Author: ممتاز حیدر

کراچی کے علاقے قیوم آباد میں بچوں اور بچیوں سے زیادتی کرنے والے ملزم کو متاثرہ بچیوں نے عدالت میں ملزم کو تھپڑ دے مارے۔

جوڈیشل مجسٹریٹ جنوبی میں شربت فروش کا متعدد بچوں اور بچیوں سے زیادتی کرنے کے کیس کی سماعت ہوئی،ملزم شبیر تنولی کو 7 مقدمات میں عدالت میں پیش کیا گیا۔ پولیس نے زیادتی کا شکار بچیوں کو بھی عدالت میں پیش کیا۔ متاثرہ بچیوں نے ملزم کو احاطہ عدالت میں تھپڑ مارے،پولیس نے عدالت کو بتایا کہ ملزم کو اہل علاقہ کی شکایت پر گرفتار کیا گیا تھا، ملزم 2016ء سے بچوں اور بچیوں سے زیادتی کر کے ویڈیوز بناتا تھا۔ ملزم کے خلاف تھانہ ڈیفنس میں مقدمات درج ہیں،جس کے بعد عدالت نے ملزم کے جسمانی ریمانڈ میں 3 روز کی توسیع کر کے آئندہ سماعت پر پیش رفت ریورٹ طلب کر لی۔

عدالت کے باہر صحافیوں نے ملزم سے سوال کیا کہ ویڈیوز کا کیا کرتے تھے؟ ملزم نے بتایا کہ میں بعد میں ویڈیوز دیکھا کرتا تھا۔

میئر کراچی مرتضیٰ وہاب نے شہر کے ٹریفک مسائل کے حل کے لیے ایک اور بڑے منصوبے کا اعلان کرتے ہوئے بھینس کالونی کو مہران ہائی وے سے ملانے والے پل کی تعمیر کا سنگ بنیاد رکھ دیا۔

اس موقع پر میڈیا سے گفتگو کرتے ہوئے مرتضیٰ وہاب نے بتایا کہ عظیم پورہ انٹرسیکشن پر 682 میٹر طویل پل تعمیر کیا جائے گا تاکہ شہری شاہ فیصل کالونی کے ٹریفک میں پھنسے بغیر براہِ راست شاہراہ فیصل تک رسائی حاصل کرسکیں۔ ان کا کہنا تھا کہ یہ منصوبہ شہریوں کے لیے 100 دنوں میں مکمل کرکے ٹریفک کے لیے کھول دیا جائے گا۔میئر کراچی نے مزید کہا کہ مرغی خانہ کے مقام پر بھی ایک نیا پل تعمیر کیا جائے گا جو چھ ماہ میں مکمل ہوگا۔ انہوں نے کہا کہ اس وقت نیت اور فنڈز کا کوئی مسئلہ نہیں اور نہ ہی کوئی تنظیمی رکاوٹ حائل ہے، ہم عوامی مسائل کے حل کے لیے عملی اقدامات کررہے ہیں۔

پانی کی فراہمی سے متعلق بات کرتے ہوئے مرتضیٰ وہاب نے بتایا کہ حب ڈیم سے کراچی کے لیے پانی کا کوٹہ 100 ایم جی ڈی سے بڑھا کر 200 ایم جی ڈی کرنے کا فیصلہ کیا گیا ہے۔ ان کا کہنا تھا کہ حب ڈیم سے اضافی 100 ایم جی ڈی پانی کی فراہمی کے لیے درکار انفرا اسٹرکچر 31 دسمبر تک مکمل کردیا جائے گا جبکہ نئی حب کینال ساڑھے 9 ماہ میں تیار ہوگی۔میئر کراچی نے اس موقع پر حالیہ بارشوں میں حب کینال کو پہنچنے والے نقصان پر بات کرتے ہوئے کہا کہ 20 میٹر حصہ متاثر ہوا تو شور مچادیا گیا، لیکن دوسری جانب جب ملتان کی موٹروے بارشوں میں بہہ گئی تو وہاں اس طرح کے تبصرے سامنے نہیں آئے۔انہوں نے مزید کہا کہ کراچی کی اندرونی گلیوں کی تعمیر و مرمت کے کام جاری ہیں، پرانی مارکیٹوں کو بھی بہتر بنایا جارہا ہے۔ مرتضیٰ وہاب نے سیاسی مخالفین پر تنقید کرتے ہوئے کہا کہ لیاقت آباد میں منعم ظفر جن سڑکوں کا افتتاح کرتے ہیں وہ بار بار ٹوٹ جاتی ہیں لیکن ان کی جانب سے اس پر کوئی سوال نہیں اٹھایا جاتا۔

کراچی کے علاقے کورنگی میں شادی والے دن لاپتا ہونے کے بعد چند روز بعد گھر واپس آنے والے نوجوان کا بیان پولیس کے سامنے آگیا ہے۔

پولیس حکام کے مطابق نوجوان نے انکشاف کیا ہے کہ وہ اپنی مرضی سے گھر سے نکلا تھا کیونکہ وہ اس رشتے پر راضی نہیں تھا جو اس کے والدین طے کر رہے تھے۔ پولیس کے مطابق نوجوان نے بتایا کہ شادی کے دباؤ اور ذہنی پریشانی کے باعث اس نے گھر چھوڑنے کا فیصلہ کیا اور کئی دن تک سڑکوں پر وقت گزارتا رہا۔تحقیقات میں یہ بھی سامنے آیا ہے کہ نوجوان کو کسی نے اغوا نہیں کیا تھا بلکہ وہ خود فرار ہوکر شہر کے مختلف علاقوں میں رہا۔ پولیس کا کہنا ہے کہ نوجوان اور اس کے اہلخانہ سے مزید تفتیش کی جا رہی ہے تاکہ معاملے کی تمام پہلوؤں سے جانچ کی جا سکے۔

یاد رہے کہ 11 ستمبر کو شادی والے دن نوجوان دلہا تیار ہونے کے لیے سیلون گیا تھا لیکن کچھ دیر بعد اہلخانہ کو اطلاع ملی کہ وہ سیلون نہیں پہنچا۔ اس واقعے پر دلہا کے والد کی مدعیت میں تھانہ زمان ٹاؤن میں مقدمہ درج کیا گیا تھا، جس میں اغوا کا شبہ ظاہر کیا گیا تھا۔پولیس حکام کا کہنا ہے کہ اب صورتحال واضح ہوگئی ہے کہ نوجوان نے اپنی مرضی سے شادی سے انکار کرتے ہوئے گھر چھوڑا تھا، تاہم قانونی تقاضے پورے کرنے کے بعد مقدمے میں مزید پیش رفت سامنے آئے گی۔

کراچی میں سی ویو کے قریب اپارٹمنٹ کی پارکنگ میں مرد اور خاتون کی لاشیں ملنے کے واقعے کی تحقیقات میں اہم پیش رفت ہوئی ہے۔ پولیس کے مطابق دونوں لاشوں کا پوسٹ مارٹم مکمل کرلیا گیا ہے، جس کی ابتدائی رپورٹ میں انکشاف ہوا ہے کہ موت گاڑی کے اندر گیس بھر جانے سے واقع ہوئی۔

ابتدائی میڈیکل رپورٹ کے مطابق گاڑی کے اندر آکسیجن کی کمی اور گیس جمع ہونے کے باعث دم گھٹنے سے دونوں افراد کی جان گئی، تاہم پولیس کا کہنا ہے کہ حتمی وجوہات پوسٹ مارٹم کی تفصیلی رپورٹ آنے پر واضح ہوں گی۔ اس ضمن میں فرانزک اور کیمیکل ٹیسٹ بھی کیے جارہے ہیں۔پولیس حکام نے بتایا کہ واقعے کا مقدمہ فی الحال درج نہیں کیا گیا، تاہم متاثرہ خاندان سے رابطہ کیا گیا ہے اور ان کے بیانات قلمبند کرنے کے بعد قانونی کارروائی کو آگے بڑھایا جائے گا۔ اہلکاروں کا کہنا ہے کہ بظاہر واقعہ حادثاتی لگتا ہے لیکن تمام پہلوؤں کو مدنظر رکھتے ہوئے تحقیقات جاری ہیں۔

لاشوں میں سے مرد کی شناخت شہباز ملک کے نام سے ہوئی ہے جو ایک ریٹائرڈ سرکاری افسر تھے۔ پولیس کا کہنا ہے کہ خاتون کی شناخت کے لیے ڈیٹا اکٹھا کیا جا رہا ہے اور ان کے لواحقین کو تلاش کیا جا رہا ہے۔پولیس ذرائع کے مطابق جائے وقوعہ سے گاڑی کو تحویل میں لے لیا گیا ہے اور اس کا تکنیکی معائنہ بھی کرایا جائے گا تاکہ معلوم کیا جا سکے کہ گیس کس وجہ سے جمع ہوئی۔ حکام کا کہنا ہے کہ تحقیقات مکمل ہونے کے بعد ہی یہ طے ہوگا کہ یہ حادثہ ہے یا اس کے پیچھے کوئی اور پہلو موجود ہے۔