Blog

امریکا نے ایران کے ساتھ ممکنہ معاہدے کی تفصیلات اسرائیل کو فراہم کرنے سے انکار کردیا ہے،جس پر اسرائیلی حکام نے حیرت کا اظہار کیا ہے۔

اسرائیلی میڈیا کے مطابق اسرائیلی حکام نے ایران اور امریکا کے درمیان جاری مذاکرات سے متعلق مفاہمتی یادداشت تک رسائی کی باضابطہ درخواست کی تھی، تاہم واشنگٹن نے اسے مسترد کردیا، امریکی حکام نے مؤقف اختیار کیا کہ یہ معاملہ قومی سلامتی سے متعلق حساس نوعیت کا ہے، اس لیے معاہدے کی مکمل تفصیلات اسرائیل کے ساتھ شیئر نہیں کی جاسکتیں،امریکی فیصلے نے تل ابیب کے حکام کو حیران کر دیا، کیونکہ امریکا اور اسرائیل کے درمیان ایران سے متعلق امور پر طویل عرصے سے قریبی مشاورت رہی ہے۔

واضح رہے کہ ایران اور امریکا کے درمیان ایک 14 نکاتی مفاہمتی مسودے کی تفصیلات سامنے آنے کا دعویٰ کیا گیا ہے، ایرانی ذرائع کے مطابق مجوزہ مسودے میں امریکی بحری ناکہ بندی 30 دن کے اندر ختم کرنے، جبکہ ایران کے تیل اور پیٹروکیمیکل شعبے پر عائد پابندیاں معطل کرنے کی تجاویز شامل ہیں ممکنہ معاہدے میں لبنان سمیت مختلف محاذوں پر فوری اور مستقل جنگ بندی کی شق بھی شامل ہے۔ مزید بتایا گیا ہے کہ مسودے کے تحت امریکا اور اس کے اتحادی ایران کی تعمیر نو کے لیے 300 ارب ڈالر تک کی معاونت فراہم کر سکتے ہیں۔

ذرائع کے مطابق مذاکرات کے دوران ایران کے منجمد اثاثوں میں سے 24 ارب ڈالر جاری کرنے کی تجویز بھی زیر غور ہے، جبکہ امریکا مذاکرات سے قبل 12 ارب ڈالر جاری کرنے پر آمادہ ہوسکتا ہےمجوزہ معاہدے میں ایران کےمیزائل پروگرام اور علاقائی اتحادی گروپوں کی حمایت کو حتمی مذاکرات کا حصہ بنانے کی بات بھی سامنے آئی ہے، جبکہ کسی بھی حتمی سمجھوتے کی توثیق اقوام متحدہ کی سلامتی کونسل کی قرارداد کے ذریعے کیے جانے کی تجویز شامل ہے۔

ایرانی مسلح افواج کے مرکزی کمانڈ خاتم الانبیاء سینٹرل ہیڈکوارٹر نے خبردار کیا ہے کہ اگر اسرائیل نے جنوبی لبنان میں اپنی عسکری کارروائیاں جاری رکھیں تو اسے سخت ردعمل کا سامنا کرنا پڑ سکتا ہے۔

ایرانی فوجی ترجمان کی جانب سے جاری بیان میں کہا گیا ہے کہ گزشتہ دو روز کے دوران اسرائیلی افواج نے مبینہ طور پر جنوبی لبنان میں جنگ بندی کی 84 بار خلاف ورزی کی ہے اور عام شہریوں کو شہید کیا گیا جو خطے میں کشیدگی میں اضافے کا باعث بن رہی ہے، امریکی صدر ڈونلڈ ٹرمپ کی جانب سے جنگ بندی یا کشیدگی میں کمی کے دعوؤں کے باوجود زمینی صورتحال میں کوئی بہتری نہیں آئی اور اسرائیلی کارروائیاں بدستور جاری ہیں۔

خاتم الانبیاء ہیڈکوارٹر نے واضح کیا کہ اگر صورتحال یہی رہی اور اسرائیلی فوج نے جنوبی لبنان میں اپنی کارروائیاں نہ روکی تو ایران کی مسلح افواج مناسب اور سخت جواب دینے کی صلاحیت رکھتی ہیں، خطے میں کسی بھی جارحیت کا مقابلہ کیا جائے گا اور یکطرفہ کارروائیوں کو برداشت نہیں کیا جائے گا۔

برطانوی پارلیمنٹ میں پاکستان کی سفارتی کامیابی کا اعتراف کیا گیا ہے جبکہ ہاؤس آف لارڈز کے ارکان نے امریکا اور ایران کے درمیان جنگ بندی کے قیام کی کوششوں میں پاکستان کو خراج تحسین پیش کیا ہے-۔

پارلیمنٹ کے ایوانِ بالا میں پاکستان کی سفارتی کاوشوں کو بھرپور خراجِ تحسین پیش کیا گیا، جہاں ارکان نے امریکا اور ایران کے درمیان جنگ بندی اور امن عمل کو آگے بڑھانے میں پاکستان کے کردار کو سراہا ارکانِ پارلیمنٹ نے کہا کہ پاکستان نے دونوں ممالک کے درمیان کشیدگی کم کرنے، مذاکرات کی راہ ہموار کرنے اور خطے میں امن و استحکام کے فروغ کے لیے اہم کردار ادا کیا ہے۔

لارڈ احمد آف ومبلڈن نے پاکستان کا کردار سراہتے ہوئے اردو میں "پاکستان کا بہت بہت شکریہ” ادا کیا برطانوی اراکینِ پارلیمنٹ نے پاکستان کی کوششوں کو سراہا لارڈ احمد نے پاکستان اور قطر کی قیادت کا خصوصی شکریہ ادا کرتے ہوئے کہا کہ دونوں ممالک کی مسلسل حمایت اور سفارتی کوششوں نے خطے میں امن و استحکام کے قیام میں اہم کردار ادا کیا،جبکہ وزیراعظم شہباز شریف کی سفارتکاری کو عالمی سطح پر تسلیم کیا گیا برطانوی حکومت کا کہناتھا کہ امریکا اور ایران کو موجودہ مقام تک پہنچانے میں پاکستان نے اہم کردار ادا کیا۔

لارڈ باربر آف چٹل ہیمپٹن نے برطانوی حکومت سے مطالبہ کیا کہ وہ وزیراعظم شہباز شریف کو ان کی امن کوششوں پر باضابطہ مبارکباد پیش کرےان کا کہنا تھا کہ خطے میں پائیدار امن اور استحکام کے لیے وزیراعظم شہباز شریف کی خدمات قابلِ ستائش ہیں اور انہیں اس کا مناسب اعتراف ملنا چاہیے۔

اس موقع پر بیرونس چیپمین نے پاکستان کے کردار کو سراہتے ہوئے کہا کہ پاکستان نے امریکا اور ایران کو اس مقام تک پہنچانے میں اہم کردار ادا کیا جہاں جنگ بندی اور امن معاہد ے کی جانب پیشرفت ممکن ہوئی،انہوں نے وزیراعظم شہباز شریف کی سفارتی کوششوں کو شاندار قرار دیتے ہوئے کہا کہ وہ تعریف اور تحسین کے مستحق ہیں پاکستان کی سفارتی سرگر میوں نے امریکا اور ایران کے درمیان مکالمے اور اعتماد سازی کے لیے سازگار ماحول پیدا کیا، جبکہ یہ امن معاہدہ مستقبل میں دونوں ممالک کو مزید قریب لانے میں مددگار ثابت ہوگا۔

برطانوی پارلیمنٹ میں ہونے والی اس بحث کے دوران مجموعی طور پر پاکستان کی سفارتی کامیابیوں، وزیراعظم شہباز شریف کی قیادت اور امریکا و ایران کے درمیان مذاکرات اور جنگ بندی کے لیے کی جانے والی کوششوں کو عالمی امن کے لیے ایک مثبت اور اہم پیش رفت قرار دیا گیا۔