Author: ممتاز حیدر

پاکستان اور بھارت کے درمیان لائن آف کنٹرول پر کشیدگی ایک بار پھر بڑھ گئی ہے، جہاں بھارتی فوج کی جانب سے سرحدی خلاف ورزیاں جاری ہیں۔ سیکیورٹی ذرائع کے مطابق، پاک فوج نے بھارتی جارحیت کا بھرپور جواب دیا ہے اور متعدد بھارتی فوجی پوسٹوں کو تباہ کر دیا ہے۔پاک فوج نے چری کوٹ کے بلمقابل جبڑی پوسٹ پر شدید جوابی حملہ کیا، جس کے نتیجے میں بھارتی فوج کی یہ پوسٹ مکمل طور پر تباہ ہو گئی۔ سیکیورٹی ذرائع نے بتایا کہ پورے علاقے میں آگ کی لپیٹ میں آنے کے بعد بھارتی فوج کے جوان اپنی پوسٹیں چھوڑ کر بھاگنے پر مجبور ہو گئے۔ فوٹیج میں واضح طور پر یہ مناظر دکھائی دے رہے ہیں جہاں پوسٹ سے دھواں اٹھتا نظر آ رہا ہے۔

مزید تفصیلات کے مطابق، پونچھ سیکٹر میں پاک فوج کی کارروائیوں کا دائرہ وسیع کرتے ہوئے 93 بریگیڈ کے ہیڈ کوارٹر کو بھی تباہ کر دیا گیا۔ اس کی ویڈیو بھی سیکیورٹی ذرائع کی جانب سے سامنے آئی ہے جس میں اس بریگیڈ کے ہیڈکوارٹر کی تباہی کے مناظر صاف طور پر دیکھے جا سکتے ہیں۔اس سے قبل، اڑی سیکٹر میں بھی 12 بریگیڈ کی بھارتی فوجی پوسٹ کو پاک فوج نے شدید حملے کا نشانہ بنایا تھا، جس کے نتیجے میں بھارتی فوج کو پسپائی اختیار کرنی پڑی۔ سیکیورٹی ذرائع کے مطابق، پاک فوج کی بھرپور جوابی کارروائیوں نے بھارتی فوج کو سخت نقصان پہنچایا ہے۔

پاکستان کی فوج نے لائن آف کنٹرول پر بھارتی جارحیت کا بھرپور جواب دیتے ہوئے یہ ثابت کر دیا ہے کہ پاکستان کی مسلح افواج اپنے دفاع میں کسی بھی قسم کی کوتاہی نہیں برتیں گی۔ سیکیورٹی ذرائع کا کہنا ہے کہ پاک فوج نے بھارتی فوج کے حملوں کا منہ توڑ جواب دیا ہے اور ان کی پوسٹوں کو تباہ کر دیا ہے۔

پاکستانی فوج کی جانب سے بھارت کی جارحیت کا مؤثر اور بھرپور جواب دینے کی ویڈیو فوٹیج منظر عام پر آ چکی ہے، جس میں سانگھڑ پوسٹ پر ہونے والی کارروائی کے پہلے اور اس کے بعد کے مناظر واضح طور پر دیکھے جا سکتے ہیں۔ اس فوٹیج میں یہ دکھایا گیا ہے کہ کس طرح پاکستانی فوج نے بھارتی فوج کی پیش قدمی کو روکنے کے لئے طاقتور جوابی کارروائی کی، جس کے نتیجے میں بھارتی فوج کو پیچھے ہٹنے پر مجبور ہونا پڑا۔

پاکستانی فوج کی جانب سے اس جوابی کارروائی نے دشمن کی پوسٹوں کو بھاری نقصان پہنچایا، جس کے بعد بھارتی فوجی اپنے گھٹنے ٹیکنے پر مجبور ہو گئے۔ یہ کارروائی لائن آف کنٹرول (LOC) پر بھارتی فوج کے خلاف ایک اور کامیاب کارنامہ ہے، جس میں دشمن کے دفاعی خطوط کو شدید نقصان پہنچایا گیا۔

اس سے قبل، پاکستانی فوج نے لیپہ، چورا کمپلیکس پوسٹ اور چکوٹھی سیکٹر میں بھی بھارتی فوج کی جارحیت کا مؤثر جواب دیا تھا، اور ان علاقوں میں بھارتی فوج کو شکست کا سامنا کرنا پڑا تھا۔ بھارتی فوج نے اس دوران سفید جھنڈا لہرا کر اپنی شکست کو تسلیم کیا تھا، جو کہ پاکستان کے ساتھ جنگ بندی یا امن کی کوششوں کی علامت سمجھا جاتا ہے۔پاک فوج کی اس جوابی کارروائی نے ثابت کر دیا کہ جب بھی بھارت نے کسی بھی طرح کی جارحیت کی، پاکستان اپنے دفاع میں ہمیشہ پوری قوت سے جواب دینے کے لیے تیار ہے۔ اس کارروائی کے نتیجے میں بھارتی فوج نہ صرف میدان جنگ میں ہار گئی بلکہ رات کی تاریکی میں شروع کی جانے والی جارحیت کے باوجود وہ صبح کے اجالے میں اپنے قدم واپس پیچھے ہٹانے پر مجبور ہو گئی۔

پاک فوج کی جانب سے اس سخت ردعمل نے نہ صرف بھارتی فوج کو سبق سکھایا بلکہ عالمی سطح پر بھی ایک مضبوط پیغام بھیجا کہ پاکستان اپنی سرحدوں کی حفاظت کے لیے کسی بھی حد تک جا سکتا ہے۔

6 اور 7 مئی کی درمیانی شب بھارت نے آزاد جموں و کشمیر کے مختلف علاقوں میں بلا اشتعال جارحیت کا مظاہرہ کیا، جس کے نتیجے میں ایک اور معصوم بچہ شہید ہو گیا۔ سکیورٹی ذرائع کے مطابق بھارتی فوج کی بلا اشتعال گولہ باری نے پاکستان کے دفاعی افسر لیفٹیننٹ کرنل ظہیر کے 7 سالہ بیٹے ارتضیٰ عباس کی جان لے لی۔

اس جارحیت کے نتیجے میں ایک معصوم زندگی کا ضیاع ہوا، جس سے پورے علاقے میں غم و غصے کی لہر دوڑ گئی ہے۔ سکیورٹی ذرائع کا کہنا ہے کہ یہ واقعہ بزدل دشمن کی جانب سے کیے گئے بلا اشتعال حملے کا نتیجہ تھا۔اس حملے میں نہ صرف پاکستان کی فوج بلکہ معصوم شہریوں کی جانوں کا بھی نقصان ہوا۔ اس پر پوری پاکستانی قوم دکھ اور کرب میں مبتلا ہے۔ سکیورٹی ذرائع نے مزید بتایا کہ پاکستانی عوام کے خون کا بدلہ افواج پاکستان بھرپور اور موثر جوابی کارروائی کے ذریعے لیں گی اور دشمن کو منہ توڑ جواب دیا جائے گا۔

بھارتی فوج کی جانب سے نہتے معصوم بچوں کو بلا اشتعال جارحیت اور بربریت کا نشانہ بنانا انسانی حقوق کی بدترین خلاف ورزی اور حیوانیت کی بدترین مثال ہے۔ سکیورٹی ذرائع کا کہنا تھا کہ بھارت کی اس جارحیت کو عالمی سطح پر اجاگر کیا جائے گا اور اس کا حساب لیا جائے گا۔

آزاد کشمیر کے حساس سرحدی علاقے نکیال میں بھارتی فوج کی جانب سے کی گئی بلا اشتعال گولہ باری کے نتیجے میں شہید ہونے والے معصوم بہن بھائی کی نمازِ جنازہ مرکزی جامع مسجد نکیال میں ادا کر دی گئی۔ نمازِ جنازہ میں عوام کی بڑی تعداد نے شرکت کی، جبکہ علاقے میں رقت آمیز مناظر دیکھنے میں آئے۔

نمازِ جنازہ کے بعد شہریوں نے شدید غم و غصے کا اظہار کرتے ہوئے بھارت کے خلاف ریلی نکالی، جو کالج گراؤنڈ سے شروع ہو کر پڑاوہ چوک تک گئی۔ ریلی کے شرکاء نے بھارت کے خلاف شدید نعرے بازی کی اور اقوامِ متحدہ سے فوری ایکشن لینے کا مطالبہ کیا۔

ادھر گزشتہ شب بھارتی فوج کی جانب سے لائن آف کنٹرول اور مختلف علاقوں پر میزائل حملوں کے ذریعے معصوم شہریوں کو نشانہ بنایا گیا، تاہم پاک فضائیہ نے بروقت اور موثر کارروائی کرتے ہوئے بھارت کے پانچ جنگی طیارے مار گرائے، جبکہ متعدد ڈرونز اور کواڈ کاپٹر بھی تباہ کر دیے گئے۔سیکیورٹی ذرائع کا کہنا ہے کہ لائن آف کنٹرول پر پاک فوج نے بھرپور جوابی کارروائی کی، جس میں بھارتی انفنٹری بریگیڈ کا ہیڈکوارٹر، ایک بٹالین ہیڈکوارٹر اور متعدد چوکیوں کو نشانہ بنا کر مکمل طور پر تباہ کر دیا گیا۔ کارروائی کے بعد بھارت کو بھاری جانی و مالی نقصان اٹھانا پڑا، جس کے بعد جورا سیکٹر میں بھارت نے سفید جھنڈا لہرا کر اپنی شکست تسلیم کر لی ہے۔

پاک فوج کے ترجمان میجر جنرل احمد شریف چوہدری نے بھارتی جارحیت کی شدید مذمت کرتے ہوئے کہا کہ بھارت کے بزدلانہ حملے میں اب تک 26 معصوم شہری شہید اور 46 زخمی ہو چکے ہیں۔ انہوں نے کہا کہ بھارت کی غلط فہمی کو جلد دور کر دیا جائے گا۔ان کا کہنا تھا کہ احمد پور شرقیہ میں مسجد "سبحان اللّٰہ” کو نشانہ بنایا گیا، جس کے نتیجے میں 13 نمازی شہید ہوئے۔ مریدکے میں ایک اور مسجد پر حملے میں 3 افراد شہید اور ایک زخمی ہوا، جبکہ مظفرآباد پر حملے میں بھی 3 معصوم شہریوں کی جانیں گئیں۔ڈی جی آئی ایس پی آر نے واضح کیا کہ پاکستان اپنے شہریوں کے تحفظ کے لیے ہر ممکن قدم اٹھائے گا اور دشمن کو ہر محاذ پر منہ توڑ جواب دیا جائے گا۔

بھارت کی جانب سے لائن آف کنٹرول پر پاکستانی فوج کی پوسٹوں کو نشانہ بنانے کا سلسلہ جاری ہے، جس میں تازہ ترین واقعہ سانگھڑ پوسٹ کے قریب پیش آیا۔ بھارتی فوج نے چری کوٹ سیکٹر میں بھی سفید جھنڈا لہرایا، جس سے یہ واضح ہوتا ہے کہ بھارتی فوج اپنی شکست تسلیم کر چکی ہے۔

پاکستان آرمی کے سیکیورٹی ذرائع کے مطابق، بھارتی فوج کی جانب سے حملے کے دوران سفید جھنڈا لہرائے جانے کا مطلب یہ ہے کہ وہ اپنی ناکامی کو تسلیم کرتے ہیں۔ اس سے قبل بھی بھارتی فوج نے لیپہ، چورا کمپلیکس پوسٹ اور چکوٹھی سیکٹر میں سفید جھنڈا لہرا کر اپنی شکست کا اعتراف کیا تھا۔سیکیورٹی ذرائع نے مزید بتایا کہ پاک فوج نے بھارتی فوج کی بزدلانہ کارروائیوں کا مؤثر جواب دیا ہے۔ پاکستان کی جانب سے جوابی کارروائیوں کے نتیجے میں بھارتی فوج میں بوکھلاہٹ اور خوف کی لہر دوڑ چکی ہے۔ پاکستانی فوج نے دشمن کے حملوں کو ناکام بنانے میں کامیابی حاصل کی ہے اور دشمن کی پوسٹوں کو بھاری نقصان پہنچایا ہے۔

سیکیورٹی ذرائع کا کہنا ہے کہ پاک فوج کی جانب سے مضبوط اور دلی جوابی کارروائیوں نے بھارت کے جنگی عزائم کو نہ صرف ناکام بنایا بلکہ دشمن کو شکست کے ساتھ ساتھ پاکستان کے عزم و حوصلے کو بھی واضح کر دیا ہے۔پاکستانی فوج کی بھرپور کارروائیاں اور بھارت کی شکست کا تسلیم کرنا اس بات کی علامت ہیں کہ پاکستان کا دفاع نہایت مضبوط اور مستحکم ہے۔

بھارت کی جانب سے پاکستان کی فضائی حدود کی خلاف ورزی کی کوشش کی گئی، جسے پاک فوج اور پاکستان رینجرز نے بروقت کارروائی کرتے ہوئے ناکام بنا دیا۔ سیکیورٹی ذرائع کے مطابق، بھارتی فوج نے شکرگڑھ سیکٹر میں ایک ڈرون بھیجا، جسے پاکستان رینجرز نے کامیابی سے مار گرایا۔

ذرائع کے مطابق، بھارتی ڈرون کے ذریعے پاکستان کی سرحد میں دراندازی کی کوشش صبح کے وقت کی گئی، تاہم پاک فوج کی ہائی الرٹ اور موثر کارروائی نے دشمن کی اس جارحیت کو ناکام بنا دیا۔ یہ ایک اور مثال ہے کہ پاک فوج دشمن کی ہر سازش اور جارحیت کا منہ توڑ جواب دینے کے لیے تیار ہے۔پاکستان کی فوج اور سیکیورٹی ادارے ہمیشہ کی طرح ملک کی سرحدوں کی حفاظت کے لیے اپنے فرض میں مخلص ہیں اور کسی بھی قسم کی دراندازی یا جارحیت کو کامیابی کے ساتھ ناکام بنا رہے ہیں۔

سیکیورٹی ذرائع کا کہنا ہے کہ پاکستان کی فورسز دشمن کی ہر قسم کی جارحیت کا جواب دینے میں مصروف ہیں اور ملکی سرحدوں کی حفاظت کے لیے کسی بھی قربانی سے دریغ نہیں کریں گے۔ ان کارروائیوں سے یہ بھی ثابت ہوتا ہے کہ پاک فوج ہر لمحہ دشمن کے منصوبوں کا مقابلہ کرنے کے لیے تیار ہے۔

بھارتی بزدلانہ کاروائی کے بعد آج بھارت کے ناظم الامور کو دفتر خارجہ طلب کیا گیا اور انہیں پاکستان اور آزاد جموں و کشمیر میں بھارت کی جانب سے کی جانے والی بلا اشتعال کارروائیوں پر شدید احتجاج ریکارڈ کرایا گیا۔

دفتر خارجہ نے بھارتی ناظم الامور کو آگاہ کیا کہ بھارت کی جانب سے کی جانے والی ان کارروائیوں کے نتیجے میں خواتین اور بچوں سمیت کئی بے گناہ شہری شہید اور متعدد زخمی ہوئے ہیں۔پاکستان کی حکومت نے بھارتی جارحیت کو انتہائی سنگین اور اشتعال انگیز قرار دیتے ہوئے کہا کہ بھارت کی یہ کارروائیاں نہ صرف پاکستان کی خودمختاری کی خلاف ورزی ہیں بلکہ یہ اقوام متحدہ کے چارٹر، بین الاقوامی قوانین اور عالمی تعلقات کے مسلمہ اصولوں کے بھی سراسر مخالف ہیں۔ دفتر خارجہ نے بھارت کی جانب سے خطے میں امن و استحکام کو نقصان پہنچانے کے اس غیر ذمہ دارانہ رویے کو سختی سے مسترد کیا۔

دفتر خارجہ نے بھارتی ناظم الامور کو سخت خبردار کیا کہ اگر بھارت نے اس قسم کی کارروائیاں جاری رکھی تو اس کے سنگین نتائج نکل سکتے ہیں۔بھارتی ناظم الامور سے کہا گیا کہ وہ پاکستان کے شدید احتجاج کو اپنے حکومت تک پہنچائیں اور بھارت کو اس کے غیر قانونی اور غیر ذمہ دارانہ اقدامات کے بارے میں آگاہ کریں۔ اس کے ساتھ ہی پاکستان نے اپنے شہریوں کے تحفظ کی ضمانت دینے کی ذمہ داری بھارت پر عائد کی۔