Author: ممتاز حیدر

تحریک انصاف کی سیاسی اور ٹیکنوکریٹ قیادت کے اختلافات شدت اختیار کر گئے۔

پی ٹی آئی کے سیاسی بیک گراؤنڈ رکھنے والے متعدد سیاسی رہنماء سیکریٹری جنرل سلمان اکرم راجا کیخلاف متحرک ہوگئے، سینئر رہنماؤں نے پارٹی پر مسلط ٹیکنوکریٹ گروپ سے جان چھڑانے کیلئے علیمہ خان سے مدد مانگ لی۔نجی ٹی وی کے ذرائع کے مطابق سینئر رہنماؤں نے علیمہ خان سے مطالبہ کیا ہے کہ بانی سے ملاقات میں ہماری تجویز کی منظوری حاصل کریں۔ذرائع پی ٹی آئی کے مطابق سیاسی قیادت ریاست سے ٹکراؤ کی مخالف اور مذاکرات کی حامی ہے جبکہ وکلاء قیادت کا ٹاکرے اور مزید دباؤ بڑھانے کی حکمت عملی پر اصرار ہے، وکلاء دھڑا اسمبلیوں سے استعفوں کے آپشن پر غور کا حامی ہے۔ذرائع کا کہنا ہے کہ سینئر سیاسی رہنماؤں نے وکلاء گروپ کو پارٹی بند گلی تک پہنچانے کا ذمہ دار قرار دے دیا، سیاسی رہنماؤں نے پارلیمانی کردار محدود کرنے کی کسی بھی کوشش کی سخت مخالفت کردی، سیاسی رہنماء پارٹی پر مسلط وکلاء کے غیرسیاسی فیصلوں سے تنگ آچکے۔

صدر مملکت آصف علی زرداری نے خصوصی افراد کے عالمی دن کے موقع پر کہا ہے کہ قومی زندگی میں خصوصی افراد کی مکمل شمولیت حکومت کی اولین ترجیح ہے۔

اپنے پیغام میں صدر مملکت آصف علی زرداری نے خصوصی افراد کے حقوق اور وقار کے تحفظ کے عزم کا اعادہ کیا ہے۔ انہوں نے کہا کہ قومی زندگی میں خصوصی افراد کی مکمل شمولیت حکومت کی ترجیح ہے اور اس مقصد کے لیے تعلیم اور صحت سمیت دیگر شعبوں میں اقدامات جاری ہیں،قومی شناختی کارڈ پر خصوصی لوگو، سرٹیفیکیشن اور سماجی تحفظ سے متعلق سہولیات کو مزید مؤثر بنایا جا رہا ہے جب کہ خصوصی افراد کے لیے بہتر روزگار اور نقل و حرکت کے مواقع فراہم کرنے پر بھی توجہ دی جا رہی ہے،منصفانہ معاشرہ وہی ہوتا ہے جہاں ہر فرد کو یکساں سہولتیں میسر ہوں اور خصوصی افراد کی راہ میں حائل جسمانی، سماجی اور رویوں پر مبنی رکاوٹیں دور کرنا ہم سب کی مشترکہ ذمہ داری ہے۔

صدرِ مملکت نے خصوصی افراد کی شناخت کے احترام پر زور دیتے ہوئے کہا کہ تعلیم، کاروبار اور ترقی میں ان کی فعال شرکت قومی مستقبل کے لیے نہایت اہم ہے۔

وفاقی وزیر اطلاعات و نشریات عطاء اللہ تارڑ نے کہا ہے کہ صحافیوں کے مسائل کے حل کے لیے حکومت پُرعزم ہے اور ان کے روزگار کے تحفظ کو یقینی بنایا جائے گا۔

انہوں نے یہ بات پارلیمانی رپورٹرز ایسوسی ایشن کے نومنتخب عہدیداران کی حلف برداری کی تقریب سے خطاب کرتے ہوئے کہی۔ وزیر اطلاعات نے پی آر اے کے نومنتخب عہدیداران کو مبارکباد بھی دی،عطاء اللہ تارڑ نے کہا کہ پی آر اے کے ساتھ ہمیشہ گہرا رشتہ رہا ہے اور پریس گیلری انہیں ہمیشہ ایوان کا حصہ محسوس ہوتی ہے۔ انہوں نے کہا کہ پارلیمانی رپورٹرز ایسوسی ایشن قومی، سماجی اور صحافتی ایشوز پر ہمیشہ توانا آواز رہی ہے۔ ان کا کہنا تھا کہ صحافی جب واک آؤٹ کرتے ہیں تو انہیں وہی عزت ملتی ہے جو کسی رکنِ ایوان کو حاصل ہوتی ہے، اور یہ ایک منفرد اعزاز ہے،پی آر اے پارلیمانی جمہوری عمل کا مضبوط حصہ ہے اور ان کی کوشش رہی ہے کہ صحافیوں کے ساتھ رابطہ برقرار رہے۔ انہوں نے کہا کہ وہ صحافیوں کو اپنا حلقہ سمجھتے ہیں اور ان کے کسٹوڈین ہیں۔ پی آر اے کے کردار کو مزید فعال بنایا جائے گا، پی آر اے صحافیوں کو ملازمتوں سے نکالنے کے مسئلے پر جوائنٹ ایکشن کمیٹی کو اپنی تجاویز بھجوائے، جن پر عمل کیا جائے گا،جرنلسٹس پروٹیکشن کمیشن کا قیام خوش آئند ہے، جس میں تمام صحافتی تنظیموں کی نمائندگی موجود ہے،کمیشن کا پہلا اجلاس بھی ہو چکا ہے،عطا تارڑ کا مزید کہنا تھا کہ جاب سیکیورٹی صحافیوں کا بنیادی حق ہے اور وہ ہمیشہ صحافیوں کے ساتھ کھڑے رہیں گے۔

نائب وزیراعظم اسحاق ڈار نے کہا ہے کہ مئی میں پاک بھارت جنگ بھی خطرناک ثابت ہوسکتی تھی۔

اسلام آباد میں سیمینار سے خطاب کرتے ہوئے اسحاق ڈار کا کہنا تھا کہ بھارت نے یکطرفہ طور پر سندھ طاس معاہدہ معطل کرنے کا اعلان کیا۔ مسئلہ کشمیر کے حل نہ ہونے سے خطے کے امن کو خطرہ لاحق ہے،دنیا میں سلگتے تنازعات عالمی امن کے لیے خطرہ ہیں، پاکستان تنازعات کے حل کے لیے مذاکرات اور سفارتکاری کی حمایت کرتا ہے، جنوبی ایشیا سب سے زیادہ آبادی والا خطہ ہے، جنوبی ایشیا میں موسمیاتی تبدیلی اور غذائی قلت کے چیلنجز سنگین ہوتے جا رہے ہیں، موسمیاتی تبدیلی اس وقت بہت بڑا چیلنج ہے، درجہ حرارت میں اضافے اور سیلابوں کے معیشت پر تباہ کن اثرت مرتب ہو رہے ہیں۔ جنوبی ایشیا کو غربت، ناخواندگی، ناگہانی آفات سمیت دیگر چیلنجز درپیش ہیں، جنوبی ایشیا کے ممالک کو اپنے مسائل کے حل کے بارے میں سنجیدگی سے سوچنا ہوگا، مشترکہ خوشحالی کے لیے علاقائی روابط اہم ہیں۔