Author: ممتاز حیدر

لاہور کے نواحی علاقے رائے ونڈ میں ایک دل دہلا دینے والا واقعہ پیش آیا ہے جہاں ایک باپ نے اپنی ہی جگر گوشہ 16 سالہ بیٹی کو مبینہ طور پر غیرت کے نام پر بے دردی سے قتل کر دیا۔

پولیس کا کہنا ہے کہ ملزم کی شناخت عمر کے نام سے ہوئی ہے جس نے اپنی کم عمر بیٹی ایمان فاطمہ کو تیز دھار آلے کے وار کر کے موت کے گھاٹ اتار دیا۔ یہ اندوہناک واقعہ اس وقت پیش آیا جب مقتولہ نے اپنی پسند کی شادی کی خواہش کا اظہار کیا، جو مبینہ طور پر ملزم کو گوارا نہ ہوا۔پولیس نے موقع پر پہنچ کر لاش کو تحویل میں لے کر پوسٹ مارٹم کے لیے اسپتال منتقل کر دیا ہے۔ ابتدائی تحقیقات کے مطابق، لڑکی کے قتل کی وجہ پسند کی شادی تھی، جسے خاندان میں "غیرت” کا مسئلہ بنا دیا گیا۔

ذرائع کے مطابق، قتل کے بعد سے ملزم عمر موقع سے فرار ہو گیا ہے اور اس کی گرفتاری کے لیے پولیس کی مختلف ٹیمیں چھاپے مار رہی ہیں۔ مقامی افراد کا کہنا ہے کہ ایمان فاطمہ ایک ذہین اور خوش اخلاق طالبہ تھی، اور وہ اپنے مستقبل کے حوالے سے مثبت خواب رکھتی تھی۔ پولیس کا کہنا ہےکہ ملزم کو جلد گرفتار کر لیا جائے گا

لاہورپولیس نے قربانی کےجانوروں کی چوری میں ملوث عناصرکیخلاف کریک ڈاؤن شروع کر دیا۔

یکم مئی سےاب تک مویشی چوری کے 113 ملزمان گرفتار کر کے 79 مقدمات کا اندراج کیا گیا۔ترجمان لاہورپولیس کے مطابق اقبال ٹاؤن ڈویژن سے مویشی چوری کے20 ملزمان گرفتار کیےگئے۔صدر سے28 اور کینٹ سے20ملزمان گرفتارکیےگئے۔ اسی طرح ماڈل ٹاؤن 23، سٹی 19اور سول لائنز سے3 مویشی چوروں کی گرفتار ی عمل میں لائی گئی۔

سی سی پی او بلال صدیق کمیانہ کے مطابق قربانی کے جانوروں کی چوری کی روک تھام کیلئے جامع سکیورٹی پلان تشکیل دیا گیا ۔سی سی پی او نے ہدایت کی کہ لاہورمیں قائم کی جانیوالی مویشی منڈیوں کی سکیورٹی کیلئے بھرپور اقدامات کئے جائیں۔مویشی منڈیوں میں اہم مقامات پر چیک پوسٹیں قائم کی جائیں۔

پنجاب کے محکمہ داخلہ نے پنجاب کنٹرول آف غنڈہ ایکٹ کا مسودہ تیار کر لیا ہے جس کا مقصد غنڈوں اور بدمعاشوں کی قانونی شناخت واضح کرنا اور امن عامہ کو یقینی بنانا ہے۔ اس نئے مسودے میں غنڈہ کی تعریف، ان کے خلاف کارروائی، نگرانی کے طریقہ کار اور متعلقہ اداروں کی ذمہ داریوں کو تفصیل سے بیان کیا گیا ہے۔

سائبر کرائم میں ملوث شخص ’’غنڈہ‘‘ ہوگا، غنڈے بدمعاش شخص کو نو فلائی لسٹ میں،شناختی کارڈ اور پاسپورٹ بلاک کیا جاسکتا ہے، غنڈے بدمعاش کے بینک اکاؤنٹس منجمد، اسلحہ لائسنس کینسل کیے جاسکتے ہیں، غنڈوں کی نگرانی کیلئے ڈیجیٹل مانیٹرنگ اور بائیو میٹرک ڈیٹا کولیکشن کی جاسکے گی

مسودے کے مطابق غنڈہ وہ شخص ہوگا جو مجرمانہ سرگرمیوں یا سماج مخالف رویے میں ملوث ہو۔ ایسے افراد کو امن عامہ کے لیے خطرہ سمجھا جائے گا اور وہ عوام کی زندگیوں میں پریشانی کا باعث بنیں گے۔غنڈہ قرار دینے کا اختیار ضلعی انٹیلی جنس کمیٹی (District Intelligence Committee) کو دیا گیا ہے جو پولیس، انتظامیہ اور حساس اداروں کی رپورٹس یا شکایات کی بنیاد پر کسی بھی شخص کو غنڈہ قرار دے سکتی ہے۔ یہ کمیٹی تمام متعلقہ اداروں کے تعاون سے کارروائی کرے گی۔منشیات کی فروشی، جوئے، بھتہ خوری، ہراسانی، اور دیگر سماج دشمن سرگرمیوں میں ملوث افراد کو غنڈہ قرار دیا جا سکے گا۔ اس سے ان غیر قانونی عناصر کے خلاف سخت قانونی کارروائی ممکن ہو گی۔

مسودے کے تحت غنڈہ قرار دیے گئے افراد کو مختلف پابندیوں کا سامنا کرنا پڑے گا، جن میں نو فلائی لسٹ میں شامل کرنا،شناختی کارڈ اور پاسپورٹ کی بلاکنگمبینک اکاؤنٹس کو منجمد کرنا،اسلحہ لائسنس کی منسوخی شامل ہیں،غنڈوں کی نگرانی کے لیے ڈیجیٹل مانیٹرنگ اور بائیو میٹرک ڈیٹا کلیکشن کا انتظام کیا جائے گا تاکہ ان کی سرگرمیوں پر مستقل نظر رکھی جا سکے،متاثرہ شخص ڈویژنل، صوبائی یا اپیل کمیٹیوں میں نظر ثانی کی اپیل دائر کر سکتا ہے۔ اپیل کی سماعت ایک ٹریبونل کرے گا جس کی سربراہی ریٹائرڈ ڈسٹرکٹ اینڈ سیشن جج کریں گے، تاکہ شفاف اور منصفانہ فیصلے یقینی بنائے جا سکیں۔ضلعی انٹیلی جنس کمیٹی کے احکامات کی خلاف ورزی کرنے والے کو 3 سے 5 سال قید اور 15 لاکھ روپے تک جرمانہ کیا جائے گا۔اگر جرم دہرایا گیا تو ملزم کو 7 سال تک قید اور 20 لاکھ روپے تک جرمانہ ہو گا۔

محکمہ داخلہ کا کہنا ہے کہ یہ ایکٹ پنجاب میں امن و امان کی صورتحال کو بہتر بنانے کے لیے ناگزیر ہے اور اس کے ذریعے غنڈہ گردی اور بدمعاشی کے خاتمے میں مدد ملے گی۔

آج دنیا بھر میں ایک ایسے شاہکارِ فطرت کو خراج تحسین پیش کیا جا رہا ہے، جو فلک بوس پہاڑوں میں اپنی گونج چھوڑتا ہے، برفانی ڈھلوانوں پر اپنی موجودگی ثبت کرتا ہے، اور حیاتیاتی تنوع کی ایک زندہ علامت ہے۔ جی ہاں، آج مارخور کا عالمی دن منایا جا رہا ہے ، پاکستان کا قومی جانور، جو نہ صرف ہمارے قدرتی ورثے کی شان ہے بلکہ دنیا بھر میں بہادری، وقار اور قدرتی حسن کی علامت کے طور پر جانا جاتا ہے۔

گلگت بلتستان — وہ خطہ جہاں ہر چٹان ایک کہانی سناتی ہے اور ہر وادی ایک راز چھپائے بیٹھی ہے — یہاں کے سربفلک پہاڑوں میں مارخور اپنی گھوم دار سینگوں اور پر وقار چال کے ساتھ قدرت کی حسین رعنائی کا ایک زندہ اثاثہ ہے۔ یہ خوبصورت مگر نایاب جانور نہ صرف ان پہاڑوں کی خوبصورتی کو مکمل کرتا ہے بلکہ ہمارے ماحولیاتی نظام کا ایک اہم ستون بھی ہے۔مارخور کی تعداد میں حالیہ برسوں میں نمایاں اضافہ ہوا ہے، جو حکومت اور مقامی برادری کی مشترکہ کاوشوں کا نتیجہ ہے۔ کنزرویٹر وائلڈ لائف گلگت بلتستان، خادم عباس کہتے ہیں،”ہم نے مقامی برادری کو اس مشن کا حصہ بنایا ہے۔ اب مارخور کا تحفظ یہاں صرف ایک حکومتی پالیسی نہیں، بلکہ عوامی شعور کی ایک تحریک بن چکا ہے۔”

اسی حوالے سے خنجراب نیشنل پارک کے وائلڈ لائف مینجمنٹ آفیسر محمد جعفر کا کہنا ہے،”مارخور صرف ایک جانور نہیں بلکہ ایک ماحولیاتی محافظ ہے۔ جب ہم مارخور کو بچاتے ہیں تو ہم دراصل قدرت کی اس زنجیر کو محفوظ رکھتے ہیں جو جنگلات، پہاڑوں، ندیاں اور چرند پرند کو جوڑے ہوئے ہے۔”

مارخور کا تحفظ صرف ایک جانور کو بچانا نہیں بلکہ پورے نظامِ فطرت کو توازن میں رکھنا ہے۔ جنگلات، پانی، اور دیگر جاندار مارخور کے وجود سے جڑے ہیں، اور اس کے بغیر یہ نظام بے توازن ہو سکتا ہے۔اگر ہم چاہتے ہیں کہ ہماری آنے والی نسلیں بھی مارخور کو آزاد فضا میں دیکھ سکیں، تو ہمیں آج ہی سے اپنی ذمہ داریوں کو سنجیدگی سے لینا ہو گا۔ مارخور کا عالمی دن ہمیں یہ یاد دلاتا ہے کہ قدرتی حسن کا تحفظ ہماری مشترکہ ذمہ داری ہے۔آئیے اس خاص موقع پر ہم سب عہد کریں کہ ہم اس تاجدارِ قدرت کی حفاظت کریں گے، کیونکہ مارخور کا تحفظ، ہماری فطرت، ہماری شناخت، اور ہماری نسلوں کا تحفظ ہے۔