Author: ممتاز حیدر

پاکستان نیوی وار کالج ، لاہور میں میری ٹائم سینٹر آف ایکسیلنس کے زیرِ اہتمام "بدلتی لہریں دوبارہ زیرِ غور، بحرِ ہند کے خطے میں تزویراتی تبدیلیاں، ایک سال بعد” کے عنوان سے دوسری بین الاقوامی کانفرنس منعقد ہوئی۔کانفرنس میں بحر ہند کے بدلتے ہوئے اسٹریٹجک منظرنامے، عالمی طاقتوں کی بڑھتی ہوئی چپقلش، ابھرتی ہوئی ٹیکنالوجیز کے اثرات، اور پاکستان کی حکمتِ عملیوں پر تفصیلی گفتگو کی گئی۔

چیئرمین جوائنٹ چیفس آف اسٹاف کمیٹی کے سابق سربراہ جنرل زبیر محمود حیات (ریٹائرڈ) نے کانفرنس سے خطاب میں کہا کہ اگر سمندر کے راستے پاکستان کے خلاف کوئی جارحیت یا شرارت کی گئی تو اس کے بعد کی تمام تر ذمہ داری بھارت پر عائد ہوگی۔ کسی ابہام کی گنجائش نہیں، پاکستان کا جواب فوری، غیر متوقع اور مؤثر ہوگا۔

سابق وزیر خارجہ حنا ربانی کھر نے بحر ہند کے بدلتے ہوئے میری ٹائم چیلنجز پر روشنی ڈالتے ہوئے سفارتی بصیرت، علاقائی تعاون اور کثیرالجہتی روابط کی اہمیت پر زور دیا۔

اس سے قبل، صدر میری ٹائم سینٹر آف ایکسیلنس اور کمانڈنٹ پاکستان نیوی وار کالج ریئر ایڈمرل سہیل احمد اعظمی نے معزز مہمانوں کو خوش آمدید کہتے ہوئے کانفرنس کی افتتاحی تقریر کی اور IOR کی اسٹریٹجک اہمیت و عالمی تنازعات سے جنم لینے والے چیلنجز پر گفتگو کی۔

دیگرنامور مقررین میں مشیر این سی اے اور سابق ڈی جی ایس پی ڈی لیفٹیننٹ جنرل خالد احمد قدوائی (ریٹائرڈ) شامل تھے۔ سابق سیکرٹری خارجہ سفیر اعزاز احمد چوہدری؛ وائس ایڈمرل خان ہشام بن صدیق (ریٹائرڈ)؛ صدر نیشنل انسٹی ٹیوٹ آف میری ٹائم افیئرز وائس ایڈمرل احمد سعید (ریٹائرڈ)؛ صدر سینٹر فار ایرو اسپیس اینڈ سیکیورٹی اسٹڈیز اسلام آباد ایئر مارشل جاوید احمد (ریٹائرڈ)؛ ڈائریکٹر بیرونی روابط QAU پروفیسر ڈاکٹر سلمیٰ ملک؛ ریئر ایڈمرل سید فیصل علی شاہ (ریٹائرڈ)؛ اور ایگزیکٹو ڈائریکٹر اسٹریٹجک ویژن انسٹی ٹیوٹ بریگیڈیئر ڈاکٹر نعیم سالک (ریٹائرڈ) شامل تھے.

کانفرنس میں سرکردہ سفارت کاروں، دفاعی ماہرین، میڈیا اراکین ، اسکالرز اور یونیورسٹی کے طلباء کی ایک بڑی تعداد نے شرکت کی، جو بحر ہند کے خطے کی ابھرتی ہوئی حرکیات میں وسیع پیشہ ورانہ اور علمی دلچسپی کی عکاسی کرتی ہے۔

چاغی میں سکیورٹی فورسز کی بھارتی پراکسی تنظیم فتنہ الہندوستان کے دہشت گردوں کے خلاف اہم کارروائی میں 2 دہشت گرد مارے گئے جبکہ ایک پکڑا گیا۔

اسلام آباد میں وزیر اعلیٰ بلوچستان سرفراز بگٹی نے گرفتار دہشت گرد جہانزیب کی ویڈیو اور اعترافی بیان میڈیا کے سامنے پیش کر دیا،وزیر اعلیٰ بلوچستان سرفراز بگٹی نے پریس کانفرنس کرتےہوئے کہا کہ سکیورٹی فورسز نے 4 دن پہلے چاغی میں انٹیلی جنس بیسڈ کارروائی کی، ان دہشت گرد وں کو نشانہ بنایا جس میں 2 دہشت گرد مارے گئے جبکہ ایک پکڑا گیا،ہ دہشت گرد جہانزیب نے ہتھیار ڈال دیے، دیگر ساتھی آپریشن میں مارے گئے، دہشت گرد اہم تنصیبات کو نشانہ بنانا چاہتے تھے، دہشت گرد جہانزیب نے ویڈیو بیان میں مختلف کارروائیوں کا اعتراف کرلیا۔

انہوں نے بتایا کہ یہ لوگ چینی باشندوں کی نقل و حرکت پر نظر رکھتے تھے ، دہشت گرد جہانزیب دالبندین میں ہتھیار اور دیگر مواد سپلائی کرتا تھا،یہ بھارتی را کی پاکستان پر مسلط کردہ جنگ ہے بلوچستان میں قیام امن کیلئے اقدامات کررہے ہیں، دہشت گردوں کو کسی صورت رعایت نہیں دی جائے گی، دہشت گرد نہتے شہریوں کو نشانہ بنا رہے ہیں، دہشت گردوں کے خلاف سخت ترین فضائی اور زمینی آپریشن ضروری ہے،پہلے دن سے کہہ رہاہوں کہ یہ را بیسڈ ، را فنڈڈ جنگ ہے ، بھارت پاکستان کے تمام دشمنوں کو اکھٹا کرنا چاہتا ہے،4 جی سروسز بند کرنے پر ہمارے پر بڑی تنقید ہوئی ،دہشت گردوں کی کمیونیکیشن کو روکنا ضروری ہے۔کسی کو بلوچستان کا امن متاثر نہیں کرنے دیں گے، دہشت گردوں کو ریاست مخالف بیانیہ بنانے میں کبھی کامیاب نہیں ہونے دیں گے۔

ریاض: خانہ کعبہ کے امام اور ممتاز اسلامی اسکالر شیخ ڈاکٹر صالح بن حمید کو سعودی عرب کا نیا مفتی اعظم اور علما کی سینئر کونسل کا سربراہ مقرر کر دیا گیا ہے۔ یہ تقرری سابق مفتی اعظم کے انتقال کے بعد عمل میں لائی گئی۔

شاہی عدالت کی جانب سے جاری بیان کے مطابق شیخ صالح بن حمید کو ملک کے سب سے بڑے مذہبی اور فقہی منصب پر فائز کیا گیا ہے۔ ان کی ذمہ داریوں میں علما کی سینئر کونسل اور مستقل کمیٹی برائے اسلامی تحقیق کی سربراہی، امت کو دینی و فقہی رہنمائی فراہم کرنا، اہم مسائل پر مستند فتوے دینا اور مذہبی بیانیے کو منظم کرنا شامل ہوگا۔

شیخ ڈاکٹر صالح بن حمید 1950 میں سعودی عرب کے شہر بریدہ (صوبہ قصیم) میں پیدا ہوئے۔ انہوں نے کم عمری میں قرآن پاک حفظ کیا اور ابتدائی تعلیم وہیں سے حاصل کی، بعدازاں مکہ مکرمہ منتقل ہو گئے۔ جامعہ ام القریٰ سے انہوں نے شریعت میں بی اے، فقہ و اصول الفقہ میں ایم اے اور بعد ازاں پی ایچ ڈی کی ڈگری حاصل کی۔1984 سے وہ مسجد الحرام میں امامت کے فرائض سرانجام دے رہے ہیں۔ وہ میدان عرفات کی مسجد نمرہ میں خطبہ حج بھی دے چکے ہیں، جسے پوری مسلم دنیا میں خصوصی اہمیت حاصل ہے۔ وہ تاریخ کے پہلے امام ہیں جنہوں نے ڈاکٹریٹ کی ڈگری کے ساتھ مسجد الحرام میں امامت کا شرف حاصل کیا۔

شیخ صالح نے تدریس کا آغاز جامعہ ام القریٰ سے کیا جہاں وہ فقہ کے لیکچرار اور بعد ازاں مختلف شعبہ جات کے سربراہ رہے۔ 2007 میں انہیں اسلامی فقہ اکیڈمی میں سعودی عرب کا نمائندہ مقرر کیا گیا اور اسی سال صدر بھی منتخب ہوئے۔انہوں نے 2009 میں شوریٰ کونسل کے چیئرمین، سپریم جوڈیشل کونسل کے سربراہ اور شاہی دیوان کے مشیر کے طور پر بھی خدمات انجام دیں۔ 2011 میں وہ وزیر کے درجے پر شاہی دیوان کے مشیر تعینات ہوئے۔شیخ بن حمید کی متعدد علمی کتب اور تحقیقی مقالات شائع ہو چکے ہیں۔ ان میں رفع الحرج فی الشریعة الإسلامیة، الفقہ الکامل للنوازل، الحوار وضوابطه، الأسرة السعیدة، الخلاف بین الزوجین اور الاجتهاد الجماعی وأھمیتہ فی النوازل المعاصرة شامل ہیں۔2016 میں انہیں خدمتِ اسلام کے اعتراف میں شاہ فیصل انٹرنیشنل ایوارڈ سے نوازا گیا۔ یہ اعزاز انہیں اسلامی فقہ اکیڈمی میں قائدانہ کردار اور جدید فقہی مسائل پر ان کی علمی رہنمائی کے باعث دیا گیا۔

ماہرین کے مطابق شیخ صالح بن حمید کی تقرری سعودی عرب کے علمی و مذہبی اداروں میں نئی فکری جہت لے کر آئے گی۔ ان کی علمی بصیرت اور فقہی خدمات نہ صرف سعودی عرب بلکہ عالمی سطح پر بھی امتِ مسلمہ کی رہنمائی میں اہم کردار ادا کریں گی۔