Author: ممتاز حیدر

وزیر دفاع خواجہ آصف نے کہا ہے کہ پاکستان دہشت گردانہ کارروائیوں کا بھرپور جواب دے گا، دہشت گردانہ کارروائیاں نہ سرحدی اور نہ ہی شہری علاقوں میں برداشت کی جائیں گی۔

اسلام آباد کچہری دھماکے پر صحافیوں سے گفتگو میں خواجہ آصف کا کہنا تھاکہ اندازہ تھا ہم پر پریشر ڈالنے کےلیے اس قسم کی کوئی حرکت کی جائےگی،اب تک دہشتگردی سرحدی علاقوں تک محدود تھی، اسلام آباد میں دہشت گردی کا حملہ ریاست کو پیغام سمجھنا چاہیے، افغان حکومت افغانستان میں بیٹھے دہشت گردوں کی پشت پناہی کر رہی ہے، اسلام آباد میں دہشت گردانہ حملےسے ہمیں پیغام دیا گیا آپ کے تمام علاقے ہماری زد میں ہیں، ہماری عوام اور افواج دہشت گردی کےخلاف قربانیاں دے رہے ہیں، پاکستان دہشت گردانہ کارروائیوں کا بھرپور جواب دے گا، دہشت گردانہ کارروائیاں نہ سرحدی اور نہ ہی شہری علاقوں میں برداشت کی جائیں گی، افغان حکومت سے کامیاب ڈائیلاگ کی تھوڑی سے امید تھی لیکن اس حملے کے بعد دیکھنا پڑے گا، ان حالات میں ریاست کو سنجیدہ ہوکر سوچنا ہوگا، کالعدم ٹی ٹی پی کے سارے چیلے کابل میں بیٹھے ہیں، کابل حکومت کس طرح ان کی ذمہ داری قبول نہیں کرسکتی۔

خیال رہے کہ اسلام آباد کچہری کے باہر خودکش دھماکے میں 12 افراد شہید اور 30 زخمی ہوگئے۔ کئی زخمیوں کی حالت تشویشناک ہے۔

وانا کیڈٹ کالج پر فتنہ الخوارج کی جانب سے ناکام حملہ ،ریسکیو کیے گئے کیڈٹس کی ویڈیو منظر عام پر آ گئی

کیڈٹ کالج وانا میں فتنہ الخوارج کے دہشت گردوں کےبزدلانہ حملہ کیخلاف طلبہ کےحوصلے بلند ہیں،کیڈٹ کالج وانا کے طالب علم کا کہنا ہے کہ میں 12ویں جماعت کا طالبعلم اور وزیرستان کے ایک معمولی خاندان سے تعلق رکھتا ہوں، پاک فوج نے ہمارے لیے یہ کیڈٹ کالج بنایا ہے تاکہ ہمیں تعلیم، امن اور ترقی مل سکے، یہ بزدل دہشت گرد ہمیشہ چاہتے تھے کہ وزیرستان کے بچے تعلیم سے محروم رہیں ، یہ بزدل دہشت گرد ہمیشہ چاہتے ہیں کہ بچوں کو تعلیم سے محروم رکھ کر اپنے شیطانی خیالات نافذ کر سکیں،ان دہشت گردوں نے ایک بار پھر کوشش کی مگر ناکام رہے اور ہمیشہ ناکام رہیں گے،

طلبا کا کہنا ہے کہ پاک آرمی نے ہماری حفاظت کی اور الحمدللہ تمام طلباء محفوظ ہیں ،طلباء کے مطابق کیڈٹ کالج پر فتنہء الخوارج کے شرپسندوں کو سیکیورٹی فورسز نے بروقت کارروائی کرتے ہوئے ہلاک کیا، سیکیورٹی فورسز نہیں بہادری سے دہشت گردوں کا حملہ پسپا کیا۔ پاک آرمی نے ہماری حفاظت کی اور الحمدللہ، تمام طلباء محفوظ ہیں۔

کیڈٹ کالج وانا میں تعلیم حاصل کرنے والے طلباء کو فتنہ الخوارج کی جانب سے بزدلانہ حملے کا نشانہ بنانے پر مقامی افراد کا شدید ردعمل سامنے آیا ہے،مقامی افراد کا کہنا ہے کہ یہ دہشت گرد دراصل پختونوں اور قبائل کو تعلیم سے دور رکھنا چاہتے ہیں، فوج نے بروقت کارروائی کرکے سینکڑوں طلباء کو ریسکیو کیا اور معصوم جانو کی حفاظت کو ممکن بنایا،افغانستان میں موجود طالبان ریجیم ہم پختونوں کو تعلیم سے محروم رکھنا چاہتی ہے، پاک فوج کی جانب سے قبائلی علاقوں میں نوجوان کو تعلیم کے زیور سے آراستہ کرنے کے لیے کیڈٹ کالج بنائے گئے ہیں۔اس حملے کی کوشش سے یہ واضح ہوگیا کہ دشمن (فتنہ الخوارج ) وانا اور قبائلی عوام کو تعلیم سے محروم رکھنا چاہتے ہیں،

دوسری جانب کیڈٹ کالج وانا کی صورتحال کے تازہ ترین ویڈیو مناظرسامنے آ گئے،سیکورٹی فورسز کی جانب سے بچوں کو ریسکیو کرتے دیکھا جا سکتا ہے ،اب تک 350 افراد کو بحفاظت ریسکیو کر لیا گیا ہے، جبکہ تمام کیڈٹس محفوظ ہیں، سیکیورٹی فورسز کا آپریشن نہایت احتیاط اور حکمتِ عملی سے جاری ہے۔ آئی جی فرنٹیئر کور خیبر پختونخوا ساؤتھ ، کیڈٹ کالج وانا میں آپریشن کی خود نگرانی کر رہے ہیں،کالج میں اس وقت بھی 300 کے قریب افراد موجود ہیں ،افغان خوارج کی کالج میں موجودگی کے باعث کیڈٹس کی جانوں کے تحفظ کو مدنظر رکھتے ہوئے سیکیورٹی فورسز دہشتگردوں کے خلاف نہایت احتیاط سے آپریشن جاری رکھے ہوئے ہیں۔آخر دہشتگرد کے خاتمے تک سیکیورٹی فورسز کا آپریشن جاری رہے گا،

اسلام آباد کچہری خودکش حملے کی ابتدائی رپورٹ تیار کرلی گئی۔

تحقیقاتی اداروں نے خودکش حملے کی ابتدائی رپورٹ تیار کرلی جس کے مطابق خودکش حملہ آور باجوڑ میں رہائش پذیر تھا،ابتدائی رپورٹ کے مطابق خودکش حملہ آور جمعہ کے روز اسلام آباد پہنچا، حملہ آور پیرودھائی سے موٹر سائیکل پر جی الیون کچہری آیا،ذرائع کےمطابق ابتدائی رپورٹ میں بتایا گیا کہ خودکش حملہ آور نے چادر اوڑھی ہوئی تھی۔

دوسری جانب آئی جی اسلام آباد کا کہنا ہے کہ دھماکے میں 8 کلو گرام تک بارودی مواد اور بال بیرنگز استعمال کیے گئے ، ابھی تک جو شواہد اکٹھے کیے گئے اس کے مطابق حملہ آور ایک ہی تھا،ایک موٹر سائیکل اور گاڑی کو مشکوک تصور کیا جا رہا ہے، کیمروں کی بیک ٹریکنگ سے شواہد اکٹھے کیے جا رہے ہیں، فارنزک، سی ٹی ڈی، انویسٹی گیشن، سیف سٹی اور حساس ادارے شواہد کا جائزہ لے رہے ہیں۔

خیال رہے کہ اسلام آباد کے جی الیون سیکٹر میں کچہری کے نزدیک خودکش دھماکے کے نتیجے میں 12 افراد شہید اور متعدد زخمی ہوگئے اسلام آباد میں منگل کی دوپہر تقریباً ساڑھے بارہ بجے جی الیون سیکٹر کی کچہری کے نزدیک زور دار دھماکا ہوا جس کی آواز دور دور تک سنی گئی۔پولیس کا کہنا ہےکہ موٹر سائیکل پر سوار خودکش حملہ آور پولیس کی گاڑی کے قریب پہنچا اور اس نے خود کو دھماکے سے اڑا لیا، دھماکے سے قریب کھڑی گاڑیوں میں آگ لگ گئی جب کہ خودکش حملہ آور کے اعضا اڑ کر کچہری کے اندر جاگرے

مرکزی مسلم لیگ کے صدر خالد مسعود سندھو نے کہا ہے کہ اسلام آباد جی الیون کچہری کے قریب دھماکہ قابل مذمت ہے، دہشت گردی کے خلاف جنگ اتحاد سے ہی جیتی جا سکتی ہے، شہدا کے لئے دعائے مغفرت،زخمیوں کی صحتیابی کے لئے دعا گو ہیں

خالد مسعود سندھو کا کہنا تھا کہ اسلام آباد دھماکہ دشمنوں کی پاکستان کو عدم استحکام سے دوچار کرنے کی مذموم کوشش ہے،تاہم پوری قوم متحد ہے اور دہشتگردی کے خلاف جنگ میں سیکورٹی فورسز کے شانہ بشانہ کھڑی ہے،ضرورت اس امر کی ہے کہ اسلام آباد سمیت تمام صوبوں میں سیکیورٹی کے انتظامات مزید سخت کیے جائیں،دہشتگردی ناقابلِ معافی جرم ہے اور اس کے مرتکب عناصر کو کسی قسم کی رعایت نہیں ملنی چاہیے، دھماکے میں شہید ہونے والے افراد کے اہلِ خانہ سے دلی ہمدردی اور تعزیت کا اظہار،زخمیوں کی جلد صحتیابی کے لیے دعاگو ہیں۔