Author: ممتاز حیدر

وزیرِ اعظم محمد شہباز شریف نے سول سروسز کو عصری تقاضوں سے ہم آہنگ کرنے، سول سروسز اسٹرکچر کی بہتری اور اسے جدید خطوط پر استوار کرنے کے حوالے سے سفارشات مرتب کرنے کیلئے وزیرِ منصوبہ بندی احسن اقبال کی سربراہی میں کمیٹی قائم کردی

کمیٹی ایک ماہ میں تفصیلی مشاورت کے بعد اصلاحات پر مبنی جامع سفارشات پیش کرے. وزیرِ اعظم نے ہدایت کی کہ کمیٹی میرٹ پر بہترین ٹیلنٹ کی بھرتی، ترقی کیلئے مخصوص اہداف پر مبنی کے پی آئیز، اے سی آر نظام کی بہتری و مؤثر متبادل کے حوالے سے سفارشات مرتب کرکے پیش کرے. جدید ٹیکنالوجی و جدید نظام کے حوالے سے افسران کی استعداد کار کو بڑھانے کیلئے لائحہ عمل بھی سفارشات کا حصہ ہو.ایسی سفارشات مرتب کی جائیں جو پائیدار نظام کی بنیاد بنیں، گورننس کی بہتری اور سول سروسز کو عصری تقاضوں سے متواتر ہم آہنگ کرنے کا مستقل نظام قائم کریں. وزیرِاعظم شہباز شریف کا کہنا تھا کہ سول سروسز میں عام آدمی کی زندگی کو آسان بنانے اور اسکا معاون بنانے کیلئے اصلاحات حکومت کی اولین ترجیحات میں شامل ہے.

وزیرِ اعظم محمد شہباز شریف کی زیرِ صدارت سول سروسز کی اصلاحات پر جائزہ اجلاس آج اسلام آباد میں منعقد ہوا. اجلاس میں وفاقی وزراء احسن اقبال، اعظم نذیر تارڑ، احد خان چیمہ، سردار اویس خان لغاری، علی پرویز ملک، مشیر وزیرِ اعظم رانا ثناء اللہ، وزیرِ مملکت بلال اظہر کیانی، معاونین خصوصی ہارون اختر، طارق باجوہ، ڈاکٹر جہانزیب خان سیکریٹری ایپکس کمیٹی ایس آئی ایف سی اور متعلقہ اعلی حکام نے شرکت کی.اجلاس کو سول سروسز اصلاحات کے حوالے سے بریفنگ دیتے ہوئے بتایا گیا کہ سول سروسز میں بھرتی، ٹریننگ، کارکردگی کے جائزے، تنخواہوں کی بہتری اور ترقی کے حوالے سے مشاورت کے بعد تجاویز مرتب کی جارہی ہیں. اجلاس کو خطے کے دوسرے ممالک میں سول سروسز کی اصلاحات کا پاکستان کے ساتھ تقابلی جائزہ بھی پیش کیا گیا. اجلاس کو بتایا گیا کہ گورننس کی بہتری، عام شہری کی زندگی کو بہتر بنانے کے ساتھ ساتھ بہترین ٹیلنٹ کی میرٹ پر بھرتیوں کو سول سروسز اصلاحات کا محور رکھتے ہوئے سفارشات کو حتمی شکل دی جائے گی.

پولیس نے سابق صوبائی وزیر راجہ بشارت کو گرفتار کرکے تھانہ نیو ٹاؤن منتقل کر دیا ہے۔ راجہ بشارت این اے 55 کے ضمنی انتخاب سے متعلق کیس میں الیکشن ٹربیونل میں پیشی کے لیے آئے تھے، جہاں سے انہیں گاڑی سمیت تھانہ نیو ٹاؤن منتقل کیا گیا۔

واضح رہے کہ اس سے قبل پولیس کی بھاری نفری سابق صوبائی وزیر کو گرفتار کرنے کے لیے ان کے قیام گاہ پر پہنچ گئی تھی۔ اس موقع پر پولیس نے الیکشن کمیشن کے دفتر کا بھی گھیراؤ کر لیا تاکہ مقدمے سے متعلق کارروائی کو ممکن بنایا جا سکے۔راجہ بشارت پر الیکشن قوانین کی خلاف ورزی کے الزام میں کیس درج ہے جس کی سماعت الیکشن ٹربیونل میں جاری ہے۔ گرفتاری اور تھانہ منتقلی کے بعد پولیس نے مزید قانونی کارروائی کا عندیہ دیا ہے۔

وزیر اعظم محمد شہباز شریف سے عالمی بینک کے مشرق وسطیٰ ، شمالی افریقہ، افغانستان اور پاکستان (MENAAP) کے ریجنل نائب صدر مسٹر عثمان ڈیون نے آج اسلام آباد میں ملاقات کی۔

وزیراعظم نے پاکستان کے ساتھ طویل شراکت داری پر عالمی بینک کا تہہ دل سے شکریہ ادا کیا۔ انہوں نے خاص طور پر عالمی بینک کے صدر جناب اجے بنگا اور پاکستان کے لئے عالمی بینک کے سابق کنٹری ڈائریکٹر جناب ناجی بنہسین کا پاکستان کے لیے نئے کنٹری پارٹنرشپ فریم ورک (CPF) کو آگے بڑھانے میں اہم کردار ادا کرنے پر تہہ دل سے شکریہ ادا کیا۔وزیراعظم نے پاکستان کی ترقی کی ترجیحات بالخصوص توانائی، انسانی وسائل ، موسمیاتی تبدیلی اور گورننس اصلاحات کے شعبوں میں CPF (Country Partnership Framewok) کے اسٹریٹجک کردار کو سراہا۔وزیراعظم نے سندھ طاس معاہدے جیسے اہم بین الاقوامی معاہدے کو نقصان پہنچانے کے بھارت کے یکطرفہ اور غیر قانونی اقدامات کی روشنی میں پاکستان کے جائز مؤقف کے لیے عالمی بینک کی اصولی حمایت کو سراہا۔ انہوں نے بین الاقوامی قانون کی پاسداری، خوشحالی کے حصول اور علاقائی امن کو برقرار رکھنے کے لیے پاکستان کے عزم کا اعادہ کیا اور تمام مسائل کو بات چیت کے ذریعے حل کرنے کے لیے پاکستان کے عزم کا اظہار کیا۔

وزیراعظم نے 2022 کے تباہ کن سیلاب کے دوران عالمی بینک کی بروقت اور فراخدلانہ مدد پر شکریہ ادا کیا، جس نے پاکستان کو فوری امدادی سرگرمیاں شروع کرنے اور تعمیر نو اور بحالی کے اقدامات شروع کرنے میں مدد کی۔جناب عثمان ڈیون نے پاکستان کے دورے کے دوران پر تپاک مہمان نوازی پر وزیر اعظم شہباز شریف کا شکریہ ادا کیا۔ انہوں نے پاکستان کی دیرینہ شراکت داری اور معیشت کے اہم شعبوں میں تعاون کو مزید گہرا اور وسعت دینے کے لیے عالمی بینک کے عزم کا اعادہ کیا۔جناب ڈیون نے پاکستان کی جاری میکرو اکنامک بحالی کی تعریف کی اور ملک کو مالیاتی استحکام اور پائیدار ترقی کی طرف لے جانے پر وزیر اعظم کی حکومت کی تعریف کی۔ انہوں نے خاص طور پر موجودہ انتظامیہ کے اصلاحاتی ایجنڈے کی تعریف کی، جس میں وزیر اعظم شہباز شریف کی مضبوط قیادت کو ادارہ جاتی جاتی اصلاحات کو آگے بڑھانے، سرمایہ کاروں کا اعتماد بحال کرنے اور جامع اقتصادی ترقی کو فروغ دینے میں اہم قرار دیا۔

ملاقات کے اختتام پر حکومت پاکستان اور ورلڈ بنک کی جانب سے طویل المدتی ترقیاتی اہداف کے حصول اور پاکستان کے عوام کے لیے ایک خوشحال مستقبل کی تعمیر کے لئے، آنے والے سالوں میں دونوں کے مابین تعاون کو مزید مضبوط بنانے کے لیے مشترکہ عزم کا اظہار کیا گیا.

اسلام آباد: وفاقی دارالحکومت کی ایک نجی ہاؤسنگ سوسائٹی میں شدید بارش کے باعث آئے سیلابی ریلے میں گاڑی سمیت بہہ جانے والے ایک شخص کی لاش مل گئی ہے، تاہم اس کی بیٹی کی تلاش تیسرے روز بھی جاری ہے۔

اسلام آباد میں گزشتہ چند روز سے جاری موسلا دھار بارش نے کئی علاقوں کو شدید متاثر کیا ہے۔ اسی دوران ریٹائرڈ کرنل اسحاق اپنی بیٹی کے ہمراہ گھر سے نکلے تھے کہ اچانک ان کی گاڑی خراب ہو گئی۔ اس دوران سیلابی پانی کا ریلہ آ گیا، جس میں وہ دونوں گاڑی سمیت بہہ گئے۔ واقعے کے بعد دونوں لاپتہ ہو گئے تھے۔گزشتہ دو روز سے ریسکیو ٹیمیں ان کی تلاش میں مصروف ہیں۔ نجی ہاؤسنگ سوسائٹی کے اندر واقع برساتی نالے میں پہلے سرچ آپریشن مکمل کیا گیا تھا، لیکن وہاں سے کچھ خاص کامیابی نہیں ملی۔ بعد ازاں سرچ آپریشن دریائے سواں کے داخلی اور خارجی راستوں پر منتقل کر دیا گیا۔ریسکیو حکام نے گزشتہ روز گاڑی کا بمپر اور سائیڈ مرر تو دریائے سواں سے برآمد کر لیے تھے، تاہم پوری گاڑی یا دونوں افراد کا سراغ نہیں ملا تھا۔ اس کے بعد پانی کی سطح میں کمی کے ساتھ سرچ آپریشن کو مزید تیز کر دیا گیا ہے۔

آج ریسکیو ٹیموں کو متاثرہ گاڑی کا بونٹ اور دروازہ دریائے سواں پل کے نیچے سے بھی مل گیا ہے، جو اس بات کی علامت ہے کہ گاڑی اس جگہ سے گزر کر سیلابی پانی میں بہہ گئی تھی۔ریسکیو حکام کا کہنا ہے کہ بارشوں کے رکنے اور پانی کی سطح کم ہونے کے باعث آج سرچ آپریشن مکمل ہونے کی توقع ہے۔ ان کا کہنا ہے کہ ہر ممکن کوشش کی جا رہی ہے تاکہ لاپتہ افراد کو جلد بازیابی ممکن ہو۔

یہ واقعہ ایک بار پھر اسلام آباد میں موسمی تبدیلی اور نا مناسب نکاسی آب کے مسائل کو اجاگر کرتا ہے، جس کے باعث شہر کے کئی حصے سیلاب کی لپیٹ میں آ جاتے ہیں اور عوام کو شدید مشکلات کا سامنا کرنا پڑتا ہے۔