Author: ممتاز حیدر

کراچی: سندھ کابینہ نے صوبے کے سب سے بڑے شہر کراچی میں رینجرز کی تعیناتی مزید ایک سال کے لیے بڑھانے کی باضابطہ منظوری دے دی ہے۔

یہ فیصلہ وزیراعلیٰ سندھ سید مراد علی شاہ کی زیر صدارت ہونے والے اہم اجلاس میں کیا گیا، جس میں صوبائی وزرا، مشیروں اور متعلقہ حکام نے شرکت کی۔اجلاس کے دوران امن و امان کی مجموعی صورتحال، دہشت گردی کے خطرات اور شہر میں جاری ٹارگٹڈ آپریشن پر تفصیلی بریفنگ دی گئی۔ حکام نے کابینہ کو بتایا کہ رینجرز کی موجودگی سے کراچی میں جرائم کی شرح میں نمایاں کمی آئی ہے جبکہ اہم کارروائیوں کے ذریعے دہشت گردی اور سنگین جرائم کے نیٹ ورک کو کمزور کیا گیا ہے۔

ترجمان وزیراعلیٰ سندھ کے مطابق رینجرز انسدادِ دہشت گردی ایکٹ کے تحت اختیارات کے ساتھ پولیس کی معاونت جاری رکھے گی۔رینجرز کو سی ٹی ڈی اور سندھ پولیس کے ساتھ مشترکہ آپریشنز کی مکمل اجازت ہوگی تاکہ شہر میں قیامِ امن کا سلسلہ برقرار رہے۔رینجرز کی تعیناتی کی نئی مدت 9 دسمبر 2025 سے مؤثر ہوگی، یعنی موجودہ تعیناتی ختم ہونے کے بعد فوراً نئی مدت کا آغاز ہوجائے گا۔

کراچی کے علاقے گلشنِ اقبال نیپا چورنگی پر کھلے مین ہول میں گرنے والے تین سالہ بچے کی لاش طویل ریسکیو آپریشن کے بعد برآمد کرلی گئی۔

ریسکیو حکام کے مطابق کمسن ابراہیم ولد نبیل کی لاش حادثے کے تقریباً 14 گھنٹے بعد جائے وقوعہ سے ڈیڑھ کلو میٹر دور نالے سے ملی، جسے فوری طور پر سرد خانے منتقل کردیا گیا۔واقعہ اتوار اور پیر کی درمیانی شب تقریباً 11 بجے پیش آیا جب تین سالہ ابراہیم والدین کے ہمراہ ایک ڈیپارٹمنٹل اسٹور میں شاپنگ کے لیے آیا تھا۔ والد پارکنگ میں بائیک کھڑی کر رہے تھے، اسی دوران ابراہیم والد کے پیچھے بھاگتے ہوئے قریب موجود کھلے مین ہول میں جا گرا۔ کمسن بچہ اپنے والدین کی اکلوتی اولاد بتایا جاتا ہے۔

حادثے کے فوراً بعد ریسکیو ٹیموں نے تلاش شروع کی، تاہم مسلسل کئی گھنٹے کی کوششوں کے باوجود بچے کا کوئی سراغ نہ مل سکا۔ بعد ازاں ریسکیو آپریشن عارضی طور پر روک دیا گیا، جس پر علاقہ مکینوں نے اپنی مدد آپ کے تحت ہیوی مشینری منگوا کر کھدائی کا کام بھی کیا۔بچے کے گرنے کی خبر پھیلتے ہی علاقہ مکین مشتعل ہوگئے اور نیپا چورنگی سمیت اطراف کی سڑکوں پر ٹائر جلا کر شدید احتجاج کیا، جس کے باعث ٹریفک کی روانی بری طرح متاثر رہی۔ یونیورسٹی روڈ پر نیپا سے حسن اسکوائر تک جانے اور آنے والا ٹریک بھی طویل وقت تک بند رہا، جسے بعد ازاں کھول دیا گیا۔

احتجاج کے دوران مشتعل افراد نے میڈیا نمائندوں پر بھی حملہ کردیا، گاڑیوں کے شیشے توڑ دیے اور دفاتر جانے والے شہریوں کو روکنے کی کوشش کی۔ ہجوم کی وجہ سے ریسکیو ٹیموں کو بھی امدادی کارروائی عارضی طور پر روکنی پڑی۔

میئر کراچی نے واقعے کا نوٹس لیتے ہوئے تحقیقات کا حکم دے دیا ہے۔ ان کا کہنا تھا کہ کھلے مین ہولز کا انتظام متعلقہ اداروں کی ایک ذمہ داری ہے، تاہم اس معاملے پر کسی بھی جماعت پر بات کرنے سے لوگ ناراض ہوتے ہیں۔

امیر جماعت اسلامی پاکستان حافظ نعیم الرحمٰن نے کہا ہے کہ میئر کراچی نے سارے ادارے اپنے قبضے میں کر رکھے ہیں۔

کراچی میں امیر جماعت اسلامی کراچی منعم ظفر ہمراہ پریس کانفرنس کرتے ہوئے حافظ نعیم الرحمٰن نے کہا کہ بی آر ٹی کے نام پر شہریوں کی تذلیل کی جا رہی ہے۔ سندھ حکومت میں کرپشن بڑا کاروبار بن چکا ہے، ان کی سرپرستی کون کر رہا ہے سب کو پتہ ہے، اس بی آر ٹی کے ڈیزائن میں بھی مسائل ہیں۔مطالبہ ہے بی آر ٹی پروجیکٹ ختم کیا جائے، یونیورسٹی روڈ کو بحال کیا جائے۔ فرضی ڈاکومنٹس پر گلشن اقبال میں گھر پر قبضہ کیا جا رہا ہے۔ کسی بھی شہری کے گھر پر کوئی قبضہ کرے گا تو جماعت اسلامی مزاحمت کرے گی، کراچی کی زمینوں پر قبضہ کے خلاف جماعت اسلامی نے سیل بنا دیا، زمینوں پر قبضے کے خلاف مزاحمت کی جائے گی، حکومت سسٹم چلانے والوں لگام دے۔ پاکستان میں ہر جگہ قبضہ ہوتا ہے، کسانوں، ہاریوں کی زمین پر قبضہ کر لیا جاتا ہے۔دریائے راوی کے کنارے جعلی سوسائٹیاں بنی ہوئی ہیں، جعلی سوسائٹیاں بنتی ہیں، دریاؤں کے راستوں پر قبضہ کر لیا جاتا ہے، زمین پر قبضے کے خلاف جدوجہد بدل دو نظام کا اہم حصہ ہو گا۔

حافظ نعیم الرحمٰن کا کہنا ہے کہ ایم کیو ایم نورا کشتی لڑتی ہے، عوام کو بے وقوف بناتی ہے۔ کے ڈی اے، ایل ڈی اے، ایم ڈی اے پر جب قبضہ ہو رہا تھا ایم کیو ایم ان کے ساتھ کھڑی تھی،قبضہ گیروں کے خلاف مزاحمت کی جائے گی، کوئی اس شہر کا پُرسان حال نہیں، حالات کی ذمے داری حکومت پر ہے، کراچی کے شہریوں کو لاوارث نہیں چھوڑیں گےچھوٹے کاشتکاروں کی زمین پر قبضہ کیا جاتا ہے، ہزار ارب روپے کراچی کو ملنے چاہیے تھا، مصطفیٰ کمال کے دور میں یہ شق ختم کی گئی، ایم کیو ایم اس وقت حکومت کا حصہ تھی۔

میئر کراچی مرتضیٰ وہاب نے کہا ہے کہ گزشتہ شب نیپا کے قریب مین ہول میں جو بچہ گرا وہ سیوریج نالہ نہیں بلکہ برساتی نالہ تھا، اس غم میں بچے کے اہلخانہ کے ساتھ برابر کا شریک ہوں لیکن معاملے کو سیاسی بنانے کی کوشش کی گئی۔

کراچی میں میڈیا سے گفتگو کرتے ہوئے مرتضیٰ وہاب کا کہنا تھا جس جگہ بچہ گرا وہاں مین ہول کا کور موجود نہیں تھا جس کی وجہ سے بچہ بدقسمتی سے اس میں گر کر حادثے کا شکار ہوگیا۔ میں اس واقعے پر غمگین ہوں،اس ماں اور والد کی تڑپ کا احساس ہے اور اہلخانہ سے افسوس کا اظہار بھی کرتا ہوں، اہلخانہ کی ہر ممکن مدد کریں گے، کل رات کو اس ایشو پر سیاست کرنے کی کوشش کی گئی جو بڑی بدقسمت چیز ہے، 500 میٹر کے حصے کو کھود چکے ہیں، بچے کی تلاش کا کام جاری ہے، سی سی ٹی وی فوٹیج بھی نکلوا رہا ہوں کہ معاملہ کیا ہوا ہے، ایم ڈی واٹر کارپوریشن کو تحقیقات کرنے کا حکم دیا ہے کہ کس نے مشینری منع کی، اگر ایسا ہے تو قانونی کارروائی کریں گے، اگر عملے کی کوتاہی ثابت ہوئی تو اس کے خلاف کارروائی کی جائے گی،پچھلے ایک سال میں 88 ہزار مین ہول کور لگائے ہیں، واٹر کارپوریشن نے 55 فیصد یوسی چیئرمینز کو ڈھکن دیے ہیں، انکوائری کراؤں گا کہ شہرکے بیچ ڈپارٹمنٹل اسٹور اور اسپتال کے قریب مین ہول کیسے کھلا تھا، مین ہول کتنے دن سے کھلا تھا، یا کھولا گیا تھا، اس کو چیک کیا جائے گا۔

میئر کراچی مرتضیٰ وہاب کا مزید کہنا تھا کہ گزشتہ رات پیش آنے والے واقعے کو سیاسی بنانے کی کوشش کی گئی، تنقید کرنے والے لوگ اس کو سیاسی مقاصد کے لیے استعمال کریں گے، واٹر کارپوریشن کو کوئی شکایات نہیں ملی تھی،میں متاثرہ خاندان اور والدین کے ساتھ کھڑا ہوں، میں حکومت کا حصہ ہوں، اس طرح کی اشتعال انگیز گفتگو کی وجہ سے معاملات حل نہیں ہو پاتے، برساتی نالے پر ٹاؤن اور کے ایم سی دونوں کام کرتے ہیں، معاملے کی ہر پہلو سے مکمل تحقیقات کریں گے، اس علاقے کا ٹاؤن چیئرمین جماعت اسلامی کا ہے، اگر میں کہوں کہ ذمہ داری جماعت اسلامی کی ہے تو لوگ ناراض ہوں گے۔