Author: ممتاز حیدر

کرغزستان کے صدر صادر ژپاروف دو روزہ دورے پر اسلام آباد پہنچ گئے،

صدر مملکت آصف علی زرداری اور وزیراعظم شہباز شریف نے نورخان ایئربیس پر ان کا پرتپاک استقبال کیا، وفاقی کابینہ کے ارکان اور اعلیٰ حکام بھی کرغزستان کے صدر کے استقبال کیلئے موجود تھے۔ کرغزستان کے صدر طیارے سے باہر آئےتو صدر مملکت آصف علی زرداری ان سے بغلگیر ہوئے جبکہ وزیراعظم محمد شہباز شریف نے بھی ان سے پرجوش مصافحہ کیا۔ روایتی لباس میں ملبوس بچوں نے کرغزستان کے صدر صادر ژپاروف کو پھول پیش کئے۔کرغزستان کے صدر کا اس موقع پر صدر مملکت اور وزیراعظم سے خوشگوار جملوں کا تبادلہ ہوا۔ دونوں ملکوں کے پرچم تھامے بچوں نے معزز مہمانوں کو خوش آمدید کہا۔ کرغزستان کے صدر کو اسلام آباد پہنچنے پر 21 توپوں کی سلامی بھی دی گئی۔

صدر صادر ژپاروف دورے کے دوران وزیراعظم محمد شہباز شریف اور صدر آصف علی زرداری سے ملاقاتیں کریں گے۔ وہ وزیراعظم شہباز شریف کی دعوت پر پاکستان کے دو روزہ دورے پر آئے ہیں۔ دورے کے دوران کرغزستان کے صدر اسلام آباد میں بزنس فورم سے بھی خطاب کریں گے۔ کرغزستان کے صدر کے ساتھ وفد میں اعلیٰ سرکاری عہدیدار اور کاروباری شخصیات بھی شامل ہیں

قومی اسمبلی کی قائمہ کمیٹی برائے خزانہ میں آئی ایم ایف کی رپورٹ پر بحث کے دوران نوید قمر نے کہا کہ آئی ایم ایف کی رپورٹ صرف حکومت کیخلاف فرد جرم نہیں اس میں پارلیمنٹ بھی شامل ہے۔

نوید قمر کی زیر صدارت قومی اسمبلی کی قائمہ کمیٹی خزانہ کا اجلاس ہوا، جس میں نوید قمر نے کہا کہ آئی ایم ایف کی رپورٹ پارلیمنٹ اور حکومت کے خلاف ہے،وزیر خزانہ محمد اورنگزیب نے کہا کہ اس رپورٹ کو کسی کے خلاف نہ سمجھا جائے، یہ تشخیصی رپورٹ حکومت کی درخواست پر تیار کی گئی،رپورٹ میں 15 ترجیحی سفارشات دی گئی ہیں، ایسی رپورٹس دنیا کے کئی ممالک کے بارے میں جاری ہوئی ہیں، رپورٹ پر لائحۂ عمل 31 دسمبر سے پہلے بنا لیا جائے گا،نوید قمر نے کہا کہ اس پر کمیٹی ماہرین کو بلا کر علیحدہ سے بریفنگ لے گی۔

دوسری جانب سینیٹ کی قائمہ کمیٹی برائے خزانہ میں آئی ایم ایف کی کرپشن اینڈ ڈائیگناسٹک رپورٹ زیر بحث آگئی،سینیٹر سلیم مانڈوی والا کی زیرِ صدارت قائمہ کمیٹی برائے خزانہ کا اجلاس ہوا جس میں وزارت خزانہ کے حکام نے بتایا کہ رپورٹ آئی ایم ایف بورڈ کے جائزہ اجلاس کے پیش نظر جاری کی گئی جس میں عالمی ادارے نے کہا کہ آپ نے رپورٹ جاری کرنے کیلیے ایگری کیا تھا، مالیاتی فنڈ نے جلد سے جلد رپورٹ جاری کرنے کا کہا تھا،رکن قائمہ کمیٹی سینیٹر فاروق ایچ نائیک نے سوال کیا کہ کیا آپ نے اس رپورٹ سے اتفاق کیا تھا؟ اراکین پارلیمنٹ تو ویسے ہی بدنام ہو جاتے ہیں اس رپورٹ کا اراکین سے تعلق نہیں، اس رپورٹ کا تعلق سول سرونٹس اور گورننس سے ہے،کمیٹی کے ایک اور رکن دلاور خان نے کہا کہ آئی ایم ایف نے 5300 ارب کی نشاندہی کی اس کے بدلے ریلیف کتنا دیا گیا ہوگا؟ جن اداروں کا رپورٹ میں ذکر ہوا کیا ان کے خلاف کوئی ایکشن کا ارادہ ہے،اس پر وزارت خزانہ کے حکام نے کہا کہ رپورٹ میں کچھ نیا نہیں ہے وہی کچھ ہے جس پر پہلے ہی حکومت کام کر چکی تھی،دلاور خان نے کہا کہ لاہور میں ایک ایف بی آر کا افسر ایک ممبر کیلیے ریفنڈز میں کرپشن کرتا ہے، یہ ٹاپ اسٹوری تھی کہ اس افسر نے ممبر بادشاہ وزیر سے حصہ مانگا، حصہ نہ ملنے پر ایف بی آر کے افسر نے فائرنگ کی تھی۔

چیئرمین قائمہ کمیٹی سینیٹر سلیم مانڈوی والا واقعہ سن کر حیران رہ گئے۔ اس پر رکن کمیٹی سینیٹر عبدالقادر نے کہا کہ کیا آپ نہیں جانتے یہ تو ڈیڑھ سال پہلے بڑی اسٹوری تھی،سینیٹر سلیم مانڈوی والا نے ممبر بادشاہ وزیر کا معاملہ اگلی میٹنگ کے ایجنڈے میں شامل کرنے کا فیصلہ کیا،رکن کمیٹی سینیٹر عبدالقادر نے بتایا کہ سی ڈی اے کا ایک افسر اربوں روپے کی کرپشن کر کے اڈیالہ جیل پہنچ گیا جہاں ڈیل ہوئی اور افسر اس سے بڑے عہدے پر تعینات ہوگیا، مافیاز حکومت چلا رہے ہیں،چیئرمین کمیٹی نے کہا کہ کرپشن میں کمی کے بجائے اضافہ ہو رہا ہے جبکہ فاروق ایچ نائیک نے کہا کہ یہ تو آئی ایم ایف تھا کہ رپورٹ سامنے لانی پڑ گئی،سلیم مانڈوی والا نے سوال کیا کہ کرپشن بڑھ رہی ہے اسے ختم کرنے کیلیے کیا کیا جا رہا ہے؟ وزارت خزانہ کے حکام نے بتایا کہ حکومت نے آئی ایم ایف کے ساتھ 15 سفارشات پر عملدرآمد کرنے کا اتفاق کیا،سینیٹر عبدالقادر نے کہا کہ ای پیڈز سے پہلے ہی بولی طے ہو جاتی ہے، سینیٹر دلاور خان بولے کہ لاہور کے ایل ٹی او کے گزشتہ 2 سال کے ریفنڈز دیکھ لیں شفافیت سامنے آ جائے گی،فاروق ایچ نائیک کا کہنا تھا کہ اس ملک کا آوہ بگڑ گیا ہے اس کو جڑ سے درست کرنا ہوگا،وزارت خزانہ کے حکام نے بتایا کہ اس سال ایس آئی ایف سی کی کارکردگی رپورٹ جاری کی جائے گی۔ اس پر سینیٹر دلاور خان بولے کہ ان کا خیال ہے کہ ایس آئی ایف سی سرمایہ کاری لائے گی،اجلاس میں رکن کمیٹی شاہزیب درانی کا کہنا تھا کہ ایس آئی ایف سی والے کہتے ہیں ٹیکس زیادہ ہے اس لیے سرمایہ کاری نہیں آ سکتی۔ اس پر چیئرمین کمیٹی نے کہا کہ یہ اہم معاملہ ہے اس پر وزیر خزانہ محمد اورنگزیب سے بریفنگ لی جائے گی۔

تحریک انصاف کے رہنما اسد قیصر نے کہا ہے کہ پاک فوج ہماری فوج ہے۔ ہم چاہتے ہیں آئین میں جس کا جو کردار ہے وہ وہاں تک رہے،افغان وار کی وجہ سے ہماری رہی سہی کسر بھی پوری ہو گئی کہ ہماری جو تھوڑی بہت انڈسری تھی وہ بھی نکل گئی جس کے ہمیں معاشی نقصان اٹھانا پڑے۔ہم سب سے پہلے پاکستانی ہیں، ہم سے بہتر کوئی پاکستانی نہیں، پاکستان ہماری جان ہے۔ یہ فوج بھی ہماری فوج ہے،

اسلام آباد میں اپوزیشن اتحاد کے رہنماؤں کے ہمراہ پریس کانفرنس کرتے ہوئے اسد قیصر کا کہنا تھا کہ خیبر پختونخوا کا این ایف سی میں جو شیئر ہے وہ دیا جائے، سرتاج عزیز کمیٹی نے جو 1000 ارب روپے دینے کا کہا وہ دیے جائیں، این ایف سی میں تمام صوبوں نے فاٹا انضمام پر حصہ دینے کا کہا، خیبر پختونخوا میں جب فاٹا ضم ہوا تو خیبر پختونخوا کا شئیر 19 فیصد ہوگیا، گیس کی رائلٹی سمیت صوبے کے وسائل کو روکا گیا ہے،افغان جنگ کی وجہ سے خیبر پختونخوا کی معیشت کو نقصان پہنچا، ہمارے کلچر اور روایات کو نقصان پہنچا، ہماری سرمایہ کاری کی شرح اور صنعتیں جنگ کی وجہ سے ختم ہوئیں۔ وار ان ٹیرر کے بعد خودکش دھماکے اور ڈورن حملے ہوئے، ماضی میں دیکھا بھتے کی کالز آتی تھیں تو کون سرمایہ کاری کرتا ہے،ہم سے بہتر کوئی پاکستانی نہیں، پاکستان ہماری جان ہے، ہم چاہتے ہیں ملک میں آئین و قانون کی حکمرانی ہو، تمام ادارے مضبوط ہوں، تمام ادارے آئین کے دائرے میں کردار ادا کریں۔ پاک فوج ہماری فوج ہے، یہ ہمارے ہی بچے ہیں، ہم چاہتے ہیں آئین میں جس کا جو کردار ہے وہ وہاں تک رہے، ہم بانی پی ٹی آئی کے ساتھ ڈٹ کر کھڑے ہیں،ہمارے پاس پوری دنیا کے ساتھ تجارت کے مواقع ہونا چاہئیں، امن کی جہاں بھی ضرورت ہو پاکستان کردار ادا کرے، پاکستان کسی تنازع میں اپنا کردار ادا نہ کرے،

اس موقع پر سابق گورنر سندھ محمد زبیر نے کہا کہ چار ماہ کی رپورٹ آئی ہے کہ ایکسپورٹ نیچے گر گئی ہے، تجارتی خسارہ 37 فیصد بڑھ گیا ہے، ہم کہتے ہی تھے کہ کوئی سرمایہ کاری نہیں کرے گا، یہاں کا ٹیکس اسٹرکچر صحیح نہیں۔

اسلام آباد ہائی کورٹ کے جج جسٹس محمد آصف کے کم عمر بیٹے کو تیز رفتار گاڑی کی ٹکر سے دو نوجوان لڑکیوں کے جاں بحق ہونے کے مقدمے میں جسمانی ریمانڈ پر پولیس کی تحویل میں دے دیا گیا۔

عدالتی مجسٹریٹ شائستہ خان کندی نے پولیس کی درخواست پر جسمانی ریمانڈ کا حکم جاری کیا،سیکرٹریٹ پولیس اسٹیشن میں درج فرسٹ انفارمیشن رپورٹ (ایف آئی آر ) کے مطابق، یہ حادثہ پیر کی رات دیر گئے اسلام آباد میں پاکستان نیشنل کونسل آف آرٹس (پی این سی اے ) کے قریب پیش آیا، جہاں مبینہ طور پر ایک تیز رفتار سیاہ رنگ کی گاڑی نے پی این سی اے میں کام کرنے والی دو لڑکیوں کو ٹکر مار دی جسے جج کا کم عمر بیٹا چلا رہا تھا،جاں بحق ہونے والی لڑکیاں اسکوٹر پر سوار تھیں جب انہیں گاڑی نے ٹکر ماری، اور وہ مبینہ طور پر موقع پر ہی دم توڑ گئیں۔ پولیس کا کہنا ہے کہ ٹکر کے بعد گاڑی فوراً موقع سے فرار ہو گئی۔

سب انسپکٹر محمد اصغر کی مدعیت میں درج کی گئی ایف آئی آر میں کہا گیا ہے کہ پولیس نے رجسٹریشن نمبر کی مدد سے گاڑی کا سراغ لگایا اور بعد ازاں ایک نجی اسپتال پہنچے جہاں ملزم کو طبی امداد کے لیے لایا گیا تھا،بعد ازاں اسے حراست میں لے لیا گیا، اس کے طبی اور فرانزک نمونے لیے گئے اور گاڑی کو جانچ کے لیے تحویل میں لے لیا گیا۔

آئینی عدالت، ارشد شریف سوموٹو کیس،وفاقی آئینی عدالت نے سوموٹو کاروائی کے دائرہ اختیار معاونت طلب کرلی،عدالت نے ارشد شریف کے قتل تحقیقات میں ابتک کی پیشرفت رپورٹ طلب کرلی۔جسٹس عامر فاروق نے کہا کہ بتایا جائے ابتک تحقیقات میں کیا پراگرس ہے۔

ارشد شریف سوموٹو کیس میں وفاقی آئینی عدالت نے کارروائی کے دائرہ اختیار پر معاونت طلب کرلی۔عدالت نے کہاکہ بتایا جائے ذمہ داران کو کٹہرے میں لانے کیلئے قانونی طور پر کیا ہوسکتا ہے؟کیا 27ویں ترمیم کے بعد آئینی عدالت سوموٹو کارروائی چلا سکتی ہے؟دونوں جانب کے وکلا قانونی نکتہ پر معاونت کریں، عدالت نے کہاکہ عدالتی کارروائی کو ریگولیٹ کرنے کے ساتھ دائرہ اختیار کو بھی دیکھنا ہے،آئینی عدالت میں کیس سماعت کے بغیر تو نہیں چل سکتا،وکیل نے کہاکہ کورٹ فیصلہ موجود ہے، آئینی عدالت سوموٹوکارروائی آگے بڑھا سکتی ہے،عدالت نے معاونت طلب کرتے ہوئے کیس کی سماعت 17دسمبر تک ملتوی کردی۔