Author: ممتاز حیدر

سندھ ہائی کورٹ نے کراچی کے علاقے لیاقت آباد میں رینجرز اہلکاروں پر قاتلانہ حملے کے 27 سال پرانے کیس کا فیصلہ سنا دیا۔

عدالت نے ملزم عبید کے ٹو کی سزا کے خلاف اپیل منظور کرتے ہوئے عمر قید کی سزا کالعدم قرار دے دی،ملزم کے وکیل نے مؤقف اختیار کیا کہ اس کیس کا دو بار پہلے ٹرائل ہو چکا ہے، فوجی عدالت میں ٹرائل ہوا تھا، ایم کیو ایم کے مرکز نائن زیرو سے گرفتار سارے ملزمان جیل سے رہا ہو چکے ہیں صرف عبید کے ٹو جیل میں ہے۔ ملزم عبید کے ٹو 2015 سے گرفتار ہے،پراسیکیوٹر اقبال اعوان نے کہا کہ ملزم نے اعتراف جرم کیا ہے، اے ٹی سی نے قانون کے مطابق سزا سنائی، ملزم بریت کا حقدار نہیں ہے

پولیس نے کہا کہ 1998 میں اہلکار رینجرز پکٹ پر موجود جوانوں کو کھانا دینے جا رہے تھے، ملزمان نے لیاقت آباد کے علاقے میں گھات لگا کر اہلکاروں پر فائرنگ شروع کر دی، فائرنگ سے سپاہی دلدار حسین شہید اور حوالدار ممتاز علی زخمی ہوگئے تھے،پراسیکیوشن نے کہا کہ انسداد ہشت گردی عدالت نے 2024 میں ملزم عبید کے ٹو کو عمر قید کی سزا سنائی تھی،سندھ ہائی کورٹ نے ملزم عبید کے ٹو کی عمر قید کی سزا کالعدم قرار دے دی۔

سندھ ہائیکورٹ نے سچل کے علاقے سے لاپتا سابق ایم این اے نثار پہنور کی بازیابی سے متعلق درخواست پر گمشدگی کا مقدمہ درج کرنے کا حکم دے دیا

سندھ ہائیکورٹ میں سچل کے علاقے سے لاپتا سابق ایم این اے نثار پہنور کی بازیابی سے متعلق درخواست کی سماعت ہوئی، ایس ڈی پی او اور سچل کے ایس ایچ او عدالت میں پیش ہوئے اور موقف اپنایا کہ لاپتا شہری کی تلاش کا عمل جاری ہے،درخواستگزار نے کہا کہ نثار پہنور تقریباً 2 ماہ سے لاپتا ہیں، پولیس کو والد کی بازیابی کا حکم دیا جائے، اگر کسی کیس میں مطلوب ہیں تو متعلقہ عدالت میں پیش کیا جائے، نثار پہنور کی عدم بازیابی پر عدالت پولیس پر برہم ہو گئی اور عدالت نے ریمارکس دیئے کہ دونوں افسران لاپتا افراد کی گمشدگی کا مقدمہ درج کرکے رپورٹ پیش کرنے میں ناکام رہے ہیں۔

عدالت نے پولیس کو نثار پہنور کی گمشدگی کا مقدمہ درج کر کے ایس ایچ او تھانہ سچل کو رپورٹ پیش کرنے کا حکم دیدیا اور ساتھ ہی عدالت نے 18 نومبر کو پولیس سے ایف آئی آر کی کاپی بھی طلب کرلی۔

وفاقی وزیرِ داخلہ محسن نقوی نے سنی تحریک کے چیئرمین محمد ثروت اعجاز قادری سے ملاقات کی، جس میں مذہبی ہم آہنگی اور ملکی ترقی کے لیے علماء کے کردار پر تفصیلی گفتگو کی گئی۔

ملاقات میں سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی وفاقی وزیر کے ہمراہ تھے۔ اس موقع پر سنی تحریک کے مرکزی قائدین، بشمول صدر سنی تحریک صاحبزادہ علامہ بلال عباس قادری، سیکرٹری جنرل صاحبزادہ علامہ بلال سلیم قادری، طیب حسین قادری، عبداللہ اکرم قادری، سلمان قادری، شہباز قادری، عمران قادری اور درویش رضا عباسی بھی موجود تھے،محسن نقوی نے علمائے کرام کی دینی، فکری اور اصلاحی خدمات کو خراج تحسین پیش کرتے ہوئے کہا کہ دینِ اسلام امن، محبت اور رواداری کا درس دیتا ہے، تشدد اور شرانگیزی کی کوئی گنجائش نہیں۔انہوں نے واضح کیا کہ مدارس یا مساجد کی بندش کے حوالے سے جو پروپیگنڈہ کیا جا رہا ہے وہ بے بنیاد ہے۔کسی بھی مدرسے یا مسجد کو بند نہیں کیا جائے گا۔موجودہ حالات میں سب کو مثبت کردار ادا کرنا ہوگا، پاکستان ترقی کے لیے ٹیک آف کر چکا ہے، آج ہمیں متحد ہو کر ملک و قوم کے مفاد میں سوچنا ہوگا۔قانون کے دائرے میں رہتے ہوئے ہر شخص کو احتجاج کا حق حاصل ہے، تاہم قومی یکجہتی اور مذہبی ہم آہنگی وقت کی اہم ترین ضرورت ہے۔اس موقع پر چیئرمین سنی تحریک ثروت اعجاز قادری نے مذہبی ہم آہنگی اور اتحاد کے فروغ کے لیے وفاقی و صوبائی حکومتوں کے ساتھ مکمل تعاون کی یقین دہانی کروائی۔