Author: ممتاز حیدر

نئی دہلی میں خواتین کے خلاف جرائم کے دو سنگین واقعات نے عوام کو ہلا کر رکھ دیا ہے۔ ایک واقعے میں صفدرجنگ اسپتال کی ایک خاتون ملازمہ کو انسٹاگرام پر دوستی کے بعد ایک ڈیلیوری بوائے نے جعلی آرمی آفیسر بن کر زیادتی کا نشانہ بنایا، جب کہ دوسرے واقعے میں ایک 18 سالہ ایم بی بی ایس طالبہ کے ساتھ ہوٹل میں زیادتی اور بلیک میلنگ کا لرزہ خیز کیس سامنے آیا ہے۔

پولیس کے مطابق متاثرہ 27 سالہ خاتون صفدرجنگ اسپتال میں ملازم ہیں۔ انہوں نے اپنی شکایت میں بتایا کہ ان کی انسٹاگرام پر "آرَو ملک” نامی شخص سے دوستی ہوئی، جس نے خود کو کشمیر میں تعینات ایک "آرمی لیفٹیننٹ” کے طور پر متعارف کرایا۔آرَو ملک نے اپریل سے ستمبر کے درمیان انسٹاگرام اور واٹس ایپ پر خاتون سے مسلسل رابطہ رکھا اور جعلی فوجی تصاویر بھیج کر ان کا اعتماد حاصل کیا۔ پولیس کا کہنا ہے کہ ملزم دراصل دہلی کے چھترپور علاقے کا رہائشی اور ایک معروف ای کامرس کمپنی میں ڈیلیوری بوائے تھا۔تفتیش کے دوران ملزم نے اعتراف کیا کہ اس نے فوجی یونیفارم دہلی کینٹ کے قریب ایک دکان سے آن لائن خریدی تھی تاکہ خاتون کو دھوکہ دے سکے۔

متاثرہ خاتون نے بیان دیا کہ آرَو ملک ایک دن ان کے گھر آیا، انہیں کھانے پینے کی چیز دی جس کے بعد ان کے ساتھ جنسی زیادتی کی۔ واقعے کے بعد خاتون نے پولیس سے رجوع کیا۔ پولیس نے ملزم کو گرفتار کر کے اس کے خلاف زیادتی، دھمکانے، جعلسازی اور غلط شناخت اختیار کرنے کی دفعات کے تحت مقدمہ درج کر لیا ہے۔

ایک اور دل خراش واقعے میں نئی دہلی کے علاقے آدرش نگر میں ایک 18 سالہ ایم بی بی ایس طالبہ کے ساتھ زیادتی اور بلیک میلنگ کا کیس درج کیا گیا ہے۔متاثرہ لڑکی جو ہریانہ کے ضلع جِند سے تعلق رکھتی ہے، نے پولیس کو بتایا کہ ایک 20 سالہ نوجوان نے اسے پارٹی میں شرکت کے بہانے ہوٹل بلایا۔ وہاں اسے نشہ آور مشروبات پلائے گئے اور پھر جنسی زیادتی کا نشانہ بنایا گیا۔طالبہ نے الزام لگایا کہ ملزم اور اس کے ساتھیوں نے اس کی نازیبا تصاویر اور ویڈیوز بنائیں اور ان کو لیک کرنے کی دھمکی دے کر بلیک میل کیا۔ پولیس رپورٹ کے مطابق ملزم نے متاثرہ کو کئی مرتبہ مجبوراً اپنے ساتھ جانے پر مجبور کیا اور متعدد بار زیادتی، تشدد اور دھمکانے کے واقعات دہرائے۔

پولیس نے واقعے کی ایف آئی آر درج کر کے تحقیقات شروع کر دی ہیں۔ دونوں واقعات نے دارالحکومت دہلی میں خواتین کے تحفظ کے حوالے سے ایک بار پھر سنگین سوالات کھڑے کر دیے ہیں۔خواتین کے حقوق کی تنظیموں اور شہریوں نے ان واقعات پر شدید غم و غصے کا اظہار کرتے ہوئے مطالبہ کیا ہے کہ جعلی شناخت کے ذریعے جرائم کرنے والوں کے خلاف سخت ترین کارروائی کی جائے۔پولیس حکام نے عوام سے اپیل کی ہے کہ وہ سوشل میڈیا پر غیر مانوس افراد سے ذاتی تعلقات قائم کرنے میں احتیاط برتیں اور کسی بھی مشکوک سرگرمی کی فوری اطلاع قانون نافذ کرنے والے اداروں کو دیں۔

برطانیہ کے علاقے والسال (Walsall) میں ایک بھارتی نژاد خاتون کے ساتھ نسل پرستی پر مبنی جنسی زیادتی کے لرزہ خیز واقعے کے بعد ویسٹ مڈلینڈز پولیس نے ایک گورے مشتبہ شخص کی تلاش کے لیے عوام سے مدد کی اپیل کی ہے۔

پولیس کے مطابق، ہفتہ کی شام پولیس کو پارک ہال کے علاقے سے ایک بیس سالہ خاتون کی فلاح و بہبود سے متعلق اطلاع موصول ہوئی، جو شدید ذہنی دباؤ اور خوف کی حالت میں سڑک پر پائی گئی۔ پولیس نے فوری کارروائی کرتے ہوئے خاتون کو طبی امداد فراہم کی اور علاقے کی سی سی ٹی وی فوٹیج حاصل کر کے تفتیش شروع کر دی۔تحقیقاتی ٹیم کے سربراہ ڈیٹیکٹیو سپرنٹنڈنٹ رونن ٹائرر نے کہا کہ یہ ایک نہایت بھیانک اور انسانیت سوز حملہ ہے۔ ہم حملہ آور کو گرفتار کرنے کے لیے ہر ممکن کوشش کر رہے ہیں۔ ہماری ٹیمیں شواہد اکٹھے کر رہی ہیں اور ملزم کی شناخت کے لیے پروفائل تیار کیا جا رہا ہے اگر کسی نے اس علاقے میں مشتبہ شخص کو دیکھا ہو، یا گاڑی کے ڈیش کیم یا گھر کی سی سی ٹی وی فوٹیج میں کوئی چیز نظر آئی ہو، تو فوراً پولیس سے رابطہ کرے۔

پولیس کے مطابق، حملہ آور ایک گورا مرد ہے، عمر تقریباً 30 سال، بال چھوٹے اور کپڑے سیاہ رنگ کے تھے۔
ابتدائی طور پر پولیس نے بتایا کہ واقعے کو نسل پرستی پر مبنی جنسی زیادتی کے طور پر درج کیا گیا ہے، تاہم تفتیش ابھی ابتدائی مراحل میں ہے۔مقامی پنجابی اور سکھ تنظیموں نے واقعے پر شدید ردِعمل ظاہر کیا ہے۔ سکھ فیڈریشن یوکے کے مطابق متاثرہ خاتون پنجابی نژاد ہے اور حملہ آور نے اس کے گھر کا دروازہ توڑ کر اندر داخل ہو کر زیادتی کی۔تنظیم نے یہ بھی کہا کہ یہ واقعہ اولڈ بری میں گزشتہ ماہ پیش آنے والے ایک اور سکھ خاتون پر نسل پرستی پر مبنی ریپ کے بعد سامنے آیا ہے، جس نے مقامی اقلیتی برادریوں میں شدید خوف پیدا کر دیا ہے۔

ہریانہ کے ضلع فریدآباد میں 19 سالہ نوجوان نے مبینہ طور پر مصنوعی ذہانت کے ذریعے بنائی گئی اپنی تین بہنوں کی فحش تصاویر اور ویڈیوز کے ذریعے بلیک میل کیے جانے پر خودکشی کرلی۔

تفصیلات کے مطابق متوفی نوجوان راہول بھارتی، ڈی اے وی کالج فریدآباد کا دوسرا سال کا طالبعلم تھا۔ اس کے والد منوج بھارتی نے بتایا کہ تقریباً دو ہفتوں سے راہول شدید ذہنی دباؤ میں تھا۔ کسی نامعلوم شخص نے اس کا موبائل فون ہیک کر کے اے آئی ٹیکنالوجی کی مدد سے اس کی اور اس کی بہنوں کی نازیبا تصاویر اور ویڈیوز تیار کرلیں اور پھر بھاری رقم کا مطالبہ شروع کردیا۔منوج بھارتی کے مطابق، ان کے بیٹے نے پچھلے کئی دنوں سے کھانا پینا چھوڑ دیا تھا اور زیادہ تر وقت خاموشی سے اپنے کمرے میں بند رہتا تھا۔ پولیس تحقیقات میں راہول اور ایک شخص "ساحل” کے درمیان چیٹ سامنے آئی ہے، جس میں ساحل نے اسے نازیبا ویڈیوز بھیج کر 20 ہزار روپے کا مطالبہ کیا تھا۔ واٹس ایپ چیٹ کے اسکرین شاٹس میں متعدد آڈیو اور ویڈیو کالز بھی شامل ہیں، جن میں ساحل نے راہول کو لوکیشن بھیج کر کہا تھا، "آجا میرے پاس”۔

پولیس کے مطابق، آخری گفتگو میں ساحل نے راہول کو دھمکی دی تھی کہ اگر اس نے رقم ادا نہ کی تو وہ تمام تصاویر اور ویڈیوز سوشل میڈیا پر وائرل کردے گا۔ اس نے مبینہ طور پر راہول کو خودکشی پر بھی اکسانے کی کوشش کی اور زہریلے مادے کے استعمال کی تفصیل تک بتائی۔شدید ذہنی دباؤ کے باعث راہول نے ہفتے کی شام تقریباً 7 بجے کچھ زہریلی گولیاں کھالیں۔ جب اس کی حالت بگڑنے لگی تو اہلخانہ نے فوراً اسے اسپتال منتقل کیا، تاہم وہ دورانِ علاج دم توڑ گیا۔

راہول کے والد کا کہنا ہے کہ:”کسی نے میرے بیٹے کے فون پر میری بیٹیوں کی نازیبا ویڈیوز اور تصاویر بھیجی تھیں اور انہیں وائرل کرنے کی دھمکی دی تھی۔ اسی ذہنی اذیت کے باعث راہول نے زہر کھا لیا۔ وہ مسلسل ہراسانی کا شکار تھا۔”اہلخانہ کے مطابق، اس واقعے میں ایک اور شخص نیرج بھارتی بھی ملوث ہوسکتا ہے، جو راہول سے خودکشی سے کچھ گھنٹے قبل رابطے میں تھا۔ راہول کی والدہ مینا دیوی نے الزام عائد کیا کہ نیرج، جو اس کا دیور ہے، اس واقعے میں ملوث ہے۔ ان کے مطابق نیرج نے ایک لڑکی کے ساتھ مل کر یہ منصوبہ تیار کیا، کیونکہ چھ ماہ قبل ان دونوں کے درمیان گھریلو جھگڑا ہوا تھا۔اہلخانہ کی درخواست پر پولیس نے دو افراد کے خلاف مقدمہ درج کرلیا ہے۔

تحقیقاتی افسر سب انسپکٹر سنیل کمار کے مطابق:”راہول نے زہر کھایا تھا اور اسے نجی اسپتال میں داخل کیا گیا، جہاں وہ دورانِ علاج فوت ہوگیا۔ معاملے کی تحقیقات راہول کے والد کی شکایت پر جاری ہیں۔ اس کا موبائل فون ضبط کرلیا گیا ہے، اور شواہد کی روشنی میں قانونی کارروائی عمل میں لائی جائے گی۔”پرانے تھانے کے انچارج وشنو کمار نے واقعے کو "سائبر کرائم اور مصنوعی ذہانت کے غلط استعمال کی سنگین مثال” قرار دیا ہے۔