Author: ممتاز حیدر

وزیراعظم محمد شہباز شریف نے پاکستان پیپلز پارٹی کے چیئرمین بلاول بھٹو زرداری، پی ٹی آئی کے چیئرمین بیرسٹر گوہر، جمیعت علماء اسلام ف کے راہنما مولانا فضل الرحمان، کنوینر متحدہ قومی موومنٹ خالد مقبول صدیقی، امیر جماعت اسلامی حافظ نعیم الرحمن، بلوچستان عوامی پارٹی کے سربراہ خالد حسین مگسی اور پاکستان مسلم لیگ ق کے راہنما چوہدری سالک حسین سے ٹیلیفونک رابطہ کیا ہے

وزیراعظم شہباز شریف کا کہنا تھا کہ الحمدللہ افواج پاکستان نے بھارتی جارحیت کا آج مربوط طریقے سے پر زور اور طاقت ور جواب دیا ہے،بھارت نے پاکستان پر میزائل اور ڈرون حملے کیے، ان جارحانہ اقدامات کے باوجود پاکستان نے انتہائی تحمل سے کام لیا، پہلگام واقعے کے بعد پاکستان نے حقائق جاننے کے لیے غیر جانبدارانہ تحقیقات کا کہا، جس کو بھارت نے ٹھکرا دیا، آج صبح دوبارہ بھارت نے نور خان ایئربیس اور دیگر مقامات پر میزائل سے حملے کیے، بھارتی حملوں میں نہتے اور معصوم شہریوں کو نشانہ بنایا گیا، بھارت کی ان پے در پے کاروائیوں کا ہماری بہادر افواج نے بھرپور جواب دیا،پاکستان نے آپریشن بنیان ال مرصوس میں جوابی کارروائی میں بھارت کی ان ملٹری تنصیبات کو خصوصی طور پر نشانہ بنایا جن سے پاکستان پر حملے کیے گئے، آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا ہے،ہمیں اپنی افواج پر فخر ہے، آپ سمیت پوری قوم کو میں اس کامیاب آپریشن پر مبارکباد پیش کرتا ہوں، ہم بھارت کی پاکستان کی سالمیت کو نقصان پہنچانے کی مذموم کوششوں کو ناکام بنانے کے لیے پر عزم ہیں،

ملکی سیاسی راہنماؤں نےپاک فوج کے جوانوں کے تدبر، حوصلے اور پیشہ ورانہ مہارت کو خراج تحسین پیش کیا،ملکی سیاسی راہنماؤں نے وزیراعظم کو مشکل کی اس گھڑی میں اپنے اور پوری پاکستانی قوم کے تعاون اور یکجہتی کا یقین دلایا،سیاسی قیادت کا کہنا تھا کہ مادر وطن کے دفاع کے لیے ہماری بہادر افواج کی مہارت قابل تحسین ہے،

پاکستان کی فضائیہ کے پائلٹس نے حال ہی میں ایک ایسی جرات مندانہ کارروائی کا مظاہرہ کیا، جسے دنیا بھر میں بہادری اور فرض شناسی کی ایک زندہ مثال کے طور پر یاد رکھا جائے گا۔

پاک فضائیہ کے پائلٹس نے انڈیا پر حملہ کرنے سے قبل ایک اہم اور جذباتی فیصلہ کیا۔ انھوں نے اپنی زندگیوں کے بارے میں ایک "ڈیتھ وارنٹ” پر سائن کیے، جس میں انھوں نے لکھا کہ اگر وہ شہید ہو جاتے ہیں تو پاکستانی پرچم ان کا کفن بنے گا اور ان کی مائیں جب ان کی لاشیں دیکھیں گی، تو وہ اللّٰہ کا شکر ادا کرتے ہوئے فخر کے ساتھ مسکریں گی۔اس دلیرانہ فیصلے کے بعد، اللّٰہ کی بے شمار رحمتوں کے ساتھ، پاکستان کے تمام پائلٹ انڈیا پر حملہ کرنے کے بعد کامیابی کے ساتھ واپس لوٹ آئے۔ ان پائلٹس کا جذبہ، ایمانداری، اور وطن کے لیے ان کی قربانی کا عزم ایک مثال بن چکا ہے۔

"الحمدللہ، اللّٰہ کی مدد سے” دنیا کی نئی تاریخ رقم کی گئی۔ ان بہادر پائلٹس کی کامیاب واپسی نے ثابت کر دیا کہ پاکستان کی فضائیہ نہ صرف طاقتور ہے بلکہ اس کے حوصلے اور عزم بھی بے مثال ہیں۔ ان پائلٹس کی قربانیوں اور شجاعت کو ہمیشہ یاد رکھا جائے گا۔اس تاریخی کامیابی نے نہ صرف پاکستانی قوم کا سر فخر سے بلند کیا بلکہ دنیا بھر میں پاکستان کی طاقت اور اس کے پائلٹس کی بے نظیر جرات کا لوہا بھی منوایا۔ یہ واقعہ نہ صرف پاکستانی تاریخ کا حصہ بن چکا ہے بلکہ یہ آنے والی نسلوں کے لیے ایک درخشاں مثال ہے۔

عوامی مسلم لیگ کے سربراہ اور سابق وفاقی وزیر شیخ رشید نے کہا ہے کہ بھارت نے اپنے پڑوسیوں کے ساتھ داداگیری کی تھی، تاہم پاکستان نے اس کی بولتی بند کردی ہے۔

انہوں نے یہ بات راولپنڈی میں میڈیا سے گفتگو کرتے ہوئے کہی۔شیخ رشید کا کہنا تھا کہ پاکستان نے کل کی رات بھارت کو واضح کردیا کہ پاکستان ایک زندہ قوم ہے۔ انہوں نے کہا، "ہم پاکستان اور اسلام کے لیے زندہ ہیں اور اسی مقصد کے لیے اپنی جانیں قربان کرنے کے لیے تیار ہیں۔”سابق وزیر نے مزید کہا کہ "بھارت میں مسلمانوں، سکھوں اور یہودیوں کی زندگی اذیت میں ڈالی جارہی ہے۔ پاکستان کی 25 کروڑ عوام بھارت کو ایسا سبق سکھائے گی جو نسل در نسل یاد رکھا جائے گا۔” انہوں نے کہا کہ تین دن سے سپر پاورز صلح کی باتیں کر رہی تھیں، لیکن گزشتہ رات پاک فوج نے اپنے کام کا مظاہرہ کرتے ہوئے دشمن کے دانت کھٹے کر دیے ہیں۔

شیخ رشید نے پاک فوج کے ساتھ کھڑے ہونے کا عزم ظاہر کرتے ہوئے کہا کہ "پاکستان کے دفاع کے لیے ہم پاک فوج کے ساتھ ہیں اور اگر ہمیں سرحد پر بھی جانا پڑا تو یہ ہمارے لیے ایک اعزاز ہوگا۔” انہوں نے کہا، "ہم جئیں تو غازی ہیں، مریں تو شہید ہیں۔” شیخ رشید نے اللہ سے دعا کی کہ انہیں بھی شہادت کا موقع ملے اور کہا کہ "اگر ضرورت پڑی تو خود بارڈر پر جا کر اپنے کشمیری اور مسلمان بھائیوں کے لیے لڑوں گا۔”بھارت کے رافیل طیاروں کے حوالے سے بات کرتے ہوئے شیخ رشید نے کہا کہ "پاکستان کے جے ایف 17 تھنڈر طیارے جب بن رہے تھے تو میں دو مرتبہ ان کو دیکھنے گیا تھا۔ ڈاکٹر عبدالقدیر خان میرے دوست اور بھائی تھے، اور ہم نے اس وقت جے ایف 17 بنائے۔ آج جے ایف 17 کے سامنے رافیل جیسے طیارے ہاتھ جوڑ کر کھڑے ہیں۔”