Author: ممتاز حیدر

وزیراعلی خیبر پختونخوا سہیل آفریدی کیخلاف انتخابی ضابطہ اخلاق خلاف ورزی کیس کی سماعت ہوئی

چیف الیکشن کمشنر اسکندر سلطان راجہ کی سربراہی میں پانچ رکنی کمیشن نےسماعت کی،وزیراعلی خیبر پختوانخوا سہیل آفریدی الیکشن کمیشن میں پیش ہوگئے ،ایڈوکیٹ جنرل خیبر پختونخوا اور وکیل علی بخاری بھی ہمراہ کمیشن میں پیش ہوئے،وکیل علی بخاری نے کہا کہ ہمارے پاس باقی درخواستوں کاریکارڈ نہیں،ہمارے خلاف چاروں درخواستیں یکجا کردیں،چیف الیکشن کمشنر نے کہا کہ آپ اسکے لئے ایک درخواست دیں،الیکشن کمیشن حکام نے کہا کہ سہیل آفریدی خلاف الگ الگ درخواستیں آئیں،وکیل سہیل آفریدی نے کہا کہ ہمارےخلاف ایک کیس ڈی آراو آفس چل رہا ہے اور ایک یہاں،چیف الیکشن کمشنر نے کہا کہ ہم آپکو سن لیں گے آپ جتنا مرضی وقت لیں،ڈی جی لا الیکشن کمیشن نے کہا کہ جسٹس منیب اختر کافیصلہ ہے کہ انتخابات کے انعقاد کیلئے کمیشن کوئی بھی فیصلہ کرسکتاہے،جسٹس منیب اختر نے فیصلے توہین کمیشن کیس کی کاروائی کرنے کابھی کہا،وزیراعلی کے خلاف عوامی اور ڈی آراو نے شکایات کی ہے،

الیکشن کمیشن کی سماعت میں پی ٹی آئی وکلاءنے شکوہ کر دیا کہ ہمارے وکلاء کوآنے نہیں دیاگیا،وکیل علی بخاری کا کہناتھا کہ ایڈوکیٹ جنرل خیبرپختوانخوااور مجھ بھی شناخت کے باوجود روکا گیا،جس پر چیف الیکشن کمشنر نے کہا کہ شہر میں آفسران نئے آئے ہیں،اسلئے روکا ہوگا،وکلاء کے ساتھ اگر بدسلوکی ہوئی تو میں معذرت کرتا ہوں۔ چیف الیکشن کمشنر نے متعلقہ افسران کے خلاف کارروائی کی یقین دہانی کروائی

سپیشل سیکرٹری الیکشن کمیشن نے کہا کہ آرٹیکل 218 تین الیکشن کمیشن کے اختیارات کو واضح کرتا ہے۔وزیر اعلیٰ کے پی کے کے خلاف قانون کے مطابق کارروائی کو آگے بڑھایا جائے۔وکیل علی بخاری کا کہنا تھا کہ ایبٹ آباد میں جلسے پر کارروائی ہوئی تو نیا پنڈورا باکس کھل جائے گا۔انہوں نے سوال کیا کہ کیا الیکشن کمیشن وزیراعظم اور وزیراعلیٰ پنجاب کو بھی طلب کرے گا؟ جس پر چیف الیکشن کمشنر نے کہا کہ الیکشن سے قبل وزیراعظم ایسا خطاب کرتے تو انہیں بھی نوٹس جاری کیا جاتا۔

وزیراعلیٰ خیبر پختونخوا ،ضابطہ اخلاق خلاف ورزی کیس،سماعت ملتوی،فیصلہ محفوظ
الیکشن کمیشن نے وزیر اعلیٰ کے پی کے سہیل آفریدی کو آئندہ سماعت پر حاضری سے استثنیٰ دے دیا،چیف الیکشن کمشنر نے کہاکہ معاملہ قابل سماعت ہونے یا نہ ہونے پر مناسب آرڈر جاری کرینگے، کیس کے قابل سماعت ہونے یا نہ ہونے پر فیصلہ محفوظ کرکے سماعت 4 دسمبر تک ملتوی کردی گئی۔

بعد ازاں میڈیا سے بات کرتے ہوئے سہیل آفریدی کا کہنا تھا کہ الیکشن کمیشن ہو یا کوئی اور ادارہ ، ہم نے ماضی میں بھی ان کی عوام مخالف پالیسیوں پر تنقید کی ہے اور آئندہ بھی تنقید کریں گے.

وفاقی وزیرِ داخلہ محسن نقوی نے سعودی وزیرِ داخلہ شہزادہ عبدالعزیز بن سعود بن نائف سے ملاقات کی، جس میں سکیورٹی امور اور دونوں ممالک کی وزارتِ داخلہ کے درمیان تعاون مزید مضبوط بنانے پر تبادلہ خیال کیا گیا۔

ملاقات میں برمی مسلمانوں کے لیگل سٹیٹس کے دیرینہ مسئلے پر بھی بات چیت کی گئی،سعودی وزیرِ داخلہ نے اس معاملے کے حل کے لیے پاکستانی وزیرِ داخلہ کی کوششوں پر اظہارِ تشکر کیا۔ انہوں نے فیڈرل کانسٹیبلری ہیڈ کوارٹر پر حملے میں شہید اہلکاروں کے خاندانوں سے تعزیت بھی کی،فریقین نے پولیس اور پیرا ملٹری فورسز کے لیے ٹریننگ ایکسچینج پروگرام پر اتفاق کیا، جبکہ یہ فیصلہ بھی کیا گیا کہ پاکستان اور سعودی عرب کی وزارتِ داخلہ کا ورکنگ گروپ آئندہ ماہ اجلاس منعقد کرے گا،محسن نقوی نے کہا کہ سعودی عرب ہر پاکستانی کا دوسرا گھر ہے اور پاکستان کو سعودی عرب کے ساتھ پائیدار تعلقات پر فخر ہے۔

ملاقات میں وفاقی سیکرٹری داخلہ محمد خرم آغا، پاکستان کے سفیر احمد فاروق، کمانڈنٹ فیڈرل کانسٹیبلری نذیر گاڑا، کمانڈنٹ نیشنل پولیس اکیڈمی محمد ادریس اور سعودی وزارتِ داخلہ کے اعلیٰ حکام بھی موجود تھے۔

وزیراعظم محمد شہباز شریف نے خواتین پر تشدد کے خاتمے کے عالمی دن کے موقع پر کہا ہے کہ آج خواتین پر تشدد کے خاتمے کے عالمی دن کے موقع پر پاکستان تمام دنیا کے ساتھ اس اہم مقصد کو اجاگر کرنے کے لیے اپنی آواز کو بلند کررہا ہے۔ اس سال یہ دن "خواتین کے خلاف ڈیجیٹل تشدد کے خاتمے کے لیے متحد” ہونے کے عنوان کے تحت منایا جا رہا ہے۔

وزیراعظم شہباز شریف کا کہنا تھا کہ یہ عنوان جدید دور میں خواتین کو مختلف سطحوں اور پلیٹ فارمز پر تشدد اور حراساں کیے جانے کی طرف توجہ دلاتا ہے اور یہ دن ہمیں اس بات کا موقع فراہم کرتا ہے کہ ہم سوچیں اور اس عہد کی تجدید کرتے ہوۓ متحد ہو کر اس کے خلاف جدوجہد کریں۔ خواتین پر تشدد اور حراساں کیے جانے کے واقعات کےمکمل انسداد کے لیے ہمیں کثیرالجہتی حکمت عملی اپنانے کی ضرورت ہے۔ جامع حکمت عملی میں نہ صرف اس طرح کے واقعات کا سدباب کے اقدامات شامل ہونا چاہئے بلکہ متاثرہ خواتین سے ہمدردی اور معاشرے کے استحصالی نظام کی اصلاح شامل ہے۔ خواتین کے خلاف تشدد نہ صرف انسانیت، بنیادی انسانی حقوق کی خلاف ورزی ہے بلکہ یہ معاشرے کے امن و سکون اور ترقی و خوشحالی میں بہت بڑی رکاوٹ ہے۔ آئین پاکستان بڑے واضح الفاظ میں خواتین کی عزت و تکریم کی ضمانت دیتا ہے اور برابری کے حقوق فراہم کرتا ہے تاہم پھر بھی ہمارے معاشرے میں خواتین کو بہت سی صورتحال میں امتیازی سلوک کا سامنا کرنا پڑتا ہے۔
حکومت پاکستان عالمی سطح پر خواتین پر تشدد کے خاتمے کے عالمی معاہدہ کو تسلیم کرتا ہے، اورحکومتی سطح پر خواتین کے حقوق کے تحفظ کے لیے پالیسی، قانون سازی، انتظامی, ادارہ جاتی اور دیگر اقدامات اٹھاے جا رہے ہیں۔ ان اقدامات میں وزیراعظم کا خواتین کو بااختیار بنانے کا وزیراعظم کا پیکج بھی شامل ہے۔

وزیراعظم شہباز شریف کا کہنا تھا کہ حکومت پاکستان تشدد سے متاثرہ خواتین کے لیے ادارہ جاتی امداد کو یقینی بنانے کی بھی بھرپور کوشش کر رہی ہے۔ اسی تناظر میں آزادانہ کمیشنز قائم کیے گئے ہیں جن قومی انسانی حقوق کمیشن, بچوں کے لیے قومی کمیشن اور خواتین کے لیےقومی کمیشن شامل ہے۔اس کے علاوہ خواتین کا تحفظ سینٹر، خواتین پولیس سینٹر، ہیلپ لائنز اور تشدد سے متاثرہ خواتین کی مالی اور قانونی امداد کے لیے بھی کام کیا جارہا ہے۔ حکومت پاکستان خواتین کے قانونی تحفظ، انکی انصاف تک رسائی کے لیے بھی کوشاں ہیں۔ حکومت پاکستان تمام متعلقہ اداروں، سول سوسائٹی اور انسانی حقوق کے لیے کام کرنے والوں کے ساتھ بھی تعاون کو جاری رکھے گی تاکہ خواتین کے تحفظ، خود مختاری اور انکی خوشحالی کو یقینی بنایا جا سکے۔ تاہم محض کوئی قانون یا حکومتی پالیسی خواتین پر تشدد کے مکمل خاتمے کو یقینی نہیں بنا سکتی جب تک معاشرے میں خواتین کے تحفظ کو مجموعی ترجیح نہ بنایا جائے اور معاشرے میں اس کے خلاف آواز نہ اٹھائی جائے۔ہماری ثقافت و تہذیب میں بھی خواتین کے لیے برابری، عزت و تکریم اور ہر گھر میں اس کو یقینی بنانے کی تعلیم شامل ہے۔ آج پاکستان کے تمام شہریوں، نوجوانوں، تمام سماجی و مذہبی رہنما، اساتذہ سے یہ گزارش کرتا ہوں کہ آئیے خواتین پر تشدد کے خلاف اور اسکے خاتمے کے لیے متحد ہو جائیں۔ آئیے پاکستان کی ترقی و خوشحالی کو مضبوط اور یقینی بنانے کے لیے اپنے عزم پختہ کا اعادہ کریں کہ پاکستان میں موجود ہر خاتون کسی بھی قسم کے خوف تشدد، استحصالی اور امتیازی سلوک سے آزاد ہو کر اپنی صلاحیتوں کو بروئے کار لا سکے ۔ تمام متعلقہ حکومتی ادارے، معاشرہ، سرکاری اور غیر سرکاری آرگنائزیشنز اور عالمی تعاون مل کر ہی محفوظ، انصاف پسند اورخواتین کے لیے برابری پر مشتمل ماحول کو پاکستان میں یقینی بنا سکتے ہیں.