Author: ممتاز حیدر

سابق ڈی جی آئی ایس آئی فیض حمید کو 14 سال قید بامشقت کی سزا سنا دی گئی۔

ڈی جی آئی ایس پی آر کے مطابق فیلڈ جنرل کورٹ مارشل نے فیض حمید کو 14 سال قیدِ بامشقت کی سزا سنائی گئی،سابق لیفٹیننٹ جنرل فیض حمیدکے خلاف پاکستان آرمی ایکٹ کے تحت فیلڈجنرل کورٹ مارشل کا عمل شروع کیا گیا اور فیلڈ جنرل کورٹ مارشل کا یہ عمل 15 ماہ تک جاری رہا ، ملزم کے خلاف 4 الزامات پر کارروائی کی گئی، الزامات میں سیاسی سرگرمیوں میں ملوث ہونا،آفیشل سیکرٹ ایکٹ کی خلاف ورزی، اختیارات اور سرکاری وسائل کا غلط استعمال اور متعلقہ افراد کو ناجائز نقصان پہنچانا شامل ہیں،طویل اور محنت طلب قانونی کارروائی کے بعد ملزم تمام الزامات میں قصور وار قرار پایا گیا ہے، عدالت کی جانب سے دی گئی سزا کا اطلاق 11 دسمبر 2025 سے شروع ہوگا۔

ڈی جی آئی ایس پی آر کے مطابق فیلڈ جنرل کورٹ مارشل نے تمام قانونی تقاضے پورے کیے اور ملزم کو دفاع کےلیے وکیلوں کی ٹیم منتخب کرنے سمیت تمام قانونی حقوق فراہم کیےگئے،ملزم کے سیاسی عناصرکے ساتھ ملی بھگت، سیاسی افراتفری اور عدم استحکام کے معاملات الگ سے دیکھے جارہے ہیں۔

افغانستان سے پاکستان میں جاری دراندازی روکنے کے سلسلے میں مثبت پیشرفت سامنے آگئی، کابل میں علما اور مذہبی رہنماؤں کے اہم اجلاس میں عسکریت پسندی کے لیے سرحد عبور نہ کرنے پر زور دیا گیا ہے۔

ذرائع نے طلوع نیوز کو تصدیق کی ہے کہ کابل میں ہونے والے اس اہم اجلاس میں علما اور مشائخ کا کہنا تھا کہ اپنے حقوق، اقدار اور شرعی نظام کا دفاع ہر فرد پر فرض ہے۔اجلاس میں اسلامی امارت سے مطالبہ کیا گیا کہ امارتِ اسلامی افغانستان کے رہبر کے حکم کی روشنی میں کسی کو بھی بیرونِ ملک عسکری سرگرمیوں کے لیے جانے کی اجازت نہ دی جائے۔اجلاس میں اس فیصلے پر بھی زور دیا گیا کہ افغانستان کی سرزمین کسی دوسرے ملک کے خلاف استعمال نہ ہو اور اگر کوئی اس فیصلے کی خلاف ورزی کرے تو اسلامی امارت کو اس کے خلاف کارروائی کا مکمل اختیار حاصل ہے،

افغان عمائدین اور علما کے بیان سےپاکستان کےدیرینہ مطالبےکی توثیق ہوگئی ہے،پاکستان کی جانب سے بارہا افغان طالبان سے اپنی سرزمین کسی دوسرے ملک کے خلاف استعمال نہ کرنے کا مطالبہ کیا گیا تاہم افغان طالبان جارحیت پر قائم ہیں اور سرحد پار سے پاکستان میں دراندازی کی کوششوں میں مصروف ہیں۔

خیبر پختونخوا و بلوچستان میں دہشتگردوں کیخلاف سیکورٹی فورسز کی کاروائیاں جاری ہیں

دو بیست و پنجہ کے علاقے میں سرکاری سپلائی گاڑی پر دیسی ساختہ بم حملے کی کوشش ناکام بنا دی گئی۔ دھماکے سے گاڑی کو نقصان پہنچا لیکن کوئی جانی نقصان نہیں ہوا۔ سکیورٹی فورسز نے علاقے کا محاصرہ کر کے سرچ آپریشن شروع کر دیا۔ ایک کالعدم تنظیم نے ذمہ داری کا دعویٰ کیا مگر حکام نے اسے پروپیگنڈا قرار دیا ہے۔

کلاتھک میں ایک مواصلاتی ٹاور دھماکے کا نشانہ بنا، جس سے ٹاور کو نقصان پہنچا۔ کوئی جانی نقصان نہیں ہوا۔ سکیورٹی فورسز نے علاقے میں سرچ آپریشن شروع کر دیا ہے۔بلوچستان کانسٹیبلری کا اہلکار غریب نواز فائرنگ کے ایک واقعے میں شہید ہو گیا۔ نامعلوم حملہ آور فرار ہو گئے۔ پولیس نے علاقے میں سرچ آپریشن شروع کر دیا ہے۔سکیورٹی فورسز نے گریشہ میں انسداد دہشت گردی کے تحت سرچ اور کلیئرنس آپریشن کیا۔ متعدد مشتبہ افراد کو مجموعی کارروائی کے دوران حراست میں لیا گیا۔جھاو اور کوہرو سمیت قریبی علاقوں میں انٹیلیجنس بیسڈ آپریشن جاری ہیں۔ شہریوں کو غیر ضروری نقل و حرکت سے گریز کی ہدایت کی گئی ہے۔

قبائلی اضلاع میں شدت پسندوں کے خلاف عوامی مزاحمت میں اضافہ ہو گیا ہے۔ تراہ کے عوام نے کھل کر اعلان کیا ہے کہ وہ مزید تشدد برداشت نہیں کریں گے۔ اس سے قبل لکی مروت میں گرینڈ جرگہ نے اجتماعی مزاحمت کا اعلان کیا تھا۔

مہمند،الینگار میں سکیورٹی فورسز نے ایک آئی بی او کے دوران آٹھ سے زائد دہشت گردوں کو ہلاک کر دیا، جن میں ایک اہم کمانڈر بھی شامل ہے۔ چار سے زائد دہشت گرد زخمی ہوئے۔ٹانک،ہورس پولیس اسٹیشن لقمان شہید پر کواد کاپٹر کے ذریعے حملے کی کوشش ناکام بنا دی گئی۔ گرینیڈ اسٹیشن کے اندر گرایا گیا لیکن وہ پھٹ نہ سکا۔ بم ڈسپوزل اسکواڈ کو طلب کر لیا گیا ہے۔

میر علی، شمالی وزیرستان،عیسوری میں پرانے بارودی مواد کے پھٹنے سے دس بچے زخمی ہو گئے۔ بچے ایک غیر پھٹا بم کھیلتے ہوئے چھیڑ بیٹھے تھے۔کالایا، اورکزئی زیریں،ڈی پی او کی زیر صدارت ایک جرگے میں فیروز خیل کے علاقوں میں شدت پسندوں کی ممکنہ موجودگی پر غور کیا گیا۔ پسکی میں چیک پوسٹ کے قیام کی فوری منظوری دے دی گئی۔تورغر پوسٹ پر دہشت گردوں کا حملہ سکیورٹی فورسز نے ناکام بنا دیا۔ جوابی کارروائی میں چھ حملہ آور مارے گئے جبکہ دیگر فرار ہو گئے۔باجوڑ (سلارزئی)،گزشتہ روز اغوا کیے گئے دو نوجوانوں کی لاشیں جنگل سے مل گئیں۔ پولیس نے واقعے کو دہشت گردی قرار دے کر تحقیقات شروع کر دی ہیں۔ ڈی ایچ کیو اسپتال بٹگرام کے مرکزی دروازے پر ڈیوٹی پر موجود کانسٹیبل نیاز علی شملائی کو نامعلوم موٹر سائیکل سواروں نے فائرنگ کر کے قتل کر دیا۔ سکیورٹی فورسز نے علاقے کو گھیرے میں لے لیا ہے۔