Author: ممتاز حیدر

پاکستان اور بھارت کے درمیان جنگ بندی کے باوجود بھارتی ائیرپورٹس پر صورتحال سنجیدہ ہے، جہاں اب بھی 24 ائیرپورٹس کے فلائٹ آپریشنز بند ہیں۔ آج تک 444 پروازیں منسوخ کی جا چکی ہیں۔

رپورٹس کے مطابق، جنگ بندی کے اعلان کے باوجود امرتسر، سرینگر، جموں، لداخ، دھرم شالا، شملہ، آدم پور، اور چندی گڑھ جیسے اہم بھارتی شہروں میں فلائٹ آپریشنز بدستور معطل ہیں۔ ان ائیرپورٹس سے آج بھی تمام پروازیں منسوخ کی جا چکی ہیں۔سرینگر ایئرپورٹ سے گزشتہ سات دنوں سے روزانہ 65 پروازیں منسوخ کی گئی ہیں۔ لداخ کے لیہ کوشک ایئرپورٹ سے بھی آج تمام 30 پروازیں منسوخ ہیں، اور جموں ایئرپورٹ پر بھی 30 پروازیں معطل ہو چکی ہیں۔ مزید برآں، دھرمشالہ کی 14 پروازیں، چندی گڑھ کی 84 پروازیں، جودھ پور ایئرپورٹ کی 20 پروازیں اور راجکوٹ ہیراسر ایئرپورٹ کی 20 پروازیں بھی منسوخ کی گئی ہیں۔گجرات کے بھوج ایئرپورٹ سے بھی 10 پروازیں منسوخ کردی گئی ہیں۔ اس کے علاوہ، بھارت کے متعدد دوسرے ائیرپورٹس پر بھی فلائٹ آپریشنز غیر فعال ہیں اور ان ایئرپورٹس سے آج کی شیڈول فلائٹس معطل کردی گئی ہیں۔

یہ صورتحال بھارت کے خلاف پاکستان کی کامیاب فوجی کارروائی کے بعد پیدا ہوئی، جب پہلگام حملے کے بعد بھارت کی جانب سے جارحیت کا مظاہرہ کیا گیا تھا۔ پاکستان نے بھرپور جواب دیتے ہوئے آپریشن "بُنْيَان مَّرْصُوْص” (آہنی دیوار) کے تحت بھارت میں 10 سے زائد اہداف کو نشانہ بنایا تھا۔پاکستانی فوج نے اپنی محدود فوجی صلاحیتوں کا استعمال کیا تھا اور مزید طاقتور صلاحیتیں محفوظ رکھی ہیں۔ پاکستان نے بھارت کے ایئر بیسز اور فوجی فیلڈز کو تباہ کیا، جن میں آدم پور، ادھم پور، بٹھنڈا، سورت گڑھ، مامون، اکھنور، جموں، سرسہ اور برنالہ کے اہم ایئر بیس شامل ہیں۔ اس کے علاوہ، بھارتی اڑی فیلڈ سپلائی ڈپو، سرسہ اور ہلواڑا ایئر فیلڈز بھی تباہ کر دی گئیں۔پاکستان نے اپنے جوابی حملے میں جدید ترین 1 میزائل سسٹم استعمال کیا، جس کے ذریعے متعدد بھارتی اہداف کو کامیابی سے نشانہ بنایا گیا۔ آدم پور میں پاک فوج نے جے ایف 17 تھنڈر طیارے سے بھارتی ایئر بیس پر ہائپر سونک میزائل داغا، جس کے نتیجے میں 1.5 ارب ڈالر مالیت کا بھارتی ایئر ڈیفنس سسٹم ایس 400 تباہ ہوگیا۔

پاکستان اور بھارت کے درمیان یہ شدت اختیار کرتی صورتحال اس وقت کم ہوئی جب امریکی صدر نے دونوں ممالک کے درمیان جنگ بندی کی کوششیں کیں۔ ان کی مداخلت کے بعد، دو دن قبل دونوں ممالک کی جانب سے جنگ بندی کا اعلان کیا گیا۔اس تمام صورتحال سے ظاہر ہوتا ہے کہ جنگ بندی کے باوجود کئی اہم بھارتی ائیرپورٹس پر فلائٹ آپریشنز کی معطلی اور پروازوں کی منسوخی نے بھارت کے فضائی آپریشن کو شدید متاثر کیا ہے، اور جنگ بندی کے بعد بھی کشیدگی کا ماحول برقرار ہے۔

بھارت، پاکستانی فضائیہ کے ساتھ ٹکراؤ میں خود کو برتر نہ سمجھے، پاکستان ائیرفورس نے پوری دنیا کو پیغام پہنچا دیا ہے۔

نیشنل انٹریسٹ کے مطابق جنگیں فریقین کے غرور اور لاعلمی سے جنم لیتی ہیں، بھارت نے پہلگام حملے کے شواہد دینے کے بجائے پاکستان پر حملہ کیا، عام تاثر تھا کہ بھارت کو پاکستان پر برتری حاصل ہے مگر پاکستان نے اپنی صلاحیتوں کا لوہا منوا لیا،امریکی جریدے نے لکھا کہ بھارت کو نیوکلئیر کمانڈ اور کنٹرول سسٹم میں پاکستان سے بہتر تصور کیا جاتا رہا مگر پاکستان فوج نے غیر معمولی صلاحیتوں کا مظاہرہ کیا، بھارت کے پاس یورپی اور روسی ساختہ جدید ہتھیاروں کا امتزاج ہے جبکہ پاکستان کو چین اور ترکی مدد حاصل رہی،نیشنل انٹریسٹ کے مطابق پاکستان ائیرفورس نے ابتدائی بھارتی فضائی حملوں کو روک کر غیرمعمولی دفاع صلاحیت ثابت کی، پاکستان نے آپریشن کے آغاز میں ہی بھارتی فضائیہ کے 5 جنگی طیارے مار گرائے،امریکی جریدے نے لکھا کہ بھارتی پائلٹس میں مناسب فلائٹ ٹریننگ کی شدید کمی ہے، بھارتی ائیرفورس کی غیر معیاری ٹریننگ نے بھارتی جنگی صلاحیت کو متاثر کیا اوربھارت کے جدید ترین رافیل طیاروں کا نقصان، نئی دہلی کی ساکھ کے لیے ایک بڑا دھچکا ہے۔

نیشنل انٹریسٹ کے مطابق پاکستان فضائیہ کی برتری کی بڑی وجہ پاک فضائیہ کے پائلٹس کی بہتر تربیت اور جنگی تجربہ ہے، پاکستانی پائلٹس افغانستان کے ساتھ سرحدی علاقے میں مسلسل انسداد دہشت گردی آپریشنز کرتے رہے ہیں،امریکی جریدے نے تجزیہ کیا کہ بھارتی خارجہ پالیسی نے اسے عالمی حمایت سے محروم کر رکھا ہے، روس، بھارت کا دیرینہ اتحادی ہے مگر وہ بھی اس تنازعے پر خاموش رہا۔

دفاع ماہرین کا کہنا ہے کہ پاکستان کی دفاعی طاقت اور عسکری حکمت عملی نے بھارت کے غرور کو خاک میں ملا دیا، دشمن کو سبق سکھانا پاک فوج خوب جانتی ہے، اور حالیہ فتح اس کی روشن مثال ہے.

پاکستان سے جنگ بندی کا اعلان کرنے کے بعد بھارتی سیکرٹری خارجہ وکرم مسری کو انتہاپسند حلقوں کی جانب سے غدار قرار دے دیا گیا ہے۔ جنگ کی حمایت کرنے والے گروپوں نے وکرم مسری کو سخت تنقید کا نشانہ بنایا، جس کے نتیجے میں ان کے خلاف شدید ردعمل سامنے آیا ہے۔

رپورٹس کے مطابق، جنگ بندی کے اعلان کے بعد وکرم مسری اور ان کے اہل خانہ کو دھمکی آمیز پیغامات اور سوشل میڈیا پر شدید تنقید کا سامنا ہو رہا ہے۔ اس دباؤ کے نتیجے میں وکرم مسری نے اپنی سوشل میڈیا اکاؤنٹ کو لاک کر دیا ہے تاکہ ان کے اہل خانہ کو مزید تکلیف کا سامنا نہ ہو۔پاکستان سے جنگ بندی کے اعلان کے بعد بھارت میں بعض حلقوں کی جانب سے وکرم مسری پر اس فیصلے کو تنقید کا نشانہ بنایا گیا، اور انہیں غدار قرار دیا گیا۔ تاہم، بھارتی سیاستدانوں، غیر ملکی سفارت کاروں اور بھارتی ایڈمنسٹریٹو سروس ایسوسی ایشن نے وکرم مسری کے ساتھ اظہار یکجہتی کیا

بھارتی ایڈمنسٹریٹو سروس ایسوسی ایشن نے اپنے بیان میں کہا کہ سول سرونٹس کو اپنے فرادی اور پیشہ ورانہ اصولوں کے تحت فیصلے کرنے کی آزادی ہونی چاہیے۔ اس کے ساتھ ساتھ انہوں نے حکومت سے مطالبہ کیا کہ وہ وکرم مسری اور ان کے اہل خانہ کی حفاظت کو یقینی بنائے تاکہ وہ پیشہ ورانہ ذمہ داریوں کی انجام دہی میں مکمل طور پر آزاد ہوں۔

مجموعی طور پر یہ صورتحال اس بات کی عکاسی کرتی ہے کہ جنگ بندی کے اعلان کے باوجود انتہاپسند گروپوں کی جانب سے اس پر مخالفت اور پاکستان کے ساتھ مذاکرات کے خلاف شدید ردعمل کا سامنا بھارت میں ہو رہا ہے۔

بھارت کو جاری علاقائی کشیدگی اور عسکری ناکامیوں کے باعث اب تک کا سب سے بڑا معاشی دھچکا لگا ہے۔ مختلف مالیاتی اور دفاعی ذرائع کے مطابق بھارت کو اب تک تقریباً 234.31 ارب امریکی ڈالر کا نقصان ہو چکا ہے، جبکہ ماہرین کے مطابق مکمل تخمینہ لگائے جانے کے بعد یہ نقصان کھربوں ڈالر تک پہنچ سکتا ہے۔

پاکستانی فضائیہ نے آپریشن "بنیان اُلمرصوص” کے تحت بھارت کے آدمپور میں نصب S-400 ایئر ڈیفنس سسٹم کو کامیابی سے تباہ کیا۔ روسی ساختہ یہ نظام بھارت کا اہم ترین دفاعی اثاثہ تھا، جس کی مالیت 1.5 ارب ڈالر بتائی گئی ہے۔اسی دوران پاکستان نے پانچ بھارتی جنگی طیارے بھی مار گرائے، جن میں تین رافیل (Rafale)، ایک SU-30MKI اور ایک MiG-29 شامل ہیں۔ ان طیاروں کی مجموعی مالیت 956 ملین ڈالر ہے۔پاکستانی دفاعی نظام نے بھارتی افواج کے استعمال کردہ 77 ڈرونز کو بھی مار گرایا، جن میں Harop اور Harpy ماڈلز شامل تھے۔ ہر ڈرون کی اوسط قیمت $700,000 ہے، جس سے بھارت کو 54.18 ملین ڈالر کا مزید نقصان پہنچا۔ بین الاقوامی خبررساں ادارے رائٹرز کے مطابق بھارتی اسٹاک مارکیٹ دو دن مسلسل گراوٹ کا شکار رہی، جس کے نتیجے میں 83 ارب ڈالر کی مارکیٹ ویلیو ختم ہو گئی۔ جمعہ کے روز صرف ابتدائی لمحات میں ہی بھارتی سرمایہ کاروں کو 3.5 لاکھ کروڑ روپے (تقریباً 40.75 ارب ڈالر) کا نقصان ہوا۔ ہفتہ بھر کی مجموعی کمی 108 ارب ڈالر تک پہنچ گئی۔

بھارتی روپے کی قیمت میں بھی زبردست گراوٹ دیکھی گئی، جو 84.83 سے گر کر 85.71 ہو گئی۔ 1.04 فیصد کی یہ کمی گزشتہ دو سالوں میں سب سے بڑی یومیہ کمی قرار دی جا رہی ہے۔پاکستان کی جانب سے فضائی حدود کی بندش کے بعد بھارتی ایئر لائنز کو ہر ہفتے تقریباً 77 کروڑ روپے (9.11 ملین ڈالر) کا نقصان اٹھانا پڑ رہا ہے۔ مہینے بھر کا اثر 306 کروڑ روپے (36.20 ملین ڈالر) تک پہنچ چکا ہے۔اب تک 32 بھارتی ہوائی اڈے بند کیے جا چکے ہیں، جس کے نتیجے میں 400 پروازیں منسوخ ہو چکی ہیں۔ یومیہ 30 کروڑ روپے (3.49 ملین ڈالر) کا نقصان بھارتی ہوابازی کو ہو رہا ہے۔

ائیر لائنز اور ہوٹل انڈسٹری متاثر رہی ، رپورٹ کے مطابق IndiGo کو یومیہ 7 کروڑ روپے (0.82 ملین ڈالر) کا نقصان ہوا، ایئر انڈیا کو 5 کروڑ روپے (0.58 ملین ڈالر) کا نقصان ہوا،سپائس جیٹ کو 1.5 کروڑ روپے (0.17 ملین ڈالر) کا نقصان ہوا،ہوٹل انڈسٹری بھی بُری طرح متاثر ہے، جہاں Indian Hotels Co. کو یومیہ 1 سے 1.5 کروڑ روپے جبکہ Ventive Hospitality کو 5 کروڑ روپے (0.58 ملین ڈالر) کا نقصان ہو رہا ہے۔

چھ ارب ڈالر سے زائد مالیت کی انڈین پریمیئر لیگ (IPL) کی معطلی نے میڈیا انڈسٹری کو شدید نقصان پہنچایا ہے۔ ماہرین کے مطابق براڈکاسٹنگ ریونیو میں 30 سے 40 فیصد کمی متوقع ہے۔ایک بڑے سائبر حملے نے بھارت کے 70 فیصد پاور گرڈ کو مفلوج کر دیا ہے، جس کے اثرات توانائی، ٹیلی کام، دفاع اور سرکاری ویب سائٹس تک پھیل چکے ہیں۔ بی جے پی کی ویب سائٹ سمیت کئی اہم پورٹلز بھی بند ہو چکے ہیں۔ اس حملے سے بھارت کو لاکھوں ڈالر کا نقصان پہنچا ہے۔موڈی کی تازہ رپورٹ کے مطابق بھارت کی سالانہ معاشی ترقی کی شرح 6.5 فیصد تک گر گئی ہے، جو گزشتہ چار سال کی کم ترین سطح ہے۔ دفاعی اخراجات میں اضافے کے باعث بھارت کی مالی صحت مزید دباؤ کا شکار ہو چکی ہے۔

ماہرین کا کہنا ہے کہ بھارت کی اسٹریٹجک حکمت عملی اس کے اپنے لیے زخم بن چکی ہے۔ یہ نقصان صرف مالی نہیں بلکہ اعتبار، استحکام اور عوامی اعتماد کے ضیاع کا بھی باعث ہے۔ ان زخموں کا مندمل ہونا برسوں یا دہائیوں تک ممکن نہیں۔