Author: ممتاز حیدر

اقوام متحدہ کی جنرل اسمبلی اجلاس کےموقع پر او آئی سی کانٹیکٹ گروپ کی جانب سے مقبوضہ کشمیر میں سیاسی اور سکیورٹی صورتحال کا جائزہ لیا گیا۔

ترجمان دفترخارجہ شفقت علی خان کے مطابق اقوام متحدہ جنرل اسمبلی اجلاس کے موقع پر او آئی سی رابطہ گروپ برائے جموں و کشمیر کا اجلاس ہوا جس کی صدارت او آئی سی اسسٹنٹ سیکرٹری جنرل برائے سیاسی امور یوسف ایم نے کی جب کہ اجلاس میں رابطہ گروپ کے رکن ممالک پاکستان، سعودی عرب، ترکیہ، نائیجر اور آذربائیجان شریک ہوئے۔دفتر خارجہ کے ترجمان کا بتانا ہے کہ کشمیری عوام کے حقیقی نمائندوں کا ایک وفد بھی اجلاس میں شامل تھا، اجلاس میں مقبوضہ علاقے میں بگڑتی انسانی حقوق کی صورتحال پرغورکیاگیا،اجلاس میں وزیراعظم کے معاون خصوصی خارجہ امور طارق فاطمی نے بھارت کی غیرقانونی قبضہ مضبوط کرنے ، ظالمانہ قوانین، جبر اور آبادیاتی تبدیلیوں کی کوششوں کی مذمت کی اور کہا کہ جنوبی ایشیا میں پائیدار استحکام جموں و کشمیر کے تنازعے کےحل سے مشروط ہے،طارق فاطمی نے او آئی سی سے بھارتی جبر کےخاتمے، سیاسی قیدیوں کی رہائی کیلئے دباؤ ڈالنے پر بھی زور دیا۔

ترجمان دفترخارجہ کے مطابق اجلاس میں اوآئی سی وزرائےخارجہ کی جانب سے کشمیری عوام کےحقِ خودارادیت کی غیرمتزلزل حمایت کا اعادہ کرتے ہوئے پاکستان اورآزادکشمیرمیں بھارتی حملوں پر گہری تشویش کا اظہار کیا گیا،دوران اجلاس اوآئی سی نے حالیہ جنگ بندی کا خیرمقدم کیا اورثالثی کی کوششوں کو سراہتے ہوئے کہا کہ پہلگام حملےکے بعد کے واقعات سے واضح ہےکہ مسئلہ کشمیرحل ہوئے بغیرخطے میں امن ممکن نہیں، بھارتی رہنماؤں کے غیرذمہ دارانہ بیانات علاقائی امن کیلئے خطرہ ہیں، او آئی سی کی جانب سے مقبوضہ کشمیرمیں کریک ڈاؤن، 2800 گرفتاریوں،گھروں کی مسماری ، کشمیری رہنما شبیرشاہ کی بیماری کے باوجودرہائی نہ دینے پر شدید تشویش کا اظہار کیا گیا ۔

دوران اجلاس اوآئی سی نے ہزاروں سیاسی کارکنوں اورانسانی حقوق کے محافظوں کی گرفتاریوں سمیت سری نگر جامع مسجد اورعیدگاہ میں مذہبی اجتماعات پرپابندی کی بھی مذمت کی،اوآئی سی نے 5 اگست 2019 کےبھارتی اقدامات اورآبادیاتی تبدیلیوں کو مستردکرتے ہوئے مؤقف اپنایا کہ مقبوضہ کشمیر میں بھارتی انتخابات حقِ خودارادیت کا متبادل نہیں ہوسکتے،اس کے علاوہ اوآئی سی نے سیکرٹری جنرل کے خصوصی ایلچی کے دورہ پاکستان اور آزاد کشمیر کا خیرمقدم کیا۔

پاکستان انٹرنیشنل ایئرلائنز (پی آئی اے) نے اعلان کیا ہے کہ اکتوبر سے برطانیہ کے لیے براہِ راست پروازیں بحال کی جائیں گی۔ یہ فیصلہ تقریباً پانچ سال بعد اس وقت ممکن ہوا جب برطانوی حکام نے پاکستانی فضائی کمپنیوں پر عائد پابندی ختم کرتے ہوئے بین الاقوامی سطح پر حفاظتی اور سیکیورٹی سرٹیفکیشن کی منظوری دے دی۔

یاد رہے کہ مئی 2020 میں کراچی میں پی آئی اے کا ایئربس اے 320 طیارہ حادثے کا شکار ہوا تھا، جس میں 97 افراد جاں بحق ہوئے۔ اس سانحے کے بعد کی جانے والی حکومتی تحقیقات میں پائلٹ لائسنسز میں بے ضابطگیوں کا انکشاف ہوا، جس کے نتیجے میں برطانیہ اور یورپی یونین دونوں نے پی آئی اے پر فضائی پابندی عائد کردی تھی۔

پی آئی اے کے ترجمان عبداللہ خان کے مطابق "پاکستان انٹرنیشنل ایئرلائنز کو باضابطہ طور پر تھرڈ کنٹری آپریٹر (TCO) کی منظوری مل گئی ہے، جس کے تحت وہ اب برطانیہ کے لیے پروازیں چلا سکے گی۔”ترجمان نے بتایا کہ ابتدائی طور پر مانچسٹر کے لیے سروس شروع ہوگی، جس کے بعد برمنگھم اور لندن کے لیے پروازیں بھی بحال کی جائیں گی۔برطانیہ کے محکمہ ٹرانسپورٹ نے اس بات کی تصدیق کی ہے کہ پی آئی اے کو "ACC3” سیکیورٹی سرٹیفکیشن حاصل ہو گیا ہے، جو کہ یورپی یونین سے باہر کی ایئرلائنز کے لیے لازم ہے تاکہ وہ برطانیہ کارگو پروازیں چلا سکیں۔ یہ منظوری اسلام آباد، لاہور اور کراچی کے ہوائی اڈوں سے حاصل کی گئی ہے اور اگست 2030 تک کے لیے مؤثر رہے گی۔

برطانیہ میں پاکستانی نژاد افراد کی تعداد 16 لاکھ سے زیادہ ہے جبکہ ہزاروں برطانوی شہری پاکستان میں مقیم ہیں۔ اس پس منظر میں پی آئی اے کی پروازوں کی بحالی کو سفری سہولت، تجارتی تعلقات میں بہتری اور آمدنی میں اضافے کے لیے ایک اہم سنگ میل قرار دیا جا رہا ہے۔

پاکستانی حکومت اس وقت آئی ایم ایف کے 7 ارب ڈالر کے بیل آؤٹ پیکج کے تحت سرکاری اداروں کے نقصانات کم کرنے کے لیے نجکاری کے عمل کو تیز کر رہی ہے۔ پی آئی اے کو گزشتہ ایک دہائی میں ڈھائی ارب ڈالر سے زائد خسارے کا سامنا کرنا پڑا ہے۔وفاقی وزیر دفاع خواجہ آصف نے جولائی میں کہا تھا کہ برطانیہ اور یورپ کے روٹس کی بحالی سے پی آئی اے کی مارکیٹ ویلیو بڑھے گی اور نجکاری کے عمل کو بہتر انداز میں آگے بڑھایا جا سکے گا۔

سی ای او پی آئی اے کی جانب سے وزیراعظم پاکستان، نائب وزیراعظم، وزیر دفاع، وزارت دفاع اور سول ایوایشن کی سرپرستی اور دیگر منسلک اداروں کے تعاون پر خصوصی شکریہ کیا گیا،ترجمان قومی ائیر لائن نے بتایا ہے کہ سی ای او پی ائی اے نے پی ائی اے کی ٹیم کا بھی شکریہ ادا کیا کہ جنھوں نے 5 سال ثابت قدمی سے متعدد آڈٹس کا سامنہ کیا اور اس میں کامیابی حاصل کی۔

وزیراعظم پاکستان کی زیر صدارت ایک اعلیٰ سطحی اجلاس منعقد ہوا جس میں ملک میں سرمایہ کاری کے حجم کو بڑھانے، اقتصادی اور تجارتی سرگرمیوں کو فروغ دینے اور قابل عمل منصوبوں کی نشاندہی کے حوالے سے اہم فیصلے کیے گئے۔

اجلاس سے خطاب کرتے ہوئے وزیراعظم شہباز شریف نے کہا کہ حکومت کی پالیسی سرمایہ کاری کے ساتھ ساتھ تجارت کو فروغ دینا ہے تاکہ ملکی معیشت کو مضبوط بنایا جا سکے اور ہماری درآمدات میں خاطر خواہ اضافہ ممکن ہو۔ وزیراعظم نے واضح کیا کہ زراعت، آئی ٹی، معدنیات، سیاحت اور قابل تجدید توانائی وہ شعبے ہیں جہاں بیرونی سرمایہ کاری کے وسیع مواقع موجود ہیں اور ان کو عملی جامہ پہنانے کے لیے فوری اقدامات کیے جائیں گے۔وزیراعظم نے تمام وزارتوں کو ہدایت کی کہ وہ ٹارگٹ کے مطابق منصوبے مکمل کریں اور زیر تکمیل اسکیموں کو بروقت پایہ تکمیل تک پہنچانے کے لیے تمام وسائل بروئے کار لائیں۔ انہوں نے کہا کہ مستقبل کو مدنظر رکھتے ہوئے ایک جامع روڈ میپ اور تبدیلی کا ایجنڈا تشکیل دیا جا رہا ہے تاکہ اہداف کے حصول کو منظم انداز میں یقینی بنایا جا سکے۔

وزیراعظم کا کہنا تھا کہ اقتصادی سرگرمیوں کے اس روڈ میپ میں نجی شعبے کا کردار کلیدی ہوگا اور ان کی شمولیت کو ہر سطح پر یقینی بنایا جائے گا۔ انہوں نے مزید کہا کہ جاری معاشی اور اقتصادی اصلاحات کی بدولت معیشت کو ایک نئی سمت ملی ہے اور شفافیت کے اس عمل نے ملک کو ترقی کی راہ پر گامزن کر دیا ہے۔اجلاس میں لندن سے زوم کے ذریعے شرکت کرنے والوں میں وفاقی وزیر ماحولیات مصدق ملک، وفاقی وزیر پیٹرولیم علی پرویز ملک، وفاقی وزیر خزانہ محمد جہانزیب، وفاقی وزیر تجارت جام کمال، وزیر اطلاعات عطا اللہ تارڑ اور وزیر اقتصادی امور احد خان چیمہ شامل تھے۔