Author: ممتاز حیدر

ایران کے سپریم لیڈر آیت اللّٰہ خامنہ ای نے کہا ہے کہ ایرانی حملوں میں صہیونی ریاست پاش پاش ہوگئی۔

اپنے خطاب میں آیت اللّٰہ خامنہ ای کا کہنا تھا کہ امریکا اس جنگ میں اس لیے داخل ہوا کہ اسے لگا اگر وہ ایسا نہ کرتا تو اسرائیل مکمل تباہ ہوجاتا، امریکا کو اس جنگ سے کوئی کامیابی حاصل نہیں ہوئی،صہیونی ریاست کے خلاف فتح پر ایرانی عوام کو مبارکباد دیتا ہوں، بلند بانگ دعوؤں کے باوجود ایرانی حملوں میں صہیونی ریاست پاش پاش ہوگئی،اسرائیل کے خلاف کامیابی پر مبارکباد پیش کرتا ہوں، 9 کروڑ نفوس پر مشتمل قوم متحد، ایک آواز، شانہ بشانہ کھڑی ہو کر افواج کی حمایت میں پیش پیش رہی، ایرانی قوم نے اپنے ممتاز کردار کا مظاہرہ کیا، ایرانی قوم نے دنیا کو دکھا دیا کہ جب وقت آئے تو یہ قوم ایک آواز بن کر اُبھر سکتی ہے،ایرانی افواج اسرائیل کے کثیر سطح کے دفاعی نظام کو توڑنے میں کامیاب رہی،ہم نے قطر میں امریکی بیس کو نشانہ بناکر بڑا نقصان پہنچایا ،ایرانی فوج ہر طرح کی جارحیت کا جواب دینے کی صلاحیت رکھتی ہے،امریکا نے اس صیہونی حکومت کو بچانے کے لیے جنگ میں شمولیت اختیار کی، مگر کچھ حاصل نہ کر سکا، ایران کے دشمن میزائل یا ایٹمی پروگرام جیسے بہانوں کا سہارا لیتے ہیں، لیکن ان کا اصل مقصد ہمیں جھکانا اور ہماری خودمختاری ختم کرنا ہے،ایران کے عوام نے متحدہوکر فوج کاساتھ دیا،ایران نے امریکہ کے منہ پر زوردارطمانچہ رسیدکیا

آیت اللّٰہ خامنہ ای کا کہنا تھا کہ امریکا نے جوہری تنصیبات کو نشانہ بنایا لیکن وہ کچھ زیادہ حاصل نہیں کرسکا، امریکی صدر ٹرمپ شومین شپ چاہتے تھے، ایران کے خلاف جارحیت کرنے والوں کو آگے بھی بھاری قیمت چکانی پڑے گی،اگر امریکہ مداخلت نہ کرتا تو اسرائیل مکمل طور پر تباہ ہو جاتا،

نئی دہلی ،اڑیسہ میں خواتین کے خلاف جرائم کی سنگینی ایک بار پھر عوامی توجہ کا مرکز بن گئی ہے، جہاں صرف دس دنوں کے دوران ریاست کے مختلف اضلاع میں پانچ الگ الگ زیادتی کے واقعات رپورٹ ہوئے ہیں۔ ان واقعات نے نہ صرف عوامی سطح پر تشویش کو جنم دیا ہے بلکہ ریاستی حکومت اور پولیس کی کارکردگی پر بھی سنگین سوالات اٹھا دیے ہیں۔

25 جون – کرنجئی، ضلع مایوربھنج،پولیس کے مطابق، ایک نوجوان خاتون مقامی مندر سے واپسی پر مبینہ طور پر تین افراد کی جانب سے اجتماعی زیادتی کا نشانہ بنی۔ تینوں ملزمان نے مبینہ طور پر اسے راستے میں روکا، قریبی جنگل میں لے جا کر زیادتی کی۔پولیس نے ایک ملزم بکاش پاترا کو گرفتار کرلیا ہے، جو مالرپاڑا گاؤں کا رہائشی ہے، جبکہ دو دیگر کی تلاش جاری ہے۔

1۔ 17 جون – گوپال پور بیچ، ضلع گنجام،ایک خاتون اپنے مرد دوست کے ہمراہ گوپال پور بیچ گئی تھی۔ رپورٹ کے مطابق، دس ملزمان نے ان دونوں پر حملہ کیا، مرد کو باندھ دیا اور خاتون کو اجتماعی زیادتی کا نشانہ بنایا۔ پولیس نے تمام دس ملزمان کو گرفتار کرلیا ہے۔

2۔ 18 جون – ٹینتلاپاشی گاؤں، ضلع کیونجھر،ایک 17 سالہ لڑکی کی لاش اُس کے گھر کے قریب دھان کے کھیت میں ایک درخت سے لٹکی ہوئی ملی۔ لڑکی گزشتہ شام سے لاپتہ تھی۔ لاش پر زخموں کے نشانات بھی پائے گئے۔ اہل خانہ کا دعویٰ ہے کہ لڑکی کے ساتھ زیادتی کی گئی اور پھر اسے قتل کیا گیا۔ پولیس نے مقدمہ درج کرکے تحقیقات شروع کردی ہیں۔

3۔ 19 جون – باری پادا، ضلع مایوربھنج،ایک 31 سالہ خاتون کے شوہر نے پولیس اسٹیشن میں شکایت درج کرائی کہ چار افراد، جو خاندان کو جانتے تھے، گھر میں داخل ہوئے اور خاتون کے ساتھ اس وقت زیادتی کی جب گھر کے دیگر افراد موجود نہیں تھے۔ پولیس نے شکایت کی بنیاد پر مقدمہ درج کرلیا ہے اور تفتیش جاری ہے۔

4۔ 25 جون – برہم پور، ضلع گنجام،ایک 17 سالہ لڑکی نے الزام لگایا کہ ایک کلینک کے مالک نے اس کے ساتھ زیادتی کی۔ لڑکی کے اہل خانہ کے مطابق، ملزم نے بی ایس سی (نرسنگ) کی تعلیم اور مفت رہائش دینے کا وعدہ کیا تھا۔ پولیس نے مقدمہ درج کرلیا ہے۔

ان واقعات نے ریاستی حکومت پر شدید دباؤ ڈال دیا ہے۔ کانگریس کی رکنِ اسمبلی صوفیہ فردوس نے کہا "یہ انتہائی افسوسناک اور شرمناک صورتحال ہے۔ خواتین کے خلاف جرائم میں جس تیزی سے اضافہ ہوا ہے، وہ حکومت کی ناکامی کا منہ بولتا ثبوت ہے۔ نہ حکومت افسوس کا اظہار کر رہی ہے اور نہ ہی کوئی ٹھوس کارروائی ہو رہی ہے۔””ریاست میں قانون و انصاف کی حالت انتہائی خراب ہو چکی ہے۔ مجرموں کو کسی کا خوف نہیں، نہ پولیس کا، نہ قانون کا۔ جب تک سخت کارروائی نہیں ہوگی، عوام کے دل میں خوف پیدا نہیں ہوگا۔”

اڑیسہ پولیس کے مطابق گوپال پور اور کرنجئی کے واقعات میں ملزمان کو گرفتار کیا جا چکا ہے جبکہ باقی کیسز کی تفتیش تیزی سے جاری ہے۔ پولیس کا کہنا ہے کہ تمام متاثرہ خاندانوں کو انصاف دلانے کیلئے مکمل سنجیدگی سے کارروائی کی جا رہی ہے۔

نئی دہلی: بھارتی نیوی کے ہیڈکوارٹر سے ایک شخص کو پاکستان کی خفیہ ایجنسی آئی ایس آئی کے لیے جاسوسی کے الزام میں گرفتار کر لیا گیا ہے۔ یہ شخص مبینہ طور پر کئی سالوں سے خفیہ معلومات فراہم کر رہا تھا، یہاں تک کہ حساس ملٹری آپریشن "سندور” کے دوران بھی معلومات کا تبادلہ کرتا رہا۔

گرفتار ہونے والا شخص وشال یادو ہے جو نیوی کے ہیڈکوارٹر دہلی میں کلرک کی حیثیت سے تعینات تھا۔ وہ ہریانہ کا رہائشی ہے اور اس کی گرفتاری راجستھان پولیس کے انٹیلیجنس ونگ نے عمل میں لائی۔ وشال یادو کو جے پور میں واقع سنٹرل انٹروگیشن سینٹر میں مختلف خفیہ ایجنسیوں کی جانب سے مشترکہ طور پر تفتیش کا سامنا ہے۔راجستھان پولیس کے سینئر افسر وشنوکانت گپتا کے مطابق، سی آئی ڈی انٹیلیجنس یونٹ کافی عرصے سے پاکستانی خفیہ ایجنسیوں کی سرگرمیوں پر نظر رکھے ہوئے تھی۔ اس دوران وشال یادو کی نگرانی کی گئی تو پتا چلا کہ وہ سوشل میڈیا کے ذریعے ایک خاتون ایجنٹ سے مسلسل رابطے میں ہے۔یہ خاتون، جو اپنے آپ کو "پریا شرما” کہتی ہے، درحقیقت پاکستانی انٹیلیجنس ایجنسی کی ہینڈلر تھی اور وہ وشال یادو کو حساس معلومات کے عوض رقم فراہم کر رہی تھی۔ ان معلومات میں بھارتی نیوی اور دیگر دفاعی یونٹس کی خفیہ تفصیلات شامل تھیں۔

ابتدائی تحقیقات سے پتا چلا ہے کہ وشال یادو کو آن لائن گیمز کھیلنے کی لت تھی اور وہ مالی طور پر مسائل کا شکار تھا۔ اپنی نقصانات پورے کرنے کے لیے اس نے خفیہ معلومات کا تبادلہ شروع کیا۔ پولیس کے مطابق، وہ رقم کرپٹو کرنسی اکاؤنٹس اور براہ راست بینک ٹرانسفر کے ذریعے وصول کرتا تھا۔سیکیورٹی ادارے اب اس بات کی کھوج لگا رہے ہیں کہ آیا اس نیٹ ورک میں مزید کون لوگ شامل ہیں اور کس قدر حساس معلومات پاکستان کو فراہم کی گئی ہیں۔ اس واقعے نے ایک بار پھر سوشل میڈیا کی خطرناک نوعیت کو نمایاں کیا ہے، جو جدید دور میں جاسوسی نیٹ ورکس کا اہم ذریعہ بنتا جا رہا ہے۔

نئی دہلی:ایئر انڈیا کی پرواز AI 171 کے 12 جون کو پیش آنے والے المناک حادثے کی تحقیقات میں اہم پیش رفت ہوئی ہے۔ حکومت نے جمعرات کو تصدیق کی ہے کہ حادثے کے مقام سے ملنے والے بلیک باکسز کا ڈیٹا کامیابی سے نکال لیا گیا ہے اور اس کی تحقیقات جاری ہے۔

حادثے میں شدید نقصان پہنچنے کے باوجود، ماہرین نے دونوں بلیک باکسز ، فلائٹ ڈیٹا ریکارڈر اور کاک پٹ وائس ریکارڈر سے محفوظ طریقے سے کراس پروٹیکشن ماڈیول اور میموری ماڈیول نکال کر تمام تر ڈیٹا ڈاؤن لوڈ کرلیا ہے۔ایک بلیک باکس حادثے میں متاثرہ ہاسٹل کی چھت سے ملا جبکہ دوسرا ملبے میں سے نکالا گیا۔ دونوں ریکارڈرز کو منگل کے روز سخت سیکیورٹی کے تحت دہلی میں واقع ایئرکرافٹ ایکسیڈنٹ انویسٹی گیشن بیورو کی لیبارٹری منتقل کیا گیا۔ پہلا بلیک باکس دوپہر 2 بجے، جبکہ دوسرا شام 5 بج کر 15 منٹ پر لیب پہنچا۔ ڈیٹا نکالنے کا عمل اسی روز شروع ہوا اور بدھ کو مکمل کرلیا گیا۔

بلیک باکس ڈیٹا میں کیا موجود ہے؟
CVR (کاک پٹ وائس ریکارڈر): پائلٹ اور معاون پائلٹ کی گفتگو، الارمز، اور اردگرد کے ماحولیاتی آوازیں
FDR (فلائٹ ڈیٹا ریکارڈر): طیارے کی رفتار، بلندی، انجن کارکردگی، اور پرواز کے کنٹرول سے متعلق اہم ڈیٹا۔

حکومت نے بیان میں کہا "CVR اور FDR ڈیٹا کی جانچ جاری ہے۔ ان کوششوں کا مقصد حادثے کے تسلسل کو سمجھنا اور وجوہات کی شناخت کرنا ہے تاکہ ہوابازی کی سیکیورٹی کو بہتر بنایا جا سکے۔”

ایئر انڈیا کا بوئنگ 787-8 ڈریم لائنر، پرواز AI 171، احمد آباد ایئرپورٹ سے 1:39 بجے دن روانہ ہوا اور صرف 36 سیکنڈ بعد ہاسٹل عمارت سے ٹکرا گیا۔حادثے میں 241 مسافر ہلاک ہوئے، جبکہ زمین پر موجود 34 افراد بھی جان سے گئے۔ صرف ایک شخص، 11A سیٹ پر موجود مسافر، بچ پایا

اہم سوالات جو بلیک باکس کا ڈیٹا واضح کرے گا
1. کیا پائلٹ نے آخری لمحوں میں کوئی الارم دیا؟سول ایوی ایشن منسٹری کے مطابق، کیپٹن سبروال نے حادثے سے لمحے پہلے "مے ڈے، مے ڈے…” کا پیغام دیا۔CVR ڈیٹا سے معلوم ہوگا کہ کیا کیپٹن نے واقعی "…نو پاور… نو تھرسٹ…” بھی کہا تھا، جو اس امکان کو تقویت دے گا کہ انجن کی ناکامی ہی حادثے کی بڑی وجہ ہو سکتی ہے۔ پیغام کس وقت بھیجا گیا؟جہاز نے 1:39 پر ٹیک آف کیا اور 36 سیکنڈ بعد زمین بوس ہوگیا۔CVR کا ڈیٹا اس بات کا تعین کرے گا کہ distress call کس ملی سیکنڈ پر دی گئی، اور اس سے اندازہ ہوگا کہ کیپٹن سبروال اور فرسٹ آفیسر کلائیو کُنڈر کے پاس جہاز بچانے کے لیے کتنا وقت تھا۔3. کیا Ram Air Turbine (RAT) فعال ہوا تھا؟حادثے کی ویڈیوز اور آڈیوز کے مطابق، جہاز سے RAT یعنی ریم ایئر ٹربائن کا اخراج دیکھا گیا، جو عام طور پر بجلی یا ہائیڈرالک نظام کی مکمل ناکامی پر فعال ہوتا ہے۔

ایئر انڈیا نے بتایا کہ حادثے سے تقریباً چار ماہ قبل جہاز کے دائیں انجن کو تبدیل کیا گیا تھا، جبکہ بائیں انجن کی اپریل میں جانچ کی گئی تھی۔اس کے باوجود تکنیکی ماہرین یہ بھی جانچ رہے ہیں کہ کیا انجن یا سسٹم کی ناکامی حادثے کی وجہ بنی۔

ذرائع کے مطابق، ایک پارلیمانی کمیٹی آئندہ ہفتے ایوی ایشن سیکٹر کی سیکیورٹی صورتحال، خاص طور پر طیاروں کی مرمت اور دیکھ بھال کے معاملات پر اجلاس کرے گی۔ اس میں حکومت کے نمائندے،ایئرلائنز کے افسرانماور بوئنگ کمپنی کے اعلیٰ حکام شامل ہوں گے، جن سے ممکنہ غفلت پر سخت سوالات کیے جائیں گے۔