Author: ممتاز حیدر

تحریک انصاف کے چیئرمین عمران خان اور ان کی اہلیہ بشریٰ بی بی کے مختلف مقدمات کی سماعت مقرر کروانے کے لیے بیرسٹر گوہر چیف جسٹس اسلام آباد ہائیکورٹ کے چیمبر پہنچے، تاہم چیف جسٹس اسلام آباد ہائیکورٹ جسٹس سرفراز ڈوگر سے ملاقات نہ ہو سکی۔

میڈیا سے گفتگو کرتے ہوئے بیرسٹر گوہر نے بتایا کہ وہ عدالتی معاملات کے حل اور کیسز کی بروقت سماعت کے لیے چیف جسٹس کے چیمبر گئے تھے، مگر ملاقات ممکن نہیں ہو سکی۔ ان کا کہنا تھا کہ ڈویژن بینچ میں پیشی کے بعد ایک مرتبہ پھر چیف جسٹس کے چیمبر جانے کا ارادہ ہے اور کوشش کی جائے گی کہ کیسز کی سماعت کے لیے تاریخ حاصل کی جا سکے۔بیرسٹر گوہر نے کہا کہ ہم چیف جسٹس پاکستان سے بھی درخواست کرتے ہیں کہ ہمارے ساتھ ایسا رویہ اختیار نہ کیا جائے، کیونکہ ہم بارہا عدالت سے رجوع کر چکے ہیں۔ ان کے مطابق پی ٹی آئی کی قانونی ٹیم اب تک تقریباً 15 مرتبہ اسلام آباد ہائیکورٹ آ چکی ہے، مگر اس کے باوجود کیسز کی سماعت مقرر نہیں ہو پا رہی۔

انہوں نے خاص طور پر بشریٰ بی بی کے کیس کا ذکر کرتے ہوئے کہا کہ ایک خاتون کی اپیل قانون کے مطابق جلد سنی جانی چاہیے، مگر بدقسمتی سے اس معاملے میں بھی تاخیر کی جا رہی ہے۔ بیرسٹر گوہر کا کہنا تھا کہ انصاف کی فراہمی میں تاخیر نہ صرف متاثرہ فریق کے لیے مشکلات کا باعث بنتی ہے بلکہ عدالتی نظام پر سوالات بھی اٹھاتی ہے۔بیرسٹر گوہر نے امید ظاہر کی کہ عدالت عظمیٰ اور اسلام آباد ہائیکورٹ اس معاملے کا نوٹس لیں گی اور عمران خان و بشریٰ بی بی کے کیسز کی جلد سماعت یقینی بنائی جائے گی تاکہ قانونی تقاضے پورے ہو سکیں اور انصاف ہوتا ہوا نظر آئے۔

سابق وفاقی وزیر داخلہ اور عوامی مسلم لیگ کے سربراہ شیخ رشید احمد نے کہا ہے کہ ملک میں “تاریخ پہ تاریخ” پڑ رہی ہے اور آج ایک بار پھر تاریخ ڈال دی گئی ہے، جبکہ پاکستان کو جرمانستان میں تبدیل کر دیا گیا ہے۔

ان خیالات کا اظہار انہوں نے راولپنڈی میں انسداد دہشت گردی عدالت (اے ٹی سی) کے باہر میڈیا سے گفتگو کرتے ہوئے کیا۔شیخ رشید احمد نے ملک کی بگڑتی ہوئی معاشی صورتحال پر گہری تشویش کا اظہار کرتے ہوئے کہا کہ وہ اللہ تعالیٰ سے دعا کرتے ہیں کہ پاکستان میں مہنگائی اور بے روزگاری کا خاتمہ ہو۔ ان کا کہنا تھا کہ آٹا اور چینی کی قیمتیں 150 روپے فی کلو تک جا پہنچی ہیں، جبکہ مرنا بھی مہنگا ہو چکا ہے اور قبر و کفن کی قیمت 70 ہزار روپے تک پہنچ گئی ہے، جو غریب آدمی کی پہنچ سے باہر ہے۔

انہوں نے حکومت کی جانب سے مختلف شعبوں پر عائد کیے گئے جرمانوں پر تنقید کرتے ہوئے کہا کہ بائیکیہ چلانے والے پر 2 ہزار روپے، ریڑھی بان پر 5 ہزار روپے جبکہ دکاندار پر 20 ہزار روپے تک جرمانہ عائد کیا جا رہا ہے۔ شیخ رشید کے مطابق یہ فیصلے عام آدمی پر مزید بوجھ ڈالنے کے مترادف ہیں، جو پہلے ہی مہنگائی اور بے روزگاری کی چکی میں پس رہا ہے۔سابق وزیر داخلہ نے حکومت سے مطالبہ کیا کہ حالات کو بہتر بنایا جائے تاکہ غریب طبقہ بھی عزت اور آسانی کے ساتھ اپنی زندگی گزار سکے۔ ان کا کہنا تھا کہ اگر موجودہ صورتحال برقرار رہی تو عوام کے لیے جینا مزید مشکل ہو جائے گا۔

دوسری جانب انسداد دہشت گردی عدالت راولپنڈی میں 9 مئی جی ایچ کیو حملہ کیس کی سماعت ہوئی، جس میں شیخ رشید احمد اپنے وکلاء کے ہمراہ عدالت میں پیش ہوئے۔ عدالتی عملے کی جانب سے ان کی حاضری کا عمل مکمل کیا گیا، جس کے بعد عدالت نے انہیں جانے کی اجازت دے دی۔

سینیٹ نے ملک میں تعلیمی نصاب کو عصری تقاضوں سے ہم آہنگ کرنے کے لیے ایک اہم قانون سازی کرتے ہوئے تولیدی صحت کو نصابِ تعلیم کا حصہ بنانے کا بل کثرتِ رائے سے منظور کر لیا ہے

اس بل کے تحت 14 سال یا اس سے زائد عمر کے بچوں کو مرحلہ وار اور عمر کے مطابق تولیدی صحت سے متعلق تعلیم فراہم کی جائے گی۔بل کے مطابق تولیدی صحت کی تعلیم کا مقصد صرف حیاتیاتی معلومات تک محدود نہیں ہوگا بلکہ اس میں جسمانی، ذہنی اور سماجی بہبود سے متعلق جامع آگاہی شامل کی جائے گی۔ اس نصاب کے ذریعے طلبہ کو صحت مند طرزِ زندگی، ذاتی صفائی، ذہنی توازن، سماجی ذمہ داریوں اور باہمی احترام جیسے اہم موضوعات سے آگاہ کیا جائے گا تاکہ وہ عملی زندگی میں بہتر فیصلے کر سکیں۔

قانون سازی میں والدین کے کردار کو بھی مرکزی اہمیت دی گئی ہے۔ بل میں واضح کیا گیا ہے کہ تولیدی صحت سے متعلق کسی بھی قسم کی تعلیم یا رہنمائی دینے سے قبل والدین یا سرپرست کی تحریری رضا مندی لازمی ہوگی۔ اس شق کا مقصد والدین کے تحفظات کو دور کرنا اور تعلیمی عمل میں ان کی شمولیت کو یقینی بنانا ہے۔بل کے متن کے مطابق نصابی کتب کی تیاری کے دوران متعلقہ اتھارٹیز اس بات کو یقینی بنائیں گی کہ مواد طلبہ کی عمر، ذہنی سطح اور سماجی اقدار کے مطابق ہو۔ نصاب کو اس انداز میں ترتیب دیا جائے گا کہ حساس موضوعات کو محتاط، سادہ اور تعلیمی اصولوں کے تحت پیش کیا جائے، تاکہ طلبہ پر کسی قسم کا منفی اثر نہ پڑے۔

ایوان میں بل پر بحث کے دوران حامی ارکان کا کہنا تھا کہ تولیدی صحت سے متعلق درست اور بروقت آگاہی نوجوانوں کو صحت کے مسائل، ذہنی دباؤ اور سماجی غلط فہمیوں سے بچانے میں مدد دے سکتی ہے۔ ان کے مطابق تعلیم کے ذریعے شعور اجاگر کرنا معاشرے کی مجموعی صحت اور ترقی کے لیے ناگزیر ہے۔دوسری جانب بعض ارکان نے اس بات پر زور دیا کہ نصاب کی تیاری اور نفاذ کے دوران معاشرتی اقدار، ثقافتی حساسیت اور مذہبی پہلوؤں کو بھی مدنظر رکھا جائے تاکہ کسی طبقے کے تحفظات جنم نہ لیں۔