لندن: پاکستان کے اعلیٰ سطح کے سفارتی وفد کی رکن اور سینئر سیاستدان سینیٹر شیری رحمان نے برطانوی دارالحکومت لندن میں میڈیا سے گفتگو کرتے ہوئے کہا ہے کہ بھارتی وفد کا ایجنڈا کسی کو سمجھ نہیں آیا اور وہ پاکستان کے خلاف منفی بیانات لینے کے لیے آیا تھا، تاہم وہ اس میں ناکام رہا۔
شیری رحمان نے مزید بتایا کہ برطانوی حکام کو بھارتی وفد کے ہتھکنڈوں سے تفصیل سے آگاہ کیا جائے گا تاکہ حقیقت سے آگاہی فراہم کی جا سکے اور بھارتی پروپیگنڈے کا بے نقاب کیا جا سکے۔سینیٹر نے کہا کہ تین روز کے دوران پاکستان کے چیئرمین بلاول بھٹو زرداری برطانوی تھنک ٹینک اور میڈیا سے ملاقاتیں کریں گے جہاں وہ پاکستان کے موقف کو بہتر انداز میں پیش کریں گے اور عالمی برادری کو حقائق سے روشناس کرائیں گے۔
یہ سفارتی دورہ بلاول بھٹو زرداری کی قیادت میں ہوا، جس میں وفد نے پہلے امریکا کا دورہ کیا جہاں اقوام متحدہ میں مختلف ممالک کے نمائندوں، امریکی کانگریس کے ارکان اور دیگر حکومتی عہدے داروں سے ملاقاتیں کی گئیں۔ اس کے بعد پاکستان کا یہ وفد امریکا سے برطانیہ پہنچا ہے تاکہ برطانوی حکام، تھنک ٹینک اور میڈیا کے ذریعے پاکستان کا مؤثر پیغام پہنچایا جا سکے۔
سینیٹر شیری رحمان نے واضح کیا کہ بھارتی وفد کا اصل مقصد پاکستان کی بدنامی کرنا تھا، مگر وہ اپنی اس سازش میں کامیاب نہ ہو سکا۔ ان کا کہنا تھا کہ بھارتی وفد کا ایجنڈا غیر واضح اور مبہم تھا، جس کا مقصد سفارتی مذاکرات نہیں بلکہ پروپیگنڈا تھا۔
