Author: ممتاز حیدر

پیر کے روز ایران کے سرکاری خبررساں ادارے ارنا کے مطابق اسرائیل نے ایران کے ریاستی نیوز چینل IRINN کے اسٹوڈیو کمپلیکس کو نشانہ بنایا۔ حملے کے وقت چینل پر براہِ راست نشریات جاری تھیں اور ایک اینکر لائیو شو پیش کر رہی تھی ا کہ زور دار دھماکے کی آواز سنی گئی۔

اسرائیلی فضائی حملے میں سرکاری نشریاتی ادارے IRIB کے متعدد ملازمین جاں بحق ہو گئے ہیں۔رپورٹ کے مطابق، یہ حملہ اس وقت کیا گیا جب سرکاری نیوز چینل IRINN کا لائیو نشریاتی سلسلہ جاری تھا۔ حملے کا نشانہ بننے والے ادارے کی عمارت شدید متاثر ہوئی، جب کہ متعدد ملازمین ملبے تلے دب کر جاں بحق ہو گئے۔اخبار نے سرکاری ذرائع کے حوالے سے کہا کہ جاں بحق ہونے والوں میں پروڈیوسر، ٹیکنیکل اسٹاف اور سیکیورٹی اہلکار شامل ہیں، جبکہ زخمیوں کو فوری طور پر قریبی اسپتالوں میں منتقل کر دیا گیا ہے۔

اسرائیلی وزیر دفاع نے اس حملے کے حوالے سے اپنے بیان میں کہا کہ "ایرانی پراپیگنڈا اور اشتعال انگیزی کا منبع جلد صفحہ ہستی سے مٹ جائے گا” اور ساتھ ہی تصدیق کی کہ "متاثرہ علاقے سے شہریوں کے انخلاء کا عمل شروع ہو چکا ہے۔”

دوسری جانب امریکی محکمہ خارجہ نے ایران اور اسرائیل کے درمیان جاری شدید کشیدگی کے پیش نظر پیر کے روز اسرائیل کے لیے اپنی سفری ہدایت کو بلند ترین سطح یعنی سطح 4 پر پہنچا دیا، جس میں امریکی شہریوں کو سفر نہ کرنے کی سختی سے ہدایت کی گئی ہے۔محکمہ خارجہ نے امریکی سفارت کاروں کے خاندانوں اور غیر ہنگامی عملے کو اسرائیل سے رضاکارانہ طور پر روانہ ہونے کی اجازت دے دی ہے۔ اسی کے ساتھ امریکی سفارتخانے نے کہا ہے کہ "موجودہ سیکیورٹی صورتِ حال اور ایران و اسرائیل کے درمیان جاری تنازعے کے باعث تمام امریکی سرکاری ملازمین اور ان کے خاندانوں کو مزید اطلاع تک اپنے گھروں میں ہی رہنے کی ہدایت دی گئی ہے۔”تازہ ترین سفری ہدایت میں کہا گیا ہے کہ سیکیورٹی خدشات کے تحت بغیر پیشگی اطلاع کے امریکی سفارتخانہ اپنے ملازمین اور ان کے اہلِ خانہ پر یروشلم کے قدیمی شہر، مغربی کنارے اور دیگر مخصوص علاقوں کا سفر مزید محدود یا مکمل طور پر ممنوع کر سکتا ہے۔

محکمہ خارجہ کے مطابق "اسرائیل، بالخصوص تل ابیب اور یروشلم، میں سیکیورٹی صورتحال غیر متوقع ہے۔ امریکی شہریوں کو متنبہ کیا جاتا ہے کہ وہ چوکنا رہیں اور اپنی ذاتی سیکیورٹی کو بہتر بنانے کے اقدامات کریں، کیونکہ مارٹر حملے، راکٹ فائرنگ، مسلح ڈرون حملے اور میزائل حملے کسی بھی وقت بغیر پیشگی اطلاع کے ہو سکتے ہیں۔”

یہ پہلا موقع ہے کہ امریکی ہدایت میں واضح طور پر تل ابیب اور یروشلم کو خطرناک علاقوں میں شامل کیا گیا ہے۔امریکی محکمہ خارجہ نے امریکی شہریوں کو مغربی کنارے اور غزہ جانے سے بھی سختی سے روکا ہے۔ اس سے پہلے اسرائیل اور مغربی کنارے کے لیے سطح 3 کی ہدایت تھی، جس میں شہریوں کو ’سفر پر نظرِ ثانی‘ کی تلقین کی گئی تھی۔

ایران کی وزارت تعلیم نے ملک میں جاری اسرائیلی بمباری کے تناظر میں اسکولوں کو بم شیلٹر قرار دے دیا ہے تاکہ ہنگامی صورتِ حال میں شہریوں کو پناہ دی جا سکے۔ یہ اقدام ایسے وقت میں سامنے آیا ہے جب ایران اور اسرائیل کے درمیان جاری خونریز کشیدگی چوتھے دن میں داخل ہو چکی ہے۔

ایرانی وزیرِ تعلیم علی رضا کاظمی نے عوام سے اپیل کی ہے کہ وہ وزارت تعلیم کی مدد کریں تاکہ اسکولوں کو ہنگامی مراکز کے طور پر استعمال کیا جا سکے۔ ان کا کہنا تھا کہ "اسکولوں میں پانی، بجلی، گیس اور دیگر بنیادی سہولیات پہلے سے ہی موجود ہیں، جو انہیں عارضی پناہ گاہوں میں تبدیل کرنے کے لیے موزوں بناتی ہیں۔”

دوسری جانب ایرانی ریاستی میڈیا کے مطابق، مغربی ایران کے شہر کرمان شاہ میں پیر کے روز اسرائیلی حملے میں فارابی اسپتال کو شدید نقصان پہنچا۔سی این این نے ان ویڈیوز کی جغرافیائی تصدیق کی ہے جو ریاستی میڈیا نے شائع کیں، جن میں اسپتال کے اندرونی حصے میں ہونے والی تباہی کو دکھایا گیا ہے۔تسنیم نیوز ایجنسی کے مطابق اسپتال کی انتہائی نگہداشت یونٹ (ICU) حملے کا سب سے زیادہ نشانہ بنی۔ اسپتال میں چھت کا کچھ حصہ منہدم ہو گیا جس کی زد میں آ کر کئی مریض زخمی ہو گئے۔ شیشے ٹوٹنے سے بھی زخمیوں کی اطلاعات موصول ہوئی ہیں۔ایرانی وزارتِ خارجہ کے ترجمان اسماعیل بقائی نے اسرائیل پر اسپتال کو جان بوجھ کر نشانہ بنانے کا الزام عائد کیا ہے۔

ادھر بیرونِ ملک مقیم ایک ایرانی کرد شہری نے سی این این سے گفتگو میں اپنے جذبات کا اظہار کرتے ہوئے کہا کہ وہ گزشتہ 48 گھنٹوں سے شدید پریشانی میں مبتلا ہے۔”میری فیملی کرمانشاہ میں رہتی ہے۔ میرے والدین، بھائی اور بہن ایک ہی علاقے میں ہیں۔ حالیہ حملے میں جو میزائل گرا، وہ ہمارے گھر سے صرف پانچ کلومیٹر دور تھا۔”اس شخص نے مزید کہا، "اگر اسرائیل کا ہدف کوئی سرکاری اہلکار ہے اور وہ شخص میرے گھر کے قریب آتا ہے، تو ایک بم سے میرا پورا خاندان مارا جا سکتا ہے۔”اس نے ایرانی حکومت پر بھی شدید تنقید کی مگر ساتھ ہی اسرائیل کی جارحیت کی مذمت کرتے ہوئے کہا،”میں ایرانی حکومت کے خلاف ہوں لیکن اس کا یہ مطلب نہیں کہ اسرائیل معصوم شہریوں کو مارے۔ بے گناہوں کی جان لینا ناقابلِ معافی ہے۔”

ایرانی تارکین وطن کی عالمی برادری شدید بے چینی کا شکار ہے کیونکہ ان کے اہل خانہ ایران میں خطرات کا سامنا کر رہے ہیں۔بہت سے افراد سوشل میڈیا اور ذرائع ابلاغ کے ذریعے دنیا کو ایران میں جاری تباہی سے باخبر کر رہے ہیں۔

کینیڈا کے پہاڑی علاقے میں جاری جی-7 سربراہی اجلاس کے پہلے روز عالمی رہنما امریکی صدر ڈونلڈ ٹرمپ پر زور دینے کی تیاری کر رہے ہیں کہ وہ اسرائیل اور ایران کے درمیان بگڑتے ہوئے تنازعے سے نمٹنے کے لیے اپنی حکمت عملی واضح کریں۔ متعدد ممالک کے وفود کے حکام کے مطابق، اجلاس کے دوران اس مسئلے پر شدید تشویش پائی جا رہی ہے۔

اجلاس کے منتظمین کی کوشش ہے کہ ایک مشترکہ اعلامیہ جاری کیا جائے جس میں کشیدگی میں کمی کی اپیل کی جائے، اور اس حوالے سے رکن ممالک کے درمیان الفاظ کے انتخاب پر مشاورت جاری ہے۔تاہم، اسرائیل کی ایران کے خلاف کارروائیوں کی حمایت کی حد پر مختلف ممالک میں اختلافات موجود ہیں۔ جہاں امریکہ اسرائیل کی حمایت کرتا رہا ہے، وہیں ٹرمپ انتظامیہ ایران کے خلاف کسی براہ راست امریکی فوجی کارروائی سے گریزاں نظر آتی ہے۔

واشنگٹن سے روانگی کے وقت صدر ٹرمپ نے صحافیوں سے گفتگو کرتے ہوئے کہا کہ انہیں امید ہے کہ اسرائیل اور ایران کے درمیان میزائل حملوں کا سلسلہ کسی معاہدے کے ذریعے ختم ہو سکتا ہے، اور انہوں نے اس اعتماد کا اظہار بھی کیا کہ ایران کے ساتھ جوہری مذاکرات ممکنہ طور پر جاری رہیں گے۔لیکن یورپی حکام کے لیے یہ واضح نہیں کہ صدر ٹرمپ اس قدر پُرامید کیوں ہیں، خاص طور پر اسرائیلی حملوں کی شدت اور دائرہ کار کے پیش نظر،یورپی رہنماؤں کا کہنا ہے کہ چونکہ امریکہ کا اسرائیل پر غیرمعمولی اثر و رسوخ ہے، اس لیے وہ جاننا چاہتے ہیں کہ آیا امریکہ اس تنازعے کو طول دینے کی اجازت دے گا یا صدر ٹرمپ اسرائیلی وزیراعظم نیتن یاہو پر دباؤ ڈالیں گے کہ وہ کشیدگی میں کمی لائیں۔

اس دوران فرانسیسی صدر ایمانویل میکرون اور صدر ٹرمپ کے درمیان اس تنازعے میں روسی صدر ولادیمیر پیوٹن کے کردار پر اختلاف سامنے آیا ہے۔ صدر ٹرمپ نے روسی صدر سے ٹیلیفونک رابطے کے بعد یہ عندیہ دیا کہ پیوٹن ثالث کا کردار ادا کر سکتے ہیں، جبکہ میکرون نے اس تجویز کو مسترد کر دیا۔گرین لینڈ کے دورے کے دوران میکرون نے کہا کہ روس خود اقوام متحدہ کے چارٹر کی خلاف ورزی کرتے ہوئے یوکرین پر حملہ کر چکا ہے، اس لیے اسے امن کا ثالث نہیں بنایا جا سکتا۔فرانسیسی صدر نے مزید کہا کہ امریکہ ہی سب سے زیادہ صلاحیت رکھتا ہے کہ وہ فریقین کو مذاکرات کی میز پر واپس لائے، کیونکہ اسرائیل بڑی حد تک امریکی اسلحے پر انحصار کرتا ہے۔

اجلاس کی پیش رفت کے ساتھ ہی دنیا کی نظریں اس بات پر مرکوز ہیں کہ آیا صدر ٹرمپ اور دیگر عالمی رہنما خطے میں جاری کشیدگی کو کم کرنے کے لیے کوئی متفقہ لائحہ عمل اختیار کر پاتے ہیں یا نہیں۔

فرانس نے پیر کے روز بین الاقوامی دفاعی نمائش "پیرس ایئر شو” میں پانچ اسرائیلی ہتھیار ساز کمپنیوں کے اسٹالز تک عوامی رسائی روک دی ہے۔ یہ فیصلہ ان کمپنیوں کی جانب سے ایسے "جارحانہ ہتھیاروں” کی نمائش پر کیا گیا ہے جو مبینہ طور پر غزہ میں جاری جنگ کے دوران استعمال کیے گئے ہیں۔

غیر ملکی خبررساں ایجنسی کے مطابق، فرانسیسی حکام کا کہنا ہے کہ ان کمپنیوں نے ایسے ہتھیار پیش کیے جو انسانی حقوق کے عالمی معیارات اور فرانس کے ساتھ موجودہ دفاعی معاہدوں کی خلاف ورزی کے زمرے میں آتے ہیں۔ اس اقدام کو اسرائیلی دفاعی کمپنیوں کے لیے ایک بڑا دھچکہ قرار دیا جا رہا ہے، خاص طور پر ایسے وقت میں جب غزہ میں اسرائیلی بمباری عالمی سطح پر شدید تنقید کا نشانہ بن رہی ہے۔

جن اسرائیلی کمپنیوں کے اسٹالز بند کیے گئے ہیں، ان میں اسرائیل ایرواسپیس انڈسٹریز (IAI)،رافیل ایڈوانسڈ ڈیفنس سسٹمز،یوویژن،ایلبٹ سسٹمز،ایئروناٹکس شامل ہیں،ان میں سے رافیل، ایلبٹ اور IAI ہدایت یافتہ بم اور میزائل تیار کرنے والی معروف کمپنیاں ہیں، جب کہ یوویژن اور ایئروناٹکس جدید ڈرون ٹیکنالوجی میں مہارت رکھتی ہیں۔

اسرائیلی صدر اسحاق ہرزوگ نے فرانس کے اس فیصلے کو "شرمناک” قرار دیتے ہوئے اس کی شدید مذمت کی۔ انہوں نے کہا کہ یہ اقدام "غیرمنصفانہ اور امتیازی” ہے اور مطالبہ کیا کہ فرانس فوری طور پر اس فیصلے کو واپس لے اور اسرائیلی کمپنیوں کو مکمل شرکت کی اجازت دے۔

یہ فیصلہ اس وقت سامنے آیا جب فرانسیسی عدالت نے مقامی اور بین الاقوامی انسانی حقوق کی تنظیموں کی درخواست مسترد کر دی تھی، جس میں 9 اسرائیلی دفاعی کمپنیوں کو ایئر شو میں شرکت سے روکنے کی اپیل کی گئی تھی۔ ان این جی اوز کا مؤقف تھا کہ یہ کمپنیاں غزہ میں جنگی جرائم میں ملوث رہی ہیں اور انہیں کسی بھی بین الاقوامی نمائش میں شرکت کا حق نہیں ہونا چاہیے۔تاہم، خبررساں ادارے کے مطابق ایئر شو میں موجود دیگر 4 اسرائیلی کمپنیوں کے اسٹالز بدستور کھلے ہوئے ہیں، جن کے بارے میں حکام کا کہنا ہے کہ وہ متنازعہ ہتھیاروں کی نمائش نہیں کر رہیں۔

برطانیہ کے جدید ترین ایف 35 بی لڑاکا طیارے نے ہفتے کی شب ایندھن کی کمی کے باعث بھارتی ریاست کیرالہ کے ترواننتاپورم انٹرنیشنل ائیرپورٹ پر ہنگامی لینڈنگ کی جس کے بعد پائلٹ نے طیارہ چھوڑنے سے انکار کردیا۔

بھارتی میڈیا کے مطابق برطانوی رائل نیوی کے فلیگ شپ ائیرکرافٹ کیریئر ایچ ایم ایس پرنس آف ویلز سے اڑان بھرنے والے اس طیارے نے رات 9 بج کر 20 منٹ پر ائیر ٹریفک کنٹرول سے لینڈنگ کی اجازت طلب کی اور 10 منٹ بعد بحفاظت لینڈ کر گیا،طیارے سے اترنے کے بعد پائلٹ، جس کی شناخت صرف ’مائیک‘ کے نام سے ہوئی ہے، نے طیارے سے دور جانے سے منع کرتے ہوئے طیارے کے ساتھ ہی بیٹھنے کے لیے ایک کرسی طلب کی۔ بھارتی فضائیہ کے اہلکار جب پائلٹ کو حفاظتی ضوابط کے تحت ائیرپورٹ کے اندر لے جانے آئے تو اس نے فوری طور پر ان کے ساتھ جانے سے بھی انکار کر دیا اور طیارے کے قریب کرسی پر ہی بیٹھا رہا، تاہم کچھ دیر پائلٹ بھارتی فضائیہ کے اہلکاروں کے ساتھ ائیرپورٹ کے اند چلا گیا۔

بھارتی فضائیہ نے اتوار کو جاری بیان میں کہا کہ وہ اس واقعے سے مکمل طور پر آگاہ تھی اور یہ کہ طیارےکے تحفظ کے لیے ضروری اقدامات کیے گئے۔