Author: ممتاز حیدر

بھارتی فلم انڈسٹری کی نامور اداکارہ شلپا شیٹھی کے شوہر راج کندرا کو 60 کروڑ روپے کے فراڈ کیس میں لک آؤٹ نوٹس جاری کر دیا گیا ہے۔

بھارتی میڈیا کے مطابق شکایت کنندہ دیپک کوٹھاری نے الزام عائد کیا ہے کہ جوڑے نے 60 کروڑ روپے کا دھوکہ دیا جس کے بعد ممبئی پولیس نے لک آؤٹ نوٹس جاری کر دیا ہے۔ شکایت کنندہ نے الزام لگایا کہ دھوکہ دہی کا تعلق شلپا شیٹی اور راج کندرا کی ناکارہ کمپنی بیسٹ ڈیل ٹی وی پرائیویٹ لمیٹڈ سے ہے،پولیس افسر نے میڈیا کو بتایا کہ دیپک کوٹھاری نے کیس میں بتایا کہ ملزم نے پہلے قرض مانگا اور پھر سرمایہ کاری دکھا کر ماہانہ منافع کا جھانسہ دیا، جوڑے نے 2015 سے 2023 یعنی 8 سال تک بزنس کیپیٹل کے نام پر رقم لی لیکن اسے ذاتی اخراجات پر خرچ کیا،شکایت کنندہ نے بتایا کہ شلپا شیٹی نے 2016 میں کمپنی سے بطور ڈائریکٹر استعفیٰ دے دیا جس کے بعد کمپنی دیوالیہ ہوگئی۔

ممبئی پولیس کے اکنامک افیئرس ونگ میں درج کیس میں امیگریشن حکام کو ایک لک آؤٹ سرکلر جاری کیا گیا تھا تاکہ جوڑے کو ملک چھوڑنے سے روکا جا سکے،راج کندرا اور شلپا شیٹی کے وکیل نے الزام کو مسترد کرتے ہوئے کہا کہ کیس کا کوئی مجرمانہ پہلو نہیں ہے، یہ پرانی لین دین ہے۔ یہ خالصتاً سول معاملہ ہے۔

امریکا اور بھارت کے درمیان تجارتی تعلقات ایک بار پھر کشیدگی کا شکار ہوگئے ہیں۔

امریکی کامرس سیکریٹری ہاورڈ لَٹ نِک نے دعویٰ کیا ہے کہ بھارت زیادہ دیر تک واشنگٹن کے دباؤ کو نظر انداز نہیں کر پائے گا اور چند ہی ماہ میں امریکا کے ساتھ نیا معاہدہ کرنے پر مجبور ہو جائے گا،’بلومبرگ‘ کو دیے گئے انٹرویو میں ہاورڈ لَٹ نِک نے کہا ہے کہ ایک یا دو ماہ میں بھارت مذاکرات کی میز پر آئے گا، معافی مانگے گا اور ڈونلڈ ٹرمپ کے ساتھ ڈیل کرنے کی کوشش کرے گا،انہوں نے خبردار کیا کہ اگر بھارت نے امریکا کی حمایت نہیں کی تو اس کی برآمدات پر مزید ٹیرف عائد کیے جا سکتے ہیں،امریکی سیکریٹری نے طنزیہ انداز میں مزید کہا کہ بھارت محض دکھاوے کے لیے سخت مؤقف اختیار کر رہا ہے، یہ سب صرف دکھاوا ہے، آخرکار بھارتی کاروباری طبقہ حکومت سے امریکا کے ساتھ ڈیل کا مطالبہ کرے گا۔

ہاورڈ لَٹ نِک نے بھارت پر روسی تیل خریدنے اور ’برکس‘ بلاک کا حصہ بننے پر بھی تنقید کی اور کہا کہ اگر بھارت اپنی منڈی کھولنے کے لیے تیار نہیں، روسی تیل لینا بند نہیں کرتا اور برکس کا حصہ رہتا ہے تو پھر اسے 50 فیصد ٹیرف ادا کرنے ہوں گے، یا پھر بھارت ڈالر اور امریکا کی حمایت کرے، دیکھتے ہیں یہ کھیل کب تک چلتا ہے،بھارت روسی خام تیل صرف اس لیے خرید رہا ہے کیونکہ وہ پابندیوں کے باعث ’انتہائی سستا‘ ہے اور نئی دہلی اس سے ’بھاری منافع‘ کما رہا ہے۔

ممبئی پولیس نے ایک 51 سالہ نجومی کو واٹس ایپ پر دھماکوں کی سنگین دھمکیاں دینے کے الزام میں گرفتار کرلیا۔ ملزم کی شناخت اَشوِنی کمار کے نام سے ہوئی ہے جو ویدک نجوم اور واسطو کنسلٹنٹ ہے اور بنیادی طور پر بہار کے پٹنہ کے علاقے پٹلی پترہ کا رہائشی ہے۔

پولیس کے مطابق اَشوِنی کمار گزشتہ پانچ برس سے نوئیڈا کے سیکٹر 79 میں اپنے والدین کے ساتھ مقیم ہے۔ اس کے والد سریش کمار محکمہ تعلیم کے ریٹائرڈ افسر ہیں جبکہ والدہ پربھاوتی گھریلو خاتون ہیں۔اطلاعات کے مطابق ممبئی ٹریفک پولیس کے کنٹرول روم کو واٹس ایپ ہیلپ لائن نمبر پر ایک پیغام موصول ہوا جس میں دعویٰ کیا گیا کہ 14 دہشت گرد شہر میں گھس چکے ہیں اور ان کے پاس 400 کلوگرام آر ڈی ایکس موجود ہے۔ پیغام میں یہ بھی کہا گیا کہ دھماکے ’لشکر جہادی‘ نامی تنظیم کی جانب سے کیے جائیں گے اور 34 گاڑیوں میں بارودی مواد نصب ہے۔

پولیس حکام کا کہنا ہے کہ پیغام موصول ہوتے ہی شہر میں ہنگامی سکیورٹی اقدامات شروع کردیے گئے۔ انسدادِ دہشت گردی دستہ (اے ٹی ایس) سمیت دیگر حساس اداروں کو بھی الرٹ کر دیا گیا ہے جبکہ اہم مقامات پر اضافی نفری تعینات کی گئی ، پولیس نے عوام سے اپیل کی ہے کہ وہ افواہوں پر کان نہ دھریں اور کسی بھی مشتبہ سرگرمی کی اطلاع فوراً قانون نافذ کرنے والے اداروں کو دیں