تحریک انصاف کے چیئرمین بیرسٹر گوہر کا کہنا ہے کہ گلگت بلتستان میں الیکشن مہم کے دوران جنید اکبر کو گرفتار کیا گیا۔
پشاور میں میڈیا سے گفتگو کرتے ہوئے بیرسٹر گوہر نے کہا کہ جنید اکبر کی گرفتاری اور انہیں الیکشن مہم سے روکنا قابل مذمت ہے،بیرسٹر گوہر نے کہا کہ گلگت بلتستان میں بھی سیاسی اسپیس نہ دینے سے جمہوریت کا نقصان ہوگا۔
دوسری جانب گرفتاری کے موقع پر جنید اکبر کا کہنا تھا کہ مجھے کہا گیا کہ آپ کی این او سی نہیں ہے اس لیے آپ گلگت سے نکل جائیں، اور اب پھر ہمیں چیک پوسٹ پر روکا گیا ہے۔ کیا گلگت بلتستان پاکستان کا حصہ نہیں ہے؟ بزدل نہ بنیں، ہمت کریں اور میدان مقابلہ کریں۔
پی ٹی آئی کے مطابق جنید اکبر، سلیم الرحمن، ڈاکٹر امجد، محبوب شاہ، نعیم اور چیف کوآرڈینیٹر گلگت بلتستان الیکشن نواز شانگلہ کو گرفتار کیا گیا ہے
گلگت بلتستان میں جنید اکبر کی گرفتاری،سابق وزیراعلیٰ گلگت بلتستان خالد خورشید کا کہنا ہے کہ پاکستان تحریک انصاف کی مرکزی قیادت کی ٹیم، جس کی قیادت جنید اکبر کر رہے تھے، کو کل ورکرز اور عوام نے شاندار استقبال کیا، جس سے پورے علاقے میں تحریک انصاف کا ایک نیا سیاسی مومنٹم پیدا ہوا۔افسوس کے ساتھ آج انہیں غذر میں داخلے سے روکا گیا اور بعد ازاں واپسی کے دوران مبینہ طور پر انہیں گرفتار کر لیا گیا۔یہ چیف الیکشن کمشنر کا انتظامیہ نام بتا رہی ہے اور ہمیں تو پتہ ہی ہے چیف الیکشن کمشنر نے ہمیشہ سے ہی بتایا کہ پچھلے جتنے بھی واقعات ہیں فیصلے وقت بند کمرے میں ہوتے ہیں، خالد خورشید کا مزید کہنا تھا کہ تحریک انصاف، عمران خان کی قیادت میں، ہمیشہ اس بات پر یقین رکھتی ہے کہ عوامی مینڈیٹ کا احترام ہر صورت میں یقینی بنایا جائے۔ ہم نہ کسی ادارے کے خلاف ہیں اور نہ ہی تصادم چاہتے ہیں، بلکہ صرف شفافیت، انصاف اور جمہوری اصولوں کی بالادستی کے حامی ہیں۔تمام ورکرز سے گزارش ہے کہ وہ پُرامن رہیں، نظم و ضبط قائم رکھیں اور اپنے سیاسی و جمہوری حقوق کے لیے آئینی و قانونی راستہ اختیار کریں۔
علاوہ ازیں پی ٹی آئی رہنما بابر سلیم سواتی کا کہنا تھا کہ صوبائی صدر پاکستان تحریک انصاف خیبرپختونخوا جنید اکبر خان کی گلگت بلتستان کے علاقے ہنزہ میں گرفتاری انتہائی قابلِ مذمت، غیر جمہوری اور سیاسی انتقام کی بدترین مثال ہے۔ ایک عوامی مینڈیٹ رکھنے والے رہنما کو اس انداز میں گرفتار کرنا نہ صرف سیاسی کارکنوں کی توہین ہے بلکہ عوام کے حقِ نمائندگی پر بھی حملہ ہے۔پاکستان تحریک انصاف کے کارکنان اور قیادت ایسے اوچھے ہتھکنڈوں سے مرعوب ہونے والے نہیں۔ جنید اکبر خان پارٹی کا ایک بہادر، نظریاتی اور عوامی رہنما ہیں جنہوں نے ہمیشہ عوام کے حقوق کی آواز بلند کی۔ سیاسی انتقام اور گرفتاریاں حق و سچ کی جدوجہد کو نہیں روک سکتیں۔ہم وفاقی و گلگت بلتستان حکام سے مطالبہ کرتے ہیں کہ فوری طور پر جنید اکبر خان کو رہا کیا جائے اور سیاسی مخالفین کے خلاف انتقامی کارروائیوں کا سلسلہ بند کیا جائے
