Author: ممتاز حیدر

قطر ایئرویز کی ایک پرواز میں 85 سالہ ویجیٹرین (سبزی خور) مسافر ڈاکٹر اشوکا جے ویرہ دورانِ پرواز دم گھٹنے سے ہلاک ہوگئے، جب انہیں پہلے سے آرڈر کیے گئے سبزی والے کھانے کے بجائے گوشت پر مشتمل کھانا پیش کیا گیا۔

یہ افسوسناک واقعہ 30 جون 2023 کو لاس اینجلس سے کولمبو جانے والی قطر ایئرویز کی طویل پرواز میں پیش آیا۔ رپورٹ کے مطابق ڈاکٹر اشوکا جے ویرہ، جو امریکہ کی ریاست کیلیفورنیا کے معروف ریٹائرڈ کارڈیالوجسٹ تھے، نے 15 گھنٹے سے زائد دورانیے کی پرواز کے لیے ویجیٹرین کھانا پہلے سے بک کرایا تھا۔پرواز کے دوران عملے نے انہیں بتایا کہ ویجیٹرین کھانے دستیاب نہیں، اور اس کے بجائے گوشت والا عام کھانا دے دیا۔تاہم، کھانا کھاتے وقت ان کا دم گھٹنے لگا اور وہ بے ہوش ہوگئے۔ فلائٹ عملے نے فوری طبی امداد کی کوشش کی، ماہرین سے رابطہ کیا، لیکن حالت مزید بگڑ گئی۔ پرواز کو ہنگامی طور پر ایڈنبرا (اسکاٹ لینڈ) اتارا گیا، جہاں ڈاکٹر جے ویرہ کو اسپتال منتقل کیا گیا۔ وہ چند دن بعد، 3 اگست 2023 کو انتقال کر گئے۔ڈاکٹروں کے مطابق ان کی موت Aspiration Pneumonia یعنی خوراک یا مائع کے سانس کی نالی میں چلے جانے سے پیدا ہونے والے پھیپھڑوں کے انفیکشن کے باعث ہوئی۔

مرنے والے کے بیٹے سوریہ جے ویرہ نے قطر ایئرویز کے خلاف غلط موت اور غفلت کا مقدمہ دائر کیا ہے۔ مقدمے میں الزام عائد کیا گیا ہے کہ ایئرلائن نے پہلے سے آرڈر کیے گئے ویجیٹرین کھانے کی فراہمی میں کوتاہی کی، اور بعد میں پیش آنے والی طبی ہنگامی صورتحال پر مناسب ردعمل نہیں دیا۔مدعی نے ایئرلائن سے 128,821 ڈالر کے ہرجانے کا دعویٰ کیا ہے، جو قانونی طور پر مقررہ کم از کم معاوضہ ہے۔مقدمے میں مزید کہا گیا ہے کہ قطر اور امریکہ دونوں مونٹریال کنونشن (Montreal Convention) کے دستخط کنندہ ممالک ہیں، جس کے تحت بین الاقوامی پروازوں میں کسی حادثے یا مسافر کی موت کی صورت میں ایئرلائنز پر سخت ذمہ داری عائد ہوتی ہے۔ اس کنونشن کے مطابق ایئرلائن کو ہلاک شدہ یا زخمی مسافروں کے لواحقین کو تقریباً 175,000 ڈالر تک کا معاوضہ ادا کرنا ہوتا ہے۔

یہ واقعہ بین الاقوامی سطح پر ایئرلائنز کی پالیسیوں، مسافروں کے غذائی تقاضوں اور خاص طور پر بزرگ یا حساس مسافروں کے لیے حفاظتی اقدامات پر سنگین سوالات اٹھا رہا ہے۔یہ پہلا موقع نہیں جب قطر ایئرویز یا دیگر ایئرلائنز میں مسافروں کو مخصوص غذائی ہدایات کے باوجود خطرناک صورتحال کا سامنا کرنا پڑا ہو۔گزشتہ سال برطانوی ریئلٹی اسٹار جیک فاؤلر کو قطر ایئرویز کی دبئی جانے والی پرواز میں نٹس والے کھانے سے شدید الرجی کا سامنا ہوا تھا، حالانکہ انہوں نے پہلے ہی اپنی الرجی سے آگاہ کر رکھا تھا۔ اسی نوعیت کا واقعہ ان کے ساتھ ایک سال قبل بھی پیش آیا تھا۔اسی طرح سنگاپور ایئرلائنز کی ایک پرواز کو رواں سال گرمیوں میں پیرس موڑنا پڑا، جب ایک 41 سالہ خاتون مسافر جھینگے سے الرجک ردعمل کے باعث شدید بیمار ہوگئیں۔

طالبان کے اقتدار میں آنے کے بعد پہلی مرتبہ افغانستان کے وزیرِ خارجہ امیر خان متقی نئی دہلی کے دورے پر پہنچ گئے ہیں۔ یہ دورہ معزول اشرف غنی حکومت کے خاتمے کے چار سال بعد بھارت اور طالبان انتظامیہ کے درمیان اعلیٰ سطحی رابطے کی سب سے بڑی مثال قرار دیا جا رہا ہے۔

یہ دورہ اُس وقت ہو رہا ہے جب پاکستان دہشت گردی کے خلاف فیصلہ کن جنگ لڑ رہا ہے اور مسلسل بھارتی حمایت یافتہ دہشت گرد نیٹ ورکس کو بے نقاب کر رہا ہے۔ پاکستانی سیکیورٹی فورسز نے حالیہ مہینوں میں متعدد کارروائیوں میں بھارتی خفیہ ایجنسی "را” سے منسلک گروہوں کے خلاف شواہد حاصل کیے ہیں۔

افغان وزیرِ خارجہ کو رواں ماہ کے آغاز میں نئی دہلی کا دورہ کرنا تھا، تاہم اقوام متحدہ کی سلامتی کونسل (یو این ایس سی) کی جانب سے عائد سفری پابندیوں کی وجہ سے یہ دورہ ملتوی ہوگیا تھا۔ بعد ازاں یو این ایس سی کی 1988 کمیٹی نے 30 ستمبر کو انہیں 9 سے 16 اکتوبر تک بھارت جانے کی عارضی اجازت دے دی،طالبان کے اکثر رہنماؤں پر اب بھی بین الاقوامی پابندیاں عائد ہیں، اور بیرونِ ملک سفر کے لیے انہیں اقوام متحدہ سے خصوصی اجازت لینا پڑتی ہے۔

کابل میں طالبان حکومت کے قیام کے بعد بھارت نے ابتدا میں محتاط رویہ اختیار کیا، تاہم گزشتہ دو برسوں میں نئی دہلی نے خاموش سفارتی رابطوں کے ذریعے طالبان انتظامیہ سے تعلقات بہتر بنانے کی کوشش کی ہے۔
بھارت کا دعویٰ ہے کہ وہ افغانستان میں "انسانی امداد” اور "عوامی روابط” کو فروغ دے رہا ہے، مگر تجزیہ کاروں کے مطابق اس کے پسِ پردہ پاکستان کے اثر و رسوخ کو کمزور کرنے کی کوشش کی جا رہی ہے۔

اسی سلسلے میں بھارتی وزیرِ خارجہ ایس جے شنکر نے 15 مئی 2025 کو امیر خان متقی سے فون پر بات کی تھی، جو طالبان کے دورِ حکومت میں بھارت اور افغانستان کے درمیان اب تک کا سب سے اعلیٰ سطحی رابطہ تھا۔

پاکستان کے سفارتی و دفاعی حلقے اس دورے کو افغانستان اور بھارت کے ممکنہ گٹھ جوڑ کے تناظر میں دیکھ رہے ہیں۔بھارت کا جنگی جنون کھل کر سامنے آ رہا ہے،بھارت ایک جانب پاکستان میں دہشت گردی کو ہوا دے رہا ہے، بلوچستان اور خیبرپختونخوا میں تخریبی نیٹ ورکس کو فنڈنگ فراہم کر رہا ہے، جبکہ دوسری جانب طالبان حکومت کو اپنے قریب لا کر ٹی ٹی پی (تحریک طالبان پاکستان) کے لیے نرم گوشہ پیدا کرنے کی کوشش کر رہا ہے، ٹی ٹی پی کے محفوظ ٹھکانے افغان سرزمین پر موجود ہیں اور کابل انتظامیہ نے اب تک ان کے خلاف کوئی عملی کارروائی نہیں کی۔

ایک جانب پاکستان دہشت گردی کے خلاف جنگ میں بھارتی نیٹ ورکس اور افغان سرزمین سے ہونے والی دراندازی کا سامنا کر رہا ہے، تو دوسری جانب بھارت اور طالبان کے بڑھتے رابطے اسلام آباد کے لیے نئے سفارتی اور سیکیورٹی خدشات کو جنم دے رہے ہیں۔تجزیہ کاروں کے مطابق آنے والے ہفتے اس حوالے سے انتہائی اہم ہوں گے، کیونکہ اگر بھارت اور افغانستان کے درمیان باضابطہ روابط مضبوط ہوتے ہیں تو اس کے براہِ راست اثرات پاکستان کے داخلی امن و استحکام پر پڑ سکتے ہیں۔