Author: ممتاز حیدر

اسلام آباد: پاکستانی سیکیورٹی ذرائع نے تصدیق کی ہے کہ پاکستان کی سیاسی اور فوجی قیادت نے ایک اہم فیصلہ کیا ہے کہ اگر بھارت کی جانب سے پاکستان کی جانب کسی بھی قسم کی جوابی کارروائی کی جاتی ہے، تو پاکستان بھارت کے اہم اور حساس اقتصادی اہداف کو نشانہ بنائے گا۔

پاکستان کی فوجی اور سیاسی قیادت نے اس بات کا عزم کیا ہے کہ پاکستان کی جانب سے کسی بھی قسم کی پیشگی یا جوابی کارروائی کا فیصلہ مکمل طور پر پاکستان کے مفادات اور سلامتی کے تناظر میں کیا جائے گا۔ اس فیصلے کی روشنی میں پاکستان بھارت کے ایسے اہداف کو نشانہ بنائے گا جو بھارت کی اقتصادی اور حکومتی استحکام کے لیے کلیدی حیثیت رکھتے ہیں۔سیکیورٹی ذرائع کے مطابق پاکستان کی جانب سے اس فیصلے کا مقصد نہ صرف دفاعی حکمت عملی کو مضبوط کرنا ہے بلکہ بھارت کو اس بات کا واضح پیغام دینا ہے کہ پاکستان کی دفاعی صلاحیتوں کا دائرہ وسیع ہے اور وہ ہر قسم کے خطرات کا مناسب جواب دینے کے لیے تیار ہے۔

پاکستان نے بھارت کی مسلسل اشتعال انگیزیوں کے جواب میں "آپریشن بنیان المرصوص” کا آغاز کر دیا ہے۔پاکستان نے گجرات، راجھستان اور نئی دہلی میں بھارت کی ملٹری تنصیبات پر حملے شروع کردیئے۔ اس آپریشن کا مقصد بھارت کی عسکری تنصیبات کو نشانہ بنانا ہے۔اب تک پاکستان نے بیاس میں براہموس کی سٹوریج جہاں سے پاکستان پر میزائل داغے گئے، کو تباہ کر دیا گیا ہے ،ائیر بیس ادھم پور کو تباہ کر دیا گیا ہے،اطلاعات کے مطابق پٹھان کوٹ میں ائیر فیلڈ کو بھی تباہ کر دیا گیا ہے,

پاکستان نے بھارتی جارحیت کے بعد مؤثر اور بھرپور جوابی کارروائی کا آغاز کر دیا ہے۔ سیکیورٹی ذرائع کے مطابق اس وقت پاکستان کی افواج بھارت کے جارحانہ اقدامات کا منہ توڑ جواب دے رہی ہیں اور دشمن کے عسکری ٹھکانوں کو نشانہ بنایا جا رہا ہے۔ذرائع کا کہنا ہے کہ پاکستان کی جوابی کارروائی نہایت منظم اور حکمت عملی کے تحت کی جا رہی ہے، جس میں دشمن کے حساس مقامات پر ہدف بنا کر حملے کیے جا رہے ہیں۔

ڈی جی آئی ایس پی آر لیفٹیننٹ جنرل احمد شریف چوہدری نے رات گئے پریس بریفنگ میں تصدیق کی کہ بھارت نے اپنے جنگی طیاروں کے ذریعے پاکستانی فضائی اڈوں پر فضا سے زمین پر مار کرنے والے میزائل داغے، تاہم پاکستانی ایئر ڈیفنس سسٹم نے زیادہ تر میزائلوں کو فضا میں ہی تباہ کر دیا اور پاک فضائیہ کے تمام اثاثے محفوظ رہے۔

ڈی جی آئی ایس پی آر کے مطابق جوابی کارروائی میں پاکستان نے بھارت کے 12 ڈرونز کو مار گرایا جبکہ دشمن کے متعدد فوجی ہلاک ہوئے۔ مزید برآں، اطلاعات کے مطابق بھارت نے اپنے ہی ملک میں 6 بیلسٹک میزائل غلطی سے گرا دیے۔

پاکستان نے جارحیت کے خطرے کے پیش نظر ملک کی فضائی حدود کو ہر قسم کی پروازوں کے لیے بند کر دیا ہے۔ ایوی ایشن حکام کے مطابق، یہ بندش آج صبح 3:15 سے دوپہر 12 بجے تک جاری رہے گی۔

ادھر، راولپنڈی، لاہور اور دیگر شہروں میں شہری سڑکوں پر نکل آئے اور پاک فوج کے حق میں نعرے لگاتے ہوئے بھارتی حملے کی شدید مذمت کی۔ نور خان ایئر بیس کے باہر شہریوں کی بڑی تعداد جمع ہوئی، جبکہ سیکیورٹی کے سخت انتظامات کیے گئے ہیں۔

ترجمان پاک فوج نے دوٹوک پیغام دیتے ہوئے کہا ہے کہ "ہم تمہاری طاقت، مکاری اور جارحیت سے مرعوب ہونے والی قوم نہیں، اب تم صرف ہمارے جواب کا انتظار کرو۔”

عالمی سطح پر بھی صورتحال پر شدید تشویش کا اظہار کیا جا رہا ہے، امریکی اور برطانوی رہنماؤں نے دونوں ممالک سے کشیدگی کم کرنے کی اپیل کی ہے، تاہم خطے میں تناؤ بدستور برقرار ہے۔

وفاقی دارالحکومت اسلام آباد،راولپنڈی میں تین دھماکوں کی‌آواز سنائی دی گئی ہے جس کے بعد شہری گھروں سے باہر نکل آئے

دھماکہ نور خان ایئربیس کے قریب ہوا ہے، پولیس اور ریسکیو کی ٹیمیں دھماکہ کی جگہ روانہ ہو گئی ہیں،دھماکے کی ویڈیو سامنے آ‌رہی ہیں جس میں آگ کے شعلے بلند ہوتے دکھائی دے رہے ہیں،

سیکورٹی‌ذرائع کا کہنا ہے کہ بھارت کی جانب سے نور خان ایئربیس چکلالہ کے قریب حملے کی کوشش کو ناکام بنا دیا گیا، میزائل کو فضا میں انٹرسیپٹ کرلیا گیا جس کے گرنے سے دو دھماکے ریکارڈ ہوئے،

پاک بحریہ کی بھارتی ائرکرافٹ کیریئر کی نقل و حرکت پر مسلسل نظر، کسی بھی مہم جوئی کا مقابلہ کرنے کے لیے تیارہے

ذرائع کے مطابق، پاک بحریہ بھارتی ائرکرافٹ کیریئر کی نقل و حرکت کی مسلسل نگرانی کر رہی ہے اور کسی بھی ممکنہ مہم جوئی کی صورت میں بھرپور جواب دینے کے لیے تیار ہے۔پاک بحریہ کے ترجمان نے نجی ٹی وی سے خصوصی بات کرتے ہوئے کہا کہ موجودہ حالات میں بھارتی ائرکرافٹ کیریئر سے کسی بڑی کارروائی کا امکان نہیں ہے۔ ان کے مطابق، بھارتی نیوی کا موجودہ بیڑا پاک بحریہ کے لیے کوئی بڑا خطرہ نہیں بن سکتا اور اگر بھارتی نیوی نے کوئی اشتعال انگیز کارروائی کی تو یہ پاک بحریہ کے لیے ایک آسان ہدف ثابت ہوگا۔ ترجمان نے مزید کہا کہ پاک بحریہ کسی بھی صورت میں دشمن کی کسی بھی مہم جوئی کا مقابلہ کرنے کے لیے تیار ہے۔

ترجمان نے اس بات کو بھی واضح کیا کہ بھارت نے اپنی فوجی تیاریوں میں تیزی لاتے ہوئے سپر سانک کروز میزائل سے لیس اپنے جنگی جہاز پاکستان کی طرف روانہ کیے ہیں تاکہ ممکنہ طور پر کراچی کی بندرگاہ کو نشانہ بنایا جا سکے۔ برطانوی میڈیا نے دعویٰ کیا تھا کہ بھارتی نیوی نے طیارہ بردار جہاز، ڈیسٹرائیرز، فریگیٹس اور اینٹی آبدوز جہاز پاکستانی ساحل سے تقریباً تین سو سے چار سو میل کے فاصلے پر بھیجے ہیں، جن میں بعض جہاز روس کے بنائے گئے براہموس میزائل سے لیس ہیں جو پانچ سو میل تک ہدف کو نشانہ بنا سکتے ہیں۔تاہم، سیکیورٹی ذرائع کا کہنا ہے کہ بھارتی بحریہ کا بیڑہ ابھی اتنی قریب نہیں آیا کہ وہ پاکستان کے شہر یا اس کی شپنگ لائنز کو خطرہ بن سکے۔ برطانوی اخبار "ٹیلی گراف” نے بھی اس بات کی تصدیق کی ہے کہ بھارتی نیوی کا جہاز ابھی اس حد تک پیش قدمی نہیں کر سکا کہ وہ پاکستان کو نشانہ بنا سکے۔ پاکستان کے تمام شہر اور شپنگ لائنز محفوظ ہیں، اور ماضی میں بھی بھارتی بحریہ کے جہازوں کو پیش قدمی کے دوران واپس جانا پڑا تھا۔

پاک بحریہ کے ترجمان نے کہا کہ جس طرح پاک فضائیہ نے دشمن کو اپنے حملوں سے جواب دیا اور بھارتی میڈیا کو اپنے طیاروں کے ملبے کو چھپانے پر مجبور کیا، اسی طرح پاک بحریہ بھی اپنی مکمل صلاحیت کے ساتھ دشمن کی کسی بھی جارحیت کا بھرپور جواب دینے کے لیے تیار ہے۔پاکستان نیوی کی قیادت نے اس عزم کا اظہار کیا ہے کہ وہ دشمن کے کسی بھی مس ایڈونچر کا مقابلہ کرنے کے لیے ہر ممکن قدم اٹھائیں گے اور اپنی سرحدوں کی حفاظت کے لیے مکمل طور پر تیار ہیں۔پاکستان کی سرحدوں کی حفاظت اور دشمن کے کسی بھی اقدام کے مقابلے میں پاک بحریہ کا عزم اور تیاریاں ہمیشہ کی طرح مضبوط ہیں۔

دہشتگرد بھارت کی سائبر دہشتگردی پر پاکستانی ہیکرز کا جوابی وار: آپریشن سالار کا آغاز، چار بڑی بھارتی ویب سائٹس ہیک

دہشتگرد بھارت کی جاری سائبر دہشتگردی کے خلاف پاکستانی ہیکرز نے بھرپور سائبر جوابی کارروائی کا آغاز کر دیا۔ پاکستانی ہیکرز کے والنٹیئر گروپ نے "آپریشن سالار” کے نام سے ایک منظم سائبر مہم کا اعلان کیا ہے، جس کے تحت بھارتی آن لائن انفراسٹرکچر کو نشانہ بنایا جا رہا ہے۔ذرائع کے مطابق، ابتدائی کارروائی میں دہشتگرد بھارت کی چار اہم ویب سائٹس کو ہیک کر کے ان کا ڈیٹا حاصل کیا گیا ،ان ویب سائٹس پر پاکستانی قومی پرچم بھی چسپاں کر دیا گیا۔

ہیکرز کی جانب سے جاری کردہ بیان میں کہا گیا ہے کہ یہ کارروائی بھارتی سائبر حملوں، پاکستان مخالف مواد اور کشمیری عوام پر جاری ظلم کے ردِ عمل میں کی گئی ہے۔”آپریشن سالار” کو ایک مکمل سائبر جنگ کا پیش خیمہ قرار دیا جا رہا ہے، پاکستانی ہیکرز کا کہنا ہے کہ ہم پرامن قوم ہیں، لیکن اگر کوئی ہماری سالمیت، خودمختاری یا قومی وقار کو چیلنج کرے گا تو ہم خاموش نہیں بیٹھیں گے۔ آپریشن سالار ایک وارننگ ہے، انجام نہیں۔

سوشل میڈیا پر "آپریشن سالار” ہیش ٹیگ ٹرینڈ کرنے لگا ہے۔ سوشل میڈیا صارفین پاکستانی ہیکرز کو خراجِ تحسین پیش کر رہے ہیں اور اس جوابی کارروائی کو بھارت کا "سائبر ناک آؤٹ” قرار دے رہے ہیں۔ مختلف صارفین نے مطالبہ کیا ہے کہ اس آپریشن کو مزید وسعت دی جائے اور بھارتی میڈیا، مالیاتی نظام اور دفاعی سائٹس کو بھی نشانہ بنایا جائے۔