صدرِ مملکت آصف علی زرداری نے قومی اسمبلی کا بجٹ اجلاس 5 جون کی شام 5 بجے طلب کر لیا ہے، جبکہ سینیٹ کا اجلاس بھی اسی روز شام 6 بجے طلب کیا گیا ہے۔
تفصیلات کے مطابق رواں سال 60 سے زائد اراکینِ پارلیمنٹ حج کی ادائیگی کے لیے سعودی عرب گئے ہوئے ہیں، جن کی جون کے پہلے ہفتے میں وطن واپسی متوقع ہے۔ اسی صورتحال کے پیشِ نظر حکومت کو بجٹ اجلاسوں کے شیڈول میں تبدیلی کرنا پڑی۔ذرائع کے مطابق حکومت نے ابتدائی طور پر یکم جون کو قومی اسمبلی اور سینیٹ کے الگ الگ اجلاس بلانے کا منصوبہ بنایا تھا، تاہم ارکانِ پارلیمنٹ کی عدم دستیابی کے باعث اب دونوں اجلاس 5 جون کو طلب کیے گئے ہیں۔
دوسری جانب وفاقی وزیرِ خزانہ محمد اورنگزیب نے کہا ہے کہ حکومت کی کوشش ہے کہ نئے بجٹ میں عوام پر کم سے کم مالی بوجھ ڈالا جائے۔باوثوق ذرائع کا کہنا ہے کہ آئندہ بجٹ میں مہنگائی اور معاشی دباؤ کو مدِنظر رکھتے ہوئے مختلف تجاویز پر غور جاری ہے، جبکہ حکومت پارلیمنٹ کے مکمل اور مؤثر اجلاس کو یقینی بنانے کے لیے تمام ارکان کی موجودگی چاہتی ہے۔