Author: ممتاز حیدر

قلات ضلع میں ایک ہی روز کے دوران دو افراد کی لاشیں مختلف علاقوں سے برآمد ہوئیں، جنہیں سروں پر گولیاں مار کر قتل کیا گیا تھا۔ پولیس کے مطابق پہلی لاش زیارت کے علاقے سے ملی جسے ڈسٹرکٹ ہیڈکوارٹر اسپتال منتقل کیا گیا۔ بعد ازاں متوفی کی شناخت امتیاز ولد عالم خان شیخ مینگل کے نام سے ہوئی جو لنگاری کا رہائشی تھا۔ قانونی کارروائی مکمل کرنے کے بعد لاش ورثا کے حوالے کر دی گئی۔دوسری لاش سنگداَس کے علاقے سے ملی جس کی شناخت تاحال نہیں ہوسکی۔ پولیس کا کہنا ہے کہ دونوں افراد کو سر میں گولیاں مارنے کی وجہ سے ابتدائی طور پر شناخت مشکل تھی۔ واقعے کی تحقیقات جاری ہیں۔

ضلع خضدار کی تحصیل وڈھ میں عبدالباری شیخ کی گمشدگی کے خلاف مقامی افراد نے قومی شاہراہ پر احتجاجی دھرنا دے دیا، جس کے باعث کوئٹہ–کراچی ہائی وے مکمل طور پر بند ہوگئی۔ صبح سویرے شروع ہونے والے احتجاج میں لوگوں نے مطالبہ کیا کہ لاپتا نوجوان کی فوری بازیابی یقینی بنائی جائے۔احتجاج سے قبل مقامی انتظامیہ اور عمائدین کے درمیان مذاکرات ہوئے تھے اور یہ اعلان کیا گیا تھا کہ شاہراہ بند نہیں کی جائے گی، تاہم اہلِ خانہ کا کہنا ہے کہ انتظامیہ کی جانب سے کوئی پیش رفت نہ ہونے پر انہیں احتجاج پر مجبور ہونا پڑا۔ شاہراہ کی بندش سے گاڑیوں کی لمبی قطاریں لگ گئیں جبکہ کئی بسیں متبادل راستوں کی تلاش میں ناکام رہیں۔انتظامیہ اور مظاہرین کے درمیان رابطے جاری ہیں تاکہ ٹریفک بحال کی جاسکے۔

تربت کی تحصیل نصیرآباد میں نامعلوم نقاب پوش مسلح افراد کی فائرنگ سے جلال ولد محمد موقع پر ہی جاں بحق ہوگیا۔ پولیس کے مطابق جلال اپنی گاڑی کو سروس اسٹیشن پر دھلوا رہا تھا جب موٹر سائیکل پر سوار حملہ آوروں نے اسے نشانہ بنایا۔مقامی ذرائع کا کہنا ہے کہ جلال زمیاد گاڑی کا ڈرائیور تھا جبکہ اس کے دو بھائی پہلے ہی پراسرار طور پر لاپتا ہوچکے ہیں، جن میں سے ایک تاحال گمشدہ ہے۔ پولیس نے واقعے کی تحقیقات شروع کردی ہیں جبکہ قتل کی وجہ معلوم نہیں ہوسکی۔

پاکستانی سیکیورٹی فورسز اور قانون نافذ کرنے والے اداروں نے بنوں میں خفیہ اطلاع پر کارروائی کرتے ہوئے آٹھ دہشت گردوں کو ہلاک کر دیا۔ آئی ایس پی آر کے مطابق کارروائی پکی اطلاع کی بنیاد پر کی گئی جہاں دہشت گردوں کا ایک ٹھکانا موجود تھا۔فورسز کی مؤثر کارروائی کے دوران شدید فائرنگ کا تبادلہ ہوا جس میں تمام دہشت گرد مارے گئے۔ موقع سے بڑی مقدار میں اسلحہ، گولہ بارود اور بارودی مواد بھی برآمد ہوا۔ آئی ایس پی آر کے مطابق ہلاک دہشت گرد سیکیورٹی فورسز، قانون نافذ کرنے والے اداروں اور شہریوں پر حملوں میں ملوث تھے۔اس کارروائی سے قبل بھی بنوں میں پولیس، سی ٹی ڈی اور فورسز نے متعدد کامیاب آپریشنز میں 17 دہشت گردوں کو ہلاک کیا تھا جن میں تین اہم کمانڈر شامل تھے۔ علاقے میں کلیئرنس آپریشن جاری ہے۔

بنّوں پولیس نے بی سی خیل کے علاقے میں دعوہ پل کو تباہ کرنے کی کوشش ناکام بنا دی۔ پولیس کے مطابق پل کے مرکزی ستون پر 8 سے 10 کلو وزنی گھریلو ساختہ بم نصب کیا گیا تھا۔بم ڈسپوزل اسکواڈ نے موقع پر پہنچ کر آلہ محفوظ طریقے سے ناکارہ بنا دیا جس سے بڑا سانحہ ٹل گیا۔ پولیس حکام نے کہا کہ فوری اور مؤثر کارروائی نے پل کو شدید نقصان اور جانی نقصان سے بچا لیا۔ مقامی افراد نے پولیس کی بروقت کارروائی پر اطمینان اور تشکر کا اظہار کیا۔

ضلع مہمند میں کارپا روڈ کی تعمیر کے دوران استعمال ہونے والی بھاری مشینری کو رات کی تاریکی میں نامعلوم شدت پسندوں نے آگ لگا دی۔ انتظامیہ کے مطابق حملے میں مشینری بری طرح جل گئی اور تعمیراتی کام معطل کرنا پڑا۔حکام کا کہنا ہے کہ شدت پسند ترقیاتی منصوبوں کو نقصان پہنچا کر علاقے کو پسماندہ رکھنے کی کوشش کر رہے ہیں۔ واقعے کے بعد قانون نافذ کرنے والے ادارے موقع پر پہنچے، علاقے کا محاصرہ کیا اور تحقیقات شروع کر دی گئی ہیں۔ جلنے والی مشینری کی مرمت اور بحالی کے اقدامات کیے جا رہے ہیں۔

وفاقی وزیر اور رہنما مسلم لیگ ن قیصر احمد شیخ نے ارادوں کی نجکاری کے عمل میں اتحادی جماعت پاکستان پیپلز پارٹی کو رکاوٹ قرار دیدیا۔

وفاقی وزیر برائے سرمایہ کاری قیصر احمد شیخ نے تقریب سے خطاب میں کہا کہ پیپلز پارٹی سے نجکاری کے معاملے پر مذاکرات ہوتے رہتے ہیں، اس کو ناراض کرنے سے ہماری حکومت نہیں رہ پائے گی، پیپلز پارٹی ملک میں سرکاری اداروں کی نجکاری کے خلاف ہے، اس کی وجہ سے نجکاری کا عمل آگے نہیں بڑھ پا رہا ہے، پیپلز پارٹی کا نجکاری کے خلاف منشور ہے، یہ کوئی نئی بات نہیں لیکن مسلم لیگ ن کی ہمیشہ سے پرائیویٹائزشن کی پالیسی رہی ہے۔

تحریکِ تحفظِ آئینِ پاکستان کے رہنما، سابق گورنر سندھ محمد زبیر کا کہنا ہے کہ 48 گھنٹوں سے زائد وقت گزر گیا کسی حکومتی نمائندے نے آئی ایم ایف رپورٹ کی تردید نہیں کی۔

اسلام آباد میں تحریکِ تحفظِ آئینِ پاکستان کے رہنماؤں کے ہمراہ پریس کانفرنس کرتے ہوئے انہوں نے سوال کیا کہ حکومت نے 3 ماہ تک آئی ایم ایف کی رپورٹ کیوں دبائے رکھی؟محمد زبیرنے کہا کہ آئی ایم ایف کی شرط تھی کہ رپورٹ جاری ہوگی تو اگلی قسط ملے گی، ہم اس رپورٹ میں بے ضابطگییوں پر تحقیقات کا مطالبہ کرتے ہیں۔ حکومتی نمائندے اس رپورٹ پر اپنا مؤقف سامنے رکھیں،عمران خان پر بنایا گیا مقدمہ جعلی اور بے بنیاد ہے۔ بانیٔ پر گھڑی کا بے بنیاد کیس بنایا ہوا ہے، پاکستان کے عوام مہنگائی کی چکی میں پس گئے ہیں۔شہباز شریف ہر وقت کہتا تھا کہ ایک کیس بتا دیں کرپشن کا جب سے میں آیا ہوں۔ شہباز آپ کی حکومت میں چینی اور گندم کا اسکنڈل ہوا ہے۔ آئی ایم ایف کی رپورٹ میں آیا ہے 5300 ارب کی کرپشن ہوئی ہے۔27وی غیر آئینی ترمیم مزید معیشت کو تباہ کریگی۔ جب شفافیت نہیں ہوتی تو ملک میں انویسٹر نہیں آتا۔ جب آپ خود ججز لگائیں گے اور کوئی جھگڑا ہوگیا انویسٹر کا گورنمنٹ آرگنائزیشن سے تو انویسٹر کہاں جائےگا،