Author: ممتاز حیدر

پاکستان مرکزی مسلم لیگ کے قائدین نے کہا ہے کہ سوشل میڈیا پر گستاخیاں روکنے کیلئے مسلم دنیا اپنی ذمہ داریاں ادا کرے۔ بین الاقوامی سطح پر قانون سازی کیلئے پاکستان سمیت تمام مسلمان ملکوں کو اپنا کردار ادا کرنا چاہیے. پاکستان سمیت تمام اسلامی ممالک کو ایسے قوانین بنانے چاہیے جن کے تحت گستاخانہ مواد پھیلانے والے عناصر کے خلاف سخت قانونی کارروائی ممکن ہو سکے۔شان رسالت ﷺ میں گستاخی کرنا دنیا کی سب سے بڑی دہشت گردی ہے۔

اسلامو فوبیا کے عالمی دن کے موقع پر پاکستان مرکزی مسلم لیگ کے زیر اہتمام یوم تحفظ ناموس رسالت منایا گیا، اس ضمن میں سحر و افطار کے موقع پر لاہور،کراچی،پشاور،کوئٹہ سمیت تمام چھوٹے بڑے شہروں میں یوم تحفظ ناموس رسالت کے عنوان سے کانفرنسز و سیمینارز کا انعقاد کیا گیا جن میں بڑی تعداد میں شہریوں نے شرکت کی. کانفرنسز و سیمینارز سے مرکزی مسلم لیگ کے سیکرٹری جنرل سیف اللہ قصوری، نائب صدر حافظ عبدالرؤف،ڈپٹی سیکرٹری جنرل حافظ خالد نیک، جوائنٹ سیکرٹری قاری محمد یعقوب شیخ،صدر پنجاب چوہدری محمد سرور ،مرکزی ترجمان تابش قیوم و دیگر نے خطاب کیا.مقررین نے اسلامو فوبیا کے خلاف مؤثر حکمت عملی اپنانے کی ضرورت پر زور دیا اور گستاخانہ حرکات کی روک تھام کے لیے عالم اسلام کو متحد ہونے کی تلقین کی۔

مرکزی مسلم لیگ کے سیکرٹری جنرل سیف اللہ قصوری نے اپنے خطاب میں کہا کہ اسلامو فوبیا کے خلاف عالمی سطح پر مؤثر قانون سازی ہونی چاہیے تاکہ مسلمانوں کی مقدس ہستیوں کی توہین کو جرم قرار دیا جا سکے،مسلمان اپنی دینی غیرت کا عملی مظاہرہ کریں اور اتحاد و یگانگت کے ذریعے اپنی آواز بلند کریں۔نبی اکرمﷺ کی حرمت کادفاع پورے اسلام کا دفاع کرنا ہے۔ حرمت رسول ﷺ کے تحفظ کیلیے ہر مسلمان کو بڑھ چڑھ کر کردار اداکرنا چاہیے۔

حافظ عبدالرؤف،حافظ خالد نیک،قاری محمد یعقوب شیخ،چوہدری محمد سرور،تابش قیوم و دیگر کا کہنا تھا کہ سوشل میڈیا پر توہین اسلام پر مبنی،نفرت انگیز مواد کو روکنے کے لیے مؤثر اقدامات کیے جائیں۔یوم تحفظ ناموس رسالت کا مقصد مسلمانوں میں شعور بیدار کرنا اور دنیا کو یہ باور کروانا ہے کہ ناموس رسالت پر کوئی سمجھوتہ نہیں کیا جا سکتا۔ شان رسالت ﷺ میں گستاخی کفر سے بڑا جرم ہے جسے آسمان سے بھی معاف نہیں کیا گیا۔دنیا کو سمجھنا چاہیے کہ مسلمانوں کے لیے ناموس رسالت ریڈ لائن ہے۔

وفاقی وزیر ریلوے، مسلم لیگ (ن) کے رہنما حنیف عباسی نے جعفر ایکسپریس سانحے اور حالیہ دہشت گردی کے واقعات پر گہرے دکھ کا اظہار کرتے ہوئے کہا ہے کہ "پولیس کانسٹیبل اور مکینیکل ریلوے ملازم کی شہادت کی کوئی قیمت نہیں ہو سکتی، ان کی قربانیوں کو ہمیشہ یاد رکھا جائے گا۔” انہوں نے کہا کہ شہیدوں کے لواحقین کے ساتھ مکمل تعاون کیا جائے گا، اور ان کے بچوں کو ریلوے میں ملازمت دی جائے گی۔

حنیف عباسی نے مزید کہا کہ "سانحہ کوئٹہ میں شہید ہونے والے افراد کے لواحقین کو باون لاکھ روپے دیے جائیں گے، اور ان کے بچوں کو ریلوے میں بھرتی کروایا جائے گا تاکہ ان کا مستقبل محفوظ ہو سکے۔” انہوں نے یہ بھی کہا کہ "ریلوے پولیس کے کانسٹیبل کا سکیل پنجاب پولیس کے برابر کر دیا گیا ہے، اور اب ریلوے پولیس کا سکیل سات اے ایس آئی گیارہ میں ہوگا۔”

حنیف عباسی نے دہشت گردی کے بڑھتے ہوئے واقعات پر تشویش کا اظہار کرتے ہوئے کہا کہ "جعفر ایکسپریس کا سانحہ ایک سنگین واقعہ تھا، جس میں خواتین، بچے اور عید کی تعطیلات منانے والے افراد سفر کر رہے تھے۔ یہ پاکستان کی تاریخ کا تیسرا بڑا دہشت گردی کا واقعہ تھا، اور ہمیں اس پر ایک مضبوط موقف اپنانا ہوگا۔”انہوں نے کہا کہ "پاکستان ایٹمی ملک ہے اور اس کی قوت عالمی سطح پر تسلیم کی جاتی ہے۔ ہماری دشمن قوتیں ہمیں کمزور کرنے کی کوشش کر رہی ہیں، خاص طور پر سی پیک کی کامیابی سے ان کی پریشانی میں اضافہ ہو رہا ہے۔ ہمیں اس کی تکمیل کے لیے کسی بھی رکاوٹ کو برداشت نہیں کرنا ہوگا۔”

حنیف عباسی نے افغانستان میں بھارتی اثرات پر بھی بات کرتے ہوئے کہا کہ "بھارتی قونصل خانہ کھولنے کا مقصد علاقے میں مزید عدم استحکام پیدا کرنا ہے۔ اگر علاقے کا شیر ہے تو اسے براہ راست لڑنا چاہیے، لیکن جب وہ لڑ نہیں سکتا تو ایسی بزدلانہ کارروائیاں کی جاتی ہیں۔”انہوں نے کہا کہ "پاکستان میں دہشت گردی کے واقعات میں ہمارے اپنے لوگ سہولت کار بنے ہوئے ہیں، اور ہمیں ان کا مکمل تعاقب کرنا ہوگا۔”حنیف عباسی نے پاکستان کی معیشت اور دفاع پر بھی بات کی۔ انہوں نے کہا کہ "معیشت مضبوط نہ ہو تو روٹی نہیں ملتی، اور دفاع مضبوط نہ ہو تو عزت بھی نہیں بچتی۔ پاکستان کے دشمنوں نے عراق، شام اور لیبیا کی طرح پاکستان کو بھی کمزور کرنے کی سازش تیار کی ہے، لیکن ہمیں اس سازش کو ناکام بنانا ہوگا۔”

حنیف عباسی نے کہا کہ "ریلوے کے بہت سے مسائل ہیں، لیکن ہم اسے سرسبز اور ترقی یافتہ بنانا چاہتے ہیں۔ ہم ریلوے کی صفائی، شفافیت اور سیکیورٹی کو یقینی بنائیں گے۔ ریلوے پولیس کی نفری اور انفراسٹرکچر کی حالت پر کام کریں گے اور اسٹیشنز کی اپ گریڈیشن کریں گے۔”انہوں نے کہا کہ "وزیر اعظم، چیف آف آرمی سٹاف اور وزیر اعلیٰ بلوچستان کے تعاون سے ہم بلوچستان کے مسائل پر قابو پانے کے لیے ایک مشترکہ حکمت عملی اپنائیں گے۔”حنیف عباسی نے آخر میں کہا کہ "اب وقت آ گیا ہے کہ سیاسی اختلافات کو ایک طرف رکھ کر پاکستان کی سلامتی اور ترقی کے لیے ایک پلیٹ فارم پر اکٹھا ہو جائیں۔ ہمیں اپنے سیاسی مفادات سے بالاتر ہو کر ملک کی بہتری کے لیے کام کرنا ہوگا۔”انہوں نے کہا کہ "ہمیں اپنے دشمنوں کے سامنے ایک مضبوط اور یکجہتی والا پاکستان بننا ہوگا تاکہ ہم ان کی سازشوں کو ناکام بنا سکیں۔”