Author: ممتاز حیدر

پاکستان نے سوشل میڈیا آپریٹرز سے دہشت گردوں کے زیر استعمال گمنام آئی ڈیز بلاک کرنے کا مطالبہ کیا ہے۔

وزیر مملکت برائے قانون و انصاف بیرسٹر عقیل ملک اور وزیر مملکت برائے داخلہ طلال چوہدری کا اسلام آباد میں پریس کانفرنس کرتے ہوئے کہنا تھا پاکستان عالمی سطح پر دہشت گردی کے خلاف مضبوط مورچہ ہے،طلال چوہدری کا کہنا تھا ہم دہشت گردوں کے اکاؤنٹس بلاک کرنا چاہتے ہیں، ہم سوشل میڈیا آپریٹر سے درخواست کررہے ہیں کہ وہ ہم سب سے تعاون کریں، ہم چاہتے ہیں کہ ہمارے ساتھ ان اکاونٹس سے متعلق معلومات شیئر کی جائیں، جو اکاونٹس بتائے ہیں وہ تمام دہشت گرد گروپوں کے ہیں،ہمیں نہیں معلوم کہ یہ اکاؤنٹس افغانستان سے یا کہاں سے آپریٹ ہو رہے ہیں، یہ اکاونٹس گمنام ناموں اور گمنام آئی ڈیز کے ذریعے چلائے جا رہے ہیں۔

بیرسٹر عقیل ملک کا کہنا تھا پاکستان دہشت گردی سے بہت زیادہ متاثر ہوا ہے، پاکستان کو دہشت گردی میں نہ صرف جانی بلکہ بھاری مالی نقصان ہوا، ہم پاکستان میں سوشل میڈیا پلیٹ فارم کے دفاتر قائم ہونے کا خیر مقدم کریں گے، بہت سے دہشت گرد گروپ ناصرف پاکستان بلکہ اقوام متحدہ کی فہرست میں بھی کالعدم ہیں، سوشل میڈیا پلیٹ فارم ناصرف ان اکاؤنٹس کی نشاندہی کرے بلکہ ان کو بلاک کرے، ہم دہشت گردوں کے مزید سوشل میڈیا اکاونٹس کی نشاندہی کر رہے ہیں، پاکستان دہشت گردی کے خلاف عالمی جنگ میں مضبوطی سے کھڑا ہے۔

طلال چوہدری نے نشاندہی کی تھی کہ یہ دہشت گرد گروپ واٹس ایپ چلارہے ہیں، یہ دہشت گرد گروپ ہمارے ملک، معاشرے اور پوری دنیا کے لیے خطرہ ہیں، پاکستان میں استعمال ہونے والے ان اکاونٹس کی نشاندہی کی گئی ہے جو ان دہشت گرد گروپوں کے ہیں۔

وزیراعظم محمد شہباز شریف سے پاکستان تحریک انصاف کے سابق صوبائی صدر اور سابق صوبائی وزیر نوابزادہ محسن علی خان کی ملاقات ہوئی ہے

نوابزادہ محسن علی خان اپنے بیٹے شہریار اور کئی ساتھیوں سمیت پاکستان مسلم لیگ (ن) میں شامل ہو گئے. اس موقع پر پاکستان مسلم لیگ ن کے صوبائی صدر اور وفاقی وزیر امور کشمیر و گلگت بلتستان انجینئر امیر مقام بھی موجود تھے،وزیراعظم نے نوابزادہ محسن علی خان کا پاکستان مسلم لیگ (ن) میں شمولیت کا خیر مقدم کیا اور کہاکہ امید ہے آپ خیبر پختونخوا میں پاکستان مسلم لیگ ن کی پالیسیوں کو فروغ دینے اور عوامی روابط بڑھانے کے حوالے سے اپنا فعال کردار ادا کریں گے،خیبر پختونخوا کے عوام کی فلاح و بہبود اور وہاں امن و امان کے فروغ کے لئے وفاقی حکومت ہر ممکن کردار ادا کرتی رہے گی

چیف سیکرٹری گلگت بلتستان نےریلیف اینڈ ریسکیوآپریشن پر اہم پریس کانفرنس کی ہے.

گلگت بلتستان میں سیلاب اور لینڈ سلائیڈنگ میں ریسکیو آپریشن کے حوالے سے چیف سیکرٹری ابرار احمد مرزا نے کہا ہے کہ متاثرہ علاقوں میں ریسکیو آپریشن میں پاک آرمی، پولیس، جی بی سکاؤٹس مقامی انتظامیہ اور مقامی لوگوں نے بھرپور حصہ لیا،افواج پاکستان کی مدد سے ہم نے متاثرہ علاقوں سے 45 سے زائد سیاحوں کو ریسکیو کیا، 10 جون سے لیکر اب تک 9 اموات ہو چکی ہیں جس میں سب سے زیادہ 8اموات دیامر میں ہوئیں،زیادہ نقصانات کلاؤڈ برسٹ کی وجہ سے ہوئے، جس سے شدید ژالہ باری اور پھر اچانک سیلاب آیا، سکردو میں لینڈ سلائیڈنگ بہت زیادہ ہوئی مگر الحمدللہ نقصان زیادہ نہیں ہوا، ہماری ریسکیو ٹیمز نے متاثرہ علاقوں کے راستوں کو بروقت کلیئرکیا، تھک اور تھور میں جو سیلاب اور لینڈ سلائیڈنگ ہوئی وہ شدید تھی،متاثرہ علاقوں سے تمام سیاحوں کو نکال کر محفوظ مقامات تک پہنچایا گیا،اسکے علاوہ ہیوی مشینری کے ذریعے کئی پھنسے ہوئے لوگوں کو نکالاگیا، تمام متاثرہ افراد کی رہائش، کھانے اورجہاں ٹینٹ کی ضرورت تھی اس کا بھی بندوبست کیا گیا،گلگت بلتستان کے تمام اضلاع متاثر ہوئے مگر دیامر سب سے زیادہ متاثر رہا ،بارش اور سیلاب سے انفراسٹرکچر بشمول سڑکوں اورپلوں کوبھی نقصان پہنچا، ہماری ٹیمز فیلڈمیں ہیں اورریلیف ورک پوری تندہی کے ساتھ سرانجام دے رہی ہیں،یہ بڑےپیمانے کی تباہی ہے مگرہم سیاحوں ، مقامی افراداورجہاں راستے بند ہیں وہاں کام کر رہے ہیں، پاک فوج اورضلعی انتظامیہ نےکئی متاثرہ علاقوں میں لوگوں کوخوراک اور دیگر سہولیات پہنچائی ہیں شدید بارشوں ، سیلاب اور لینڈ سلائیڈنگ کی وارننگ بھی جاری کی گئی تھی، تمام سیاحوں سے گزارش ہے کہ موسم بہتر ہونےتک متاثرہ علاقوں کاسفر نہ کریں، افواج پاکستان اور تمام ریسکیو ادارے اس مشکل وقت میں متاثرین کی ہر ممکن مددکرینگے

اسلام آباد میں قتل کی جانے والی معروف ٹک ٹاکر ثناء یوسف کے قتل کیس میں پولیس نے اپنی تحقیقات مکمل کرتے ہوئے چالان پراسیکیوشن برانچ میں جمع کرا دیا ہے۔

ذرائع کے مطابق، پولیس نے چالان میں ملزم عمر حیات کو ہی ثناء یوسف کا قاتل قرار دیا ہے۔ پولیس کی جانب سے جمع کروائے گئے چالان میں ثناء یوسف کی والدہ، پھوپھی اور دیگر اہم گواہوں کے بیانات شامل ہیں جو واقعے کے حوالے سے اہم شواہد فراہم کرتے ہیں۔مزید برآں، چالان میں ملزم عمر حیات کے پولیس کے سامنے دیے گئے 164 کے اعترافی بیان کو بھی شامل کیا گیا ہے جو کہ کیس میں ایک کلیدی ثبوت کے طور پر سامنے آیا ہے۔ یہ اعترافی بیان پولیس کی تحقیقات کو مضبوط بنیاد فراہم کرتا ہے۔

پراسیکیوشن کی جانب سے دو رکنی ٹیم تشکیل دی گئی ہے جو چالان کی مکمل اسکروٹنی کرے گی تاکہ کیس کی تمام پہلوؤں کو بغور جانچا جا سکے۔ چالان کی مکمل جانچ کے بعد اسے عدالت میں پیش کیا جائے گا۔عدالت میں چالان کی پیشی کے بعد، متعلقہ جج کی عدالت میں کیس کا باضابطہ ٹرائل شروع کیا جائے گا، جس سے یہ قتل کیس قانونی عمل کے تحت اپنے آئندہ مراحل میں داخل ہو جائے گا۔