Author: ممتاز حیدر

چین میں جینیاتی طور پر تبدیل شدہ خنزیر کا جگر انسان میں ٹرانسپلانٹ — مریض 171 دن زندہ رہا، طبی تاریخ میں سنگ میل

چین کے معالجین نے طب کی دنیا میں ایک اہم سنگ میل عبور کرلیا ہے۔ چینی ڈاکٹروں نے اعلان کیا ہے کہ انہوں نے 71 سالہ مریض کے جسم میں جینیاتی طور پر تبدیل شدہ خنزیر کا جگر ٹرانسپلانٹ کیا، جس کے بعد مریض 171 دن زندہ رہا۔ ان میں سے 38 دن اس نے خنزیر کے جگر کے ساتھ گزارے۔ یہ واقعہ طبی تاریخ میں اپنی نوعیت کا پہلا کیس ہے جو کسی مستند تحقیقی جرنل Journal of Hepatology میں شائع ہوا ہے۔

یہ جگر 11 ماہ کے ایک کلون خنزیر سے حاصل کیا گیا تھا، جس کے جینز میں 10 اہم تبدیلیاں کی گئی تھیں تاکہ انسانی جسم میں اس کے ردِ عمل یا انفیکشن کے امکانات کم کیے جا سکیں۔ یہ آپریشن چین کے شہر ہفے میں موجود First Affiliated Hospital of Anhui Medical University میں کیا گیا، جس کی سربراہی ڈاکٹر بائی چنگ سُن کر رہے تھے۔ڈاکٹر سن کے مطابق لوگ ہمیشہ کہتے تھے کہ جگر بہت پیچیدہ ہے اور اسے خنزیر سے انسان میں منتقل کرنا ممکن نہیں، لیکن اس تجربے نے ثابت کیا ہے کہ مستقبل میں یہ ممکن ہو سکتا ہے، اگر خنزیر میں کافی انسانی جینز شامل کیے جائیں۔

مریض کو ہیپاٹائٹس بی سے متعلق جگر کے نقص اور جگر کے دائیں حصے میں بڑے رسولی کا سامنا تھا۔ کیموتھراپی سے رسولی کم نہ ہو سکی اور خطرہ پیدا ہوگیا کہ وہ پھٹ سکتی ہے۔ چونکہ کوئی انسانی ڈونر دستیاب نہیں تھا، اس لیے ڈاکٹروں نے خنزیر کے جگر کا آپشن آزمایا۔ مریض اور اس کی بیٹی نے مشاورت کے بعد رضامندی ظاہر کی۔سرجنز نے رسولی نکالنے کے بعد خنزیر کا جگر مریض کے جسم میں پیوند کیا۔ آپریشن کے فوراً بعد خنزیر کا جگر سرخ رنگ میں فعال نظر آیا اور بائل (پت) کا اخراج شروع ہوگیا، جو آہستہ آہستہ بڑھتا گیا۔ پہلے ہی دن جگر کے افعال کے اشارے بہتر ہو گئے، اور کوئی ابتدائی سوزش یا ردعمل ظاہر نہیں ہوا۔دسویں دن تک مریض کے جسم نے کوئی منفی ردعمل نہیں دکھایا۔ الٹراساؤنڈ سے ثابت ہوا کہ خون کی روانی پورٹل وین، ہیپاٹک آرٹری اور وین نارمل طور پر چل رہی تھی۔

تاہم، 25 ویں دن سے مریض کے دل پر دباؤ کے آثار ظاہر ہونے لگے۔ اگلے چند دنوں میں سوزش بڑھی اور ٹیسٹوں نے ظاہر کیا کہ مریض کو پیچیدگی لاحق ہو رہی ہے، جس میں چھوٹی خون کی نالیوں میں خون کے چھوٹے لوتھڑے بننے لگتے ہیں۔37 ویں دن مریض کا بلڈ پریشر اچانک گر گیا اور دل کی دھڑکن تیز ہوگئی۔ ڈاکٹروں نے اندازہ لگایا کہ اب مریض کا اپنا جگر کافی حد تک بحال ہو چکا ہے، لہٰذا 38 ویں دن خنزیر کا جگر نکال دیا گیا۔ اس کے بعد مریض کا اپنا جگر بہتر طریقے سے کام کرتا رہا۔آپریشن کے 135 ویں دن مریض کو معدے میں خون بہنے کی شکایت ہوئی اور آخرکار 171 دن بعد وہ انتقال کر گیا۔

اس تحقیق نے سائنسدانوں کو خنزیر سے انسان میں جگر منتقل کرنے کے عمل کی ممکنات، خطرات اور حدود کے بارے میں اہم معلومات فراہم کیں۔ ماہرین کے مطابق، مستقبل میں یہ ٹیکنالوجی ان مریضوں کے لیے عارضی حل بن سکتی ہے جن کے جگر ناکارہ ہو چکے ہیں مگر وہ انسانی ڈونر کا انتظار کر رہے ہیں۔جرمنی کی Hannover Medical School کے پروفیسر ڈاکٹر ہائنر ویڈمائر نے اس تحقیق پر تبصرہ کرتے ہوئے کہایہ تجربہ ایک طرف محتاط امید کا پیغام دیتا ہے، تو دوسری طرف یہ یاد دہانی بھی ہے کہ ہمیں ابھی طویل سفر طے کرنا ہے۔ اگر مستقبل میں خنزیر کا جگر کچھ ہفتوں کے لیے مریض کے جسم کو سہارا دے سکے، تو یہ علاج میں ایک انقلابی قدم ثابت ہوگا۔

امریکا میں اس وقت ایک لاکھ سے زائد افراد اعضا کی پیوندکاری کے منتظر ہیں، جن میں سے 9 ہزار سے زیادہ صرف جگر کے منتظر ہیں۔ ماہرین کا کہنا ہے کہ خنزیر کے جین-ایڈیٹڈ اعضا مستقبل میں انسانی اعضا کی کمی کو پورا کرنے میں مدد دے سکتے ہیں، بشرطیکہ ان کے حیاتیاتی ردعمل کو مکمل طور پر قابو میں لایا جا سکے۔ڈاکٹر سن نے کہا ہمیں ایسے مریضوں اور ان کے اہل خانہ کا احترام کرنا چاہیے جو سائنس کے لیے اپنی زندگی قربان کرتے ہیں۔ انہی کی قربانیوں سے انسانیت کو نئے علاج کے دروازے کھلتے ہیں۔

اسرائیل اور حماس کے درمیان طویل اور تباہ کن جنگ کے بعد بالآخر ایک جنگ بندی معاہدے کا اعلان کر دیا گیا، جس کے بعد غزہ اور اسرائیل دونوں جانب خوشی اور جشن کے مناظر دیکھنے میں آئے۔ تاہم عوامی سطح پر اب بھی خدشات اور بے یقینی کی فضا قائم ہے کہ آیا یہ معاہدہ پائیدار ثابت ہو پائے گا یا نہیں۔

امریکی صدر ڈونلڈ ٹرمپ نے بدھ کی رات مصر کے شہر شرم الشیخ میں ہونے والے مذاکرات کے بعد اعلان کیا کہ اسرائیل اور حماس کے درمیان جنگ بندی فریم ورک کے پہلے مرحلے پر اتفاق ہو گیا ہے۔ٹرمپ کے مطابق اس منصوبے میں حماس کی تحویل میں موجود تمام اسرائیلی یرغمالیوں کی رہائی اور اسرائیلی افواج کا ایک متعین حد تک انخلا شامل ہے۔ بعد ازاں ایک قطری عہدیدار نے بھی تصدیق کی کہ یہ معاہدہ جنگ کے خاتمے، اسرائیلی یرغمالیوں اور فلسطینی قیدیوں کی رہائی اور انسانی امداد کے داخلے کی راہ ہموار کرے گا۔تاہم اب بھی کئی اہم معاملات غیر واضح ہیں، جیسے کہ حماس کا غیر مسلح ہونا، غزہ کی مستقبل کی حکمرانی، اور یہ کہ دوبارہ جھڑپیں رکوانے کی کیا ضمانتیں دی گئی ہیں۔

اس خبر کے بعد تل ابیب کے “ہوسٹیجز اسکوائر” میں ہزاروں شہری جمع ہوگئے۔ لوگ ایک دوسرے کو گلے لگا رہے تھے، نعرے لگا رہے تھے، اور اُن اسرائیلی یرغمالیوں کی واپسی کی امید پر جشن منا رہے تھے جو اب بھی غزہ میں حماس کے قبضے میں ہیں۔ایناف زنگاؤکر، جن کے بیٹے متان زنگاؤکر اب بھی یرغمال ہیں، جذباتی انداز میں نعرے لگا رہی تھیں: “ہم متان کو واپس لائیں گے!”ایک مقامی شہری ہلیل مایر نے کہا “ہمارے دل خوشی سے لبریز ہیں، یقین نہیں آتا کہ شاید اب وہ دن آ گیا ہے جب ہمارے لوگ واپس آئیں گے۔”دوسری جانب، سابق یرغمالیوں اور اُن کے اہل خانہ نے بھی جشن میں شرکت کی، مگر ان کے چہروں پر احتیاط آمیز خوشی نمایاں تھی۔

غزہ کی تباہ حال گلیوں میں بھی جنگ بندی کے اعلان پر خوشی کی لہر دوڑ گئی۔ خان یونس کے علاقے میں لوگ رات گئے ناصر اسپتال کے قریب جمع ہوئے، تالیاں بجائیں، نعرے لگائے اور ایک دوسرے کو مبارکباد دی۔علی عارف ابو عودہ نامی شہری نے بتایا “ایسا لگ رہا ہے جیسے میں اڑ سکتا ہوں۔ بس یہ خواب ہے کہ جنگ رک جائے، نقل مکانی ختم ہو، اور ہمارا ڈراؤنا خواب ختم ہو جائے۔ مگر اب ہمارے پاس نہ گھر ہیں، نہ اسکول، نہ یونیورسٹیاں، کچھ نہیں بچا۔”

اسی دوران اسرائیلی فوج نے اپنے جوانوں کو ہدایت کی ہے کہ وہ “ہر ممکن صورت حال کے لیے تیار رہیں”۔ فوج کے عربی ترجمان اویخائے ادرعی نے خبردار کیا کہ فلسطینی شہری شمالی علاقوں کی طرف واپسی نہ کریں جہاں اسرائیلی فوجی موجود ہیں۔صحافیوں کے مطابق غزہ شہر میں بمباری بدستور جاری ہے، جس سے عوام میں خوف اور بے چینی کی کیفیت برقرار ہے۔

اسرائیل میں یرغمالیوں کے اہل خانہ نے صدر ٹرمپ کا شکریہ ادا کیا اور امید ظاہر کی کہ یہ معاہدہ اُن کے پیاروں کی واپسی کا سبب بنے گا۔اوحاد بن امی، جو پہلے ہی رہائی پا چکے ہیں، نے ایک ویڈیو میں کہا “مجھے یقین نہیں آ رہا… لیکن آخرکار وہ گھر آ رہے ہیں۔”جبکہ لیران برمن، جن کے جڑواں بھائی اب بھی غزہ میں قید ہیں، نے کہا “میرے گالی اور زیوی، میں تم سے بہت محبت کرتا ہوں۔”صدر ٹرمپ کی ایک ویڈیو بھی منظرعام پر آئی جس میں وہ واشنگٹن میں یرغمالیوں کے خاندانوں سے بات کر رہے تھے، اور انہیں بتا رہے تھے کہ اُن کے پیارے پیر کے روز واپس آئیں گے۔

یہ معاہدہ ایک ایسے موقع پر ہوا ہے جب 7 اکتوبر 2023 کو ہونے والے حماس کے حملے کو دو سال مکمل ہو گئے ہیں۔ اس حملے میں کم از کم 1200 اسرائیلی ہلاک اور 251 افراد کو یرغمال بنا لیا گیا تھا۔اب بھی 48 یرغمالی حماس کی تحویل میں ہیں، جن میں سے کم از کم 20 کے زندہ ہونے کا یقین ہے۔

دوسری طرف، غزہ دو سالہ جنگ سے مکمل طور پر اجڑ چکا ہے۔ فلسطینی وزارتِ صحت کے مطابق 67 ہزار سے زائد افراد جن میں اکثریت خواتین اور بچوں کی ہے شہید ہوئے ہیں،اقوامِ متحدہ کی ایک آزاد رپورٹ میں ستمبر 2025 میں کہا گیا کہ اسرائیل نے غزہ میں نسل کشی کے جرائم کیے ہیں، جسے اسرائیلی حکومت نے سختی سے مسترد کر دیا۔

خان یونس میں ایک کم سن لڑکی نے صحافی سے کہا “ہم دو سال سے جنگ میں جی رہے ہیں۔ اب امید ہے کہ شاید ہم اپنے گھروں کو لوٹ سکیں۔ ہم بہت تھک گئے ہیں۔”واٸل رضوان نامی مقامی شخص نے صدر ٹرمپ کا شکریہ ادا کرتے ہوئے کہا “جو کوئی بھی خون بہنے سے روکنے کی کوشش میں شریک ہوا، وہ تعریف کے قابل ہے۔”جبکہ ایک اور شہری عبدالمجید عبدربّو نے کہا “پورا غزہ خوش ہے، پورا عرب خوش ہے، دنیا خوش ہے کہ آخرکار جنگ رکنے جا رہی ہے۔”تاہم غزہ کی حکومتی میڈیا آفس نے شہریوں کو خبردار کیا ہے کہ وہ سرکاری اعلان سے قبل محتاط رہیں اور اپنی نقل و حرکت محدود رکھیں۔