Author: ممتاز حیدر

پاکستان نے بھارتی طیاروں کیلئے اپنی فضائی حدود بند رکھنے کا فیصلہ ایک بار پھر توسیع دیتے ہوئے، آج سے مزید ایک ماہ کیلئے نافذ رکھنے کا اعلان کیا ہے۔ اس سلسلے میں متعلقہ حکام کی جانب سے باضابطہ نوٹس ٹو ایئرمین (NOTAM) سہہ پہر تک جاری کیے جانے کا امکان ہے۔

ایوی ایشن ذرائع کے مطابق، پاکستان نے 24 اپریل کو پاک بھارت کشیدگی کے تناظر میں بھارتی طیاروں کے لیے اپنی فضائی حدود بند کی تھی۔ بعد ازاں، 23 مئی کو اس بندش میں مزید ایک ماہ کی توسیع کی گئی تھی، جو آج یعنی 23 جون کو ختم ہو رہی تھی۔تاہم، موجودہ صورتحال کے پیشِ نظر فیصلہ کیا گیا ہے کہ بھارتی طیاروں کیلئے فضائی حدود کی بندش میں مزید ایک ماہ کی توسیع کی جائے۔ اس فیصلے کا مقصد قومی سلامتی اور خطے میں موجود کشیدگی کو مدنظر رکھتے ہوئے احتیاطی تدابیر کو جاری رکھنا ہے۔

واضح رہے کہ بھارت نے بھی پاکستان کی جانب سے فضائی حدود بند کرنے کے بعد جوابی اقدام کے طور پر پاکستانی طیاروں کیلئے اپنی فضائی حدود بند کر رکھی ہے۔ دونوں ممالک کے درمیان فضائی پابندیاں نہ صرف سفارتی تعلقات کی کشیدگی کو ظاہر کرتی ہیں بلکہ اس کا اثر دونوں ملکوں کی فضائی ٹریفک اور ایئرلائنز پر بھی پڑ رہا ہے۔ذرائع کا کہنا ہے کہ اگلے مرحلے میں صورتحال کا از سرِ نو جائزہ لیا جائے گا اور خطے میں تناؤ کم ہونے کی صورت میں فضائی راستے کھولنے پر غور کیا جا سکتا ہے۔

کنگ سلمان ریلیف سینٹر کی طرف سے پاکستان میں اندھے پن اور اس کی وجہ سے ہونے والی بیماریوں کے علاج کیلئے 11 آئی کیمپس کامیابی سے اختتام پذیر

کنگ سلمان ہیومینیٹیرین ایڈ اینڈ ریلیف سینٹر نے نور سعودی رضاکارانہ پروگرام 2025 کے تحت پاکستان کے مختلف علاقوں میں منعقدہ گیارہ جامع آنکھوں کے علاج کے کیمپس کامیابی سے مکمل کر لیے ہیں۔ یہ کیمپس البصر انٹرنیشنل فاؤنڈیشن اور ابراہیم آئی اسپتال کراچی کے تعاون سے منعقد کیے گئے، جن کا مقصد ایسے مستحق افراد کو مفت طبی سہولیات فراہم کرنا تھا جو خصوصی علاج تک رسائی نہیں رکھتے یا مالی وسائل کی کمی کا سامنا کر رہے ہیں۔

یہ کیمپس سندھ، بلوچستان، پنجاب اور آزاد جموں و کشمیر کے شہری و دیہی علاقوں میں اس حکمت عملی کے تحت لگائے گئے جہاں آنکھوں کی دیکھ بھال کی خدمات محدود ہیں۔ اس پروگرام کا بنیادی مقصد قابل علاج بینائی کی بیماریوں کی بروقت تشخیص و علاج کے ذریعے نابینائی سے بچاؤ اور افراد کے معیارِ زندگی کو بہتر بنانا تھا۔اس مہم کے دوران 43,294 مریضوں کا طبی معائنہ کیا گیا، جبکہ 4,484 سے زائد سرجریاں کامیابی سے مکمل ہوئیں۔ اس کے علاوہ 11,050 عینکیں مفت تقسیم کی گئیں اور مستحق مریضوں کو ڈاکٹرز کی جانب سے تجویز کردہ ادویات بھی فراہم کی گئیں۔

یہ پروگرام کراچی، ماتلی، کندھارو، شکارپور، حیدرآباد، نصیرآباد، خاران، خضدار، جہلم اور راولا کوٹ سمیت مختلف شہروں میں منعقد ہوا، جہاں ہزاروں افراد نے خصوصی آنکھوں کے علاج سے فائدہ اٹھایا اور اپنی بینائی دوبارہ حاصل کی۔یہ مہم مملکت سعودی عرب کی انسان دوستی کے جذبے اور نابینائی سے متاثرہ افراد کی زندگی بہتر بنانے کے عزم کی عکاس ہے۔ کنگ سلمان ریلیف سینٹر نے ان کیمپس کے ذریعے ہزاروں مریضوں کی زندگی میں روشنی واپس لا کر ایک روشن مستقبل کی امید دی ہے۔

جے یو آئی سربراہ مولانا فضل الرحمان نے کہا ہے کہ پاک انڈیا جنگ نہیں تھی پاک مودی جنگ تھی ، پاکستان میں سب متحد تھے انڈیا میں اقلیتیں مودی کے ساتھ نہیں تھیں، جنگ کو پاکستان بھارت جنگ نہیں، پاکستان مودی جنگ کہا جائے،

قومی اسمبلی اجلاس کے دوران اظہار خیال کرتے ہوئے مولانا فضل الرحمان کا کہنا تھا کہ وزیراعظم (شہباز شریف) نے ہمارے علاقوں میں جن منصوبوں کا افتتاح خود کیا تھا، آج ان منصوبوں کے ہی فنڈز روک دیے گئے،معیشت قوت کے استعمال سے بہتر نہیں ہوگی۔ہم نے وہ بھی بجٹ دیکھے ہیں جب جی ڈی پی مائنس میں چلا گیا تھا، یہ بجٹ وزیر خزانہ نے نہیں بلکہ یہ بجٹ آئی ایم ایف نے تیار کیا ہے، حکومت نے صرف یہ بجٹ پڑھ کر سنایا ہے،جائز نکاح کے لیے مشکلات پیدا کی جارہی ہیں۔ اسپیکر نوٹس لے کر رُولنگ دیں۔ آپ چاہتے ہیں ہم اپنا فکری نظریہ بھی آپکے سامنے پھینک دیں؟ اس سوچ کے خلاف اعلان جنگ کرتا ہوں۔ہم ایران کے ساتھ کھڑے ہیں، پاکستان کو کھل کر ایران کے ساتھ کھڑا ہونا چاہئیے۔اس ملک کو انقلاب چاہیئے، روائتی سیاست کا دور ختم ہو چکا۔ عوام کو بیدار کرو، ان میں شعور پیدا کرو تاکہ وہ اپنے مسائل کے حل کے لئے آواز اٹھا سکیں۔ پیغام اس پارلیمنٹ سے پوری امت مسلمہ کو جانا چاہیے کہ بین الاقوامی اداروں کی اب کوئی حیثیت نہیں رہی، پورا اقوام متحدہ جنرل اسمبلی امریکہ کی لونڈی ہے

پاکستان کے سینیٹ میں فوجداری قوانین میں ترمیم کا ایک اہم بل پیش کیا گیا ہے جس میں خواتین کے تحفظ اور دیگر مجرمانہ کارروائیوں کے حوالے سے قوانین میں چند بنیادی تبدیلیاں کی گئی ہیں۔ اس بل کی سب سے بڑی خصوصیت یہ ہے کہ خاتون کو سرعام برہنہ کرنے اور ہائی جیکر کو پناہ دینے جیسے جرائم پر سزائے موت ختم کرنے کی تجویز دی گئی ہے۔

مجوزہ ترمیم کے تحت اگر کسی شخص نے خاتون پر مجرمانہ حملہ کیا یا اسے سرعام برہنہ کیا تو اس پر سخت سزا دی جائے گی۔ سزا کے طور پر عمر قید، جائیداد ضبطگی اور جرمانہ عائد کیا جائے گا۔ تاہم اس جرم پر سزائے موت ختم کر دی جائے گی۔اس ترمیم کے مطابق خواتین کے خلاف ایسے جرائم میں ملزم کو بلا وارنٹ گرفتار کیا جا سکے گا اور یہ جرم ناقابل ضمانت قرار دیا جائے گا، تاکہ ملزم کو جلد از جلد گرفتار کیا جا سکے اور انصاف کی فراہمی ممکن ہو۔خاتون پر حملہ یا اسے سرعام برہنہ کرنا ایسے جرائم میں شامل کیا گیا ہے جن کا مقدمہ مصالحت کے بغیر چلایا جائے گا۔ یعنی متاثرہ خاتون کی رضامندی کے بغیر مقدمہ ختم یا کم نہیں کیا جا سکے گا۔اس بل میں ہائی جیکر کو پناہ دینے یا سہولت فراہم کرنے پر سزائے موت ختم کرنے کی بھی تجویز دی گئی ہے، تاکہ اس جرم کے حوالے سے قانونی پیچیدگیوں کو کم کیا جا سکے۔

یہ ترمیمی بل اس وقت پیش کیا گیا ہے جب ملک بھر میں خواتین کے خلاف جرائم کی بڑھتی ہوئی شرح پر تشویش پائی جاتی ہے۔ اس بل کا مقصد خواتین کے تحفظ کو یقینی بنانا اور عدالتی نظام میں آسانیاں پیدا کرنا بتایا جا رہا ہے۔ اس کے علاوہ، بل کے ذریعے ناانصافی اور ظلم کے خلاف سخت قوانین بنا کر معاشرے میں تحفظ کا ماحول پیدا کرنا ہے۔

اب یہ بل سینیٹ کی قائمہ کمیٹی میں بھیجا جائے گا جہاں اس کی باریک بینی سے جانچ پڑتال کے بعد حتمی سفارشات تیار کی جائیں گی۔