Author: ممتاز حیدر

پاکستان میں امن و استحکام کیلئے غیر قانونی افغان مہاجرین کی واپسی ناگزیرہو چکی

پاکستان نے گزشتہ پانچ دہائیوں سے انسانی ہمدردی کی بنیاد پر لاکھوں افغان پناہ گزینوں کی میزبانی کی ، دوحہ معاہدے کے بعد افغانستان سے تمام غیر ملکی افواج کا انخلا ہو ا اور خانہ جنگی کا خاتمہ ہوا،افغان مہاجرین کا پاکستان میں رہنے کے لیے اب کوئی جواز باقی نہیں رہا،شواہد سے ثابت ہے کہ افغان پناہ گزینوں کے کچھ عناصر پاکستان میں دہشتگردی اور دیگر جرائم میں ملوث ہیں،پاکستان نے غیر قانونی افغان مہاجرین کی واپسی کیلئے تمام تر سہولیات فراہم کی

اب تک پاکستان چھوڑنے والے غیر قانونی افغان باشندوں کی تعداد 1,447,709 تک پہنچ چکی ہے،ستمبر 2023 سے جاری افغان مہاجرین کی واپسی کے عمل کیلئے 31اگست2025 کی ڈیڈلائن مقرر کی گئی تھی،پاکستان میں اب بھی تقریباً 40لاکھ سے زیادہ غیر قانونی اور افغان سٹیزن کارڈ ہولڈر مہاجرین مقیم ہیں ،غیر قانونی طور پر مقیم اور افغان سٹیزن کارڈ ہولڈرز کے خلاف قانونی کارروائی عمل میں لائی جا رہی ہے ،دیگر خودمختار ممالک کی طرح پاکستان کو اپنے قومی مفادات، امن اور داخلی استحکام کو یقینی بنانے کا حق حاصل ہے

انسداد دہشت گردی عدالت راولپنڈی نے بانی پی ٹی آئی کی بہن علیمہ خان کے قابلِ ضمانت وارنٹِ گرفتاری جاری کردیے۔

علیمہ خان سمیت 10 ملزمان کے خلاف 26 نومبر کے احتجاج پر تھانہ صادق آباد میں درج مقدمے کی سماعت ہوئی، اس موقع پر علیمہ خان کے علاوہ باقی ملزمان عدالت میں پیش ہوئے تھے،علیمہ خان کی جانب سے ان کے وکیل فیصل ملک اور حسنین سنبل نے حاضری سے استثنیٰ کی درخواست دائر کی جسے عدالت نے خارج کردیا،عدالت میں پراسیکیوٹر ظہیر شاہ نے کہا کہ وکیل فیصل ملک اور حسنین سنبل کا علیمہ خان کے کیس میں وکالت نامہ ہی جمع نہیں، دونوں وکلاء علیمہ خان کی طرف سے حاضری سے استثنیٰ کی درخواست نہیں دے سکتے،بعدازاں عدالت نے علیمہ خان کے قابلِ ضمانت وارنٹ گرفتاری جاری کر کے سماعت 11 اکتوبر تک ملتوی کردی۔

پاکستان نے دنیا کے چھ بڑے بین الاقوامی مالیاتی اداروں کے ساتھ ریکو ڈک منصوبے کی ترقی کے لیے 3.5 ارب ڈالر کے فنانسنگ پیکج کو حتمی شکل دے دی ہے، جو ملک کے سب سے اہم معدنیاتی منصوبوں میں سے ایک کے لیے ایک بڑی پیش رفت قرار دی جا رہی ہے۔

ذرائع کے مطابق یہ فنانسنگ پیکج امریکی ایکسپورٹ امپورٹ بینک (US EXIM Bank)، ایشیائی ترقیاتی بینک ، یورپی ترقیاتی بینک سمیت دیگر تین بین الاقوامی مالیاتی اداروں کے ساتھ طے پایا ہے۔ اس کے تحت فنڈز کی ادائیگی آئندہ 45 سے 90 دنوں میں شروع ہونے کا امکان ہے۔ریکو ڈک منصوبے کا کل تخمینہ 7.7 ارب ڈالر ہے، جس میں سے ابتدائی فنانسنگ اب مکمل ہو چکی ہے۔ منصوبے پر کینیڈین کمپنی بیریک گولڈ کا 55 فیصد شیئر ہے، جب کہ باقی 45 فیصد حصہ پاکستان کے اداروں آئل اینڈ گیس ڈویلپمنٹ کمپنی لمیٹڈ ، پاکستان پیٹرولیم لمیٹڈ اور بلوچستان حکومت کے پاس ہے۔

ذرائع کے مطابق اس مالی معاہدے کے تحت حاصل ہونے والے قرضوں میں چار سے پانچ سال کی رعایتی مدت اور بارہ سالہ ادائیگی کی مدت شامل ہے، جبکہ شرحِ سود سنگل ڈیجٹ یعنی انتہائی سازگار سطح پر رکھی گئی ہے۔

یہ منصوبہ بلوچستان کے ضلع چاغی میں واقع ریکو ڈک کے تانبے اور سونے کے ذخائر کی کان کنی اور پراسیسنگ کے لیے تیار کیا جا رہا ہے۔ منصوبہ 2028 میں پیداوار کے آغاز کے بعد پاکستان کی معیشت میں انقلاب لانے کی صلاحیت رکھتا ہے۔ماہرین کے مطابق ریکو ڈک سے آئندہ 25 سے 30 سالوں میں تقریباً 53 ارب ڈالر کی آمدن متوقع ہے، جس سے وفاقی حکومت اور بلوچستان حکومت دونوں کو نمایاں مالی فوائد حاصل ہوں گے۔ اس منصوبے سے مقامی روزگار کے ہزاروں مواقع پیدا ہوں گے اور بلوچستان کے پسماندہ علاقوں میں بنیادی ڈھانچے، تعلیم اور صحت کے شعبوں میں بھی ترقی متوقع ہے۔

وزارتِ خزانہ کے ایک اعلیٰ عہدیدار نے تصدیق کی ہے کہ “یہ فنانسنگ معاہدہ نہ صرف ریکو ڈک منصوبے کی تکمیل کو یقینی بنائے گا بلکہ پاکستان کے بین الاقوامی سرمایہ کاروں پر اعتماد کی بحالی کا مظہر بھی ہے۔”انہوں نے مزید کہا کہ حکومت اس منصوبے کو “پاکستان کے معدنیاتی شعبے میں گیم چینجر” قرار دے رہی ہے، جو مستقبل میں ملکی برآمدات اور زرمبادلہ کے ذخائر میں خاطر خواہ اضافہ کرے گا۔

ماہرین کا کہنا ہے کہ ریکو ڈک کی فنانسنگ پاکستان کے معدنیاتی شعبے میں غیر ملکی سرمایہ کاری کے نئے دروازے کھولنے کے مترادف ہے، جو آنے والے برسوں میں ملکی معیشت کے لیے ایک مضبوط ستون ثابت ہو سکتی ہے۔

وفاقی وزیر داخلہ محسن نقوی کل وزیراعظم شہباز شریف سے اہم ملاقات کریں گے جس میں وہ صدرِ مملکت آصف علی زرداری کا خصوصی پیغام پہنچائیں گے

یہ ملاقات ایسے وقت میں ہونے جا رہی ہے جب پیپلز پارٹی نے وزیراعلیٰ پنجاب کے حالیہ بیانات اور حکومتی ترجمانوں کے الزامات پر ناراضی کے باعث سینیٹ اور قومی اسمبلی میں کاروائی کا بائیکاٹ کیا ہے،ذرائع کے مطابق، صدرِ مملکت آصف علی زرداری نے وزیر داخلہ کو ہدایت دی ہے کہ وہ پنجاب اور سندھ حکومت کے درمیان پیدا ہونے والے تناؤ کو کم کرنے میں کردار ادا کریں اور سیاسی محاذ آرائی کے بجائے مصالحت کی فضا قائم کرنے کی کوشش کریں۔

گزشتہ شب بلاول ہاؤس کراچی میں وفاقی وزیر داخلہ محسن نقوی نے صدرِ مملکت آصف زرداری سے ملاقات کی، جس دوران ملکی سیاسی صورتحال، وفاقی و صوبائی تعلقات، اور بالخصوص سندھ و پنجاب حکومت کے درمیان بڑھتی کشیدگی پر تفصیلی تبادلہ خیال کیا گیا۔ذرائع کا کہنا ہے کہ صدرِ مملکت نے پنجاب حکومت کے وزراء اور ترجمانوں کے سخت بیانات پر تشویش کا اظہار کیا اور کہا کہ ایسے بیانات سے اتحادی جماعتوں کے درمیان اعتماد کو نقصان پہنچ رہا ہے۔ انہوں نے محسن نقوی سے کہا کہ وہ بطور وفاقی وزیر داخلہ، دونوں صوبوں کے درمیان مصالحتی کردار ادا کریں تاکہ سیاسی دراڑیں مزید گہری نہ ہوں۔

یاد رہے کہ گزشتہ چند روز میں پنجاب حکومت اور سندھ حکومت کے درمیان مختلف امور پر بیانات کے تبادلے نے سیاسی فضا میں شدید تناؤ پیدا کر دیا ہے، جس کے نتیجے میں پیپلز پارٹی نے پارلیمنٹ کے اجلاسوں کا بائیکاٹ کیا تھا،سیاسی مبصرین کے مطابق، اگر وزیر داخلہ محسن نقوی کی وزیراعظم سے ملاقات نتیجہ خیز ثابت ہوئی تو ممکن ہے کہ پیپلز پارٹی اور مسلم لیگ (ن) کے درمیان پیدا ہونے والی خلیج کم ہو سکے اور پارلیمانی تعاون بحال کیا جا سکے