Author: ممتاز حیدر

چیئرمین پی ٹی آئی بیرسٹر گوہر نے آئین میں ترمیم کی مخالفت کردی۔ کہا کہ ستائیس ویں آئینی ترمیم خطرہ مول لینے والی بات ہے، ایسا کسی صورت نہیں ہونا چاہیے۔

اڈیالہ جیل کے باہر میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ عدالت پر ایک اور عدالت بنانا غلط ہے، ایسی شقوں کو نہ چھیڑا جائے جس سے صوبوں میں تناؤ بڑھے۔ان کا کہنا ہے کہ 27 ویں آئینی ترمیم خطرہ مول لینے والی بات ہے، کسی صورت نئی ترمیم پیش نہیں کرنی چاہئے، آئین میں درج ہے کسی صوبے کا حصہ کم نہیں کیا جائے گا۔بیرسٹر گوہر نے مزید کہا کہ 2020ء میں پی ٹی آئی حکومت میں 10ویں این ایف سی ایوارڈ پر کام ہوا، سب صوبے گیارہویں ایوارڈ کے منتظر ہیں، مشترکہ مفادات کونسل میں اتفاق رائے کے بغیر نہریں نہ نکالنے کا بھی فیصلہ کیا گیا تھا۔

تحریکِ انصاف کے سینیٹر علی ظفر نے کہا ہے کہ آئین کو گولیوں سے تو آپ مار نہیں سکتے، 27ویں ترمیم پر بلاول بھٹو نے جو لکھا ہے وہ آئین کو ختم کرنے کے مترادف ہے۔

اسلام آباد میں میڈیا سے گفتگو کے دوران سینیٹر علی ظفر نے کہا کہ حکومت والوں سے جب پوچھا جاتا رہا، وہ اس پر خاموش تھے، حکومت والوں کو یا تو پتہ نہیں ترمیم آ رہی ہے یا ان کو پتہ نہیں یہ کوئی اور کر رہا ہے۔ دہشت گردی ہم سب کا مسئلہ ہے، دہشت گردی ختم کرنے سے متعلق مؤقف مختلف ہو سکتے ہیں، آپریشنز بھی ہوتے ہیں لیکن ہمیں اس پر یکسوئی سے بات کرنا ہوگی، دہشت گردی کی ایک وجہ غربت اور بے روزگاری بھی ہے۔ وزیر اعلیٰ کے پی نے صوبہ چلانا ہے، گورننس دیکھنی ہے، وزیر اعلیٰ ایک سیاسی جماعت کے نمائندے ہیں وہ سیاسی بات بھی کرسکتے ہیں، وزیر اعلیٰ اگر بانی چیئرمین کی رہائی کی بات کرتے ہیں تو اس میں کیا غلط ہے؟

سینٹیرعلی ظفر کا کہنا تھا کہ فلور آف دی ہاؤس آپ ہر وہ بات کرسکتے ہیں جو نیشنل انٹرسٹ میں ہو۔ اسلام آباد آنے کی کال کے بارے میں نہیں جانتا نہ بانی کی کوئی ہدایات ہیں، اگر ملاقات ہوئی تو مزید ہدایات آ سکتی ہیں،ملاقاتوں کی فہرستوں کی بات بہت چھوٹی ہے، ہوسکتا ہے غلطی سے دو فہرستیں جاری ہوئی ہوں، آئندہ نہیں ہوں گی، میں اپنے آپ کو ان تمام چیزوں سے بالا سمجھتا ہوں، میں کسی کے خلاف بات نہیں کرتا اس دن غلطی سے دو فہرستیں آگئیں آج ایک ہی ہے، مستقبل کی بات کر کے آگے بڑھنا چاہیے۔

سپریم کورٹ نے نان نفقہ عدم عدائیگی کیس میں متاثرہ خاتون کو فوری نان نفقہ ادائیگی کا حکم دے دیا

سپریم کورٹ میں چیف جسٹس یحییٰ آفریدی کی سربراہی میں 2 رکنی بینچ نےنان نفقہ کی عدم ادائیگی کیس کی سماعت کی،چیف جسٹس یحییٰ آفریدی نے ریمارکس دیے کہ جب نکاح نامہ میں لکھا ہے تو ادائیگی میں تاخیر کیوں ہوئی، 2013 میں کیس ڈگری ہوا، متاثرہ خاتون کا کچھ تو خیال کریں، پشاور ہائیکورٹ نے 20 تولہ سونا اور 2لاکھ نقد ادائیگی کا حکم دیا تھا،سپریم کورٹ نے اپنا فیصلہ سناتے ہوئے شوہر کی درخواست مسترد کردی اور چیف جسٹس یحییٰ آفریدی نے متاثرہ خاتون کو فوری نان نفقہ کی ادائیگی کا حکم دیا۔

اسلام آباد کے تعلیمی اداروں سے منشیات کے خاتمے سے متعلق کیس کی سماعت ہوئی

عدالت نے پیمراء کو منشیات کے خاتمے سے متعلق چینلز پر پرائم ٹائم کے دوران آگاہی مہم چلانے کی ہدایت کر دی، جسٹس راجہ انعام امین منہاس کا کہنا تھا کہ رات ایک بجے آگاہی مہم نہیں چلانی بلکہ پرائم ٹائم پر مہم چلانی ہے ، آئی جی اسلام آباد اے این ایف ، پرائیویٹ سکول ریگولیٹری باڈی و دیگر سٹیک ہولڈر سے مل کر منشیات کے خاتمے کا میکنزم بنائیں ،

پرائیویٹ تعلیمی اداروں کی ریگولیٹری اتھارٹی پیرا کی رپورٹ عدالت میں پیش کر دی گئی، رپورٹ میں بتایا گیا کہ تعلیمی اداروں میں طلباء، سٹاف، کنٹین سٹاف یا کسی سے بھی منشیات برآمدگی پر سربراہ ادارہ کے خلاف کاروائی کی جائے گی، تمام تعلیمی اداروں میں ڈلیوری بوائے، کوریئر سروسز وغیرہ کے داخلہ پر مکمل پابندی عائد کردی گئی ہے،2025 میں اسلام آباد کے تعلیمی اداروں میں منشیات پر درج مقدمات کی تفصیلات عدالت میں پیش کر دی گئی،اے این ایف نے رواں سال اسلام آباد کے تعلیمی اداروں میں منشیات سے متعلق 51 مقدمات درج کیے ،ڈی ایس پی لیگل نے کہا کہ رواں سال پولیس نے اسلام آباد کے تعلیمی اداروں سے منشیات برآمدگی کے 22 مقدمات درج کیے ، جسٹس راجہ انعام امین منھاس نے کیس کی سماعت کی ،وکیل درخواست گزار کاشف علی ملک عدالت میں پیش ہوئے،عدالت نے آئی جی کو تمام اسٹیک ہولڈرز سے مشاورت کرکے منشیات کے خاتمے پر میکنزم بنانے کی ہدایت کر دی،کیس کی سماعت دو ہفتوں کے بعد تک ملتوی کر دی گئی