Author: ممتاز حیدر

انڈونیشیا کے دارالحکومت جکارتہ میں ایک افسوسناک واقعہ پیش آیا جہاں ایک اسکول کی مسجد میں نمازِ جمعہ کے دوران ہونے والے دھماکے کے نتیجے میں 54 افراد زخمی ہوگئے۔ واقعے کے فوراً بعد علاقے میں شدید خوف و ہراس پھیل گیا اور ریسکیو ٹیمیں موقع پر پہنچ گئیں۔

غیر ملکی خبر رساں ادارے کے مطابق، دھماکہ اس وقت ہوا جب نمازی جمعہ کی نماز ادا کر رہے تھے۔ دھماکے کی آواز دور دور تک سنی گئی، جبکہ مسجد کے شیشے ٹوٹ گئے اور عمارت کے کچھ حصے کو بھی نقصان پہنچا۔ عینی شاہدین کے مطابق، دھماکے کے فوراً بعد مسجد میں چیخ و پکار مچ گئی اور لوگ زخمیوں کی مدد کے لیے دوڑ پڑے،پولیس اور امدادی اداروں نے تمام زخمیوں کو نزدیکی اسپتالوں میں منتقل کر دیا ہے جہاں ان کا علاج جاری ہے۔ اسپتال ذرائع کے مطابق بعض زخمیوں کی حالت تشویشناک بتائی جا رہی ہے،پولیس حکام نے بتایا کہ دھماکے کی نوعیت اور محرکات کا ابھی تعین نہیں کیا جا سکا، تاہم بم ڈسپوزل اسکواڈ اور فرانزک ٹیمیں جائے وقوعہ پر پہنچ کر شواہد اکٹھے کر رہی ہیں۔ ابتدائی طور پر یہ شبہ ظاہر کیا جا رہا ہے کہ دھماکہ گیس سلنڈر یا برقی خرابی کے باعث ہوا ہو سکتا ہے، لیکن دہشت گردی کے امکان کو بھی مسترد نہیں کیا جا رہا۔

جکارتہ کے گورنر نے واقعے پر افسوس کا اظہار کرتے ہوئے کہا کہ حکومت زخمیوں کے علاج اور متاثرہ خاندانوں کی مدد کے لیے تمام وسائل بروئے کار لائے گی۔ انہوں نے اس عزم کا بھی اظہار کیا کہ ذمہ داروں کو قانون کے مطابق سخت سزا دی جائے گی۔مقامی میڈیا رپورٹس کے مطابق، پولیس نے مسجد کے اطراف کے علاقے کو گھیرے میں لے لیا ہے اور تمام داخلے کے راستے بند کر دیے گئے ہیں تاکہ شواہد ضائع نہ ہوں۔ شہریوں سے اپیل کی گئی ہے کہ وہ افواہوں پر کان نہ دھریں اور صرف سرکاری اطلاعات پر اعتماد کریں۔

نئی دہلی: جمعہ کی صبح دہلی کے اندرا گاندھی انٹرنیشنل ایئرپورٹ (آئی جی آئی اے) پر شدید بدنظمی دیکھنے میں آئی جب ایئر ٹریفک کنٹرول (اے ٹی سی) سسٹم میں اچانک تکنیکی خرابی کے باعث 100 سے زائد پروازیں تاخیر کا شکار ہوگئیں۔

ایئرپورٹ حکام کے مطابق خرابی کو دور کرنے کی کوششیں جاری ہیں اور مسافروں سے پیش آنے والی مشکلات پر افسوس کا اظہار کیا گیا ہے۔ایئرپورٹ انتظامیہ کی جانب سے جاری بیان میں کہا گیا “ایئر ٹریفک کنٹرول (اے ٹی سی) سسٹم میں تکنیکی مسئلے کے باعث دہلی ایئرپورٹ پر فلائٹ آپریشنز میں تاخیر ہو رہی ہے۔ ہماری ٹیم ڈی آئی اے ایل سمیت تمام متعلقہ اداروں کے ساتھ مل کر اس مسئلے کو جلد از جلد حل کرنے کی کوشش کر رہی ہے۔”حکام نے مسافروں کو مشورہ دیا ہے کہ وہ اپنی پروازوں کے تازہ ترین شیڈول کے لیے اپنی ایئرلائنز سے رابطے میں رہیں۔

ائیرپورٹس اتھارٹی آف انڈیا (AAI) نے وضاحت کی کہ یہ تاخیر خودکار میسج سوئچنگ سسٹم میں تکنیکی خرابی کے باعث پیدا ہوئی ہے۔ یہ نظام ایئر ٹریفک کنٹرول کے لیے اہم ڈیٹا فراہم کرتا ہے۔بیان کے مطابق،“اے ٹی سی کنٹرولرز اب فلائٹ پلانز کو دستی طور پر پراسیس کر رہے ہیں، جس کے نتیجے میں تاخیر ہو رہی ہے۔ تکنیکی ٹیمیں نظام کو بحال کرنے میں مصروف ہیں۔”کئی ایئر لائنز نے اپنے مسافروں سے کہا ہے کہ وہ ایئرپورٹ جانے سے پہلے اپنی پرواز کی حیثیت چیک کر لیں۔ ایئر انڈیا نے صبح کے وقت جاری اپنے بیان میں کہا کہ تاخیر اور انتظار کے بڑھنے سے مسافروں کو مشکلات کا سامنا ہے، تاہم ان کی کیبن کریو اور زمینی عملہ فوری مدد فراہم کر رہے ہیں۔

ایئر انڈیا نے کہا “دہلی میں اے ٹی سی سسٹم کی تکنیکی خرابی کے باعث تمام ایئر لائنز کی پروازیں متاثر ہوئی ہیں، جس کے نتیجے میں ایئرپورٹ اور طیاروں کے اندر انتظار کا وقت بڑھ گیا ہے۔ یہ صورتحال ہمارے کنٹرول سے باہر ہے، تاہم ہم مسافروں کے صبر کے شکر گزار ہیں۔”

ذرائع کے مطابق، گزشتہ شب بھی اے ٹی سی سسٹم کے سرور میں خرابی کے باعث کم از کم 20 پروازیں تاخیر کا شکار ہوئیں، تاہم اس خرابی کو بعد میں دور کر لیا گیا تھا۔اندرا گاندھی انٹرنیشنل ایئرپورٹ ملک کا مصروف ترین ہوائی اڈہ ہے جہاں روزانہ تقریباً 1,550 پروازیں آتی جاتی ہیں۔ گزشتہ ہفتے ایئرپورٹ کو متعدد جی پی ایس (GPS Spoofing) واقعات کا سامنا رہا، جس نے جہازوں کے نیوی گیشن سسٹم میں خلل ڈال دیا اور کئی پروازوں کو متبادل راستوں پر موڑنا پڑا۔جی پی ایس اسپوفنگ میں جعلی سیٹلائٹ سگنلز کے ذریعے نیوی گیشن سسٹم کو دھوکہ دیا جاتا ہے، جس سے طیارے غلط مقام یا بلندی کی نشاندہی کرتے ہیں۔ یہ جمنگ سے مختلف عمل ہے، کیونکہ اسپوفنگ میں سگنلز کو مکمل طور پر بند کرنے کے بجائے غلط ڈیٹا فراہم کیا جاتا ہے، جو نظام کو جھوٹے راستے دکھاتا ہے۔

حالیہ برسوں میں ایسے واقعات صرف جنگی علاقوں تک محدود نہیں رہے بلکہ بین الاقوامی فضائی سفر کے لیے بھی خطرہ بنتے جا رہے ہیں۔ پچھلے ماہ ویانا سے دہلی آنے والی ایک پرواز کو اسی طرح کے اسپوفڈ سگنلز کے باعث دبئی کی طرف موڑنا پڑا تھا۔

بھارتی سپریم کورٹ نے احمد آباد میں جون میں ہونے والے ایئر انڈیا بوئنگ 787 ڈریم لائنر کے ہولناک طیارہ حادثے میں ہلاک ہونے والے پائلٹ اِن کمانڈ کی ذمہ داری مسترد کرتے ہوئے کہا ہے کہ "اس سانحے کا الزام پائلٹ پر نہیں ڈالا جا سکتا۔” اس حادثے میں 260 افراد جاں بحق ہوئے تھے۔

یہ فیصلہ آج سپریم کورٹ نے پائلٹ سمیت سبھروال کے والد، پشکراج سبھروال کی درخواست پر دیا، جنہوں نے اپنے 91 سال کی عمر میں عدالت سے انصاف کی اپیل کی تھی۔ اس کے ساتھ فیڈریشن آف انڈین پائلٹس (FIP) نے بھی ایک مشترکہ درخواست دائر کر رکھی تھی۔ جسٹس سوریہ کانت نے کہا کہ یہ حادثہ المناک تھا، مگر آپ کے بیٹے کو قصوروار نہ سمجھا جائے،کیس کی سماعت کرنے والے جسٹس سوریہ کانت نے دورانِ سماعت بزرگ والد سے مخاطب ہو کر کہا "یہ حادثہ بے حد افسوسناک تھا، مگر آپ کو یہ بوجھ نہیں اٹھانا چاہیے کہ آپ کے بیٹے کو الزام دیا جا رہا ہے۔ ہندوستان میں کوئی نہیں مانتا کہ یہ پائلٹ کی غلطی تھی۔ ابتدائی رپورٹ میں بھی اس قسم کا کوئی اشارہ نہیں،ایک پائلٹ نے پوچھا کہ کیا دوسرے پائلٹ نے فیول کٹ آف کیا؟ تو دوسرے نے نفی میں جواب دیا۔”

پائلٹ کے والد کے وکیل نے عدالت کو بتایا کہ “دی وال اسٹریٹ جرنل” نے اس حادثے پر ایک رپورٹ شائع کی ہے، جس میں ایک بھارتی سرکاری ذریعے کا حوالہ دیا گیا ہے۔اس پر جسٹس کانت نے ریمارکس دیے کہ ہمیں غیر ملکی رپورٹس سے کوئی سروکار نہیں۔ اگر آپ کو ان سے شکایت ہے تو آپ کا چارہ غیر ملکی عدالت میں ہے۔ یہ محض منفی رپورٹنگ ہے،

ایئرکرافٹ ایکسیڈنٹ انویسٹی گیشن بیورو (AAIB) کی جولائی میں جاری ابتدائی رپورٹ کے مطابق، پرواز کے کچھ دیر بعد ہی دونوں انجنوں کی فیول سپلائی بند ہو گئی تھی۔رپورٹ کے مطابق دونوں فیول کنٹرول سوئچز تیزی سے "کٹ آف” پوزیشن پر لے جائے گئے۔تقریباً 10 سیکنڈ بعد انہیں دوبارہ "آن” کیا گیا، مگر تب تک انجن بند ہو چکے تھے۔اس کے نتیجے میں طیارہ نے طاقت کھو دی اور چند لمحوں بعد گر کر تباہ ہو گیا۔

پائلٹ کے والد کے وکیل گوپال شنکرناراین نے عدالت میں مؤقف اپنایا کہ AAIB کی تحقیق آزاد نہیں، اس لیے ایک عدالتی کمیشن کے ذریعے علیحدہ اور شفاف انکوائری کی ضرورت ہے۔”بوئنگ طیاروں میں دنیا بھر میں تکنیکی مسائل سامنے آئے ہیں، لہٰذا آزادانہ تفتیش ناگزیر ہے۔ سپریم کورٹ نے مرکز، DGCA اور AAIB کو نوٹس جاری کر دیے،عدالت نے حکومتِ ہند، ڈائریکٹوریٹ جنرل آف سول ایوی ایشن (DGCA) اور ایئرکرافٹ ایکسیڈنٹ انویسٹی گیشن بیورو (AAIB) کو نوٹس جاری کرتے ہوئے معاملے کی سماعت 10 نومبر کو مقرر کر دی ہے۔ عدالت نے یہ بھی کہا کہ اس نوعیت کی ایک اور درخواست موصول ہوئی ہے جسے اسی تاریخ کو سنا جائے گا۔

ایئر انڈیا کے منیجنگ ڈائریکٹر اور سی ای او کیمبل ولسن نے 30 اکتوبر کو ایک بیان میں کہا کہ "AAIB رپورٹ میں ایئرلائن کے آپریشن یا نظام میں کسی خرابی کی نشاندہی نہیں کی گئی، تاہم ہم مسلسل اپنے طریقہ کار کا جائزہ لے رہے ہیں۔””ہوائی صنعت میں جو کچھ ہوتا ہے، چاہے وہ ہم سے متعلق ہو یا کسی اور سے، وہ ہمارے لیے غور و فکر کا موقع ہوتا ہے۔ ہم ہر واقعے سے سیکھنے کی کوشش کرتے ہیں۔”

یہ حادثہ احمد آباد سے دہلی کے لیے پرواز بھرنے والے ایئر انڈیا بوئنگ 787 ڈریم لائنر طیارے کے اڑان بھرتے ہی پیش آیا تھا، جس میں عملے سمیت 260 افراد جاں بحق ہوئے۔ حادثے نے بھارت سمیت عالمی ہوا بازی کی دنیا کو ہلا کر رکھ دیا تھا۔