں بحق ہوئے، جبکہ دو افراد رات گئے اسپتال میں دم توڑ گئے۔ جاں بحق افراد کی عمریں 10 سے 87 سال کے درمیان بتائی جا رہی ہیں۔ نوید اکرم پولیس کی گولی لگنے کے بعد اسپتال میں زیر علاج ہیں اور پولیس کی سخت نگرانی میں ہیں۔

سڈنی کے ممتاز اسلامی رہنما ڈاکٹر جمال ریفی نے کہا کہ مسلم برادری ان حملہ آوروں کو اسلام کے دائرے میں شامل نہیں سمجھتی۔ان کا کہنا تھا،انہوں نے جو کیا، اس کی کوئی بھی حمایت نہیں کرتا۔ بے گناہ شہریوں کا قتل ہماری تعلیمات کے خلاف ہے۔ ہماری کتاب میں واضح ہے کہ ایک بے گناہ انسان کا قتل پوری انسانیت کے قتل کے مترادف ہے،ڈاکٹر ریفی نے 2014 کے لنڈٹ کیفے محاصرے کا حوالہ دیتے ہوئے کہا کہ اس وقت بھی مسلم برادری نے یہی مؤقف اختیار کیا تھا۔جب حملہ آور کی موت ہوئی تو ہم سے اس کی میت وصول کرنے کے بارے میں پوچھا گیا۔ ہم نے انکار کیا، آخری رسومات ادا نہیں کیں اور اسے روک وُڈ قبرستان کے کسی مسلم حصے میں دفنانے سے بھی انکار کیا۔ انہی اصولوں پر ہم اس معاملے میں بھی عمل کریں گے۔

نوید اکرم کے سابق اسلامی استاد، شیخ آدم اسماعیل جو المرد انسٹی ٹیوٹ کے سربراہ ہیں نے بھی حملے کی شدید مذمت کی۔انہوں نے بتایا میرا ان سے آخری رابطہ 2022 کے اوائل میں ہوا تھا۔ ہمارے ادارے میں صرف قرآن پڑھایا جاتا ہے، اس کے علاوہ کچھ نہیں۔ بانڈی میں متاثرین کی تصاویر دیکھ کر میں شدید غمزدہ ہوں۔ انہیں اور ان کے خاندان کو جان سے مارنے کی دھمکیاں مل رہی ہیں، جس کے باعث انہیں گھر خالی کرنا پڑا اور پولیس کی مدد لینا پڑی، جس پر انہوں نے پولیس کا شکریہ ادا کیا۔

سڈنی: آسٹریلیا کی ریاست نیو ساؤتھ ویلز میں امن و امان کی صورتحال ایک بار پھر شدید بحث کا موضوع بن گئی ہے۔ حالیہ دنوں میں سڈنی، خصوصاً بانڈی کے علاقے میں ہونے والے پرتشدد واقعات اور نفرت انگیز حملوں کے بعد پولیس کی کارکردگی اور حکومتی اقدامات پر سخت سوالات اٹھائے جا رہے ہیں۔

سڈنی کی انڈرورلڈ سرگرمیوں میں اضافہ دیکھا جا رہا ہے، جبکہ بعض حلقوں کا دعویٰ ہے کہ اسلحے کی غیر قانونی ترسیل اور جرائم پیشہ نیٹ ورکس میں مخصوص گینگز سرگرم ہیں۔ گزشتہ ہفتے نیو ساؤتھ ویلز پولیس نے کارروائی کرتے ہوئے “افغانی کریو” کے نام سے جانے جانے والے ایک گروہ کو توڑنے کا اعلان کیا تھا، جسے پولیس جرائم پیشہ سرگرمیوں میں ملوث قرار دے رہی ہے۔رپورٹس کے مطابق گزشتہ ایک سال کے دوران سڈنی کے بانڈی علاقے میں یہودی برادری کو نشانہ بناتے ہوئے کم از کم 8 مختلف حملے کیے گئے۔ ان واقعات میں نفرت انگیز کارروائیاں اور آتش زنی شامل ہیں، جنہوں نے اقلیتی برادری میں شدید خوف و ہراس پیدا کر دیا ہے۔

بانڈی میں واقع ایک کوشر ریسٹورنٹ کو آگ لگا دی گئی،یہودیوں کی ملکیت ایک چائلڈ کیئر سینٹر کو نذرِ آتش کیا گیا،دو یہودی عبادت گاہوں (سیناگاگز) پر آتش زنی کی گئی،ایک یہودی اجتماع کے دوران متعدد گاڑیوں کو آگ لگا دی گئی،بعض رپورٹس میں ان واقعات کو سڈنی کی انڈرورلڈ سے جڑی شخصیات سے منسوب کیا جا رہا ہے، تاہم پولیس کی جانب سے ان دعوؤں کی باضابطہ تصدیق نہیں کی گئی۔

مزید برآں، بانڈی بیچ پر منعقد ہونے والے ایک بڑے یہودی تہوار کے موقع پر پولیس کی نمایاں موجودگی نہ ہونے پر بھی سوالات اٹھائے جا رہے ہیں۔ ناقدین کا کہنا ہے کہ ایسے حساس مواقع پر سیکیورٹی کے سخت انتظامات نہ ہونا سنگین غفلت کے مترادف ہے۔ان واقعات پر بین الاقوامی سطح پر بھی ردِعمل سامنے آیا ہے۔ سابق امریکی صدر ڈونلڈ ٹرمپ اور اسرائیلی وزیراعظم بنیامین نیتن یاہو نے صورتحال پر تشویش کا اظہار کرتے ہوئے آسٹریلوی وزیراعظم کو تنقید کا نشانہ بنایا ہے۔ ان رہنماؤں کا مؤقف ہے کہ آسٹریلیا میں بڑھتے ہوئے نفرت انگیز جرائم اور اقلیتی برادریوں کے خلاف تشدد کو روکنے کے لیے حکومت کو مزید مؤثر اقدامات کرنے کی ضرورت ہے۔

تازہ ترین واقعہ کیمبل پریڈ، بونڈی بیچ پر پیش آیا، جو سڈنی کا ایک انتہائی مہنگا اور حساس علاقہ تصور کیا جاتا ہے۔ یہ علاقہ ارب پتی افراد اور مشہور شخصیات کی رہائش گاہ کے طور پر جانا جاتا ہے، جہاں معروف بزنس ٹائیکون کیری پیکر اور ان کے بیٹے جیمز پیکر سمیت کئی بااثر شخصیات کی جائیدادیں موجود ہیں۔ ایسے علاقے میں پرتشدد واقعے نے سیکیورٹی انتظامات پر مزید سوالیہ نشان لگا دیے ہیں۔