Author: ممتاز حیدر

وزیراعظم شہباز شریف اور اقوام متحدہ کے سیکرٹری جنرل کے درمیان ٹیلیفونک رابطہ ہوا ہے، اس موقع پر دونوں رہنماؤں نے جنوبی ایشیاء کی سیکیورٹی صورتحال پر تبادلہ خیال کیا۔

اسلام آباد سے سرکاری اعلامیہ کے مطابق وزیراعظم شہباز شریف نے عالمی ادارے کے سیکرٹری جنرل کی جنوبی ایشیاء کی حالیہ پیشرفت میں روابط کی کوششوں کو سراہا اور کشیدگی میں کمی اور تصادم سے بچنے کی ضرورت کا خیرمقدم کیا، وزیراعظم نے پہلگام واقعے پر غیر جانبدار اور معتبر تحقیقات کی پیشکش کا اعادہ کیا اور کہا بھارت اشتعال انگیز بیان بازی اور جنگ کو ہوا دینے کا سلسلہ جاری رکھے ہوئے ہے، وزیراعظم نے پاکستان کی خود مختاری اور علاقائی سالمیت کے دفاع کے عزم کا اعادہ کیا،وزیراعظم نے عالمی مالیاتی اداروں کو سیاسی رنگ دینے کی بھارتی کوششوں پر تشویش کا اظہار کیا،اقوام متحدہ کے سیکرٹری جنرل نے وزیر اعظم کو خطے میں امن کے لیے کوششوں کے بارے میں آگاہ کیا، یو این سیکریٹری جنرل نے معاملے پر تمام فریقین کے ساتھ رابطے میں رہنے کے عزم کا اظہار بھی کیا۔

قبل ازیں اقوام متحدہ کے سیکرٹری جنرل انتونیو گوتریس نے پاکستان اور بھارت کے درمیان ثالثی کی پیشکش کردی ، انتونیو گوتریس نے کہا ہے کہ پاکستان اور بھارت کے درمیان کشیدگی تاریخ کی بلند ترین سطح پر ہے، پاکستان اور بھارت کے عوام کی امن مشنز میں کارکردگی پر شکرگزار ہوں،نیو یارک میں اقوام متحدہ ہیڈکوارٹر میں میڈیا بریفنگ کے دوران عالمی ادارے کے سربراہ نے کہا کہ دونوں ملکوں میں جنگ کی سی صورتِ حال میرے لیے باعثِ تکلیف ہے، پہلگام حملے کی مذمت اور متاثرہ خاندانوں سے تعزیت کرتا ہوں،شہریوں کو نشانہ بنانا قابلِ قبول نہیں، حملہ آوروں کو کیفرِ کردار تک پہنچانا چاہیے، اِن حالات میں ایسی محاذ آرائی سے بچنا چاہیے جس سے جنگ کا خطرہ بنے، ایسی فوجی محاذ آرائی سے بچنا چاہیے جس کے قابو سے باہر ہو جانے کا خطرہ ہو، یہ اپنے آپ کو روکنے اور جنگ کے دہانے سے واپس لوٹنے کا وقت ہے، دونوں ملکوں کو پیغام دیا ہے کہ کسی بھی مسئلے کا فوجی حل کوئی حل نہیں ہوتا۔ دونوں ملکوں میں قیام امن کے لیے اپنی خدمات پیش کرتا ہوں، اقوامِ متحدہ ایسی کاوش کی حمایت اور مدد کے لیے تیار ہے جس سے کشیدگی ختم ہو۔

اسلامی جمہوریہ ایران کے وزیر خارجہ سید عباس عراقچی نے آرمی چیف جنرل سید عاصم منیر سے جی ایچ کیو میں ملاقات کی ہے

اس ملاقات میں جغرافیائی،حکمت عملی کے ماحول پر تفصیلی اور تعمیری بات چیت ہوئی، جس میں دونوں ممالک کو درپیش سیکیورٹی کے چیلنجز پر خاص طور پر توجہ دی گئی۔ ملاقات کے دوران پاک-ایران سرحدی سیکیورٹی میکانزم کا بھی جائزہ لیا گیا، تاکہ دو طرفہ ہم آہنگی کو مزید بڑھایا جا سکے۔آرمی چیف جنرل سید عاصم منیر کا کہنا تھا کہ پاکستان اور ایران بھائی چارے کے رشتہ میں بندھے ہوئے ہمسایہ ممالک ہیں، جن کے درمیان تاریخ، ثقافت اور مذہب کے گہرے تعلقات ہیں۔

دونوں فریقوں نے اس بات پر اتفاق کیا کہ وہ دو طرفہ تعاون کو مزید بڑھانے کے لیے مصروف رہیں گے اور مشترکہ طور پر خطے سے متعلق مسائل میں مثبت ترقی لانے میں مدد فراہم کریں گے۔ایرانی وزیر خارجہ نے پاکستان کے خطے میں امن اور استحکام کے لیے کی جانے والی کوششوں کو سراہا اور اس کی تعریف کی۔

پاک بحریہ نے گزشتہ شب بھارتی بحریہ کے ایک جاسوس طیارے P8I کا بروقت سراغ لگایا اور اسے مسلسل نگرانی میں رکھا۔

سیکیورٹی ذرائع کے مطابق، یہ واقعہ اس وقت پیش آیا جب بھارتی طیارہ پاکستان کی سمندری حدود کے قریب پرواز کر رہا تھا۔ پاک بحریہ کے ایئر ڈیفنس اور ریڈار سسٹمز نے بروقت ردعمل دیتے ہوئے طیارے کی سرگرمیوں پر کڑی نظر رکھی۔بھارتی بحریہ کے زیر استعمال امریکی ساختہ P8I میری ٹائم پیٹرول ائیرکرافٹ کو عام طور پر نگرانی، انٹیلیجنس اکٹھا کرنے اور جاسوسی کے لیے استعمال کیا جاتا ہے۔ ماہرین کے مطابق، اس قسم کی سرگرمیاں نہ صرف بین الاقوامی قوانین کی خلاف ورزی ہیں بلکہ خطے کے امن کو بھی خطرے میں ڈالتی ہیں۔

اس پیش رفت کے پس منظر میں خطے میں حالیہ کشیدگی کو نظر انداز نہیں کیا جا سکتا۔ گزشتہ روز ڈی جی آئی ایس پی آر لیفٹیننٹ جنرل احمد شریف چوہدری نے سیاسی قیادت کو بریفنگ دیتے ہوئے کہا کہ پاکستان ایک پُرامن ملک ہے اور خطے میں امن کا خواہاں ہے، تاہم اگر کسی قسم کی جارحیت مسلط کی گئی تو پاکستان ہر سطح پر موثر اور منہ توڑ جواب دینے کے لیے مکمل طور پر تیار ہے۔

یاد رہے کہ 22 اپریل کو مقبوضہ کشمیر کے علاقے پہلگام میں پیش آنے والے ایک حملے میں 26 سیاح ہلاک ہو گئے تھے۔ بھارت نے اس واقعے کا الزام بغیر کسی تحقیق کے پاکستان پر عائد کیا، اور ردعمل میں سندھ طاس معاہدہ معطل کرنے کے ساتھ ساتھ پاکستانی شہریوں کو ملک چھوڑنے کے احکامات جاری کیے۔ پاکستان نے اس الزام کو مسترد کرتے ہوئے واقعے کی بین الاقوامی تحقیقات کروانے کی پیشکش کی، جس پر بھارت کی جانب سے اب تک کوئی جواب موصول نہیں ہوا۔بین الاقوامی سطح پر پاکستان کے موقف کو پذیرائی حاصل ہو رہی ہے۔ چین کے بعد ترکیہ اور سوئٹزر لینڈ سمیت متعدد ممالک نے پاکستان کے مؤقف کی حمایت کرتے ہوئے بھارتی بیانات کو غیر ذمہ دارانہ قرار دیا ہے۔

تجزیہ نگاروں کے مطابق، پاک بحریہ کی بروقت کارروائی ایک واضح پیغام ہے کہ پاکستان نہ صرف اپنی فضائی اور بحری حدود کی حفاظت کے لیے مکمل طور پر تیار ہے بلکہ کسی بھی قسم کی مہم جوئی کا بھرپور جواب دے سکتا ہے۔