Author: ممتاز حیدر

لندن: برطانیہ کے وزیراعظم کیئر اسٹارمر نے اپنے عہدے سے مستعفی ہونے کا اعلان کرتے ہوئے کہا ہے کہ وہ لیبر پارٹی کی قیادت بھی چھوڑ رہے ہیں۔ اپنے فیصلے سے بادشاہ کو بھی آگاہ کر دیا گیا ہے اور لیبر پارٹی کی نئی قیادت کے انتخاب کے لیے باقاعدہ شیڈول جاری کر دیا گیا ہے۔

کیئر اسٹارمر نے کہا کہ لیبر پارٹی کی نیشنل ایگزیکٹو کمیٹی کو قیادت کے انتخاب کا عمل شروع کرنے کی ہدایت کر دی گئی ہے۔ پارٹی قیادت کے لیے نامزدگیاں 9 جولائی سے وصول کی جائیں گی جبکہ 16 جولائی کو پارلیمنٹ کی گرمیوں کی تعطیلات سے قبل نامزدگیوں کا مرحلہ مکمل ہو جائے گا۔انہوں نے کہا کہ اگر قیادت کے لیے مقابلہ ہوا تو ستمبر میں پارلیمنٹ کے دوبارہ اجلاس سے قبل نئی لیبر قیادت منتخب ہو جائے گی، جس سے حکومتی امور میں تسلسل برقرار رکھنے میں مدد ملے گی۔

اپنے الوداعی خطاب میں اسٹارمر نے اپنی حکومت کی کارکردگی کا ذکر کرتے ہوئے کہا کہ ان کے دور میں معیشت مضبوط ہوئی، اجرتوں میں افراطِ زر سے زیادہ اضافہ ہوا، سرمایہ کاری میں اضافہ دیکھنے میں آیا اور بنیادی ڈھانچے کے متعدد منصوبے شروع کیے گئے۔ ان کا کہنا تھا کہ قومی صحت کے نظام (این ایچ ایس) میں انتظار کی فہرستوں میں نمایاں کمی آئی، کارکنوں اور کرایہ داروں کے حقوق کو بہتر بنایا گیا جبکہ دفاعی اخراجات میں سرد جنگ کے بعد سب سے بڑا اضافہ کیا گیا۔

کیئر اسٹارمر نے کہا کہ انہوں نے اس سوال کے جواب کو قبول کر لیا ہے کہ آیا وہ آئندہ عام انتخابات میں لیبر پارٹی کی قیادت کے لیے موزوں ترین شخصیت ہیں یا نہیں۔ انہوں نے کہا کہ پارلیمانی پارٹی کی رائے کا احترام کرتے ہوئے وہ خوش دلی کے ساتھ لیبر پارٹی کی قیادت چھوڑ رہے ہیں۔اسٹارمر نے مزید بتایا کہ انہوں نے اپنے فیصلے سے متعلق آج صبح بادشاہ کنگ چارلس کو بھی آگاہ کر دیا ہے۔انہوں نے کہا کہ وہ نئے قائد کے انتخاب کے عمل کی تکمیل تک وزیراعظم کے عہدے پر برقرار رہیں گے اور اقتدار کی منظم اور ہموار منتقلی کو یقینی بنانے کے لیے ہر ممکن اقدام کریں گے۔برطانوی وزیراعظم نے اس عزم کا بھی اظہار کیا کہ وہ اپنے جانشین کو مکمل، واضح اور غیر مشروط حمایت فراہم کریں گے تاکہ حکومت اور پارٹی کے امور میں تسلسل برقرار رہے۔

سیاسی مبصرین کے مطابق کیئر اسٹارمر کے استعفے کے اعلان کے بعد لیبر پارٹی میں نئی قیادت کے انتخاب کے لیے سرگرمیاں تیز ہونے کا امکان ہے، جبکہ برطانوی سیاست میں اس پیش رفت کو ایک اہم موڑ قرار دیا جا رہا ہے۔

سیاسی مبصرین کے مطابق اسٹارمر کے استعفے کے اعلان کے بعد برطانوی سیاست میں ایک نئے مرحلے کا آغاز ہو گیا ہے۔ لیبر پارٹی کے اندر قیادت کی دوڑ تیز ہونے کا امکان ہے جبکہ حکومت کے مستقبل اور معاشی پالیسیوں کے حوالے سے بھی اہم سوالات جنم لے رہے ہیں۔

استعفے کی خبروں سے قبل ڈاؤننگ اسٹریٹ میں غیر معمولی سرگرمی دیکھی گئی، جہاں میڈیا نمائندوں اور سیاسی شخصیات کی بڑی تعداد جمع ہو گئی تھی۔ لیبر پارٹی کی بعض شخصیات گزشتہ چند روز سے اسٹارمر پر مستعفی ہونے کے لیے دباؤ ڈال رہی تھیں، جس کے بعد ان کے اس اعلان کو برطانوی سیاست میں ایک اہم پیش رفت قرار دیا جا رہا ہے۔

لندن: برطانیہ کے دارالحکومت لندن میں عرب اور لبنانی ثقافت کی پہچان سمجھے جانے والے معروف لبنانی ریسٹورنٹ گروپ ماروش کے بارے میں اطلاعات سامنے آئی ہیں کہ کمپنی انتظامی نگرانی ے مرحلے میں داخل ہو گئی ہے۔ تاہم ریسٹورنٹ انتظامیہ نے ان خبروں کے باوجود اپنے صارفین کو یقین دہانی کرائی ہے کہ کاروبار معمول کے مطابق جاری ہے اور مستقبل میں بھی خدمات فراہم کرنے کا عزم برقرار ہے۔

رپورٹس کے مطابق لبنانی نژاد میاں بیوی معروف اور ہدیٰ ابوزکی نے 1981 میں ماروش کی بنیاد رکھی تھی۔ یہ جوڑا لبنان کی خانہ جنگی کے دوران لندن منتقل ہوا تھا اور اس نے برطانوی عوام کو مستند لبنانی کھانوں اور ثقافت سے روشناس کرانے کے لیے ایج ویئر روڈ پر پہلا ریسٹورنٹ قائم کیا۔چند ہی برسوں میں ماروش لندن کے عرب کمیونٹی مراکز میں شمار ہونے لگا اور اس نے برطانوی اور عرب صارفین کی بڑی تعداد کو اپنی جانب متوجہ کیا۔ ایج ویئر روڈ پر قائم اس کا مرکزی ریسٹورنٹ اپنی پرجوش فضا، رات گئے تک سروس، لبنانی موسیقی اور روایتی تفریحی پروگراموں کی وجہ سے خاص شہرت رکھتا تھا۔

میڈیا رپورٹس میں دعویٰ کیا گیا کہ لندن گزٹ میں شائع ہونے والے ایک نوٹس کے بعد کمپنی انتظامی عمل میں داخل ہو چکی ہے، تاہم ماروش انتظامیہ نے اس حوالے سے براہِ راست کوئی وضاحت نہیں کی۔ ریسٹورنٹ کی جانب سے جاری بیان میں کہا گیا کہ ’’ماروش بدستور کھلا ہے اور معمول کے مطابق اپنے صارفین کی خدمت کر رہا ہے۔ ہم 1981 سے لندن کا حصہ ہیں اور آنے والے کئی برسوں تک اپنے مہمانوں کی میزبانی جاری رکھنے کے لیے پُرعزم ہیں۔‘‘

دوسری جانب مالی دستاویزات سے ظاہر ہوتا ہے کہ کمپنی گزشتہ چند برسوں سے مالی دباؤ کا سامنا کر رہی تھی۔ مارچ 2024 کو ختم ہونے والے مالی سال کے دوران ماروش کو 34 لاکھ پاؤنڈ سے زائد خالص نقصان برداشت کرنا پڑا، جبکہ آڈیٹرز نے بھی کمپنی کے مستقبل میں کاروبار جاری رکھنے کی صلاحیت کے حوالے سے خدشات کا اظہار کیا تھا۔

ماہرین کے مطابق برطانیہ کی مہمان نوازی اور ریسٹورنٹ انڈسٹری اس وقت بڑھتی ہوئی آپریٹنگ لاگت، افرادی قوت کی کمی اور صارفین کے بدلتے ہوئے اخراجاتی رجحانات جیسے چیلنجز سے دوچار ہے، جس کے باعث متعدد کاروبار مشکلات کا سامنا کر رہے ہیں۔تاحال منتظمین کی جانب سے کمپنی کی مالی مشکلات کی وجوہات یا ماروش برانڈ کے مستقبل کے بارے میں کوئی باضابطہ بیان جاری نہیں کیا گیا، تاہم ریسٹورنٹ انتظامیہ کا کہنا ہے کہ وہ اپنے صارفین کو بہترین لبنانی کھانوں اور مہمان نوازی کی روایت فراہم کرنے کے لیے پُرعزم ہے