Author: ممتاز حیدر

اسلام آباد: تھانہ سنگجانی کی حدود سے گدھے کے گوشت کی برآمدگی کے معاملے پر سنسنی خیز انکشافات سامنے آ گئے ہیں۔ پولیس اور اسلام آباد فوڈ اتھارٹی کی مشترکہ کارروائی میں خفیہ سلاٹر ہاؤس کا سراغ لگایا گیا جہاں گدھوں کو ذبح کر کے ان کا گوشت اور کھالیں مبینہ طور پر بیرونِ ملک بھیجی جا رہی تھیں۔

ابتدائی رپورٹ کے مطابق سنگجانی کے علاقے میں قائم ایک خفیہ سلاٹر ہاؤس میں باقاعدہ منصوبہ بندی کے تحت گدھوں کو ذبح کیا جاتا تھا۔ ذرائع کے مطابق یہ سلاٹر ہاؤس غیر ملکی باشندوں نے ایک مقامی شخص کے ساتھ مل کر قائم کیا تھا، جہاں گوشت محفوظ رکھنے کے لیے کولڈ اسٹوریج کی سہولت بھی موجود تھی۔ذرائع نے بتایا کہ سلاٹر ہاؤس میں گدھوں کو ذبح کرنے کے لیے ایک غیر ملکی قصائی کو بیرونِ ملک سے بلایا گیا تھا، جو خاص مہارت رکھتا تھا۔

اسلام آباد فوڈ اتھارٹی اور پولیس کی جانب سے مشترکہ کارروائی کے دوران سلاٹر ہاؤس سے 14 ذبح شدہ گدھوں کی باقیات اور 45 زندہ گدھے برآمد کیے گئے۔ کارروائی کے دوران دو غیر ملکی باشندوں کو گرفتار کیا گیا ہے جنہیں پولیس نے حراست میں لے کر مزید تفتیش شروع کر دی ہے۔پولیس کا کہنا ہے کہ ابتدائی تفتیش کے مطابق اس گوشت کو مقامی مارکیٹ میں فروخت کرنے کے شواہد نہیں ملے، تاہم یہ شبہ ظاہر کیا جا رہا ہے کہ یہ گوشت پاکستان میں مقیم غیر ملکیوں کو فراہم کیا جاتا تھا یا اسمگلنگ کے ذریعے بیرون ملک بھجوایا جا رہا تھا۔

یاد رہے کہ ایک روز قبل اسلام آباد فوڈ اتھارٹی نے ترنول کے علاقے میں چھاپہ مار کر گوشت کو قبضے میں لیا تھا، جس کے بعد یہ شبہ مضبوط ہوا کہ گدھے کے گوشت کی غیر قانونی سپلائی کا ایک منظم نیٹ ورک کام کر رہا ہے۔ترجمان فوڈ اتھارٹی کے مطابق موقع پر موجود ایک غیر ملکی شہری کے خلاف مقدمہ درج کر لیا گیا ہے جبکہ مزید ملزمان کی گرفتاری کے لیے چھاپے مارے جا رہے ہیں۔ تحقیقات کا دائرہ کار وسیع کر دیا گیا ہے تاکہ اس گھناؤنے کاروبار میں ملوث مقامی سہولت کاروں تک بھی پہنچا جا سکے۔

خیبرپختونخوا کے ضلع بنوں کے علاقہ میریان میں دہشت گردوں کے خلاف ایک اہم پولیس آپریشن کے دوران ایک حیران کن واقعہ پیش آیا، جب دہشت گردوں کا استعمال شدہ ڈرون تکنیکی خرابی یا غلطی کے باعث اُنہی کے ساتھیوں پر گر پڑا، جس کے نتیجے میں متعدد دہشت گردوں کے ہلاک و زخمی ہونے کی اطلاعات موصول ہوئی ہیں۔

تفصیلات کے مطابق ریجنل پولیس آفیسر (آر پی او) بنوں سجاد خان نے میڈیا کو بتایا کہ خفیہ اطلاعات پر بنوں کے علاقہ میریان میں دہشت گردوں کی موجودگی کی تصدیق ہوئی تھی، جس کے بعد پولیس نے فوری طور پر مربوط کارروائی کا آغاز کیا۔ آپریشن کے دوران پولیس نے بکتربند گاڑیوں، ڈرون، تھرمل ویپنز اور جدید ہتھیاروں کا استعمال کیا، جبکہ علاقے کا مکمل محاصرہ بھی کر لیا گیا۔آر پی او سجاد خان کے مطابق دہشت گردوں کی جانب سے میریان پولیس اسٹیشن پر کواڈکاپٹر کے ذریعے حملے کی کوشش کی گئی، تاہم اینٹی ڈرون ٹیکنالوجی کی مدد سے اس حملے کو ناکام بنا دیا گیا۔ اسی دوران دہشت گردوں کا ایک ڈرون نامعلوم وجوہات کی بنا پر اپنے ہی ٹھکانے پر گر گیا، جس سے متعدد دہشت گرد موقع پر ہلاک یا شدید زخمی ہو گئے۔

سکیورٹی حکام کا کہنا ہے کہ یہ واقعہ دہشت گردوں کی صفوں میں افراتفری اور خوف کا سبب بنا، جبکہ پولیس اور دیگر قانون نافذ کرنے والے ادارے علاقے میں مکمل الرٹ ہیں۔آر پی او بنوں نے مزید کہا کہ پولیس سکیورٹی فورسز کے ساتھ مسلسل رابطے میں ہے اور اگر ضرورت پڑی تو علاقے میں مزید آپریشنز کیے جائیں گے تاکہ دہشت گردی کے مکمل خاتمے کو یقینی بنایا جا سکے۔

پاکستان مرکزی مسلم لیگ کے صدر خالد مسعود سندھو نے کہا ہے کہ پاکستان کی بیٹی ڈاکٹر عافیہ صدیقی کے حوالہ سے حکمران دوغلی پالیسی ترک کریں اور قوم کے سامنے اپنا واضح اور دوٹوک مؤقف پیش کریں،اسحاق ڈار کا امریکہ میں بیان قوم کے جذبات کی ترجمانی نہیں ،پاکستانی قوم ڈاکٹر عافیہ کی رہائی چاہتی ہے،

خالد مسعود سندھو کا کہنا تھا کہ ایک طرف وزیراعظم فوزیہ صدیقی کو تسلیاں دے رہے ہیں کہ حکومت غافل نہیں، جبکہ دوسری جانب وزیر خارجہ اسحاق ڈار امریکا میں بیٹھ کر فرما رہے ہیں کہ ڈاکٹر عافیہ کو سزا منصفانہ قانونی عمل کے تحت ملی۔ یہ منافقانہ طرز حکمرانی قوم مزید برداشت نہیں کرے گی،ڈاکٹر عافیہ کو امریکی عدالتوں نے جھوٹے مقدمے میں سزا دی اور دہائیوں سے قید میں رکھا ہوا ہے،حکمران وعدے تو کرتے ہیں مگر عمل نہیں کرتے، اسحاق ڈار کے بیان کی وزیراعظم تردید کریں اورڈاکٹر عافیہ صدیقی کی رہائی کی کوششیں تیز ہونی چاہئے، ایک طرف پاکستان کی عدالتوں میں عافیہ صدیقی کی رہائی کے لئےدائر درخواست پر حکومت کوئی دلچسپی نہیں دکھا رہی تو وہیں اسحاق ڈار کابیان سامنے آنا اس امر کی نشاندہی ہے کہ حکمران ڈاکٹر عافیہ صدیقی کی رہائی میں دلچسپی نہیں رکھتے، اگر ن لیگی حکومت نے کوئی ایسا فیصلہ تو قوم انہیں کبھی معاف نہیں کرے گی.

امریکہ میں پاکستان کے نائب وزیراعظم اسحاق ڈار نے امریکی جیل میں موجودعافیہ صدیقی کے بارےے میں گفتگو کی ہے ۔

امریکی تھنک ٹینک اٹلانٹنک کونسل کو انٹریو میں اسحاق ڈار کا کہنا تھا کہ میرا خیال ہے کہ ہمیں کسی بھی چیز کو سیاست زدہ نہیں کرنا چاہیئے، ڈاکٹر عافیہ صدیقی کو دی گئی سزا امریکی عدالتی نظام کے تحت قانونی ہے، اور پاکستان کو اس پر کوئی اعتراض نہیں،مثال کے طورپر جب میں کہتا ہوں کہ عافیہ صدیقی کئی دہائیوں سے یہاں ہیں اور خدا بہتر جانتا ہے کہ وہ کب تک یہاں قید میں رہیں گی،میں سوچتا ہوں کہ یہ غیر منصفانہ بات ہوگی ،اگر یہ قانونی کارروائی کے نتیجے میں ایکشن ہوا ہے تو میرا خیال ہے یہی فارمولہ سب پر لاگو ہوتا ہے،کسی کو کوئی استثنیٰ نہیں، اگر آپ ایک مقبول سیاسی رہنما ہیں تو اس کا ہر گز یہ مطلب نہیں کہ آپ کو لائسنس مل گیا ہے کہ آپ ہتھیار اٹھائیں اور عوام کو اشتعال دلا کر ایک ملک کی فوجی تنصیبات پر حملہ کردیں ،یہ غداری ہے،میں جج نہیں ہوں کہ کوئی فیصلہ کر سکوں