Author: ممتاز حیدر

وفاقی وزیر دفاع خواجہ آصف نے کہا ہے کہ وطن عزیز کی آدھی سے زیادہ بیوروکریسی پرتگال میں پراپرٹی لے چکی ہے،

ایکس پر ایک پوسٹ میں خواجہ آصف کا کہنا تھا کہ وطن عزیز کی آدھی سے زیادہ بیوروکریسی پرتگال میں پراپرٹی لے چکی ہے اور شہریت لینی کی تیاری کر رہی ہے۔ اوریہ نامی گرامی بیوروکریٹس ہیں ۔ مگر مچھ اربوں روپے کھا کے آرام سے ریٹائرمنٹ کی زندگی گزار رہیں۔ بزدار کا ایک قریب ترین بیوروکریٹ چار ارب بیٹیوں کی شادی پر صرف سلامی وصول کر چکا ھےاور آرام سے ریٹائرمنٹ کی زندگی گذار رہا ھے۔ سیاستدان تو انکا بچا کھچا کھا تے اور چولیں مارتےییں نہ پلاٹ نہ غیر ملکی شہریت کیو نکہ الیکشن لڑنا ھوتا ھے۔ پاک سر زمین کو یہ بیوروکریسی پلیت کر رہی ھیں۔

https://x.com/KhawajaMAsif/status/1952799486637396418

امریکی صدر ڈونلڈ ٹرمپ نے ایک بار پھر واضح کیا ہے کہ وہ بھارت سے درآمدات پر عائد 25 فیصد ٹیرف کو "بہت زیادہ حد تک” بڑھانے کا ارادہ رکھتے ہیں، اور یہ اقدام آئندہ 24 گھنٹوں کے اندر نافذ کیا جائے گا۔ صدر ٹرمپ کا کہنا ہے کہ بھارت کی جانب سے روسی تیل کی خریداری ناقابل قبول ہے اور وہ اس صورت حال پر سخت ردعمل دیں گے۔

ٹرمپ نے بھارت کی روسی تیل کی خریداری پر کڑی تنقید کرتے ہوئے کہا کہ بھارت "یوکرین میں جاری جنگی مشین کو ایندھن فراہم کر رہا ہے”، اور اگر بھارت نے ایسا کرنا بند نہ کیا تو وہ امریکہ کی طرف سے سخت کارروائی کریں گے۔ انہوں نے مزید کہا کہ بھارت نہ صرف بڑی مقدار میں روسی تیل خرید رہا ہے بلکہ اس تیل کا ایک بڑا حصہ کھلے بازار میں بیچ کر بھاری منافع بھی کما رہا ہے، اور اس صورتحال سے بھارت کو کوئی فرق نہیں پڑتا کہ اس جنگ کی وجہ سے کتنے لوگ مارے جا رہے ہیں۔

صدر ٹرمپ نے بھارت کے ساتھ اصل تنازعے کی وجہ بھارتی ٹیرفز کو قرار دیا، جنہیں انہوں نے "بہت زیادہ” بتایا۔ تاہم انہوں نے نئے ٹیرف کی شرح کے حوالے سے کوئی واضح اعداد و شمار فراہم نہیں کیے۔

گزشتہ روز بھی صدر ٹرمپ نے بھارت کو خبردار کیا تھا کہ وہ روسی تیل کی خریداری کی بنا پر ٹیرف میں اضافے کے سخت اقدامات کریں گے۔ انہوں نے اپنی سوشل میڈیا پوسٹ میں کہا، "میں بھارت کی طرف سے امریکہ کو ادا کیے جانے والے ٹیرفز میں نمایاں اضافہ کروں گا تاکہ بھارت اس جنگ میں اپنی شمولیت کو روک سکے۔”

وفاقی وزیر صحت مصطفیٰ کمال نے قومی اسمبلی کے اجلاس میں اہم خطاب کرتے ہوئے کہا ہے کہ کشمیر کی آزادی کی جنگ کراچی کی گلیوں میں لڑی گئی ہے ، بھارت نے کراچی کو بھی میدانِ جنگ بنا رکھا تھا، جہاں دہشت گردی اور تشدد کا سلسلہ شدت اختیار کیے ہوئے تھا۔

مصطفیٰ کمال نے کہا کہ آج الحمد للہ کراچی را کے تسلط سے آزاد ہو چکا ہے اور یہاں سے دہشت گردی اور را کے قتل و غارت گری کا خاتمہ ہو چکا ہے۔ "کراچی سے را کو ختم کیا گیا، وہاں روزانہ بیس بیس لوگ مارے جاتے تھے، لیکن تمام سیاسی جماعتوں، سول و فوجی قیادت اور قوم نے مل کر ایک مثال قائم کی اور اس جنگ کو جیتا۔”وفاقی وزیر نے کہا کہ پاکستان میں ہونے والی دہشت گردی کے پیچھے بھارت کا ہاتھ ہے، اور جب بھارت میں کوئی واقعہ ہوتا ہے تو بھارتی میڈیا سب سے پہلے پاکستان کا نام لیتا ہے۔ انہوں نے کہا، "ماضی میں آٹھویں لائن میں بھارت کا ذکر ہوتا تھا، لیکن اب بھارت کا نام دہشت گردی کے حوالے سے پہلے نمبر پر آنا چاہیے کیونکہ بھارت اس میں ملوث ہے۔”

انہوں نے مزید کہا کہ قوم کے بچوں کو معلوم ہونا چاہیے کہ بھارت ہمارا دشمن ہے اور پوری قوم بھارت کے خلاف ایک سیسہ پلائی دیوار کی طرح متحد ہو چکی ہے۔ مصطفیٰ کمال نے زور دیا کہ پاک فوج اور قوم نے بھارت کے تمام سازشی خواب چکنا چور کر دیے ہیں، اور آج بھارت اپنی اندرونی مشکلات میں الجھا ہوا ہے۔

پاکستان ٹیلی کمیونیکیشن اتھارٹی (پی ٹی اے) نے عوام کو خبردار کرتے ہوئے کہا ہے کہ ڈیجیٹل پلیٹ فارمز پر اظہارِ رائے کی آزادی ہر فرد کا بنیادی حق ہے، لیکن آزادی کے نام پر غیر قانونی مواد کی تشہیر یا اس قسم کی سرگرمیاں ہرگز قابل قبول نہیں۔ پی ٹی اے نے واضح کیا ہے کہ آن لائن اور سوشل میڈیا پلیٹ فارمز پر ایسی سرگرمیوں پر سخت قانونی کارروائی کی جائے گی۔

پی ٹی اے کے مطابق، مذاہب، رسالتِ محمدیؐ یا مقدس شخصیات کی توہین ایک قابل گرفت جرم ہے، جس کے مرتکب افراد کے خلاف قانونی کاروائی عمل میں لائی جائے گی۔ علاوہ ازیں، کسی فرد یا ادارے کے خلاف اشتعال انگیز مواد کی اشاعت بھی قانوناً جرم شمار کی جاتی ہے۔دفاع اور دیگر قومی اداروں کے خلاف نفرت انگیز تقاریر اور جھوٹے پروپیگنڈے کو بھی قابل گرفت قرار دیتے ہوئے پی ٹی اے نے کہا ہے کہ اس طرح کے مواد کی تشہیر ملک کی سلامتی اور عوامی مفاد کے خلاف ہے اور اس کی سختی سے روک تھام کی جائے گی۔

پی ٹی اے نے مزید بتایا کہ فحش، غیر اخلاقی مواد اور جعلی خبروں کی تشہیر مکمل طور پر غیر قانونی ہے اور پاکستان کے الیکٹرانک کرائمز ایکٹ (پیکا) 2016 کے تحت یہ تمام سرگرمیاں قابلِ گرفت جرم ہیں۔وام سے اپیل کی گئی ہے کہ وہ ملک میں امن و امان قائم رکھنے اور عوامی مفاد کے تحفظ کے لیے ایسے غیر قانونی مواد کی فوری اطلاع دیں۔ پی ٹی اے نے اپنی CMS موبائل ایپ کے ذریعے آن لائن مواد کی رپورٹنگ کا سہولت فراہم کی ہے تاکہ صارفین آسانی سے مشتبہ مواد کی رپورٹ کر سکیں۔پی ٹی اے نے واضح کیا ہے کہ خبردار رہیں، محفوظ رہیں، اور غیر قانونی مواد کی نشاندہی کر کے ملک کی ترقی اور سماجی ہم آہنگی میں اپنا کردار ادا کریں۔