Author: ممتاز حیدر

منی پور کی قومی شاہراہ پر جاری طویل ناکہ بندی سے علاقے میں اہم سپلائی متاثر ہے

شاہراہوں کی بندش سے سامان کی نقل و حمل میں شدید مشکلات ہین،بھارتی میڈیا رپورٹس کے مطابق ’’چوراچند پور، جہاں کوکی-زو برادری کے لوگ آباد ہیں اور دارالحکومت امفال اس صورتحال سے اقتصادی طور پر شدید متاثر ہیں،ناکہ بندی کے باعث میزورام کے راستوں سے سامان کی نقل وحمل سے اشیاء ضروریہ کی قیمتوں میں اضافہ ہوا ہے،ناکہ بندی سے طبی سامان کی شدید قلت بھی پیدا ہو گئی ہے، مقامی آبادی پریشان ہے

ماہرین کے مطابق ’’ناکہ بندی نسلی کشیدگی اور جھڑپوں سے جڑی ہوئی ہے، جو علاقے میں بڑھتے ہوئے معاشی بحران کو مزید پیچیدہ بنا رہی ہے‘‘مقامی شہریوں کا کہنا ہے کہ ناکہ بندی سے اشیاء کی قیمتیں بڑھ گئی ہیں اور صورتحال انتہائی تشویش ناک ہے، مقامی افراد نے نسلی برادریوں سے مفاہمت کی اپیل کی ہے تاکہ صورتحال معمول پر آسکے،سوشل میڈیا پر بھی ناکہ بندی اور نسلی تشدد کے باعث قیمتوں کے بڑھنے اور قلت کی اطلاعات ہیں.

دہشت گردی کی سازش کے ملزم پاکستانی شہری شاہ زیب خان کو کینیڈا سے امریکا بدر کردیا گیا

20 برس کے شاہزیب خان کو آج امریکی عدالت میں پیش کیا جائے گا۔محمد شاہ زیب خان کو شاہ زیب جدون کے نام سےبھی جانا جاتا ہے،حکام کے مطابق شاہ زیب نے نیویارک کے علاقے بروکلین میں ایک یہودی مرکز پر حملے کی سازش کی تھی اور نیویارک ہی میں اس پر فردجرم داخل کی گئی ہے،امریکی محکمہ انصاف کے مطابق شاہ زیب خان نے سازش میں شریک کرنے کیلئے جن افراد سے رابطہ کیا ان میں قانون نافذ کرنیوالے ادارے کے 2 خفیہ اہلکار بھی شامل تھے،دعویٰ کیا گیا ہے کہ شاہ زیب خان نے ایک موقع پر کہا تھا کہ اگر ہم اس منصوبے میں کامیاب رہے تو یہ نائن الیون کے بعد امریکا کی سرزمین پر سب سے بڑا حملہ ہوگا۔

شاہ زیب خان کو نیویارک کے جنوبی ڈسٹرکٹ میں شکایت درج ہونے پر ستمبر سن 2024 کو کینیڈا میں گرفتار کرلیا گیا تھا،یہ کارروائی اس وقت کی گئی تھی جب شاہ زیب خان کینیڈا کی سرحد سے مبینہ طورپر امریکا میں داخل ہونے کی کوشش کر رہا تھا،

ایف بی آئی کے ڈائریکٹر کاش پٹیل نے کہا کہ شاہ زیب خان امریکا میں داخل ہوکر یہودی کمیونٹی پرحملہ کرنا چاہتا تھا، وہ داعش سے متاثر ہوکر بڑے پیمانے پر لوگوں کو گولیوں کا نشانہ بنانے کی سازش کررہا تھا اور یہ کارروائی غزہ حملوں کو ایک برس مکمل ہونے پر کی جانا تھی تاہم ایف بی آئی اور اس کے شراکت دار یہ حملہ روکنے میں کامیاب رہے،امریکا کی اٹارنی جنرل پام بانڈی نے کہا کہ داعش امریکی شہریوں کیلئے واضح خطرہ ہے، خصوصاً یہودی شہری ایسے گروہوں کے ہاتھوں خاص طور پر نشانہ بنے ہیں،محکمہ انصاف کو اس بات پر فخر ہے کہ اس نے شاہ زیب خان کی امریکا بدری یقینی بنائی اور ملزم کیخلاف قانون پوری طرح حرکت میں لایا جائے گا،جرم ثابت ہونے کی صورت میں شاہ زیب خان کو عمر قید کا سامنا ہے۔

لندن کے برٹش پاکستانی میئر سر صادق خان کو نائٹ ہُڈ کے اعزاز سے نواز دیا گیا۔

برطانیہ کے بادشاہ چارلس نے صادق خان کو نائٹ ہُڈ کے اعزاز سے نوازا،برٹش پاکستانی سر صادق خان سن 2016 سے لندن کے میئر ہیں۔ وہ تاریخ میں پہلے شخص ہیں جو مسلسل تیسری بارلندن کے میئر منتخب ہوئے،
میڈیا رپورٹس کے مطابق صادق خان نے بتایا کہ بادشاہ چارلس بکھنگم پیلس میں نائٹ ہُڈ کااعزاز دیتے ہوئے مسرور تھے، نائٹ ہُڈ کا اعزاز لینے پر بے حد فخر ہے،سرصادق خان نے کہا کہ وہ ٹوٹنگ کےکونسل گھر میں جوان ہوئے اور یہ کبھی سوچا بھی نہ تھا کہ اس قدر بڑے اعزاز سے انہیں ایک روز نوازا جائے گا، لندن کا وعدہ ہے، جاں فشانی سے کام کرو گے تو تمہیں مدد ضرور ملے گی اور جو چاہوگے حاصل کرلو گے۔

صادق خان 8 اکتوبر 1970 کو لندن میں پیدا ہوئے۔وہ لندن کے پہلے مسلم میئر ہیں اور انہیں دائیں بازو کی شدید مخالفت کا سامنا رہا ہے،صادق خان کی پیدائش سے کچھ ہی عرصہ پہلے ان کے والد پاکستان سے برطانیہ منتقل ہوئے تھے۔ان کے والد بس ڈرائیور تھے،صادق خان نے یونیورسٹی آف نارتھ لندن سے قانون کی تعلیم حاصل کی۔ وہ 1994 میں سالیسٹر بنے اور انسانی حقوق سے متعلق امور میں خاص مہارت رکھتے ہیں۔ حکومت اور پولیس کے خلاف ان کے مقدمات وجہ شہرت بنے،صادق خان نے سیاست کا آغاز 1990 کی دہائی میں ٹوٹنگ سے لیبر کونسلر کی حیثیت سے کیا تھا۔ سن 2005 کے عام انتخابات میں وہ دارالعوام کی نشست جیتنے میں بھی کامیاب رہے تھے،سن 2008 میں صادق خان کمیونیٹیز سے متعلق امور کے انڈر سیکرٹری مقرر کیے گئے اور پھر وزیر مملکت برائے امور ٹرانسپورٹ بنائے گئے تھے،سن 2016 میں انہوں نے میئر کا انتخاب لڑنے کی ٹھانی۔ ان کا مقابلہ پاکستان تحریک انصاف کے بانی چیئرمین عمران خان کی سابقہ اہلیہ جمائما گولڈ اسمتھ کے بھائی زیک گولڈ اسمتھ سے ہوا جنہیں صادق خان نے با آسانی شکست دے کر پہلا مسلمان میئر لندن بننے کا اعزاز حاصل کرلیا تھا اوراب وہ اس اعزاز کی ہیٹ ٹرک کرچکے ہیں۔

فلسطینی صدر محمود عباس نے مزاحمتی تحریک حماس سے ہتھیار ڈالنے کا مطالبہ کردیا۔

غیر ملکی میڈیا کے مطابق فرانسیسی صدر ایمانوئل میکرون اور سعودی ولی عہد محمد بن سلمان کو لکھے گئے خط میں فلسطین کے صدر محمود عباس نے فلسطینی عوام کی حفاظت کے لیے عرب اور بین الاقوامی افواج کی تعیناتی کا مطالبہ کیا،محمود عباس نے اپنے خط میں کہا کہ حماس غزہ پر مزید حکومت نہیں کرے گی، اسے اپنے ہتھیار اور فوجی صلاحیتوں کو فلسطینی سکیورٹی فورسز کے حوالے کرنا ہوگا، اقوام متحدہ کی سلامتی کونسل کے مینڈیٹ کے ساتھ استحکام اور تحفظ مشن کے حصے کے طور پر عرب اور بین الاقوامی افواج کو فلسطین میں تعیناتی کے لیے مدعو کرنے کو تیار ہیں۔

واضح رہے کہ محمود عباس نے یہ خط ایک ایسے موقع پر لکھا ہے جب فرانسیسی صدر ایمانوئل میکرون اور سعودی ولی عہد محمد بن سلمان مشترکہ طور پر فلسطینی ریاست کے قیام کے موضوع پر رواں ماہ ایک کانفرنس منعقد کرنے جارہے ہیں۔