بحرین نے ایرانی میزائل اور ڈرون حملوں کی ویڈیوز بنانے پر 5 پاکستانی اور ایک بنگلہ دیشی شہری کو گرفتار کر لیا ہے
بحرینی حکام کے مطابق گرفتار افراد پر الزام ہے کہ انہوں نے ایران کے حملوں کے حق میں خوشی/ہمدردی کا اظہار کیا، سوشل میڈیا پر گمراہ کن معلومات پھیلائیں اور ایسی ویڈیوز بنائیں جو ملک کی سکیورٹی کے لیے خطرہ بن سکتی تھیں۔
حکام کا کہنا ہے کہ ان کے خلاف قومی سلامتی کو نقصان پہنچانے اور دشمن کارروائیوں کی حمایت کے الزامات کے تحت قانونی کارروائی کی جائے گی۔
وزیر قانون اعظم نذیر تارڑ نے کہا کہ خطے میں کشیدہ صورتحال ہمارے لئے بھی چیلنج ہے،پاکستان نے کوشش کی ہے تنازع کا سفارتی حل نکلے،ہم تبصرے کرتے ہوئے غیرضروری معاملات میں الجھ رہے ہیں ،آئین میں غیرذمہ دارانہ تبصروں کی اجازت نہیں۔
اعظم نذیر تارڑ نے دیگر وزرا کے ہمراہ پریس کانفرنس کرتے ہوئے کہاکہ پاکستان ایک ذمہ دار ریاست ہے، دوست ممالک پر حملوں کے معاملے کو بھی دیکھا گیا، ہم تبصرے کرتے ہوئے غیرضروری معاملات میں الجھ رہے ہیں ،دوست ممالک کی جانب سے بے چینی کااظہار کیا گیا ہے، آرٹیکل 19کے تحت ہر شہری کو اظہاررائے کی آزادی ہے،ہر شخص کو دل کی بات کرنے کا حق ہے لیکن آئین کو بھی دیکھنا ہے،وفاقی وزیر قانون اعظم نذیر تارڑ نے آرٹیکل 19پڑھ کر سنایا،انہوں نے کہاکہ قانون کے تحت اظہاررائے میں احتیاط کا دامن نہیں چھوڑیں گے،آئین میں غیرذمہ دارانہ تبصروں کی اجازت نہیں،میڈیا کا ذمہ درانہ کردار ادا کرنا ضروری ہے،سوشل میڈیا پر تبصروں کی وجہ سے دوست ملک کی جانب سے بے چینی کا اظہار ہوا ہے اور پوچھا گیا کہ کیا یہ پاکستان کا مؤقف ہے؟ اس لیے میڈیا یا سوشل میڈیا پر بات کرتے ہوئے آئین پاکستان کو ذہن میں رکھیں اور بین الاقومی سطح پر جو خارجہ پالیسی ہے اس کو بھی سامنے رکھنا ہے۔ ہمارے صحافیوں اور پاکستان اور بیرون ملک کے لوگوں سے درخواست ہے کہ وہ پاکستان کی خارجہ پالیسی پر گفتگو کرتے ہوئے آئین کو مدنظر رکھیں۔ اگر اس طرح کے بیانات گروپوں کی طرف سے دیے جاتے ہیں اور دوست ممالک تک پہنچتے ہیں اور انہیں تکلیف پہنچاتے ہیں تو ان سے گریز کیا جانا چاہیے،
اس موقع پر وزیر اطلاعات عطا تارڑ کا کہنا تھا کہ آج کل وی لاگز میں، لوگ اکثر ایسی باتیں کہتے ہیں کہ زیادہ آراء یا زیادہ رقم کمائی جائے، یہاں تک کہ دوست ممالک کے بارے میں بھی۔ لیکن میرا آئین اور حلف مجھے پابند کرتا ہے کہ میں اپنی خارجہ پالیسی پر عمل کروں۔ ہماری پالیسی واضح ہے، پاکستان کے مفادات پہلے آتے ہیں،ویلاگ میں ویوز لینے اور ٹی وی شوز میں تبصرہ میں بہت احتیاط کریں.
اسرائیل میں ایرانی بیلسٹک میزائل حملے کے نتیجے میں مزید ایک شخص ہلاک ہو گیا، جس کے بعد مجموعی ہلاکتوں کی تعداد 12 تک پہنچ گئی ہے۔
اسرائیل کی ہنگامی امدادی سروس کے مطابق پیر کے روز داغا گیا ایرانی بیلسٹک میزائل، جس میں کلسٹر ایمونیشن نصب تھی، نے بیک وقت تل ابیب کے جنوب میں متعدد مقامات کو نشانہ بنایا۔میزائل حملے کے نتیجے میں شہر یہود میں واقع ایک تعمیراتی مقام پر ایک شخص موقع پر ہی ہلاک ہو گیا، جبکہ شدید زخمی حالت میں اسپتال منتقل کیے گئے ایک اور شخص نے بعد میں دم توڑ دیا۔ہنگامی امدادی ادارے کے مطابق ایرانی بیلسٹک میزائل حملوں کے نتیجے میں اب تک اسرائیل میں کم از کم 12 افراد ہلاک ہو چکے ہیں، جبکہ متعدد افراد زخمی بھی ہوئے ہیں۔حکام کا کہنا ہے کہ حملے کے بعد ریسکیو ٹیمیں متاثرہ علاقوں میں امدادی کارروائیاں جاری رکھے ہوئے ہیں اور مزید نقصانات کا جائزہ لیا جا رہا ہے۔
عدلیہ کی سرپرستی میں بچوں کو یتیم نہیں کرسکتے، سپریم کورٹ نے سزائے موت کے خلاف اہم فیصلہ جاری کردیا، بیوی اور بیٹی کے قاتل محمد امین کی سزائے موت کو عمر قید میں تبدیل کردیا۔
سپریم کورٹ کے جج جسٹس اشتیاق ابراہیم نے سزائے موت کیخلاف تحریری فیصلہ جاری کیا۔ عدالت نے کہا کہ والد کو پھانسی دینا عدلیہ کی سرپرستی میں بچوں کو یتیم کرنے کے مترادف ہے، ریاست کو ایک بچے کی مکمل بے چارگی، خاندان کی تباہی کا معمار نہیں بننا چاہئے۔فیصلے میں کہا گیا ہے کہ اقوام متحدہ کنونشن کے تحت بچوں کے بہترین مفاد کو مدنظر رکھنا ریاست کی ذمہ داری ہے، جب وارث مقتول کا براہ راست وارث ہو تو دفعہ 306 کے تحت قصاص نافذ نہیں ہوتا، مجرم اپنی 15 سال کی بیٹی کا واحد بچ جانے والا سہارا ہے۔
بحرین کی انٹیلی جنس اور سکیورٹی اداروں نے ایک بھارتی شہری کو اسرائیل کی خفیہ ایجنسی موساد کو حساس معلومات فراہم کرنے کے الزام میں گرفتار کر لیا ہے۔
حکام کے مطابق گرفتار شخص کی شناخت نتن موہن کے نام سے ہوئی ہے جو پیشے کے لحاظ سے ٹیلی کمیونیکیشن انجینئر ہے۔بحرینی حکام کے مطابق ملزم پر الزام ہے کہ وہ ملک کے اہم اور حساس مقامات سے متعلق جغرافیائی معلومات ، تصاویر اور ویڈیوز اسرائیل کی بیرونی خفیہ ایجنسی موساد کو فراہم کر رہا تھا۔ ابتدائی تحقیقات کے مطابق اس نے مختلف مقامات کی تصویری اور عملی نوعیت کی معلومات بھی شیئر کیں جو غیر ملکی انٹیلی جنس کے لیے تجزیے اور ممکنہ اہداف کے تعین میں استعمال ہو سکتی تھیں۔سکیورٹی ذرائع کا کہنا ہے کہ فراہم کی گئی معلومات میں اسٹریٹجک مقامات کی نگرانی سے متعلق ویڈیوز اور تصاویر شامل تھیں، جنہیں ممکنہ طور پر انٹیلی جنس تجزیے اور سکیورٹی جائزوں کے لیے استعمال کیا جا سکتا تھا۔
بحرین کی وزارت داخلہ نے گرفتاری کی تصدیق کرتے ہوئے کہا ہے کہ ملزم کو حراست میں لے کر تحقیقات شروع کر دی گئی ہیں۔ تاہم وزارت نے ابھی تک اس کیس کی تکنیکی تفصیلات یا مزید تفتیشی معلومات جاری نہیں کیں۔حکام کا کہنا ہے کہ تحقیقات مکمل ہونے کے بعد مزید حقائق سامنے لائے جائیں گے
ترکی نے منگل کے روز اعلان کیا ہے کہ نیٹو کی جانب سے فضائی اور میزائل دفاع کو مضبوط بنانے کے اقدامات کے تحت امریکی پیٹریاٹ ایئر ڈیفنس سسٹم ملک کے جنوب مشرقی صوبے ملاتیا میں تعینات کر دیا گیا ہے۔
ترکی کی وزارت دفاع نے سوشل میڈیا پلیٹ فارم ایکس (ائکس) پر جاری بیان میں کہا کہ خطے میں حالیہ پیش رفت کے پیش نظر ملکی سرحدوں اور فضائی حدود کے تحفظ کے لیے ضروری اقدامات کیے جا رہے ہیں اور اس سلسلے میں نیٹو اور اتحادی ممالک سے مسلسل مشاورت جاری ہے۔بیان میں کہا گیا کہ قومی سطح پر کیے گئے اقدامات کے ساتھ ساتھ نیٹو نے بھی فضائی اور میزائل دفاعی نظام کو مزید مضبوط بنایا ہے۔ اسی فریم ورک کے تحت پیٹریاٹ دفاعی نظام اس وقت صوبہ ملاتیا میں موجود ہے اور اسے جلد آپریشنل بنانے کی تیاری کی جا رہی ہے تاکہ ترکی کی فضائی حدود کے تحفظ کو یقینی بنایا جا سکے۔
دوسری جانب ترک صدر رجب طیب اردوان نے ایران کو مزید "اشتعال انگیز اقدامات” سے باز رہنے کی تنبیہ کی ہے۔ ترک خبر رساں ادارے کے مطابق یہ بیان اس واقعے کے بعد سامنے آیا جب ایران سے داغا گیا ایک بیلسٹک میزائل ترک فضائی حدود میں داخل ہونے کی اطلاع دی گئی۔ترکی کی وزارت دفاع کا کہنا تھا کہ میزائل مشرقی بحیرہ روم میں موجود نیٹو کے فضائی اور میزائل دفاعی نظام کے ذریعے تباہ کر دیا گیا۔
تاہم ایران نے اس الزام کی تردید کرتے ہوئے کہا ہے کہ اس نے ترکی کی جانب کوئی میزائل فائر نہیں کیا۔ ایرانی وزارت خارجہ کے ترجمان اسماعیل بقائی نے اس واقعے کو ممکنہ طور پر "فالس فلیگ آپریشن” قرار دیا، تاہم انہوں نے کسی مخصوص ملک پر الزام عائد نہیں کیا۔
ایران کی پاسدارانِ انقلاب نے دعویٰ کیا ہے کہ اس نے اسرائیل کے شہر تل ابیب کے جنوب میں واقع ہیلا سیٹلائٹ کمیونیکیشن سینٹر کو ڈرون حملے میں تباہ کر دیا ہے۔
آئی آر جی سی کے مطابق حملہ آور ڈرونز کے ذریعے اس مرکز کو نشانہ بنایا گیا جو اسرائیلی فضائی اڈوں کو لڑاکا طیاروں کے ساتھ منسلک کرنے میں اہم کردار ادا کرتا تھا۔ایرانی بیان میں کہا گیا ہے کہ یہ تنصیب اسرائیل کے فوجی سیٹلائٹ کنٹرول اور مواصلاتی نیٹ ورک کا حصہ تھی اور اسے تباہ کر کے اسرائیلی فوج کے کمانڈ اور رابطہ نظام کو نقصان پہنچانے کی کوشش کی گئی۔ایرانی حکام کا کہنا ہے کہ مذکورہ مرکز کے ذریعے اسرائیلی فضائیہ کے جنگی طیاروں اور مختلف فضائی اڈوں کے درمیان رابطہ برقرار رکھا جاتا تھا، جسے اب حملے کے نتیجے میں شدید نقصان پہنچا ہے۔
ایران کے شہر خمین میں اسرائیل اور امریکا نے ایک اور اسکول پر میزائل حملہ کردیا۔
ایرانی میڈیا کے مطابق خمین شہر میں ایک اور اسکول پر میزائل حملہ کیا گیا، حملے میں ڈاکٹر حفیظ خمینی اسکول اور ملحقہ رہائشی عمارتیں تباہ ہوگئی۔ایرانی میڈیا کا کہنا ہے کہ بمباری سے جانی نقصانات کی اطلاع نہیں ملی۔دوسری جانب ایران کے دارالحکومت تہران میں ریسالت اسکوائر کے علاقے میں ایک رہائشی عمارت پر ہونے والے مبینہ فضائی حملے کے بعد امدادی ٹیمیں ملبے تلے دبے افراد کو نکالنے کے لیے بھرپور کوششیں کر رہی ہیں۔ایرانی سرکاری میڈیا کے مطابق حملے کے بعد کئی منزلہ عمارت کو شدید نقصان پہنچا اور متعدد افراد ملبے تلے پھنس گئے۔ ایرانی ریڈ کریسنٹ سوسائٹی کی جانب سے جاری کی گئی ویڈیو میں امدادی کارکنوں کو تباہ شدہ عمارت کے اندر سیڑھیوں کے ذریعے اوپر جاتے اور پھنسے ہوئے افراد کو تلاش کرتے دیکھا جا سکتا ہے۔ ویڈیو میں ایک ریسکیو اہلکار کو یہ کہتے ہوئے بھی سنا جا سکتا ہے کہ پانچویں منزل پر لوگ پھنسے ہوئے ہیں۔
ویڈیو مناظر میں عمارت کا ڈھانچہ بری طرح تباہ دکھائی دیتا ہے، جہاں کنکریٹ کے ملبے کے ڈھیر لگے ہوئے ہیں اور عمارت کی آہنی سلاخیں باہر نکلی ہوئی نظر آتی ہیں۔ عمارت کے صحن میں بھی ملبہ پھیلا ہوا ہے جس کے باعث امدادی کارروائیاں مشکل ہو گئی ہیں۔ایرانی ریڈ کریسنٹ سوسائٹی نے سوشل میڈیا پلیٹ فارم ایکس پر اپنے بیان میں کہا ہے کہ “ریڈ کریسنٹ اور فائر فائٹنگ یونٹس تہران کے ریسالت علاقے میں امریکی اور اسرائیلی فضائی حملوں سے متاثرہ مقام پر امدادی کارروائیاں جاری رکھے ہوئے ہیں۔”
ایران کی نیم سرکاری خبر رساں ایجنسی تسنیم کے مطابق اس حملے میں تقریباً 40 افراد ہلاک ہو گئے ہیں۔ رپورٹ کے مطابق یہ حملہ ایسے وقت میں ہوا جب امریکہ اور اسرائیل ایران کے مختلف علاقوں، بشمول دارالحکومت تہران، میں فضائی کارروائیاں جاری رکھے ہوئے ہیں۔
خطے میں امریکی تنصیبات پر بھی تہران کے حملے جاری ہیں، دوحا میں دھماکے سنے گئے، سعودی وزارت دفاع نے 4 ڈرون مار گرانے کا دعویٰ کیا ہے۔
رپورٹ کے مطابق بحرین میں رہائشی عمارت پر ڈرون حملے میں ایک شہری جاں بحق اور متعدد زخمی ہوگئے۔یو اے ای نے 12 میزائل اور 17 ڈرون مار گرانے کا دعویٰ کیا ہے، عراق کے شہر موصل میں عراقی تنظیم کے دفتر پر بھی ڈرون حملہ کیا گیا،آپریشن وعدہ صادق کی 33 ویں لہر کے دوران ایران نے اسرائیل پر القدر اور خرم شہر بیلسٹک میزائلوں سے حملے کیے، کلسٹر بموں کا بھی استعمال کیا گیا، 2 صیہونی شہری ہلاک ہوگئے۔
ایرانی پاسداران انقلاب نے واضح کیا ہے کہ جنگ کب بند ہوگی یہ اب ہم طے کریں گے، خطے میں سب محفوظ ہونگے یا کوئی نہیں ہوگا۔ایران کی پاسداران انقلاب نے امریکی صدر کے بیان پر ردعمل دیدیا۔ ترجمان نے کہا کہ ایران سے متعلق امریکی صدر کی باتیں مضحکہ خیز ہیں، حملے جاری رہے تو خطے سے تیل برآمد نہیں ہونے دیں گے۔ایرانی نائب وزیر خارجہ نے کہا کہ فرانس، چین اور روس سمیت کچھ ممالک نے سیزفائر کیلئے ہم سے رابطہ کیا ہے، جنگ بندی کیلئے ہماری پہلی شرط جارحیت کا خاتمہ ہے۔ایرانی وزیر خارجہ عباس عراقچی کا کہنا ہے امریکا کے ساتھ دوبارہ مذاکرات ایجنڈے پر نہیں، خطے میں کشیدگی کے ذمہ دار امریکا اور اسرائیل ہیں، ایران پر مسلط جنگ میں ہماری کارروائیاں دفاعی ہیں۔
عالمی منڈی میں تیل کی قیمتوں میں نمایاں کمی دیکھنے میں آئی ہے، جس کی بڑی وجہ امریکی صدر ڈونلڈ ٹرمپ کا جنگ کے جلد خاتمے سے متعلق بیان قرار دیا جا رہا ہے۔
میڈیا رپورٹس کے مطابق صدر ٹرمپ کے بیان کے بعد عالمی مارکیٹ میں خام تیل کی قیمتوں میں تیزی سے کمی آنا شروع ہوگئی۔ رپورٹ کے مطابق کروڈ آئل کی قیمت 100 ڈالر فی بیرل سے نیچے آگئی ہے۔امریکی خام تیل (ویسٹ ٹیکساس انٹرمیڈیٹ) کی قیمت میں تقریباً 9 فیصد کمی ریکارڈ کی گئی، جس کے بعد اس کی قیمت کم ہو کر 86 ڈالر فی بیرل تک پہنچ گئی۔دوسری جانب برطانوی برینٹ کروڈ آئل کی قیمت بھی نمایاں کمی کے بعد 89 ڈالر فی بیرل پر ٹریڈ کرنے لگی۔ اس سے قبل برینٹ کروڈ آئل کی قیمت بڑھ کر 119 ڈالر فی بیرل تک جا پہنچی تھی۔
معاشی ماہرین کے مطابق اگر خطے میں کشیدگی میں مزید کمی آتی ہے اور جنگ کے خاتمے کے امکانات مضبوط ہوتے ہیں تو عالمی توانائی مارکیٹ میں تیل کی قیمتوں میں مزید استحکام یا کمی دیکھنے کو مل سکتی ہے۔تجزیہ کاروں کا کہنا ہے کہ عالمی منڈی میں تیل کی قیمتیں زیادہ تر جغرافیائی سیاسی صورتحال، خاص طور پر مشرقِ وسطیٰ میں جاری کشیدگی، سے براہِ راست متاثر ہوتی ہیں۔