Author: ممتاز حیدر

اسلام آباد ہائیکورٹ میں 190 ملین پاؤنڈ کیس میں بانی پی ٹی آئی عمران خان اور ان کی اہلیہ بشریٰ بی بی کی سزا معطلی کی درخواستوں پر آج سماعت ہوئی،

سماعت قائم مقام چیف جسٹس سرفراز ڈوگر اور جسٹس محمد آصف خان نے کی۔ سماعت کے دوران بانی پی ٹی آئی کے وکیل بیرسٹر سلمان صفدر، نیب کے سپیشل پراسیکیوٹر جاوید ارشد اور پراسیکیوٹر رافع مقصود عدالت کے سامنے پیش ہوئے، سابق وزیراعظم کی ہمشیرہ علیمہ خان، نورین خان، وزیراعلیٰ خیبرپختونخوا علی امین گنڈا پور اور قومی اسمبلی میں اپوزیشن لیڈر عمر ایوب بھی سماعت کے دوران عدالت میں موجود رہے۔سماعت کے دوران نیب نے سماعت ملتوی کرنے کی استدعا کی، جسے عدالت نے منظور کرلیا۔ قائم مقام چیف جسٹس سرفراز ڈوگر نے ریمارکس دیے کہ سماعت کی نئی تاریخ آرڈر میں درج کر دی جائے گی۔

سماعت ملتوی ہونے پر بیرسٹر سلمان صفدر نے عدالت سے شکوہ کیا کہ آج کافی دنوں بعد کیس لگا ہے، پیر کو کیس مقرر کر لیں اور مجھے سنا جائے۔ انہوں نے پراسیکیوشن کو کہا، کیس بنایا ہے تو آئیں کھیلیں، اپیل میں کیوں بھاگتے ہیں؟جس پر نیب کے سپیشل پراسیکیوٹر جاوید ارشد نے جواب دیا، بالکل کھیلیں گے،اس کیس میں 14 سال کی سزا ہے، لیکن ہم چاہتے ہیں کہ اسے عام کیس کی طرح ڈیل کیا جائے

راولپنڈی: جی ایچ کیو حملہ کیس کی سماعت 3 جولائی تک ملتوی، جیل ٹرائل نہ ہوسکا

راولپنڈی میں جی ایچ کیو حملہ کیس سمیت سانحہ 9 مئی سے متعلق دیگر مقدمات کی سماعت انسداد دہشتگردی کی عدالت میں ہوئی، تاہم جیل ٹرائل نہ ہونے کے باعث تمام کیسز کی کارروائی بغیر کسی پیش رفت کے ملتوی کر دی گئی۔ جہاں عدالت نے جی ایچ کیو حملہ کیس سمیت 9 مئی کے 11 دیگر مقدمات کی سماعت 3 جولائی تک ملتوی کرنے کا حکم دیا۔ آئندہ سماعت اڈیالہ جیل میں ہونے کا امکان ہے۔آج کی سماعت کے موقع پر شیخ رشید احمد، زرتاج گل، راجہ بشارت اور ایمان طاہر عدالت میں پیش ہوئے،

واضح رہے کہ سانحہ 9 مئی کے بعد درج کیے گئے درجنوں مقدمات میں متعدد سیاسی شخصیات کو نامزد کیا گیا ہے، اور ان مقدمات کی کارروائیاں مختلف مراحل میں ہیں۔ عدالت کی جانب سے آئندہ سماعت پر جیل ٹرائل ممکن ہونے کی توقع کی جا رہی ہے۔

اسلام آباد میں وفاقی وزیر داخلہ محسن نقوی کی صدارت میں ملک بھر کے تمام صوبوں بشمول آزاد کشمیر، گلگت بلتستان اور اسلام آباد کے محرم الحرام کے سکیورٹی پلان کا تفصیلی جائزہ لیا گیا۔

اجلاس میں سوشل میڈیا پر مذہبی منافرت پھیلانے والے عناصر کے خلاف سخت کارروائی کرنے کا فیصلہ کیا گیا اور ایسے عناصر کو قانون کی گرفت میں لا کر سخت اقدامات اٹھانے کی ہدایت کی گئی۔ اس حوالے سے الیکٹرانک و سوشل میڈیا پر نفرت انگیز مواد کی روک تھام کے لیے پیمرا کو واضح سفارشات ارسال کی جائیں گی۔محرم الحرام کے دوران امن و امان کو یقینی بنانے کے لیے تمام ضروری انتظامی اقدامات اٹھانے کی منظوری دی گئی۔ اجلاس میں طے کیا گیا کہ انٹرنیٹ اور موبائل فون سروس کی بندش کے حوالے سے فیصلہ سکیورٹی خدشات اور متعلقہ صوبوں کی مشاورت کے بعد کیا جائے گا۔ وزیر داخلہ نے ہدایت کی کہ اس ضمن میں تمام فیصلے زمینی حقائق اور سکیورٹی صورتحال کو مدنظر رکھتے ہوئے کیے جائیں۔

محسن نقوی نے کہا کہ تمام ضروری اقدامات باہمی مشاورت سے لیے جائیں گے اور وفاقی حکومت صوبوں، آزاد کشمیر، گلگت بلتستان اور اسلام آباد کو قیام امن کے لیے ہر ممکن تعاون فراہم کرے گی۔ انہوں نے واضح کیا کہ کسی کو بھی اشتعال انگیزی اور شرپسندی کی اجازت نہیں دی جائے گی۔وزیر داخلہ نے کہا کہ محرم الحرام کے دوران ضابطہ اخلاق کی سختی سے پابندی کروائی جائے گی جبکہ جلوسوں اور مجالس کی جدید ٹیکنالوجی کے ذریعے نگرانی کو یقینی بنایا جائے گا۔

اجلاس میں پنجاب، خیبرپختونخوا، سندھ، بلوچستان، آزاد کشمیر، گلگت بلتستان اور اسلام آباد کے آئی جیز پولیس اور سیکرٹریز داخلہ نے محرم الحرام سکیورٹی پلان پر تفصیلی بریفنگ دی۔وزیر مملکت داخلہ طلال چوہدری، وفاقی سیکرٹری داخلہ، قائمقام چیئرمین سی ڈی اے، کمانڈنٹ فرنٹیئر کانسٹیبلری، ڈی سی اسلام آباد، ڈی آئی جی اسلام آباد پولیس، وزارت داخلہ اور قانون نافذ کرنے والے اداروں کے اعلیٰ حکام بھی اجلاس میں شریک ہوئے۔تمام صوبوں، آزاد کشمیر، گلگت بلتستان کے آئی جیز پولیس، سیکرٹریز داخلہ، ڈی جیز رینجرز پنجاب، ڈی جی رینجرز سندھ اور قانون نافذ کرنے والے اداروں کے اعلیٰ حکام نے ویڈیو لنک کے ذریعے اجلاس میں شرکت کی۔

پیپلز پارٹی کی پارلیمانی پارٹی کا اجلاس ختم ہوگیا جس میں بجٹ کی منظوری میں ووٹ دینے کا فیصلہ کیا گیا ہے۔

اجلاس کے دوران چیئرمین پیپلز پارٹی بلاول بھٹو زرداری نے کہا ہے کہ ہم بجٹ میں ووٹ دینے جارہے ہیں۔ پاکستان پیپلزپارٹی کے پارلیمانی پارٹی کے اجلاس میں رکن قومی اسمبلی بی بی آصفہ بھٹو زرداری نے بھی شرکت کی،اجلاس میں اراکین اسمبلی بھی موجود تھے،بلاول نےا راکین کو بجٹ پر ووٹ دینے کی ہدایت کی

قبل ازیں بلاول نے چند روز قبل اسمبلی اجلاس کے دوران خطاب کرتے ہوئے کہا تھا کہ حکومت کے وفاقی بجٹ کی حمایت کرتا ہوں، پاکستان کو جنگ کی تیاری کرنا ہے اس لیے دفاعی بجٹ میں 20 فیصد اضافہ ہوا ہے، وزیر اعظم، وزیر خزانہ، وزیر خارجہ کا شکریہ کہ اس دفعہ انہوں نے بجٹ پر پیپلز پارٹی کو انگیج کیا، ہم چاہتے تھے کہ تنخواہ اور پنشن میں مزید اضافہ کیا جائے، یہ اچھا اقدام ہے کہ حکومت نے تنخواہوں اور پنشن میں اضافہ کیا،پیپلز پارٹی کی خواہشات تھیں جو ہم بجٹ میں حاصل نہیں کر سکے، چاہتے تھے کہ پی ایس ڈی پی میں جنوبی پنجاب کو پنجاب کا 30 فیصد حصہ دلایا جائے، وزیر خزانہ نے کہا کہ اگلے بجٹ میں ہم بیٹھ کر کوشش کریں گے.

اسلام آباد: دنیا بھر کی طرح پاکستان میں بھی منشیات کے استعمال اور غیر قانونی اسمگلنگ کی روک تھام کا عالمی دن آج نہایت سنجیدگی اور عزم کے ساتھ منایا جا رہا ہے۔ اس دن کو منانے کا مقصد معاشرے میں منشیات کے تباہ کن اثرات سے آگاہی فراہم کرنا اور ایک منشیات سے پاک دنیا کے خواب کو عملی جامہ پہنانے کے لیے اجتماعی کوششوں کو فروغ دینا ہے۔

ہر سال 26 جون کو منایا جانے والا یہ دن عالمی سطح پر منشیات کے پھیلاؤ، اسمگلنگ اور ان کے استعمال سے پیدا ہونے والے مسائل پر توجہ مرکوز کرنے کا موقع فراہم کرتا ہے۔ اقوام متحدہ کی جانب سے تسلیم شدہ اس دن کا مقصد انفرادی، قومی اور بین الاقوامی سطح پر اس لعنت کے خلاف جنگ کو مضبوط بنانا ہے۔

وزیراعظم محمد شہباز شریف نے اس موقع پر اپنے خصوصی پیغام میں کہا کہ "منشیات کا استعمال اور اس کی اسمگلنگ ایک عالمی چیلنج ہے جس کا حل صرف بین الاقوامی تعاون سے ہی ممکن ہے۔” انہوں نے کہا کہ حکومت پاکستان اس مسئلے کی سنگینی سے بخوبی آگاہ ہے اور انسداد منشیات فورس (اے این ایف) جیسے مستعد ادارے کی مدد سے اس ناسور کے خاتمے کے لیے سنجیدہ اور سخت اقدامات کیے جا رہے ہیں۔وزیراعظم نے مزید کہا کہ "منشیات نہ صرف انسانی صحت کو تباہ کرتی ہیں بلکہ متاثرہ فرد اور اس کے خاندان کی معاشرتی اور معاشی ساکھ بھی برباد کر دیتی ہیں۔” انہوں نے والدین، اساتذہ اور معاشرے کے دیگر ذمہ دار افراد سے اپیل کی کہ وہ نوجوان نسل کو منشیات کے خطرات سے آگاہ کریں اور انہیں اس لعنت سے محفوظ رکھنے کے لیے مؤثر کردار ادا کریں۔

انسداد منشیات فورس (ANF) نے اس سال بھی منشیات کی اسمگلنگ اور اس کی کاشت کی روک تھام میں قابلِ قدر کارکردگی دکھائی۔ ادارے نے نہ صرف ملک بھر میں متعدد کارروائیوں کے ذریعے منشیات کی بڑی مقدار ضبط کی، بلکہ بین الاقوامی نیٹ ورکس سے جُڑے کئی اسمگلرز کو بھی قانون کی گرفت میں لایا۔اے این ایف نے دیگر قانون نافذ کرنے والے اداروں کے ساتھ مل کر قریبی ہم آہنگی کے ساتھ کام کیا، جس کے نتیجے میں کئی اہم کامیابیاں حاصل ہوئیں۔ بلوچستان، خیبرپختونخوا اور پنجاب کے بعض علاقوں میں منشیات کی غیر قانونی کاشت کو روکا گیا اور ہزاروں ایکڑ اراضی کو منشیات سے پاک کرایا گیا۔

ماہرین کا کہنا ہے کہ منشیات کے خلاف جنگ صرف حکومتی سطح پر نہیں جیتی جا سکتی، بلکہ اس کے لیے معاشرے کے ہر فرد کو اپنا کردار ادا کرنا ہوگا۔ خاص طور پر تعلیمی اداروں میں آگاہی مہمات، نوجوانوں کو مشغول رکھنے کے مثبت مواقع، اور بحالی کے مراکز کی بہتری جیسے اقدامات ناگزیر ہیں۔

وزیراعظم شہباز شریف نے عالمی برادری سے بھی اپیل کی کہ منشیات کی اسمگلنگ اور پیداوار کی روک تھام کے لیے معلومات کا تبادلہ، ٹیکنالوجی کی فراہمی، اور فنڈنگ میں تعاون کو یقینی بنایا جائے تاکہ یہ عالمی چیلنج مؤثر انداز میں شکست کھا سکے۔