Author: ممتاز حیدر

پاکستان اور افغانستان کے درمیان کشیدہ تعلقات، سرحدی سیکیورٹی کی خلاف ورزیوں، اور ملک کے مختلف علاقوں میں دہشت گردی کے بڑھتے واقعات کے تناظر میں پاکستان نے ایک جامع پالیسی بیان جاری کیا ہے، جبکہ سیکیورٹی فورسز نے خیبر پختونخوا اور بلوچستان میں متعدد کارروائیوں کے دوران دہشت گردوں اور جرائم پیشہ عناصر کے خلاف اہم کامیابیاں حاصل کی ہیں۔

دفترِ خارجہ نے تصدیق کی ہے کہ استنبول میں ہونے والے پاکستان-افغان مذاکرات کے حوالے سے حکومت نے ایک جامع پالیسی بیان جاری کیا ہے۔ترجمان دفترِ خارجہ کے مطابق پاکستان نے ترکیہ اور قطر کی ثالثی کوششوں کو سراہا، تاہم افغان حکام کے “غیر ذمہ دارانہ رویے” پر شدید تحفظات کا اظہار کیا۔بیان میں کہا گیا کہ کسی بھی دہشت گرد تنظیم کے ساتھ تعاون “مذاکرات” کے پردے میں ناقابل قبول ہے اور عالمی برادری کو افغان حکام کو سرحدی اور سیکیورٹی ذمہ داریوں میں ناکامی پر جوابدہ ٹھہرانا چاہیے۔پاکستان نے امید ظاہر کی کہ آئندہ مذاکرات ٹھوس یقین دہانیوں اور قابلِ تصدیق اقدامات کی بنیاد پر آگے بڑھیں گے۔

سیکیورٹی ذرائع کے مطابق شمالی وزیرستان میں فورسز کی چوکی پر دہشت گردوں نے بھاری ہتھیاروں اور راکٹ لانچرز سے حملہ کیا۔فورسز نے فوری اور مؤثر جوابی کارروائی کرتے ہوئے ایک دہشت گرد کو ہلاک اور چار کو زخمی کر دیا۔ذرائع کے مطابق علاقے کو کلیئر کر دیا گیا ہے جبکہ فضائی اور زمینی نگرانی جاری ہے تاکہ کسی نئی کارروائی کو روکا جا سکے۔

خیبر پختونخوا کے ضلع ٹانک کے گاؤں محمد اکبر میں نامعلوم حملہ آوروں نے مسجد میں فائرنگ کر کے ہیڈ کانسٹیبل شاہ نواز کو شہید کر دیا۔شاہ نواز چھٹی پر گھر آئے ہوئے تھے اور نماز کے دوران نشانہ بنے۔لاش کو ڈسٹرکٹ ہیڈکوارٹر اسپتال منتقل کر دیا گیا جبکہ پولیس اور سیکیورٹی فورسز نے علاقے کو گھیرے میں لے کر تحقیقات شروع کر دی ہیں۔

پشاور کے نواحی پہاڑی علاقے شاکرنبو میں انٹیلی جنس بنیادوں پر سیکیورٹی فورسز نے کارروائی کی جس میں دو اہم دہشت گرد کمانڈرز سلمان عرف صدیق اور سعد عرف شاہ گلی سمیت 15 دہشت گرد ہلاک ہوئے۔ذرائع کے مطابق پورے علاقے کو گھیرے میں لے کر سرچ آپریشن جاری ہے تاکہ کسی بھی فرار ہونے والے دہشت گرد کو پکڑا جا سکے۔

سیکیورٹی فورسز نے رات گئے بلوچستان میں کارروائی کرتے ہوئے 400 کلوگرام افیون برآمد کر لی۔کارروائی کے دوران اسمگلر محمد عادل نے فائرنگ کی کوشش کی لیکن جوابی کارروائی میں مارا گیا۔ذرائع کے مطابق عادل کا تعلق پنجگور سے تھا اور وہ کالعدم تنظیم بلوچ لبریشن آرمی (BLA) کے نیٹ ورک سے وابستہ تھا۔رپورٹ کے مطابق منشیات ایران سے بلوچستان کے علاقے کسؤی میں پہنچائی جا رہی تھیں۔

30 ستمبر کو کوئٹہ میں ایف سی ہیڈکوارٹر نارتھ پر خودکش حملے میں ملوث دہشت گرد کی شناخت افغان شہری محمد سہیل عرف خباب کے طور پر ہوئی ہے۔وہ افغانستان کے صوبہ وردک کے علاقے میدان کا رہائشی اور کالعدم تنظیم فتنہ الخوارج سے وابستہ تھا۔حملے میں 8 شہری جاں بحق اور 40 زخمی ہوئے تھے۔پاکستان نے ایک بار پھر افغان سرزمین سے دہشت گردی کی مذمت کرتے ہوئے کہا کہ افغان طالبان حکومت کی ناکامی علاقائی استحکام کے لیے سنگین خطرہ ہے۔

قلات کے علاقے خالق آباد میں نامعلوم حملہ آوروں نے فائرنگ کر کے سردار شاکر سعداللہ لانگو، ان کے بھائی شاکر خیراللہ لانگو اور دو دیگر افراد کو قتل کر دیا۔لیویز فورس نے علاقے کو گھیرے میں لے لیا ہے اور تفتیش جاری ہے۔پنجگور کے علاقے شیپستان میں نامعلوم حملہ آوروں نے دو افراد محمد ظفر اور محمد نعیم کو گولیاں مار کر ہلاک کر دیا۔وجہِ قتل تاحال معلوم نہیں ہو سکی۔نوٹل تھانے کی حدود میں نامعلوم افراد نے تعمیراتی کمپنی کے دو ایکسکیویٹر ڈرائیورز عاشق علی محمد حسنی اور شکیل احمد کورائی کو اغوا کر لیا۔پولیس اور سیکیورٹی فورسز نے بازیابی کے لیے سرچ آپریشن شروع کر دیا ہے۔گاؤں مصری خان میں نامعلوم مسلح افراد کی فائرنگ سے عبدالقدیر کرد موقع پر جاں بحق ہو گئے۔حملہ آور فرار ہو گئے جبکہ لاش ورثا کے حوالے کر دی گئی۔ہتھیاری علاقے میں سولنگی اور وزدانی مگسی قبائل کے درمیان زمین کے تنازع پر فائرنگ کے تبادلے میں محمد بچل مگسی ہلاک ہو گئے۔
انتظامیہ نے حالات قابو میں کر لیے ہیں۔دالبندین کے قریب نامعلوم افراد نے معروف قبائلی شخصیت سردار حسین کو فائرنگ کر کے ہلاک کر دیا۔لاش پرنس فہد اسپتال منتقل کر دی گئی ہے، پولیس نے شواہد اکٹھے کر کے تحقیقات شروع کر دی ہیں۔ چمن میں نامعلوم مسلح افراد نے جمعیت علمائے اسلام (ف) کے ضلعی رہنما مولانا قاری محمد اعظم کو گولی مار کر قتل کر دیا۔پولیس نے علاقے کو گھیرے میں لے لیا ہے اور تحقیقات کا آغاز کر دیا ہے۔

بنوں: سابق ایس ایچ او اغوا، ٹی ٹی پی دھڑے نے ذمہ داری قبول کر لی

بنوں کے علاقے پیپل داؤد شاہ میں سابق ایس ایچ او عابد کو مسلح افراد نے گاڑی سمیت اغوا کر لیا۔ذرائع کے مطابق انہیں چند روز قبل ڈسٹرکٹ پولیس آفیسر نے ملازمت سے برطرف کیا تھا۔کالعدم تحریکِ طالبان پاکستان کے نئے دھڑے لشکرِ دفاعِ قدس نے اغوا کی ذمہ داری قبول کر لی ہے۔پولیس نے علاقے میں سرچ آپریشن شروع کر دیا ہے۔

ماہرین کے مطابق پاکستان میں حالیہ دہشت گرد کارروائیوں کا تسلسل اس بات کی عکاسی کرتا ہے کہ افغان سرزمین سے سرگرم شدت پسند نیٹ ورکس اب بھی پاکستان کے لیے براہِ راست خطرہ ہیں

مسلم لیگ ن کے سینیٹر عرفان صدیقی شدید علالت کے باعث اسپتال کے انتہائی نگہداشت کے وارڈ (آئی سی یو) میں زیر علاج ہیں۔

سینیٹر عرفان صدیقی کے اہلخانہ نے تصدیق کی ہے کہ عرفان صدیقی سانس کی تکلیف کے باعث انتہائی نگہداشت یونٹ میں زیر علاج ہیں،عرفان صدیقی کے اہلخانہ کا بتانا ہے کہ سانس کی تکلیف کے باعث گزشتہ کچھ دن سے عرفان صدیقی اسلام آباد کے مقامی اسپتال میں زیر علاج ہیں، سینیٹر عرفان صدیقی علالت کے باعث 27 ویں آئینی ترمیم کے لیے ووٹ بھی کاسٹ نہیں کر سکیں گے۔

گزشتہ روز سینیٹ اور قومی اسمبلی کی مشترکہ پارلیمانی کمیٹی نے 27 ویں آئینی ترمیم کی تمام 49 شقوں کی منظوری دیدی تھی جس کے بعد اس بات کا امکان ہے کہ آج سینیٹ کے اجلاس میں آئینی ترمیم پیش کی جائے گی۔دوسری جانب متحدہ اپوزیشن نے 27 ویں آئینی ترمیم کو مسترد کرتے ہوئے اس کے خلاف تحریک چلانے اور پارلیمنٹ کو نہ چلنے دینے کا اعلان بھی کیا ہے۔

کال سینٹرز سے کروڑوں روپے بھتہ لینے کے الزام میں این سی سی آئی اے کے مزید 13 افسران کے خلاف مقدمہ درج کر لیا گیا۔

مقدمہ اینٹی کرپشن سرکل ایف آئی اے اسلام آباد میں درج کیا گیا جس میں این سی سی آئی اے کے ایڈیشنل ڈائریکٹرز راولپنڈی سمیت کئی افسران شامل ہیں۔ مقدمے میں کال سینٹرز سے ڈیل کرانے والے شخص اور غیر ملکی شہری بھی نامزد ہیں۔مقدمے کے متن میں کہا گیا ہے کہ اسلام آباد کے سیکٹر 11 ایف میں 15 غیر قانونی کال سینٹرز سے کروڑوں روپے بھتہ لیا گیا، این سی سی آئی اے افسران کال سینٹرز سے ماہانہ بنیادوں پر بھی کروڑوں روپے وصول کرتے رہے۔مقدمے کے مطابق ایک ملزم افسران کا فرنٹ مین ہے جس نے خاتون سے رقوم وصول کیں، خاتون نے 13 غیر ملکیوں اور اپنے شوہر کی رہائی کے لیے کروڑوں روپے ادا کیے، مرکزی ملزم ڈائریکٹر این سی سی آئی اے سندھ بھی رہ چکا ہے۔مقدمے میں 2 ایڈیشنل ڈائریکٹرز شہزاد حیدر اور عامر نذیر، ڈپٹی ڈائریکٹرز سلمان اعوان، حیدر عباس اور ندیم احمد خان کو بھی نامزد کیا گیا ہے۔سب انسپکٹرز عثمان بشارت، محمد بلال، صارم علی، ظہیر عباس نیازی اور میاں عرفان سمیت متعدد اہلکاروں پر الزام ہے کہ انہوں نے 25 کروڑ روپے سے زائد رقم وصول کر کے غیر قانونی کال سینٹرز کو قانونی تحفظ فراہم کیا، مقدمے میں ایک نجی کمپنی کے مالک حسن امیر اور ایک چینی شہری کا نام بھی شامل ہے۔مقدمے کے متن کے مطابق ملزمان چھاپوں کے بعد مختلف مقامات پر جا کر ڈیلز کرتے اور بھاری رقوم وصول کرتے تھے۔

30 ستمبر کو فرنٹیئر کور ہیڈکوارٹر کوئٹہ پر ہونے والے خودکش حملے میں ملوث دوسرے حملہ آور کی شناخت ہوگئی۔
سیکیورٹی ذرائع کے مطابق خودکش حملے میں ملوث دوسرا حملہ آور افغان دہشت گرد نکلا،سیکیورٹی ذرائع کے مطابق فتنہ الخوارج کے افغان خودکش حملہ آور کی شناخت محمد سہیل عرف خباب کے نام سے ہوئی ہے،سیکیورٹی ذرائع کے مطابق محمد سہیل عرف خباب افغانستان کے صوبے وردک کے ضلع میدان شہر کا رہائشی تھا،سیکیورٹی ذرائع کے مطابق کوئٹہ ایف سی ہیڈ کوارٹر حملے میں 8 شہری شہید اور 40 زخمی ہوئے تھے۔