Author: ممتاز حیدر

آبنائے ہرمز کھلوانے کے لیے امریکی صدر ڈونلڈ ٹرمپ نے چین سمیت دنیا بھر سے مدد کی جو اپیل کی تھی اس پر دنیا بھر سے خاموش ردعمل سامنے آیا ہے اور اب تک کسی ایک ملک نے بھی ٹرمپ کی اپیل پر خطے میں بحری جہاز بھیجنے کا اعلان نہیں کیا۔

امریکا کے معاشی اتحادی جاپان نےبھی آبنائے ہرمز میں اپنے بحری جہاز بھیجنے سے انکار کر دیا ہے،جاپانی حکمراں جماعت کے پالیسی چیف نے کہا کہ خطے میں بہت بڑی دہلیز پار ہوئی تبھی جاپانی بحری جہاز آبنائے ہرمز بھیجے جا سکیں گے،چین بھی ٹرمپ کے مطالبے پر خاموش ہوگیا،ادھر واشنگٹن میں چینی سفارت خانے نے کہا کہ چین متعلقہ فریقین سے رابطے موثر بنانے پر کام کر کے تعمیری کردار ادا کرے گا۔

امریکی وزیر توانائی نے بھی چین سے امداد مانگ لی۔ کرس رائٹ نے کہا کہ انہیں توقع ہے کہ چین آبنائے ہرمز کھلوانے میں تعمیری شراکت دار کا کردار ادا کرے گا۔برطانوی وزیر توانائی ایڈ ملی بینڈ نے کہا کہ ہم آبنائے ہرمز کھلی رکھنے کے لیے امریکا اور دیگر اتحادیوں سے بات چیت کر رہے ہیں، ہو سکتا ہے ہم بارودی سرنگیں تلاش کرنے والے ڈرون بھیج دیں۔اس کے علاوہ جنوبی کوریا نے کہا ہے کہ ہم نے ٹرمپ کی اپیل پڑھ لی ہے، مشرق وسطیٰ کی صورت حال کا قریبی سے جائزہ لے رہے ہیں،واضح رہے کہ فرانس خطے میں اپنے بحری جہاز بھیجنے سے پہلے ہی انکار کر چکا ہے۔

عرب میڈیا کے مطابق آبنائے ہرمز کی بندش کے بعد ایک ہزار بحری جہاز آبنائے ہرمز سے گزرنے کے انتظار میں کھڑے ہیں،عرب میڈیا کے مطابق ان جہازوں میں 20 تیل کے ٹینکر بھی شامل ہیں، آبنائے ہُرمُز دنیا بھر میں تیل کی فراہمی کرنے والے ٹینکروں کی گزرگاہ بھی ہے۔

خلیج فارس کی حالیہ کشیدگی کے دوران امریکی طیارہ بردار بحری جہاز ابراہیم لنکن کی خراب حالت میں واپسی کی خبروں نے عالمی میڈیا اور عسکری حلقوں میں نئی بحث چھیڑ دی ہے۔ مختلف بین الاقوامی خبر رساں اداروں اور مبصرین کا کہنا ہے کہ اس واقعے نے جدید جنگ میں طیارہ بردار جہازوں کے کردار پر سنجیدہ سوالات کھڑے کر دیے ہیں۔

برطانوی خبر رساں ادارے رائیٹرز کے مطابق خلیج فارس میں پیش آنے والے حالیہ واقعات نے یہ تاثر پیدا کیا ہے کہ طیارہ بردار جہازوں کا روایتی دور شاید اختتام کے قریب پہنچ رہا ہے۔ رپورٹ میں کہا گیا کہ ایران کی عسکری حکمت عملی اور جدید دفاعی صلاحیتوں نے یہ ثابت کرنے کی کوشش کی ہے کہ طیارہ بردار جہاز اب ناقابلِ تسخیر قلعے نہیں رہے بلکہ بڑے اور مہنگے اہداف بن سکتے ہیں۔

امریکی نشریاتی ادارے سی این این نے اس صورتحال کو امریکہ کے لیے ایک “قومی صدمہ” قرار دیا۔ رپورٹ کے مطابق تقریباً 13 ارب ڈالر مالیت کے اس بحری جہاز کے چند ہی لمحوں میں غیر مؤثر ہونے کے دعووں نے امریکی فوجی طاقت کے بارے میں سخت سوالات پیدا کر دیے ہیں۔ سی این این کے مطابق اس حالت میں جہاز کی امریکہ واپسی کو بعض تجزیہ کار ویتنام جنگ کے بعد امریکی فوجی ساکھ کو لگنے والا سب سے بڑا دھچکا قرار دے رہے ہیں۔

روسی خبر رساں ادارے ے اپنے تجزیے میں لکھا کہ “ایک زمانے میں سمندری طاقت کی علامت سمجھا جانے والا یہ جہاز اب اپنی پرانی حیثیت کھوتا دکھائی دے رہا ہے۔” رپورٹ میں طنزیہ انداز میں کہا گیا کہ جو جہاز خطے کو دھمکانے آیا تھا وہ اب “پانی میں تیرتے ملبے” جیسی حالت میں واپس جا رہا ہے۔

اسی طرح فرانسیسی خبر ایجنسی Agence France-Presse نے دعویٰ کیا کہ اس واقعے کے بعد امریکی محکمہ دفاع میں تشویش کی فضا پیدا ہو گئی ہے۔ رپورٹ کے مطابق جہاز کی واپسی سے مشرق وسطیٰ میں طاقت کا توازن ایران کے حق میں جھکتا ہوا دکھائی دے رہا ہے۔ اے ایف پی کے مطابق امریکی اتحادی ممالک میں بھی خدشات پیدا ہو رہے ہیں کہ اگر امریکہ کا سب سے بڑا جنگی جہاز بھی اپنے دفاع میں مشکلات کا شکار ہو سکتا ہے تو خطے میں امریکی تحفظ کی ضمانت پر سوال اٹھ سکتے ہیں۔

برطانوی اخبار دی ٹیلیگراف نے اس صورتحال کو مغربی بحری بالادستی کے لیے ایک علامتی دھچکا قرار دیا۔ اخبار کے مطابق اگر یہ دعوے درست ثابت ہوتے ہیں تو تاریخ میں اسے وہ لمحہ سمجھا جا سکتا ہے جب مغربی بحری طاقت کی روایتی برتری کو پہلی بار سنجیدہ چیلنج ملا۔

مشرق وسطیٰ کی بدلتی ہوئی عسکری صورتحال کے تناظر میں یہ واقعہ عالمی طاقتوں کے درمیان جاری اسٹریٹجک مقابلے کی ایک نئی مثال بن سکتا ہے۔

متحدہ عرب امارات (یو اے ای) میں فجیرہ پیٹرولیم انڈسٹریز زون کے اوپر ایک ڈرون کی "کامیاب انٹرسیپشن” کے بعد گرنے والے ملبے کی وجہ سے لگنے والی آگ کو بجھانے کی کوششیں جاری ہیں،

نیو یارک پوسٹ نے رپورٹ کیا ہے کہ متحدہ عرب امارات کے اوپر سے گاڑھا سیاہ دھواں اٹھ رہا ہے جب فوجیرہ کی بندرگاہ پر آگ بھڑک اٹھی -متحدہ عرب امارات کی وزارت دفاع نے کہا کہ اس نے ہفتے کے روز ایران سے داغے گئے 9 بیلسٹک میزائل اور 33 ڈرون مار گرائے۔ کسی جانی نقصان کی اطلاع نہیں ہے، لیکن افراتفری کے درمیان تیل لوڈ کرنے کے کچھ آپریشن رک گئے۔ اطلاعات کے مطابق اس واقعے میں ایک اردنی شہری معمولی زخمی ہوا ہے۔فجیرہ پورٹ خطے کا ایک اہم مرکز ہے جہاں روزانہ 1.7 ملین بیرل سے زیادہ خام تیل اور ریفائنڈ فیول برآمد کیے جاتے ہیں۔ایران نے اس حملے کے جواب میں کہا ہے کہ یو اے ای میں امریکی مفادات، بشمول بندرگاہیں، جائز فوجی اہداف ہیں۔

مالدیپ کے مالے ویلانا بین الاقوامی ہوائی اڈے پر 22 فروری کو جنوبی افریقہ کے جوڑے سیمونا مسو اور ڈین شیپرز کی خوشی کا کوئی ٹھکانہ نہیں تھا۔ یہ جوڑا، جو ایمسٹرڈیم میں رہائش پذیر ہے، مالدیپ کے سفر پر اپنی شادی کی تقریب کے لیے آیا تھا، جو بعد میں اس موسم گرما میں کورٹ ہاؤس میں ہونے والی رسمی شادی کی پیش رفت تھی۔

سیمونا مسو نے سی این این ٹریول کو بتایا، "ہم بلکل خوشیوں کے بادلوں میں تھے۔ ہوائی اڈے سے سیدھا سیپلین کے ذریعے ریزورٹ پہنچایا گیا، جہاں ہمارا شاندار استقبال کیا گیا۔”ایک ہفتہ بعد، جب جوڑا واپس مالے پہنچا، تو خوشی کی جگہ پریشانی نے لے لی۔ ان کی اور دنیا بھر میں ہزاروں مسافروں کی پروازیں 28 فروری کو ایران پر امریکی اور اسرائیلی حملوں کے بعد منسوخ ہو گئیں۔ڈین شیپرز نے بتایا، "ہوائی اڈے پر ہر کوئی بالکل تھکا ہوا اور پریشان نظر آ رہا تھا، جیسے کسی نے ابھی چھٹی ختم کی ہو۔”

اس تصادم کے دو ہفتے بعد بھی، عالمی ہوائی سفر شدید متاثر ہے۔ تجزیہ کاروں کے مطابق، مشرق وسطیٰ میں 52,000 سے زائد پروازیں منسوخ ہو چکی ہیں، جس سے تقریباً چھ ملین مسافروں کو مشکلات کا سامنا کرنا پڑا۔ دبئی، ابو ظہبی اور ریاض کے قریبی کنگ خالد انٹرنیشنل ایئرپورٹ جزوی طور پر فعال ہیں۔سیمونا اور ڈین کی پروازیں پانچ مرتبہ شیڈول ہونے کے بعد منسوخ ہوئیں، جس سے ان کا مہنگا اور شاندار ہنی مون تقریباً تین ہفتے طویل ہو گیا۔ جوڑے نے روزانہ آن لائن اور ایئر لائن کسٹمر سروس کے ذریعے متبادل پروازوں کی کوشش کی، لیکن زیادہ تر آپشنز مہنگے یا غیر معقول تھے، بعض رستے 56 گھنٹے طویل تھے۔شروع میں ریزورٹ نے متاثرہ مہمانوں کے لیے 50 فیصد رعایت دی، لیکن جوڑے کو طویل قیام کے لیے مزید سستے اختیارات تلاش کرنے پڑے۔ آخرکار انہوں نے ماافوشی جزیرے پر رہائش اختیار کی، جہاں انہیں متعدد ہوٹلوں میں رہنے کے بعد ایک "آرام دہ، صاف” بیچ فرنٹ ہوٹل ملا۔

سیمونا اور ڈین نے دوسرے پھنسے ہوئے مسافروں سے تعلق قائم کیا، معلومات کا تبادلہ کیا اور ایک دوسرے کا حوصلہ بڑھایا۔ سیمونا نے کہا، "ہم لوگوں سے پوچھتے ہیں، ‘آپ واپس کیسے جا رہے ہیں؟’ اور پھر معلومات کا تبادلہ کرتے ہیں۔”آخرکار، دو ہفتے بعد، ڈچ خاندان کی مدد سے انہوں نے سعودی ایئر لائن کی دو نشستیں بک کرائیں، جس سے ان کی واپسی کا امکان پیدا ہوا۔ سیمونا نے کہا، "میں محتاط پرامید ہوں۔ ہم کچھ بھی کرنے کے لیے تیار ہیں تاکہ جنت سے نکل کر گھر پہنچ سکیں۔”

مالدیپ کا یہ سفر جو شروعات میں خوشیوں بھرا تھا، عالمی سیاسی کشیدگی کی وجہ سے ایک "طویل ہنی مون ڈیزاسٹر” میں تبدیل ہو گیا، لیکن جوڑے کی ثابت قدمی اور مثبت سوچ نے انہیں مشکلات کے باوجود امید کے ساتھ واپسی کی جانب گامزن رکھا۔

کویت کے حکام نے اطلاع دی ہے کہ کویت انٹرنیشنل ایئرپورٹ پر متعدد ڈرون حملے کیے گئے، جس کے نتیجے میں ایئرپورٹ کے ریڈار سسٹم کے کچھ حصے کو نقصان پہنچا۔

سول ایوی ایشن اتھارٹی کے ترجمان عبداللہ الراجی کے مطابق، “کویت انٹرنیشنل ایئرپورٹ کو کئی ڈرونز نے نشانہ بنایا جنہوں نے ایئرپورٹ کے ریڈار سسٹم کو نقصان پہنچایا۔ خوش قسمتی سے کسی کے زخمی ہونے یا ہلاک ہونے کی اطلاع نہیں ملی۔” کویت کے بین الاقوامی ہوائی اڈے کے ریڈار سسٹم کو ایران سے منسوب ایک حملے میں متعدد ڈرونز نے نشانہ بنایا اور اسے نقصان پہنچایا۔

دوسری جانب بحرین کی وزارت داخلہ نے کہا ہے کہ ملک میں ایرانی حملوں سے متعلق ویڈیوز پوسٹ کرنے اور غلط معلومات پھیلانے کے الزام میں چھ افراد کو گرفتار کیا گیا ہے۔وزارت داخلہ کے مطابق، “چھ افراد کو گرفتار کیا گیا اور انہیں عوامی استغاثہ کے حوالے کیا گیا کیونکہ انہوں نے ایرانی جارحیت کے اثرات کے بارے میں ویڈیوز پوسٹ کیں، دشمنانہ کارروائیوں کی تعریف کی اور جھوٹی خبریں پھیلائیں۔”اطلاعات کے مطابق، بحرین میں ایرانی حملوں کے نتیجے میں کم از کم دو افراد ہلاک اور درجنوں دیگر زخمی ہو چکے ہیں۔

سربیا کے صدر نے کہا کہ کروشیا، البانیہ اور کوسوو مبینہ طور پر سربیا پر حملہ کرنے کی تیاری کر رہے ہیں۔

صدر ووچیچ نے ایک بیان میں کہا کہ مذکورہ ممالک موجودہ عالمی حالات کا بغور جائزہ لے رہے ہیں اور ان کی امید ہے کہ اگر روس اور یورپ کے درمیان جاری کشیدگی مزید بڑھتی ہے تو خطے میں طاقت کا توازن تبدیل ہو سکتا ہے۔ ان کے مطابق ایسے حالات میں عالمی سطح پر پیدا ہونے والا انتشار ان ممالک کو سربیا کے خلاف کارروائی کا موقع فراہم کر سکتا ہے۔ مشرقِ وسطیٰ میں جاری جنگ اور دنیا بھر میں بڑھتی ہوئی کشیدگی بھی بعض ممالک کے لیے ایسا ماحول پیدا کر سکتی ہے جس میں وہ اپنے علاقائی مقاصد حاصل کرنے کی کوشش کریں۔

صدر ووچیچ نے اس موقع پر یہ بھی دعویٰ کیا کہ سربیا کے پاس جدید انتہائی تیز رفتار بیلسٹک میزائل موجود ہیں، جو ملک کی دفاعی صلاحیت کو مضبوط بناتے ہیں۔ سربیا اپنی خودمختاری اور سلامتی کے تحفظ کے لیے ہر ممکن اقدامات کر رہا ہے۔انہوں نے واضح کیا کہ سربیا کا نیٹومیں شامل ہونے کا کوئی ارادہ نہیں ہے