Author: ممتاز حیدر

شورش زدہ بھارتی ریاست منی پور میں فوجیوں نے میانمار کی سرحد سے متصل ضلع چندیل میں دس قبائلی نوجوانوں کو ایک جعلی مقابلے میں ہلاک کر دیا ہے۔

خبررساں ادارے کے مطابق ان افراد کو تحصیل کھنگجوئے کے گاؤں نیو سمتلم میں ہلاک کیا گیا۔ریاستی پولیس نے کہا ہے کہ مرنے والے میانمار کے شہری تھے اور ان کی لاشیں میانمار کے حکام کے حوالے کر دی گئی ہیں۔ بھارتی فوج نے بھی دعویٰ کیا ہے کہ ہلاک ہونے والے سرحد پار سے آئے تھے اور ایک اُنہیں تصادم کے دوران مار دیا گیا۔انسانی حقوق کے گروپوں اور آزاد مبصرین نے واقعے کی شفافیت پر سوال اُٹھاتے ہوئے تحقیقات کا مطالبہ کیا ہے۔ انہوں نے کہا کہ اس بات کا امکان ہے کہ فوجیوں نے ان لوگوں کو فرضی تصادم میں مار دیا ہو۔یاد رہے کہ منی پور میں مئی 2023ء سے میتی (ہندو) اور کوکی (عیسائی) قبائل کے درمیان محاذ آرائی کے دوران اب تک سینکڑوں افراد ہلاک و زخمی جبکہ 60 ہزار کے قریب بے گھر ہو چکے ہیں

یوم تشکر کے موقع پر سفیر پاکستان رضوان سعید شیخ نے خطاب میں کہا ہے کہ پاکستان دنیا کے حساس ترین خطے میں واقع ہے۔ یہاں کی تاریخ پاکستان کے معرضِ وجود میں آنے سے پہلے سے ہی پیچیدہ ہے۔ ان محرکات کی عکاسی آج بھی کسی نہ کسی صورت سامنے آتی ہے، گذشتہ اٹھتر سالوں کے واقعات نے صورتحال کی پیچیدگی میں اضافہ کیا ہے . عالمی برادری کو بخوبی ادراک ہے کہ ہمارے خطے میں کشیدگی کے اثرات اور مضمرات نہ صرف علاقائی بلکہ عالمی سطح پر باعثِ تشویش ہوتے ہیں

رضوان سعید شیخ کا مزید کہنا تھا کہ امریکی قیادت نے خطے میں کشیدگی میں کمی لانے کے حوالے سے ہمیشہ نمایاں کردار ادا کیا ہے، مسلمہ طاقت ہونے کے ناطے علاقائی اور عالمی امن کے قیام کے حوالے سے امریکہ کا کردار اہم ہے ، واقعاتی شواہد سے ظاہر ہوتا ہے کہ پہلگام کا اسکرپٹ پہلے سے لکھا جا چکا تھا۔ بظاہر اس کاروائی کا مقصد داخلی کمزوریوں، انتخابی خساروں اور تسلط پسندانہ عزائم کو پایہ تکمیل تک پہنچانا تھا، بھارتی حکمران علاقائی تسلط کی دیرینہ خواہش کا بارہا اور برملا اظہار کرتے رہے ہیں، بھارتی پارلیمنٹ میں اکھنڈ بھارت کا نقشہ علاقائی تسلط پسندانہ عزائم کا منہ بولتا ثبوت ہے، یہ طرزِ عمل ہندوتوا کے ایسے دہشت گردانہ فلسفے پر مبنی ہے جو اظہر من الشمس ہے۔ کسی معاشی یا سیاسی عوامل یا ترجیحات کی وجہ سے دنیا ایسے طرزعمل سے صرفِ نظر کرتی رہی ہے ، 22 اپریل سے آج تک پاکستان کو وہ ثبوت نہیں دیے گئے جو ہم مانگ رہے ہیں، واقعے کے فورا بعد بھارتی قیادت اور ذرائع ابلاغ نے طبل جنگ بجانا شروع کر دیا، بارہا سمجھانے کے باوجود بھارت کی جانب سے جارحیت کا مظاہرہ کیا گیا اور خواتین اور بچوں کو نشانہ بنایا گیا۔ مسجدوں کو خاص طور پر نشانہ بنائے جانے کا عمل حد درجہ اشتعال انگیز تھا، اشتعال پسندی کے باوجود پاکستان سمجھاتا رہا کہ امن کی خواہش کو ہماری کمزوری نہ سمجھا جائے۔ بھارتی جارحیت کے سامنے افواجِ پاکستان اور پچیس کروڑ عوام ایک سیسہ پلائی دیوار کی طرح کھڑے ہوگئے، بنیان مرصوص نے متاؑعِ غرور کو خاک میں ملا دیا، بھارتی قیادت نہ صرف خود فیل ہوئی بلکہ اس نے رافیل کو بھی فیل کر دیا، کامیابیوں اور برتری کے باوجود بھی ہماری افواج نے امن کی خواہش کو قبول کیا۔ ایک اعشایہ چھ ارب لوگوں کی زندگیوں سے کھیلنا نہ تو مذاق ہے اور نہ اس قسم کے رویے کی کوئی بنیاد ڈالنی چاہیے۔ پاکستان کے خلاف کسی بھی جارحیت کا بھرپور جواب دیا جائے گا۔ دنیا کی کوئی طاقت پاکستان کو مٹا نہیں سکتی، بنیان مرصوص کے فلسفے کی تکمیل معاشی طور پر مستحکم ہونے سے ہوگی، آیئے آج کے دن اپنے ذاتی ، شخصی، فرقہ وارانہ ، فروعی، سیاسی نظریات اور اختلافات سے بالاتر ہو کر مادروطن کی تعمیر و ترقی میں اپنا کردار ادا کریں۔

نیویارک: 2022 میں نیویارک کے ایک لیکچر کے دوران سلمان رشدی پر حملہ کرنے والے ہادی متار کو جمعہ کے روز 25 سال قید کی سزا سنائی گئی۔ اس حملے کے نتیجے میں سلمان رشدی اپنی ایک آنکھ کھو بیٹھے تھے۔ 27 سالہ ہادی متار کو فروری میں قتل کی کوشش اور حملے کے جرم میں قصوروار قرار دیا گیا تھا۔ سلمان رشدی اپنی کتابوں اور متنازعہ خیالات کے باعث عالمی سطح پر مشہور ہیں، اور کئی ممالک میں ان کی کتابوں پر پابندی ہے۔

ہادی متار کو اس حملے کے بعد نیویارک کی عدالت میں سزا سنائی گئی، تاہم سلمان رشدی خود عدالت میں موجود نہیں تھے۔ انھوں نے اپنے بیان کو عدالت میں جمع کرایا۔ اس مقدمے میں سلمان رشدی نے خود کو کلیدی گواہ کے طور پر پیش کیا۔سزا سنائے جانے سے پہلے، ہادی متار نے جیل کے لباس میں عدالت میں کھڑے ہو کر آزادی اظہار کے حوالے سے بیان دیا اور سلمان رشدی کو منافق قرار دیا۔ چیختے ہوئے اس نے کہا: "سلمان رشدی دوسرے لوگوں کی بے عزتی کرنا چاہتا ہے۔ وہ بدمعاش بننا چاہتا ہے، وہ دوسروں پر دھونس جمانا چاہتا ہے۔ میں اس سزا سے متفق نہیں ہوں۔”

اس حملے میں سلمان رشدی کو شدید زخمی کیا گیا تھا اور اس کی ایک آنکھ کی بینائی چلی گئی تھی۔ ہادی متار کو رشدی کی قتل کی کوشش کے الزام میں زیادہ سے زیادہ 25 سال قید کی سزا سنائی گئی ہے، اور اس کے ساتھ اسٹیج پر موجود ایک اور شخص کو زخمی کرنے کے الزام میں سات سال کی سزا بھی دی گئی ہے۔ ڈسٹرکٹ اٹارنی جیسن شمٹ نے کہا کہ دونوں سزائیں ایک ساتھ چلنی چاہئیں کیونکہ دونوں متاثرین ایک ہی واقعے میں زخمی ہوئے تھے۔

امریکی میڈیا نے ایک حیران کن دعویٰ کیا ہے کہ سابق امریکی صدر ڈونلڈ ٹرمپ کی انتظامیہ غزہ سے ایک لاکھ فلسطینیوں کو مستقل طور پر لیبیا منتقل کرنے کے لیے ایک منصوبے پر کام کر رہی ہے۔ اس حوالے سے سابق امریکی عہدے دار کا کہنا ہے کہ امریکا نے اس منصوبے کے بارے میں لیبیا کی قیادت سے تبادلہ خیال بھی کیا ہے۔

رپورٹ کے مطابق، اس منصوبے کے تحت فلسطینیوں کی آبادکاری کے بدلے ٹرمپ انتظامیہ لیبیا کے منجمد اربوں ڈالر کو بحال کرے گی۔ واضح رہے کہ امریکا نے ایک دہائی قبل لیبیا کے اربوں ڈالر منجمد کر دیے تھے۔ اس سے قبل، امریکی حکومت نے لیبیا کے خلاف اقتصادی پابندیاں عائد کی تھیں، جن میں یہ منجمد رقم بھی شامل تھی۔خبر رساں ایجنسیوں کے مطابق اسرائیل فلسطین تنازعہ کے دو ریاستی حل کے حوالے سے ایک اہم کانفرنس 17 سے 20 جون تک اقوام متحدہ کے ہیڈکوارٹرز میں منعقد کی جائے گی۔ اس کانفرنس کا انعقاد فرانس اور سعودی عرب کی مشترکہ صدارت میں ہوگا اور اسے اقوام متحدہ جنرل اسمبلی کی حمایت حاصل ہوگی۔اس کانفرنس کا مقصد اسرائیل اور فلسطین کے درمیان دیرپا امن قائم کرنے کے لیے عالمی سطح پر کوششوں کو فروغ دینا ہے۔ فرانس اور سعودی عرب نے اس حوالے سے سرگرم کردار ادا کرنے کا عہد کیا ہے اور عالمی برادری کو اس تنازعہ کے حل کے لیے ایک متحدہ موقف اختیار کرنے کی دعوت دی ہے۔

فروری میں امریکی صدر ڈونلڈ ٹرمپ نے ایک اور متنازع بیان دیتے ہوئے کہا تھا کہ امریکا غزہ کی پٹی پر قبضہ کرے گا۔ انہوں نے کہا کہ "ہم غزہ کے مالک ہوں گے، اور اس کا مقصد اس علاقے میں استحکام لانا اور ہزاروں نئی ملازمتیں پیدا کرنا ہے۔”ٹرمپ نے مزید کہا تھا کہ ان کا مقصد غزہ میں طویل المدتی ملکیت حاصل کرنا ہے اور اس علاقے کو ترقی دینے کے لیے فلسطینیوں کے لیے نئی ملازمتیں فراہم کرنا ہے۔ ان کا دعویٰ تھا کہ اس اقدام سے غزہ میں امن اور خوشحالی کی نئی راہیں کھلیں گی۔

امریکا کے صدر ڈونلڈ ٹرمپ نے ایک حالیہ انٹرویو میں کہا ہے کہ خارجہ پالیسی کے امور میں انہیں زندگی میں آج تک جس بات پر سب سے زیادہ سراہا گیا ہے، وہ پاک بھارت جنگ بندی کو کامیاب بنانا ہے۔ ان کا کہنا تھا کہ یہ ان کے لیے ایک اعزاز ہے کہ وہ دونوں ملکوں کے درمیان کشیدگی کو کم کرنے میں کامیاب ہوئے۔

ٹرمپ نے پاکستانیوں کی ذہانت اور ان کی شاندار اشیاء بنانے کی صلاحیتوں کا بھی برملا اعتراف کیا۔ انہوں نے کہا کہ پاکستانی بہت ذہین لوگ ہیں جو حیرت انگیز اشیاء تیار کرتے ہیں۔ صدر ٹرمپ نے یہ بھی کہا کہ انہوں نے پاکستان سے بہت عمدہ بات چیت کی ہے اور وہ پاکستان کو نظرانداز نہیں کرسکتے، کیونکہ ان کے مطابق تالی دونوں ہاتھوں سے بجتی ہے۔

امریکی صدر کا کہنا تھا کہ بھارت کے ساتھ تو ان کا موقف ہمیشہ واضح رہا ہے، تاہم انہوں نے پاکستان سے تجارت کے بارے میں بھی بات کی۔ ان کے مطابق پاکستان یہ چاہتا ہے کہ وہ امریکا سے تجارت کرے اور اس حوالے سے پاکستان کے ساتھ بھی بات چیت جاری ہے۔صدر ٹرمپ نے بھارتی جارحیت کے جواب میں پاکستان کی بھرپور کارروائی اور اس کے بعد امریکی مداخلت سے متعلق سوالات کا جواب دیتے ہوئے کہا کہ پاکستان اور بھارت کوئی معمولی ملک نہیں بلکہ دونوں بڑی ایٹمی طاقتیں ہیں۔ ان کا کہنا تھا کہ دونوں ممالک ایک دوسرے سے سخت ناراض تھے اور لڑائی کا دروازہ نیوکلیئر ہتھیاروں تک پہنچ چکا تھا۔ ٹرمپ نے کہا کہ یہ لڑائی اتنی بڑھ گئی تھی کہ یہ ایٹمی جنگ کی صورت اختیار کر سکتی تھی، لیکن وہ خوش ہیں کہ دونوں ممالک اس کے قریب پہنچ کر واپس آ گئے۔صدر ٹرمپ نے کہا کہ نیوکلیئر جنگ ایک ایسی بدترین صورتحال ہوتی جس کا تصور بھی انسان کے لیے اذیت ناک ہے۔ انہوں نے اس بات پر افسوس کا اظہار کیا کہ دونوں ممالک اس جنگ کے بہت قریب پہنچ چکے تھے، مگر انہوں نے سفارتکاری کے ذریعے دونوں ممالک کے درمیان کشیدگی کو کم کیا۔

مذاکرات اور جنگ بندی کے پیچھے کے عمل کے بارے میں صدر ٹرمپ نے بتایا کہ انہوں نے اپنے اہلکاروں کو ہدایت دی تھی کہ پاکستان اور بھارت کو ٹیلی فون کرکے تجارت اور ملاقاتوں کا آغاز کیا جائے۔ ٹرمپ نے کہا کہ ان کی کوشش تھی کہ دونوں ممالک کے درمیان تجارت بڑھائی جائے تاکہ دشمنیوں کا خاتمہ ہو اور امن قائم ہو سکے۔امریکی صدر نے بھارت پر تنقید کرتے ہوئے کہا کہ بھارت دنیا کا وہ ملک ہے جو سب سے زیادہ ٹیرف لگاتا ہے اور اس کے ذریعے دوسرے ممالک کے لیے کاروبار کرنا تقریباً ناممکن بنا دیتا ہے۔ تاہم، اب بھارت بھی امریکا کے ساتھ اپنے ٹیرف کو سو فیصد کم کرنے پر تیار ہو چکا ہے، جو کہ دونوں ممالک کے تجارتی تعلقات میں بہتری کی طرف اشارہ کرتا ہے۔

صدر ٹرمپ نے اپنی صلاحیتوں کے بارے میں بات کرتے ہوئے کہا کہ وہ ہمیشہ اپنے وعدوں پر عمل کرنے والے شخص ہیں اور اپنے فیصلوں سے عالمی سطح پر امن اور تعاون کے فروغ کے لیے کوشاں ہیں۔