Author: ممتاز حیدر

اسلام آباد: پاکستان پیپلز پارٹی پارلیمنٹرینز کی مرکزی ترجمان شازیہ مری نے ایران اور امریکہ کے درمیان ہونے والے معاہدے کو خطے میں امن، استحکام اور سفارتی پیش رفت کی جانب ایک مثبت قدم قرار دیتے ہوئے کہا ہے کہ پاکستان ہمیشہ سے مذاکرات، سفارتکاری اور پرامن بقائے باہمی کا حامی رہا ہے۔

اپنے بیان میں شازیہ مری نے کہا کہ صدرِ پاکستان، وزیراعظم اور فیلڈ مارشل عاصم منیر کی قیادت نے قومی سلامتی اور سفارتی محاذ پر پاکستان کے مؤقف کو مؤثر انداز میں عالمی سطح پر اجاگر کیا۔ انہوں نے کہا کہ فیلڈ مارشل عاصم منیر کے مؤثر رابطوں اور سفارتی کاوشوں کو بین الاقوامی سطح پر سراہا جا رہا ہے۔شازیہ مری کا کہنا تھا کہ فیلڈ مارشل عاصم منیر نے قومی قیادت کے ساتھ مل کر ایران اور امریکہ کے درمیان کشیدگی کم کرنے اور مذاکرات کی راہ ہموار کرنے میں اہم کردار ادا کیا۔ انہوں نے کہا کہ پاکستان نے ہمیشہ جنگ کے بجائے امن، استحکام اور باہمی احترام کی پالیسی اپنائی ہے اور عالمی برادری کو بھی تنازعات کے حل کے لیے سفارتکاری اور مذاکرات کو اولین ترجیح دینی چاہیے۔انہوں نے کہا کہ پاکستان کی متوازن اور ذمہ دار خارجہ پالیسی کو دنیا بھر میں پذیرائی حاصل ہو رہی ہے، جبکہ بھارتی عصبیت، جنگی جنون اور ہٹ دھرمی جنوبی ایشیا کے امن کے لیے سب سے بڑا خطرہ ہے۔ ان کا کہنا تھا کہ بھارت کو خطے میں کشیدگی بڑھانے کے بجائے امن اور مذاکرات کی راہ اختیار کرنی چاہیے۔

شازیہ مری نے مزید کہا کہ پاکستان نے ہر مشکل وقت میں ایک ذمہ دار ریاست ہونے کا عملی ثبوت دیا ہے اور امن ہی ترقی، خوشحالی اور علاقائی تعاون کی بنیاد ہے۔ انہوں نے کہا کہ پاکستان کی مسلح افواج اور سیاسی قیادت قومی سلامتی کے تحفظ کے لیے مکمل طور پر یکجہت ہیں جبکہ قومی مفادات پر پوری قوم ایک صفحے پر کھڑی ہے۔انہوں نے کہا کہ پاکستان عالمی امن، اقتصادی تعاون اور مشترکہ ترقی کے وژن پر یقین رکھتا ہے اور سفارتکاری ہی پائیدار امن کا واحد راستہ ہے، جبکہ طاقت کا استعمال مسائل کا مستقل حل نہیں۔ شازیہ مری نے کہا کہ پاکستان نے ہمیشہ اقوام متحدہ کے منشور اور بین الاقوامی قوانین کی پاسداری کی ہے۔انہوں نے کہا کہ چیئرمین بلاول بھٹو زرداری نے بھارتی جارحیت کے خلاف عالمی سطح پر متحرک سفارتکاری کے ذریعے پاکستان کے مؤقف کو مؤثر انداز میں دنیا کے سامنے پیش کیا۔ شازیہ مری کے مطابق پاکستان پیپلز پارٹی خطے میں امن، جمہوریت اور عوامی خوشحالی کی سیاست پر یقین رکھتی ہے اور دنیا کو نفرت، انتہا پسندی اور جنگی بیانیے کے بجائے مفاہمت، تعاون اور باہمی احترام کو فروغ دینا ہوگا۔انہوں نے اس عزم کا اظہار کیا کہ جنوبی ایشیا کے عوام امن، ترقی اور خوشحالی کے مستحق ہیں اور تمام تنازعات کا حل مذاکرات اور سفارتکاری کے ذریعے ہی ممکن ہے۔

پاکستان انفارمیشن کمیشن نے وزیراعظم کے ہیلی کاپٹر کے استعمال اور اس پر آنے والے اخراجات کی تفصیلات جاری کرنے کا حکم دیتے ہوئے متعلقہ اداروں سے 2017 سے اب تک کا مکمل ریکارڈ 10 روز کے اندر طلب کر لیا ہے۔

کمیشن کی جانب سے جاری فیصلے کے مطابق وزیراعظم کے ہیلی کاپٹر کی پروازوں، ایندھن کے اخراجات، مرمت و دیکھ بھال اور عملے سے متعلق تمام معلومات فراہم کی جائیں گی۔ یہ فیصلہ معلومات تک رسائی سے متعلق درخواست پر کیا گیا۔فیصلے میں وفاقی حکومت کے اس مؤقف کو بھی مسترد کر دیا گیا جس میں قومی سلامتی اور قانونی استثنیٰ کی بنیاد پر معلومات فراہم کرنے سے انکار کیا گیا تھا۔ کمیشن نے قرار دیا کہ طلب کی گئی معلومات نہ تو دفاعی نوعیت کی ہیں اور نہ ہی ان کا تعلق کسی حساس قومی سلامتی کے معاملے سے ہے۔پاکستان انفارمیشن کمیشن کا کہنا ہے کہ عوامی وسائل کے استعمال سے متعلق معلومات عوام کا حق ہیں، اس لیے متعلقہ ریکارڈ مقررہ مدت کے اندر فراہم کیا جانا چاہیے۔

واضح رہے کہ حال ہی میں وزیراعظم نے وفاقی حکومت کے اخراجات میں کمی کے لیے ایک کمیٹی بھی تشکیل دی تھی، جبکہ سربراہانِ مملکت کے اخراجات کے تعین کے لیے قانون سازی کی ہدایت بھی جاری کی گئی تھی۔ ایسے میں وزیراعظم کے ہیلی کاپٹر کے استعمال اور اس پر ہونے والے اخراجات کی تفصیلات منظرِ عام پر آنے سے حکومتی اخراجات کے حوالے سے مزید شفافیت متوقع ہے۔

پاکستان انٹرنیشنل ایئرلائنز (پی آئی اے) کی نئی انتظامیہ نے فضائی میزبانوں کے لیے دورانِ ڈیوٹی سگریٹ نوشی پر مکمل پابندی عائد کر دی ہے۔ اس حوالے سے باقاعدہ حکم نامہ بھی جاری کر دیا گیا ہے جس میں عملے کو نئی ہدایات سے آگاہ کیا گیا ہے۔

جاری کردہ حکم نامے کے مطابق فضائی میزبان اب اپنے ہینڈ کیری یا دیگر سامان میں سگار، سگریٹ اور تمباکو کی مصنوعات ساتھ نہیں لے جا سکیں گے۔ انتظامیہ نے واضح کیا ہے کہ یہ اقدام پیشہ ورانہ معیار کو بہتر بنانے اور بین الاقوامی فضائی ضوابط کے مطابق نظم و ضبط کو یقینی بنانے کے لیے اٹھایا گیا ہے۔حکم نامے میں مزید کہا گیا ہے کہ فضائی میزبان دورانِ ڈیوٹی ہوٹلوں، عوامی مقامات یا کسی بھی ایسی جگہ پر سگریٹ نوشی نہیں کر سکیں گے جہاں وہ سرکاری فرائض انجام دے رہے ہوں۔ انتظامیہ نے ہدایت کی ہے کہ تمام عملہ نئی پالیسی پر سختی سے عمل درآمد کو یقینی بنائے۔

یاد رہے کہ حالیہ عرصے میں پی آئی اے کے بعض فضائی میزبان مختلف تنازعات کی وجہ سے خبروں میں رہے ہیں، جن میں دبئی سے ملتان آنے والی پرواز کے عملے سے قیمتی موبائل فونز کی برآمدگی اور ٹورنٹو پرواز پر تعینات ایک فضائی میزبان کے کینیڈا میں لاپتا ہونے کے واقعات بھی شامل ہیں۔ نئی انتظامیہ کی جانب سے جاری کردہ یہ اقدام ادارے میں نظم و ضبط اور پیشہ ورانہ معیار کو مزید مضبوط بنانے کی کوشش قرار دیا جا رہا ہے۔

قومی اسمبلی اجلاس میں حکومتی اور اپوزیشن اراکین کے درمیان شدید تلخ کلامی دیکھنے میں آئی، جہاں وفاقی وزیر رانا تنویر حسین اور تحریک انصاف کے ارکان کے درمیان جملوں کا تبادلہ گالم گلوچ تک جا پہنچا۔ اس دوران اسپیکر قومی اسمبلی مسلسل مداخلت کرتے ہوئے صورتحال کو قابو میں لانے کی کوشش کرتے رہے۔

اجلاس کے دوران اپوزیشن کی تنقید کے جواب میں رانا تنویر حسین نے تحریک انصاف کو چیلنج دیتے ہوئے کہا کہ بانی پی ٹی آئی کو ان کے مقابلے میں الیکشن لڑوایا جائے۔ انہوں نے مزید کہا کہ تحریک انصاف کے ساتھ جو کچھ ہو رہا ہے وہ "مکافاتِ عمل” ہے، جبکہ حکومتی ارکان بھی عوام کے ووٹوں سے منتخب ہو کر ایوان میں آئے ہیں۔ رانا تنویر کے ریمارکس پر اپوزیشن ارکان نے سخت ردعمل دیا جس سے ایوان کا ماحول مزید کشیدہ ہوگیا۔بعد ازاں رانا تنویر حسین نے اپنے الفاظ پر تحریک انصاف کے ارکان سے معذرت کرلی، جسے چیئرمین پی ٹی آئی نے قبول کرتے ہوئے کہا کہ وہ معذرت کو تسلیم کرتے ہیں۔

دوسری جانب اجلاس کے دوران وزیر مملکت برائے داخلہ طلال چوہدری اور اپوزیشن ارکان کے درمیان بھی تلخ جملوں کا تبادلہ ہوا۔ طلال چوہدری کا کہنا تھا کہ اگر ایوان میں بحث جاری ہے تو شور شرابے کا آغاز اپوزیشن نے کیا، اور اگر حکومتی رکن کی تقریر کے دوران ہنگامہ آرائی کی جائے گی تو حکومت بھی جواب دے گی۔وزیر مملکت کے ریمارکس کے بعد ایوان میں کشیدگی مزید بڑھ گئی۔ اس موقع پر رکن اسمبلی عامر مگسی نے اسپیکر کو مخاطب کرتے ہوئے کہا کہ معاملہ حد سے بڑھ رہا ہے اور اسے فوری طور پر روکا جائے۔ایوان میں ہنگامہ آرائی اور شور شرابے کے باعث اپوزیشن رکن زین قریشی اپنا خطاب مکمل نہ کر سکے، جبکہ اسپیکر نے بارہا ارکان کو تحمل اور پارلیمانی آداب کا مظاہرہ کرنے کی ہدایت کی۔