Blog

حکومت نے پیٹرول اور ڈیزل میں کمی کے بعد جیٹ فیول بھی سستا کردیا۔

ذرائع کے مطابق جیٹ فیول کی قیمت میں 56 روپے 97 پیسے کی بڑی کمی کردی گئی اور جیٹ فیول کی نئی قیمت کم ہوکر 238 روپے 87 پیسے فی لیٹر ہوگئی جیٹ فیول کی قیمتوں میں کمی کےبعد فضائی کرایوں میں کمی کا امکان ہے۔

خیال رہے کہ گزشتہ روز حکومت نے پیٹرول 74 روپے 28 پیسے اور ڈیزل 67 روپے 31 پیسے فی لیٹر کی کمی کی تھی،جس کے بعد صدر ایف پی سی سی آئی عاطف اکرام شیخ، مرکزی تنظیم تاجران پاکستان کے صدر کاشف چوہدری، آل پاکستان انجمن تاجراں و ٹریڈ ایکشن کمیٹی اسلام آباد کے صدر اجمل بلوچ سمیت دیگر تاجر رہنماؤں نے کہا کہ وزیراعظم کی جانب سے پیٹرول کی قیمت میں 74روپے فی لیٹر اور ہائی اسپیڈ ڈیزل کی قیمت میں 67روپے فی لیٹر کمی کے اعلان کا بھرپور خیرمقدم کرتے ہیں۔انہوں نے کہا کہ عالمی منڈی میں پیٹرولیم مصنوعات کی قیمتوں میں کمی کا فائدہ پاکستانی عوام اور کاروباری طبقے تک منتقل کرنا حکومت کا دانش مندانہ فیصلہ ہے، ایندھن کی قیمتوں میں نمایاں کمی سے اشیائے ضروریہ کی ترسیل، مال برداری، پیداواری لاگت اور کاروباری اخراجات میں کمی آئے گی جس سے مہنگائی پر قابو پانے میں مدد ملے گی اور معاشی سرگرمیوں میں تیزی آئے گی۔

اسلام آباد: ترجمان دفتر خارجہ کے مطابق اسلام آباد مفاہمتی یادداشت کے تحت تکنیکی سطح کے اہم مذاکرات 21 جون کو سوئٹزرلینڈ کے شہر برگن اسٹاک میں منعقد ہوں گے۔

ترجمان دفتر خارجہ نے اپنے ایک بیان میں کہا ہے کہ مذاکرات میں امریکا اور ایران کے نمائندے شریک ہوں گے، جبکہ پاکستان اور قطر ثالث کے طور پر اپنا کردار ادا کریں گے پا کستان ثالث کے طور پر اپنے ذمہ دارانہ کردار کو جاری رکھتے ہوئے اسلام آباد مفاہمتی یادداشت کے تحت طے پانے والی پیشرفت کو آگے بڑھانے کے لیے سہولت کاری جاری رکھے گا یہ عمل خطے میں کشیدگی میں کمی اور فریقین کے درمیان سفارتی رابطوں کو مضبوط بنانے کی کوششوں کا حصہ ہے۔ جبکہ مذاکرات کا مقصد باہمی فہم و فراست کے ذریعے معاملات کو آگے بڑھانا ہے۔

دوسری جانب امریکی نائب صدر جے ڈی وینس نے کہا ہے کہ ایران کے ساتھ معاملات اچھے چل رہے ہیں اور اتوار کو ایران مذاکرات ممکن ہیں ایران سے مذاکرات کے لیے اسٹیو وٹکوف اور جیرڈکشنر سوئٹزرلینڈ میں موجود ہیں اور ایران کے ساتھ معاملات اچھے چل رہے ہیں میں بھی سوئٹزرلینڈ جا سکتا ہوں اور میرا اگلے چند دنوں میں سوئٹزرلینڈ کا دورہ متوقع ہے اتوار کو ایران مذاکرات ممکن ہیں پرامید ہیں کہ ہم جنگ بندی برقرار رکھ سکتے ہیں، ایران کے ساتھ مذاکرات کو ایک موقع دینے جا رہے ہیں، اور اس بات کا کوئی ثبوت نہیں کہ ایران آبنائے ہرمز کو بند کر رہا ہے۔

+صدر مملکت آصف علی زرداری نے بھارت میں تاریخی مسلم مذہبی مقامات کو مسمار کیے جانے اور انہیں لاحق خطرات پر گہری تشویش کا اظہار کیا ہے، جن میں وارانسی کی ایک ہزار سال قدیم مسجد گنج شہیداں بھی شامل ہے۔

ہفتہ کو سماجی رابطہ کی ویب سائیٹ ایکس پر اپنے پیغام میں صدر زرداری نے بھارت سے مطالبہ کیا کہ وہ فوری طور پر ایسے اقدامات بند کرے، انہوں نے خبردار کیا کہ مذہبی مقامات کو نشانہ بنانے کے ایسے اقدامات سماجی ہم آہنگی کو شدید نقصان پہنچا سکتے ہیں اور ملک میں طویل المدتی بے چینی اور عدم استحکام کا سبب بن سکتے ہیں صدر زرداری نے ان اقدامات کو فوراً روکنے، اقلیتوں کے حقوق کے تحفظ کو یقینی بنانے اور مشترکہ ثقافتی و تاریخی ورثے کی حفاظت کرنے پر زور دیا۔

واضح رہے کہ بھارتی میڈیا کے مطابق، ناردرن ریلوے کے وارانسی ڈویژن نے کاشی ریلوے اسٹیشن کے قریب واقع اس تاریخی مسجد کو ’20 جون‘ تک ہٹانے کا متنازع نوٹس جاری کر رکھا ہے،دوسری جانب مسجد انتظامیہ ’انجمن انتظامیہ مساجد وارانسی‘ نے ریلوے کے اس اقدام پر سخت ردِعمل ظاہر کرتے ہوئے نوٹس کو یکسر غیر قانونی قرار دے دیا ہے۔

انجمن کے عہدیداران نے وارانسی کے ضلعی مجسٹریٹ (ڈی ایم) سے ملاقات کر کے ایک احتجاجی یادداشت پیش کی ہے، جس میں ریلوے حکام کیجانب سے پیش کردہ دستاویزا ت اور دعوؤں کی شفاف تحقیقات کا مطالبہ کیا گیا ہے انتظامیہ نے ضلعی حکام سے درخواست کی ہے کہ جب تک معاملے کا مکمل جائزہ نہیں لے لیا جاتا، تب تک ریلوے کو کسی بھی قسم کی کارروائی سے روکا جائے۔

میڈیا رپورٹس کے مطابق انجمن انتظامیہ کے جوائنٹ سیکریٹری ایس ایم یاسین نے بتایا کہ 13 جون کو مسجد کے باہر چسپاں کیے گئے نوٹس پر نہ تو کوئی تاریخ درج ہے، نہ کسی کے دستخط ہیں اور نہ ہی کوئی سرکاری مہر موجود ہے، لہٰذا یہ نوٹس قانونی تقاضے پورے نہیں کرتا اور انجمن اسے مسترد کرتی ہے ضلعی انتظامیہ کو دی گئی یادداشت میں واضح کیا گیا ہے کہ مسجد گنج شہیداں وارانسی میونسپل کارپوریشن میں عمارت نمبر ‘A-36/4’ کے طور پر رجسٹرڈ ہے اور اس کا ریلوے کی زمین سے کوئی تعلق نہیں، اس سلسلے میں عدالت میں جمع کر ائے گئے ایک جوابی حلف نامے کا حوالہ بھی دیا گیا ہے قدیم نقشوں میں مسجد کا وجود واضح طور پر درج ہے، جبکہ کاشی ریلوے اسٹیشن تو اس کے بہت بعد میں قائم کیا گیا تھا،مسجد کی تاریخی حیثیت اور قدامت کو مدنظر رکھتے ہوئے کسی بھی انتظامی فیصلے سے قبل مکمل اور غیر جانبدارانہ تحقیقات کی جائیں۔

پاکستان اور ایشیائی ترقیاتی بینک (اے ڈی بی) کے درمیان 70 کروڑ ڈالر کے پالیسی بیسڈ قرض کے معاہدے پر دستخط ہو گئے۔

ترجمان اقتصادی امور کے مطابق اے ڈی بی انشورنس ٹرانسفارمیشن پروگرام کے تحت پاکستان کو 700 ملین ڈالر فراہم کرے گا جن میں سے 250 ملین ڈالر رعایتی شرائط پر دیئے جائیں گے ،معاہدے پر پاکستان کی جانب سے سیکرٹری اقتصادی امور محمد حمیر کریم جبکہ اے ڈی بی کی جانب سے ڈپٹی کنٹری ڈائریکٹر حسین حیدر نے دستخط کیے۔

اس موقع پر محمد حمیر کریم نے ایشیائی ترقیاتی بینک کو پاکستان کا قابل اعتماد ترقیاتی شراکت دار قرار دیتے ہوئے کہا کہ پروگرام کا مقصد مالیاتی شعبے کو مضبوط بنانا اور جامع اصلاحات متعارف کرانا ہے یہ پروگرام اڑان پاکستان اور سیکیورٹی اینڈ ایکسچینج کمیشن آف پاکستان (ایس ای سی پی) کے 5 سالہ روڈ میپ کی تکمیل میں معاون ثابت ہو گا پروگرام قومی مالیاتی شمولیت اور موسمیاتی تبدیلی سے متعلق حکومتی پالیسی اہداف سے بھی ہم آہنگ ہے۔

اے ڈی بی کے ڈپٹی کنٹری ڈائریکٹر حسین حیدر نے پروگرام کو انشورنس شعبے کے لیے ایک اہم اور انقلابی اقدام قرار دیتے ہوئے کہا کہ اس سے انشورنس کمپنیوں کے درمیان منصفانہ مسابقت کو فروغ ملے گا اور شعبے کی مجموعی کارکردگی میں بہتری آئے گی۔