Author: ممتاز حیدر

چرچ آف انگلینڈ کی 1400 سالہ تاریخ میں پہلی بار ایک خاتون کو آرچ بشپ منتخب کر لیا گیا ہے۔

خبر رساں ادارے رائٹرز کے مطابق 63 سالہ ڈیم سارہ مولالی کو باضابطہ طور پر آرچ بشپ آف کینٹربری منتخب کیا گیا ہے۔ وہ اس عہدے پر فائز ہونے والی 106 ویں مذہبی رہنما ہیں۔چرچ آف انگلینڈ میں اس سے قبل خواتین کے لیے اس عہدے پر فائز ہونا ممکن نہیں تھا، تاہم 2014 میں خواتین کو بشپ بنانے کی اجازت دی گئی جس کے بعد یہ تاریخی فیصلہ سامنے آیا ہے۔ڈیم سارہ مولالی گزشتہ سات برسوں سے لندن کی بشپ کے طور پر خدمات انجام دے رہی تھیں۔ اس سے قبل وہ ایک پیشہ ور نرس رہ چکی ہیں اور 2000 کی دہائی کے اوائل میں برطانیہ کی چیف نرسنگ آفیسر کے طور پر کام کرتی رہی ہیں۔ 2002 میں انہوں نے مذہبی خدمت کا راستہ اختیار کیا اور پادری بن گئیں۔ وہ برطانوی ایوان بالا (ہاؤس آف لارڈز) کی رکن بھی رہ چکی ہیں۔

چرچ آف انگلینڈ کے آرچ بشپ کا عہدہ گزشتہ تقریباً ایک سال سے خالی تھا، جب سابق آرچ بشپ جسٹن ویلبی نے ایک جنسی اسکینڈل کے بعد استعفیٰ دے دیا تھا۔عالمی ماہرین مذہبی امور کے مطابق سارہ مولالی کا انتخاب چرچ آف انگلینڈ کے لیے ایک انقلابی اور تاریخی لمحہ ہے، جو نہ صرف ادارے میں خواتین کی شمولیت کو مزید تقویت دے گا بلکہ دنیا بھر کے مسیحی حلقوں میں اس کی حیثیت ایک نمایاں پیش رفت کے طور پر دیکھی جا رہی ہے۔

کولمبیا نے گلوبل صمود فلوٹیلا پر اسرائیلی حملے کے بعد اپنے ملک میں موجود اسرائیلی سفارتکاروں کو ملک بدر کردیا۔

غیر ملکی میڈیا کے مطابق اسرائیل سے سفارتی تعلقات ختم کیے جانے کے بعد اب کولمبیا کے صدر نے گزشتہ روز غزہ جانے والے گلوبل صمود فلوٹیلا پر اسرائیلی حملے کے بعد اسرائیل کے باقی ماندہ سفارتکاروں کو بھی ملک بدر کردیا۔،رپورٹ کے مطابق ایک بیان میں کولمبیا کے صدر گوستاوو پیٹرو نے کہا کہ اسرائیل کے تمام سفارتکار کولمبیا سے چلے گئے ہیں،میں نے اسرائیل کے ساتھ آزادانہ تجارتی معاہدہ بھی فوری طور پر ختم کرنے کا فیصلہ کیا ہے۔

واضح رہے کہ سال 2024 میں کولمبیا نے اسرائیلی فوج کی جانب سے غزہ میں جاری قتل عام پر اسرائیل سے اپنے تعلقات منقطع کردیے تھے تاہم 4 اسرائیلی سفارتی اہلکار اب تک کولمبیا میں موجود تھے جنہیں اب ملک سے نکال دیا گیا ہے۔

غزہ کے مظلوم عوام تک امداد پہنچانے کی کوشش ایک بار پھر اسرائیلی جارحیت کی نذر ہو گئی۔ فلسطین پر قابض اسرائیلی فورسز نے گلوبل صمود فلوٹیلا کی آخری کشتی کو بھی حراست میں لے لیا ہے۔

عرب میڈیا کے مطابق، فلوٹیلا کی اس آخری کشتی پر پولینڈ کا جھنڈا لہرا رہا تھا، جس پر 6 امدادی کارکنان سوار تھے۔ یہ کشتی غزہ کی سمندری حدود سے تقریباً 43 ناٹیکل میل کے فاصلے پر تھی جب اسرائیلی بحریہ نے اسے روک کر قبضے میں لے لیا۔رپورٹس کے مطابق اسرائیلی بحریہ اب تک 43 کشتیوں کو قبضے میں لے چکی ہے جن میں دنیا بھر سے شریک تقریباً 500 کارکنان سوار تھے۔ ان میں سے 200 سے زائد افراد کو پہلے ہی جیل منتقل کیا جا چکا ہے، جب کہ بقیہ کو مختلف حراستی مراکز میں رکھا گیا ہے۔قابض فورسز کی جانب سے گرفتار ہونے والوں میں پاکستان کے سابق سینیٹر مشتاق احمد خان بھی شامل ہیں۔

اسرائیلی میڈیا کے مطابق، صمود فلوٹیلا کے 200 امدادی کارکنان کو صحرائے نقب کی جیل میں منتقل کرنے کا فیصلہ کیا گیا ہے۔ یہ کارکنان ممکنہ طور پر اپنے اپنے ممالک کو ڈی پورٹ کیے جانے تک قید رہیں گے۔گلوبل صمود فلوٹیلا میں دنیا کے مختلف ممالک سے تعلق رکھنے والے انسانی حقوق کے کارکنان، سیاسی رہنما اور سماجی شخصیات شامل تھیں جو غزہ کے محصور عوام کے لیے خوراک، ادویات اور بنیادی امداد لے کر جا رہے تھے۔ تاہم اسرائیلی بحریہ نے اس مشن کو ناکام بنانے کے لیے مسلسل کارروائیاں کیں اور تمام کشتیاں اپنے قبضے میں لے لیں۔