Author: ممتاز حیدر

وزیراعظم محمد شہباز شریف نے دریائے ستلج میں پیدا ہونے والی سیلابی صورتحال کے پیش نظر نیشنل ڈیزاسٹر منیجمنٹ اتھارٹی (این ڈی ایم اے) کے چیئر مین کو فوری اور موثر اقدامات کرنے کی سخت ہدایات جاری کر دیں۔ انہوں نے خاص طور پر پنجاب کے متاثرہ اضلاع میں ریسکیو آپریشنز کو تیز تر کرنے اور سیلاب زدہ علاقوں میں پھنسے ہوئے افراد کے فوری انخلاء کے لیے اقدامات کرنے پر زور دیا۔

وزیراعظم نے گنڈا سنگھ والا کے مقام پر سیلاب کی شدت اور خطرے کو مدنظر رکھتے ہوئے حفاظتی اقدامات میں اضافے اور مسلسل نگرانی یقینی بنانے کی ہدایت کی ہے تاکہ ممکنہ نقصانات کو کم سے کم کیا جا سکے۔ انہوں نے کہا کہ عوام کی جان و مال کی حفاظت حکومت کی اولین ترجیح ہے اور اس حوالے سے ہر ضروری سہولت فراہم کی جائے گی۔سیلاب سے متاثرہ علاقوں میں فوری خوراک، ادویات اور خیموں کی فراہمی کے انتظامات کو بھی وزیراعظم نے انتہائی اہم قرار دیا اور ہدایت کی کہ متاثرین کو بلا تاخیر یہ امداد پہنچائی جائے تاکہ ان کی مشکلات میں کمی آئے۔

وزیراعظم نے چیئر مین این ڈی ایم اے کو ہدایت کی ہے کہ وہ پنجاب کے ڈیزاسٹر مینجمنٹ کے اداروں کے ساتھ مکمل رابطے میں رہیں تاکہ ریسکیو اور ریلیف کے کام مؤثر طریقے سے انجام دیے جا سکیں۔حکومت کا عزم ہے کہ سیلاب زدہ علاقوں میں ہر ممکن تعاون فراہم کیا جائے اور متاثرین کو ہر قسم کی سہولیات فراہم کر کے ان کے مسائل کو فوری حل کیا جائے۔

صحافی کے سوال پر بانی پی ٹی آئی عمران خان کی بہن ناراض ہوگئیں

راولپنڈی میں اڈیالا جیل کے باہر میڈیا سے گفتگو کرتے ہوئے علیمہ خان سے صحافی نے سوال کیا کہ عمران خان اور ان کی فیملی کا انتخابات سے متعلق علیحدہ مؤقف ہے اور پارٹی نے جو فیصلہ کیا آپ اس سے متفق نہیں؟،جواب میں علیمہ خان نے کہا کہ آپ نے سوال بہت عجیب سا پوچھا ہے، عمران خان سے کسی کی ملاقات نہیں ہورہی ہے، اگر وہ فیملی کے ہاتھ مؤقف بھیجتے ہیں تو وہ عمران خان کا مؤقف ہے، آپ نے یہ کیوں کہا کہ وہ فیملی کا مؤقف ہے، آپ کی اس طرح کی جو باتیں ہوتی ہیں نہ ، شیطانیاں آپ لوگ کرتے ہیں، اگر ہم آپ سے بات کررہے ہیں تو آپ ہمارا احترام کریں، آپ نے جان بوجھ کر عمران خان اور فیملی کا کہا، یہ شیطانیت ہے،مجھے برا لگا، دکھ ہوا۔

علیمہ خان کا کہنا تھا کہ آپ 2 سال سے ہمارے ساتھ کھڑے ہو اور آپ کو مجبوراً یہ سوال کرنا پڑتا ہے، ہمارے بچے اور بھائی جیل میں ہیں، ہمارے اوپرکیسز ہیں، اتنا تو لحاظ کرلو، جان بوجھ کر شیطان والے سوال نہ کرو، ورنہ یقین کرو مجھے ضرورت نہیں میڈیا سےبات کرنے کی، ہمارا موڈ نہیں آپ سے بات کرنے کا ،ہم بات نہیں کریں گے۔

پی ٹی آئی سیکرٹری جنرل سلمان اکرم راجہ نے پارٹی عہدہ چھوڑنے کا فیصلہ کر لیا

سلمان اکرم راجہ کا کہنا تھاکہ پچھلے منگل میں نے علی بخاری ایڈووکیٹ کے ذریعے عمران خان صاحب کو درخواست بھیجی تھی کہ پارٹی ممبران کو بے تحاشہ ناحق سزاؤں کے پیش نظر مجھے سیکرٹری جنرل کے عہدے سے ہٹ کر قانونی معاملات پر توجہ مرکوز کرنے دی جائے۔ خان صاحب نے میری درخواست منظور نہ کی۔ میں انکے اعتماد پر شکر گزار ہوں۔میری تمام وکالتی اور فکری زندگی ان اصولوں کے تابع رہی ہے جو میری سرشت کا حصہ ہیں: انسان کی عزت جو جمہوریت کی اساس ہے، خواتین اور اقلیتوں پر معاشرتی اور ریاستی جبر کیخلاف مزاحمت ، معاشی انصاف اور قانون و آئین کی بالادستی۔مزدوروں اور پنشنروں کے حقوق کی قانونی جنگ، NRO کیخلاف ڈاکٹر مبشر کی وکالت، جمہوری عمل میں عسکری مداخلت کیخلاف ائر مارشل اصغر خان کی وکالت سے لے کر مقدموں کی طویل فہرست ہے جن میں مجھے اپنے اصولوں کا ساتھ دینے کا موقع ملا۔پی ٹی آئی کے ابتلا کے دور میں میں نے خان صاحب کی ہدایت پر قانونی معاونت کے ساتھ ساتھ سیاسی میدان میں قدم رکھا۔ میرا مقصد آئین، قانون اور جمہوریت کی بالادستی کی جد و جہد میں حصہ ڈالنا تھا۔ مجھے فخر ہے کہ مجھے تن، من، دھن سے اس مقصد کے حصول میں حصہ ڈالنے کا موقع ملا۔خان صاحب نے حساس ترین مقدمات میرے سپرد کیے۔ ٹیریان، عدت، سائفر میں کھلی عدالت کا حصول، فوجی عدالتوں کیخلاف آئینی جنگ، مخصوص نشستوں کا مقدمہ اور دیگر میں اللہ تعالیٰ کے فضل سے کامیابی ہوئی۔ جبر کو ۲۶ ویں ترمیم کے ذریعے فوجی عدالتوں اور مخصوص نشستوں کے فیصلوں کو الٹانا پڑا۔سیاسی میدان میں میں نے اپنے آپ کو عمران خان کے آئینی و جمہوری نظرئے کا امین سمجھا ہے۔ ہر فورم پر اس نظریے کے دفاع اور ترویج کیلئے اپنے وجود کو وقف کئے رکھا۔ اس پاداش میں مجھے دہشتگردی کے بیس جھوٹے مقدمات میں ملوث کر دیا گیا ہے۔ کوئی غم نہیں۔ جیل سے نہیں ڈرتا۔میں کوئی روایتی سیاست دان نہیں، نہ جاگیردار نہ مل اونر۔ تاہم میرا مختصر خاندان میرے ساتھ کھڑا ہے۔ ہم نے پارٹی کے اندر اور باہر سے ہر قسم کے رقیق حملوں کو سہا ہے۔ کوئی ملال نہیں۔ اپنی بھرپور وکالت کو پس پشت ڈال کر معاشی بے یقینی کو بخوشی قبول کیا۔آج ایک ایسا واقعہ ہوا ہے جو اب مجھ سے دو ٹوک فیصلے کا تقاضا کرتا ہے۔ میری زندگی کھلی کتاب ہے۔ میرا کوئی عمل کسی اصول سے متصادم نہیں۔ فکری و معاشی دیانت پر سمجھوتہ مجھے قبول نہیں۔ کل میں خان صاحب سے گزارش کر کے عہدے سے علیحدہ ہو جاؤں گا۔ میری وکالتی خدمات بلامعاوضہ حاضر رہیں گی۔