Author: ممتاز حیدر

ممبئی سے وارانسی جانے والی انڈیگو کی پرواز میں گزشتہ شب تکنیکی خرابی کے باعث پرواز میں تقریباً دو گھنٹے کی تاخیر ہو گئی، جس کے بعد ہوائی جہاز کے اندر ہنگامہ خیزی کے مناظر دیکھنے میں آئے۔

ایک ویڈیو جو سوشل میڈیا پر وائرل ہو گئی ہے، اس میں مسافر فلائٹ کے روانگی کے وقت کے بارے میں پوچھ رہے ہیں، جبکہ کیبن عملہ انہیں تحمل کا مظاہرہ کرنے اور اپنی نشستوں پر بیٹھے رہنے کی درخواست کر رہا ہے۔ ویڈیو میں ایک ایئر ہوسٹس بھی ہاتھ جوڑ کر ایک مسافر سے اپنی نشست پر بیٹھنے کی درخواست کرتی نظر آتی ہے، جو فلائٹ میں تاخیر پر احتجاج کر رہا ہے۔یہ واقعہ اس وقت پیش آیا ہے جب گزشتہ ماہ احمد آباد میں AI 171 فلائٹ کے حادثے کے بعد فضائی سفر کے حوالے سے مسافروں میں خدشات اور بے چینی میں اضافہ ہو گیا ہے۔ کورونا کے بعد ہوائی سفر کے کرایوں میں اضافے کے ساتھ اب سیکیورٹی اور حفاظت کے مسائل بھی مسافروں کو پریشان کر رہے ہیں۔

وارانسی جانے والی انڈیگو کی فلائٹ کو روانگی سے کچھ دیر قبل تکنیکی مسئلہ سامنے آنے کی وجہ سے پرواز ملتوی کی گئی۔ اس دوران گراؤنڈ اسٹاف جہاز کی جانچ پڑتال میں مصروف رہا جبکہ دوسری پروازوں کو رن وے استعمال کرنے کی اجازت دی گئی۔ چیکنگ مکمل ہونے کے بعد، 176 مسافروں کو لے کر انڈیگو کی یہ پرواز ممبئی سے روانہ ہوئی۔فلائٹ ٹریکر "flightradar24” کے مطابق، پرواز نمبر 6E 5028 کی روانگی مقررہ وقت 7:45 بجے کی بجائے رات 9:53 بجے ہوئی، جبکہ یہ وارانسی میں رات 11:40 بجے اتری۔ مقررہ وقت پر آمد 9:45 بجے تھی۔

ویڈیو میں کیبن عملہ مسافروں سے تحمل کا مظاہرہ کرنے کو کہہ رہا ہے اور زمین پر کام کرنے والے عملے سے جہاز کی جانچ مکمل ہونے تک انتظار کرنے کی تاکید کر رہا ہے۔ ایک ایئر ہوسٹس ویڈیو بنانے والے مسافر سے درخواست کرتی ہے کہ "سر، ویڈیو بنانا منع ہے، براہ کرم ویڈیو بند کریں۔” جس پر مسافر سخت احتجاج کرتے ہیں اور سوال کرتے ہیں کہ "ہماری جان کی کوئی قدر نہیں؟” ایک اور مسافر پوچھتا ہے، "جہاز کے اندر بٹھانے کے بعد جانچ کرنا مناسب ہے؟ اگر پرواز کے دوران کچھ ہوا تو ذمہ داری کون لے گا؟”مسافروں میں غصہ اور بے یقینی دیکھنے میں آ رہی تھی، کئی افراد ویڈیو بنا رہے تھے اور عملے سے مطالبہ کر رہے تھے کہ وہ متبادل حل پیش کریں۔ ایک مسافر کہتا ہے، "آپ ہم سے تعاون کی توقع رکھتے ہیں، تو آپ کو بھی ہمارے ساتھ تعاون کرنا چاہیے۔”

جہاز کی خاتون پائلٹ، کیپٹن اروشوی، غصے میں آئے ہوئے مسافروں کو ان کی نشستوں پر بیٹھنے کی درخواست کرتی ہیں۔ وہ کہتی ہیں، "آئیے بات کرتے ہیں لیکن براہ کرم بیٹھ جائیں۔ ہم دروازہ اس وقت تک بند نہیں کریں گے جب تک آپ مطمئن نہ ہوں۔ ہم آپ کے تمام سوالات کے جوابات دیں گے۔”ایک اور ویڈیو میں کیپٹن اروشوی مسافروں کو یقین دلاتی ہیں کہ تاخیر اس لیے کی گئی تاکہ ہر نظام کی مکمل جانچ پڑتال کی جا سکے۔ وہ کہتی ہیں، "ہم دس منٹ میں روانگی کے لیے تیار ہیں۔ اگر آپ خلفشار نہ کریں تو میں یقین دلاتی ہوں کہ ہم سب خوش و خرم وارانسی پہنچ جائیں گے۔”اس موقع پر کچھ مسافر "ہر ہر مہا دیو” کا نعرہ لگاتے ہیں اور پائلٹ بھی اس میں شامل ہو جاتی ہیں۔ وہ مزید کہتی ہیں، "آئیے مثبت رہیں اور اچھی فلائٹ کی توقع کریں۔ اگر کوئی مسئلہ ہوتا تو میں کبھی جہاز نہیں اُڑاتی۔ یہ جہاز فلائٹ کے لیے مکمل طور پر محفوظ ہے۔ ہمیں وارانسی خوشگوار اور محفوظ طریقے سے پہنچنا ہے، براہ کرم پریشان نہ ہوں۔”

بھارتی ریاست مہاراشٹرا میں خواتین کی مالی امداد کے لیے شروع کی گئی اسکیم میں بڑے پیمانے پر دھوکہ دہی کا انکشاف ہوا ہے۔

اطلاعات کے مطابق ہزاروں مردوں نے خود کو خواتین ظاہر کر کے امدادی رقم وصول کی، جس سے حکومت کو کروڑوں روپے کا نقصان اٹھانا پڑا ہے۔گزشتہ سال مہاراشٹرا حکومت نے کم آمدنی والے خاندانوں کی خواتین کی مالی معاونت کے لیے ایک اسکیم ‘لڑکی بہن یوجنا’ شروع کی تھی۔ اس اسکیم کے تحت 21 سے 65 سال کی عمر کی خواتین کو ماہانہ 1500 روپے کی امداد دی جانی تھی، تاکہ ان کے معیار زندگی میں بہتری آئے۔تاہم، ویمن اینڈ چائلڈ ڈیولپمنٹ ڈیپارٹمنٹ (WCD) کی تازہ رپورٹ میں حیران کن انکشاف ہوا ہے کہ اس اسکیم کا غلط استعمال ہوا ہے۔ رپورٹ کے مطابق اسکیم میں رجسٹرڈ 14 ہزار 298 افراد دراصل مرد تھے جنہوں نے خود کو خواتین ظاہر کر کے 21 کروڑ 44 لاکھ روپے کی امداد حاصل کی۔

مزید برآں، اسکیم میں ہر خاندان سے صرف دو خواتین کو رجسٹرڈ کرنے کی اجازت تھی، مگر تقریباً 8 لاکھ سے زائد خواتین نے ایک ہی خاندان کی تیسری یا چوتھی ممبر بن کر بھی رجسٹریشن کرائی، جس سے حکومت کو تقریباً 1196 کروڑ روپے کا نقصان ہوا۔رپورٹ میں یہ بھی بتایا گیا کہ اسکیم سے فائدہ اٹھانے والی 2 لاکھ سے زائد خواتین کی عمر 65 سال سے زائد تھی، جبکہ 1 لاکھ 62 ہزار خواتین ایسے خاندانوں سے تعلق رکھتی تھیں جن کے پاس گاڑیاں موجود تھیں، جس کے باعث وہ اسکیم کے اہل نہیں تھیں۔

اس بڑے مالیاتی نقصان اور فراڈ کے انکشاف کے بعد مہاراشٹرا حکومت شدید تنقید کی زد میں آ گئی ہے۔ عوامی اور سیاسی حلقے حکومت سے مطالبہ کر رہے ہیں کہ مردوں کے عورت بن کر امداد لینے کے معاملے کی مکمل اور شفاف تحقیقات کی جائیں تاکہ ذمہ داروں کو قانونی کارروائی کے ذریعے سزا دی جا سکے۔مہاراشٹرا میں خواتین کی فلاح و بہبود کے لیے بنائی گئی اسکیم میں اس نوعیت کی بدعنوانی حکومت کی کارکردگی پر سوالیہ نشان ہے اور اس سے اس اسکیم کے اصل مستحق افراد کو بھی نقصان پہنچا ہے۔

امریکی صدر ڈونلڈ ٹرمپ نے امریکا اور یورپی یونین کے درمیان تجارتی معاہدے کے اعلان کردیا۔

اسکاٹ لینڈ میں یورپی کمیشن کی سربراہ اُرسلا وان سے ملاقات کے بعد ٹرمپ نے اعلان کیا کہ امریکا اور یورپی یونین کے درمیان تجارتی معاہدہ ہوگیا، معاہدہ سب کو مبارک ہو،ہم ایک معاہدے پر پہنچ چکے ہیں جو سب کے لیے اچھا ہوگا، یورپی مصنوعات پر 15 فیصد ٹیکس عائد ہوگا اور یورپی یونین امریکی فوجی ساز و سامان خریدے گا،یورپی یونین امریکی توانائی شعبے سے 750 ارب ڈالر کی خریداری کرے گا جبکہ یورپی یونین امریکا میں 600 ارب ڈالر کی سرمایہ کاری کرے گا، یورپی یونین کے ساتھ تجارتی معاہدہ اب تک کا سب سے بڑا معاہدہ ہے، معاہدہ گاڑیوں کے لیے بہت اچھا ہوگا اور اس سے زراعت پر بھی بڑا اثر پڑے گا۔

یورپی کمیشن کی سربراہ ارسلا وان نے کہا کہ تجارتی معاہدہ استحکام لائے گا، تمام شعبوں میں 15 فیصد ٹیکس کا نفاذ ہوگا،معاہدہ کے تحت یورپی یونین اور امریکا نے کچھ مصنوعات پر صفر ٹیرف کا بھی فیصلہ کیا ہے، دونوں ممالک نے جن اشیا کی تجارت پر صفر ٹیرف کا فیصلہ کیا ہے ان میں، طیارے، کچھ کیمیکلز، سیمی کنڈکٹر آلات، کچھ زرعی مصنوعات اور ضروری خام مال شامل ہے۔

یہ معاہدہ یورپی یونین کے لیے تجارتی معاہدہ کرنے کی یکم اگست کی ڈیڈ لائن سے قبل ہوا ہے جس کے بعد یورپی یونین پر 30 فیصد ٹیرف عائد ہوسکتا تھا،ٹرمپ کی جانب سے دوبارہ عہدہ صدارت سنبھالنے کے بعد سے یورپی یونین پر مختلف مواقعوں پر ٹیرف عائد ہوچکے ہیں، اس وقت گاڑیوں پر یہ ٹیرف 25 فیصد جبکہ اسٹیل اور ایلومینیم پر 50 فیصد ہے،تاہم امریکی صدر ٹرمپ کے مطابق اس معاہدے میں اسٹیل پر عائد ٹیرف کو برقرار رکھا گیا ہے۔

بھارت کی ریاست اترپردیش کے شہر مرادآباد میں پولیس نے معروف یوٹیوبر محمد عامر کو غیراخلاقی اور متنازعہ مواد اپ لوڈ کرنے کے الزام میں گرفتار کر لیا ہے۔ بھارتی میڈیا رپورٹس کے مطابق، محمد عامر پر ہندو مذہبی لباس پہن کر گالیاں دینے اور مذہبی جذبات کو ٹھیس پہنچانے کا سنگین الزام عائد کیا گیا ہے۔

پولیس کا کہنا ہے کہ یہ گرفتاری ایک مقامی شہری امان ٹھاکر کی شکایت پر عمل میں لائی گئی۔ شکایت میں کہا گیا کہ محمد عامر نے جان بوجھ کر ایک ایسی ویڈیو بنائی جس میں وہ ہندوؤں کے مذہبی لباس میں ملبوس ہو کر گالیاں دیتا نظر آتا ہے، جو کہ مذہبی جذبات کو مجروح کرنے کے مترادف ہے۔صرف یہی نہیں، بلکہ محمد عامر پر اپنے یوٹیوب چینل اور انسٹاگرام اکاؤنٹ پر غیراخلاقی، غیر مہذب اور گالیوں سے بھرپور مواد شائع کرنے، فروغ دینے اور اس کی تشہیر کا بھی الزام ہے۔ پولیس نے بتایا کہ ان کے خلاف سائبر کرائم اور مذہبی نفرت پھیلانے سے متعلق دفعات کے تحت مقدمہ درج کیا گیا ہے۔

محمد عامر بھارت کے مشہور سوشل میڈیا شخصیات میں سے ایک ہیں۔ ان کے انسٹاگرام پر 50 لاکھ فالوورز جبکہ یوٹیوب پر بھی 50 لاکھ سبسکرائبرز ہیں۔ ان کے ویڈیوز زیادہ تر کامیڈی اور روزمرہ کے مسائل پر مبنی ہوتے ہیں، تاہم حالیہ مہینوں میں ان کے مواد پر تنقید بڑھتی جا رہی تھی۔گرفتاری کے بعد سوشل میڈیا پر ملا جلا ردعمل سامنے آ رہا ہے۔ کچھ افراد نے محمد عامر کے مواد کو فحش اور معاشرتی اقدار کے خلاف قرار دیا ہے، جبکہ ان کے حامیوں کا کہنا ہے کہ ان کے خلاف کارروائی اظہارِ رائے کی آزادی کے خلاف ہے اور یہ سوشل میڈیا پر پابندی لگانے کی ایک کوشش ہے۔پولیس حکام کے مطابق، محمد عامر سے تفتیش کی جا رہی ہے اور ان کے سوشل میڈیا اکاؤنٹس کا بھی جائزہ لیا جا رہا ہے تاکہ معلوم کیا جا سکے کہ آیا اس قسم کا مواد جان بوجھ کر یا کسی ایجنڈے کے تحت پھیلایا جا رہا تھا۔